ꓡꓳꓹ ꓬꓰˍ ꓟ ꓕꓲꓽ ꓫꓵꓽ ꓠꓽ ꓗꓪ ꓥˍ ꓟꓲ ꓦꓮꓔꓲꓚꓮꓠ ꓗꓪ ꓬꓰˍ ꓟ ꓠꓬꓲ ꓧꓪꓹ ꓕꓲꓽ ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓬꓲ ꓟꓸ ꓟꓲ ꓒꓶ, ꓟ ꓔꓯ ꓐꓯ ꓟꓸ ꓖꓶ ꓡꓳ, ꓬꓰꓳ= ꓘꓴ ꓜꓲꓼ ꓞꓳ ꓡꓰ ꓐꓯ ꓟꓸ ꓔ ꓟ ꓡꓲꓽ ꓒꓰꓼ ꓬꓲ ꓟꓸ ꓟꓲꓽ ꓮꓽ ꓙꓵꓽ ꓔꓯ ꓬꓲ ꓧꓶꓹ ꓚ ꓢꓲ ꓛꓳꓽ ꓠꓬꓲ ꓠꓬ ꓟꓵꓽ ꓘꓳꓼˍ ꓐꓰ ꓟꓲ ꓠꓯ ꓔꓯ ꓒꓳꓹ ꓡꓶꓸ ꓠ, ꓟ ꓐꓱ ꓶ ꓚꓲ. ꓛꓬ ꓞꓲꓼ ꓔꓯ ꓪꓴꓽ ꓡ ꓟꓴ ꓡ ꓠ ꓬꓰ ꓠ, ꓟ ꓐꓱ ꓶ꓾ ꓕꓱ ꓡꓱ ꓫꓵꓽ ꓔꓯ ꓐꓯˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=
ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓐꓯˍ ꓕꓯ ꓠꓬ ꓟꓲ ꓠꓯ ꓞꓳ ꓤ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓢꓯꓸ ꓔꓬˍ ꓟ꓾ ꓬꓰ ꓔꓬˍ ꓟ ꓫꓷ,꓾ ꓚꓲꓸ ꓛꓬꓽ ꓘꓳ ꓣꓴ ꓔꓬ ꓟ ꓛꓳ ꓚꓱꓹ꓾ ꓚꓲꓸ ꓛꓬꓽ ꓔꓳꓹ ꓜꓳꓽ ꓔꓬˍ ꓟ ꓚꓱꓹ꓾ ꓢꓯꓸ ꓔꓬˍ ꓟ ꓚꓱꓹ꓾ ꓫꓸ ꓪ꓾ ꓫꓷꓸ ꓡˍ ꓟ ꓛꓳ ꓚꓱꓹ꓾ ꓧꓶꓸ ꓕꓯ ꓕꓲꓽ ꓞꓲꓼ ꓗꓪ ꓚꓳ. ꓡꓰ ꓬꓰ ꓫꓷꓸ ꓡˍ ꓟ ꓚꓱꓹ꓾ ꓞꓳ ꓫꓵꓽ ꓕꓲꓽ ꓫꓵꓽ ꓠꓯꓸꓼ ꓗꓪ ꓬꓲ ꓒꓵꓽ ꓒꓵꓽˍ ꓟ ꓚꓱꓹ꓾ ꓐꓲ ꓜꓳꓽ ꓠꓴꓽ꓾ ꓮꓽ ꓗ. ꓗˍ ꓟ꓾ ꓜꓽ ꓪꓳꓽ ꓡꓳ ꓪꓳꓽ꓾ ꓶ ꓖꓪꓽ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓔꓯ ꓐꓯˍ ꓟ ꓥˍ ꓪ= ꓕꓲꓽ ꓣꓳˍ ꓐꓰ ꓕꓲꓽ ꓣꓳ ꓕꓲꓽ ꓪ ꓔꓬ ꓢꓲ ꓬꓰˍ ꓟ꓾ ꓕꓲꓽ ꓪ ꓔꓬ ꓢꓲ ꓞꓳ ꓙꓳ ꓢꓯꓸ ꓔꓬ ꓚꓱꓹ꓾ ꓠꓲꓽ ꓗꓴˍ ꓟ꓾ ꓪꓴ-ꓢ ꓔꓯ ꓫꓱꓸ ꓖꓶˍ ꓟ꓾ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓙꓵꓻ ꓠꓲꓹ ꓚꓱꓹ ꓮꓽ ꓙꓵꓽ ꓥˍ ꓟꓲ ꓡꓲꓽ ꓒꓰꓼ ꓠꓯꓸꓼ ꓗꓪ ꓐˍ ꓟ ꓥ ꓪ=
ꓞꓳ ꓤ ꓠꓬ ꓧꓪꓽ ꓖꓳ ꓓꓱꓽ ꓕꓲꓽ ꓛꓱꓽ ꓔꓯ ꓢꓲ ꓟꓳꓸ꓾ ꓠꓲꓹ ꓟ ꓓꓵꓽ ꓙˍ ꓟ ꓕꓲꓽ ꓛꓱꓽ ꓔꓯ ꓢꓲ ꓟꓳꓸ꓾ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓟꓳꓸ ꓣꓱꓽ ꓬꓯꓼˍ ꓟ ꓮꓽ ꓙꓵꓽ ꓜꓽ ꓪꓳꓽ ꓡꓳ ꓪꓳꓽ꓾ ꓶ ꓖꓪꓽ꓾ ꓔꓬˍ ꓔꓶꓸ꓾ ꓦꓵꓻ ꓔꓶꓸ꓾ ꓫꓵꓽ ꓤ ꓧꓪꓽ ꓤ ꓕꓯ ꓢꓲ ꓠꓵ ꓠꓲꓹ꓾ ꓠꓲꓹ ꓫꓵˍ ꓟ꓾ ꓕꓲꓽ ꓫꓵꓽ ꓫꓵꓽ ꓔꓯ ꓠꓲꓹ ꓫꓵˍ ꓟ꓾ ꓢꓷꓸ ꓠꓲꓹ꓾ ꓙꓽ ꓜꓲꓼ ꓠꓲꓹ꓾ ꓢꓳꓺ ꓣꓴˍ ꓟ꓾ ꓐꓲ ꓫꓴꓽˍ ꓟ ꓐꓰ ꓙꓵꓽ ꓪꓽ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓔꓯ ꓒꓬꓱꓼ ꓠꓲꓹ ꓫꓵˍ ꓟ ꓞꓳ ꓤ ꓥˍ ꓡꓳ=
ꓕꓱ ꓡꓰ ꓚꓲꓸ ꓛꓬ ꓢꓯꓸ ꓔꓬˍ ꓟ ꓤꓶ ꓗꓪ ꓣꓱꓽ ꓬꓯˍ ꓟ꓾ ꓥꓳ ꓡꓳꓸ ꓔ ꓟ ꓮꓽ ꓙꓵꓽ ꓔꓯ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓲ ꓟꓵꓽ ꓘꓳꓼ ꓐꓰ ꓟꓲ ꓠꓯ ꓔꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓟꓬꓽ ꓠꓬꓲ ꓙꓲꓻ ꓠ ꓒꓳꓹ ꓡꓶꓸ ꓔꓬˍ ꓟ ꓥ ꓪ= ꓟꓵꓽ ꓘꓳꓼ ꓐꓯˍ ꓟ ꓠꓬ ꓞꓳ ꓤ ꓟꓬꓱꓽ ꓬꓰ ꓐ ꓡ ꓠ, ꓟ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓕꓲꓽ ꓟ ꓥˍ ꓡꓳ= ꓟꓲ ꓠꓯ ꓞꓳ ꓤ ꓕꓲꓽ ꓛꓱꓽ ꓗꓪ ꓚꓳꓸ ꓚꓲꓸ ꓛꓬ ꓠꓲꓹ ꓫꓵˍ ꓟ ꓟꓬꓱꓽ ꓗꓪ ꓐꓰ ꓚꓲꓸ ꓛꓬ ꓐꓱ ꓶ ꓣꓱꓽ ꓬꓯˍ ꓟ ꓥ ꓕ ꓑꓳꓸ ꓔꓯ ꓐꓲ ꓜꓲꓼ ꓡꓰ ꓠ, ꓟ ꓧꓪˍ ꓕꓯ ꓖꓳ ꓟ ꓟꓵꓽ ꓘꓳꓼ ꓐꓰ ꓮ ꓡꓰ ꓢꓲ ꓕꓲꓽ ꓪ ꓬꓰ ꓠ, ꓟ ꓢꓯꓼ ꓕꓵꓼˍ ꓟ ꓥ ꓪ=
ꓟꓵꓽ ꓘꓳꓼ ꓔꓯ ꓢꓲ ꓗꓪ ꓣꓳꓽ ꓠꓬ ꓛꓳꓽ ꓢꓲ ꓚꓲꓸ ꓛꓬꓽ ꓣꓱꓽ ꓬꓯˍ ꓟ ꓔꓯ ꓧꓪ ꓢꓲ ꓟꓬꓱꓽ ꓬꓰˍ ꓕꓯ ꓚꓲꓸ ꓛꓬꓽ ꓥˍ ꓟꓲ ꓟꓵꓽ ꓘꓳꓼ ꓪꓴꓸ ꓠꓬꓲ ꓒꓳꓹ ꓡꓰꓼ ꓡˍ ꓟ ꓔꓯ ꓘꓳˍ ꓣꓴ ꓟꓶˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓣꓳꓽ ꓟꓳˍ ꓟ꓾ ꓣꓳꓽ ꓔꓳꓹ ꓜꓳꓽˍ ꓟ꓾ ꓣꓳꓽ ꓓꓵꓽ ꓙˍ ꓟ ꓣꓳꓽ ꓟꓬꓱꓽ ꓬꓰˍ ꓟ꓾ ꓣꓳꓽ ꓫꓱꓹ ꓥ ꓕ ꓑꓳꓸ ꓮꓽ ꓙꓵꓽ ꓠꓬ ꓟꓵꓽ ꓘꓳꓼ ꓐꓰ ꓕꓲꓽ ꓪ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓣꓳꓽ ꓒꓳꓹ ꓔ ꓟ ꓥ ꓕ ꓑꓳꓸ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ=
ꓔꓯ ꓥꓳꓽ ꓐꓯ ꓠꓬ ꓙꓬ ꓟꓵꓽ ꓗꓪ ꓔꓬ ꓢꓴ ꓠꓬ ꓙꓬ ꓟꓵꓽ ꓗꓪ ꓣꓱꓽ ꓬꓯˍ ꓟ ꓶ ꓖꓪꓽ ꓖꓪˍ ꓟ ꓕꓱ ꓡꓰ ꓒꓬꓱꓼ ꓡ꓾ ꓙꓬ ꓟꓵꓽ ꓗꓪ ꓔꓬ ꓢꓴ ꓡꓲꓽ ꓒꓰꓼ ꓠꓬ ꓞꓺ ꓟꓵꓽ ꓗꓪ ꓔꓬ ꓢꓴ ꓡꓲꓽ ꓒꓰꓼˍ ꓐꓰ ꓟꓽ ꓪꓽ ꓡꓰ꓾ ꓕꓱ ꓡꓰ ꓗꓷ ꓡꓰˍ ꓟ ꓡꓰ ꓐꓰ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓡꓲꓽ ꓒꓰꓼ ꓥˍ ꓟꓲ ꓒꓳꓹ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓑꓶꓸ ꓓꓴ ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓤ ꓕꓲꓽ ꓞꓲꓼ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓥ ꓢꓲ ꓚꓲꓸ ꓛꓬꓽ ꓕꓲꓽ ꓞꓲꓼ ꓐꓱ ꓶ꓾ ꓚꓲꓸ ꓛꓬꓽ ꓗꓴꓷꓼ ꓐꓱ ꓶ꓾ ꓚꓲꓸ ꓛꓬ ꓞꓳ ꓫꓵꓽ ꓐꓱ ꓶ ꓢꓷ. ꓙ ꓟꓳ ꓙ ꓓꓴ ꓟꓳ ꓪ ꓓˍ ꓟ ꓢꓷꓸ ꓡꓰ ꓓꓴ ꓓꓽ ꓟ ꓕꓲꓽ ꓟ ꓥˍ ꓡꓳ=
ꓖꓳ ꓟ ꓪꓴꓸ ꓠꓬꓲ ꓦꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓡꓲꓽ ꓒꓰꓼ ꓐꓰ ꓚꓬꓴ. ꓙˍ ꓟ ꓐꓯˍ ꓟ ꓪꓴꓸ ꓓꓵ ꓛꓹ ꓢꓲ ꓙꓵ ꓠꓲꓹ ꓚꓱꓹ ꓔꓯ ꓟꓳꓸ ꓖꓪ ꓙꓱ ꓡꓳꓹ ꓬꓰ ꓟ ꓥ ꓪ= ꓞꓳ ꓤ ꓐꓰ ꓕꓲꓽ ꓪ ꓙꓳˍ ꓟ ꓡꓲꓽ ꓒꓰꓼ ꓠꓬ ꓪꓴ-ꓢ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓓꓽ ꓟ ꓥˍ ꓡꓳ= ꓠꓱꓸ ꓐꓯꓼ ꓞꓳ ꓫꓵꓽ ꓐꓰ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱ. ꓡꓯꓽ ꓘꓳ ꓟ ꓚꓲꓸ ꓛꓬ ꓡꓲꓽ ꓒꓰꓼ ꓗꓪ ꓙꓳ ꓢꓲ꓾ ꓖꓳ ꓟ ꓠꓬ ꓪꓴ-ꓢ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓥˍ ꓟ ꓔꓯ ꓟꓳ ꓪ ꓓˍ ꓟ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓐ ꓡˍ ꓟ ꓥˍ ꓡꓳ꓾ ꓐꓰ ꓕꓱ ꓡꓰ ꓟꓸ ꓖꓶ ꓡˍ ꓟ ꓥˍ ꓡꓳ=
