ꓕꓱ ꓕꓲ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯ ꓐꓯ ꓟ. ꓖꓶˍ ꓟ ꓙꓵ, ꓗꓪ ꓐꓰ ꓠꓬꓲ. ꓠꓬꓲ ꓗꓪ watermelon ꓐꓰ ꓘꓴˍ ꓟ ꓮ ꓒꓵꓽ ꓫꓵꓽ ꓫꓵꓽ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓡꓳ꓿
ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓠꓬ ꓞ ꓝꓲ. ꓜꓽ ꓓꓴ ꓕꓲ ꓙꓰꓽ ꓥ ꓢꓲ ꓠꓬꓲ꓾ ꓬꓲ ꓫꓵꓽ ꓫꓵꓽ ꓐꓰ ꓬꓲ ꓧꓪꓼ ꓧꓪꓼ ꓐꓯ ꓢꓲ ꓠꓬꓲꓽ ꓙꓰꓽ ꓙꓳˍ ꓟ ꓥꓳ꓿
ꓮ ꓒꓵꓽ ꓫꓵꓽ ꓫꓵꓽ ꓠꓬ ꓖꓴ ꓟꓶ. ꓮ‐ꓩ‐ꓣꓲ‐ꓗ ꓗꓪ ꓚꓳ. ꓬꓲ ꓪꓴ. ꓓꓳ ꓡˍ ꓟ ꓬꓲ ꓜꓲ ꓥ ꓡꓳ꓾ ꓐꓰ ꓢꓷ. ꓪ ꓟ ꓥ ꓡꓳ꓿ ꓗꓳ. ꓡ ꓟ 1,000 ꓘꓳꓼ ꓛꓲ ꓕꓯ ꓰꓖꓬꓑꓔ ꓗꓴꓷꓼ ꓠꓮꓲ, ꓬꓲꓻ ꓙꓬ ꓡꓳꓻ ꓗ. ꓕꓲ ꓚꓱ, ꓐꓰ ꓧꓶꓽ ꓗꓴꓷꓼ ꓐꓴ ꓗꓪ ꓔꓶ ꓪꓴ. ꓔꓴ ꓗꓷꓳ꓾ ꓐꓰ ꓢꓷ. ꓪ ꓡꓳ꓿ ꓮ ꓟꓶ ꓕꓯ ꓠꓬ ꓮ ꓒꓵꓽ ꓫꓵꓽ ꓫꓵꓽ ꓔꓯ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓶ ꓔꓬ ꓟ ꓥ ꓡꓳ꓿ ꓢꓲ, ꓢꓶꓽ ꓕꓱ ꓟ ꓠꓬ ꓬꓲ ꓬꓲꓻ ꓮ ꓟꓬ, ꓓꓵˍ ꓟ ꓥ ꓢꓲ ꓠꓬꓲ ꓮ ꓘꓶ. ꓛꓵˍ ꓟ ꓬꓲ ꓢꓶꓽ ꓕꓲ ꓙꓰꓽ ꓥꓳ꓿ ꓬꓲ ꓢꓶꓽ ꓜꓽ ꓐ ꓡˍ ꓟ ꓡꓰꓽ ꓟꓽ ꓞꓲ꓾ ꓒꓬꓮꓪ‐ꓬꓰ ꓬꓲ ꓬꓲꓻ ꓫꓬ, ꓢꓲ ꓓꓳꓻ ꓐ ꓡˍ ꓟ ꓥꓳ꓿ ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓠꓬ ꓮ ꓘꓶ. ꓟꓲ ꓠꓽ ꓮ ꓘꓶ. Beta-carotene ꓐꓰ lycopene ꓢꓯꓼ ꓮ ꓟꓬ, ꓓꓵˍ ꓟ ꓥ ꓡꓳ꓿
ꓮ ꓒꓵꓽ ꓫꓵꓽ ꓫꓵꓽ ꓗꓪ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓬꓯꓼˍ ꓟ ꓬꓲ ꓢꓯꓼ꓾ ꓦꓲꓔꓮꓟꓲꓠ꓾ ꓟꓲꓠꓰꓣꓮꓡ ꓢꓯꓼ ꓐꓰ ꓳꓣꓖꓮꓠꓲꓚ ꓚꓳꓟꓑꓳꓴꓠꓓꓢ ꓢꓯꓼ ꓓꓯ,ˍ ꓟ ꓥꓳ꓿ ꓕꓱ ꓟ ꓡꓰꓽ ꓟꓽ ꓞꓲ꓾ ꓮ ꓒꓵꓽ ꓫꓵꓽ ꓫꓵꓽ ꓗꓪ ꓦꓲꓔꓮꓟꓲꓠ ꓚ꓾ ꓚꓮꓡꓚꓲꓴꓟ꓾ ꓟꓮꓖꓠꓰꓢꓲꓴꓟ꓾ ꓝꓲꓐꓰꓣ꓾ ꓑꓣꓳꓔꓰꓠꓰ ꓐꓰ ꓑꓳꓔꓮꓢꓢꓲꓴꓟ ꓢꓯꓼ ꓓꓯ,ˍ ꓟ ꓥ ꓡꓳ꓿ ꓝꓮꓲ ꓦꓲꓔꓮꓟꓲꓠ ꓮ꓾ ꓦꓲꓔꓮꓟꓲꓠ ꓐ6꓾ ꓠꓲ‐ꓗꓻ‐ꓢꓲꓠ꓾ ꓔꓲ‐ꓬ‐ꓟꓲꓠ, ꓐꓰ ꓗ‐ꓣꓳ‐ꓔꓲ‐ꓠꓳꓲꓓ ꓢꓯꓼ ꓐꓴ ꓥˍ ꓟꓲ ꓮ ꓟꓬ, ꓓꓵˍ ꓟ ꓥ ꓡꓳ꓿
ꓮ ꓒꓵꓽ ꓫꓵꓽ ꓫꓵꓽ ꓠꓬ ꓜꓽ ꓗꓽ ꓠꓯ, ꓓꓴ ꓐꓱ ꓶˍ ꓡꓰꓽ ꓣꓱꓽ ꓬꓯꓼˍ ꓟ ꓟꓽ ꓥ ꓥ꓾ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓡꓲ ꓐꓰ ꓣꓱꓽ ꓬꓯꓼ ꓖꓴ ꓙꓳˍ ꓡ꓾ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓐꓯ ꓟ ꓔꓯ ꓝ. ꓢꓲ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓪꓳꓽ ꓓꓲꓻ ꓠꓻ ꓔꓯ ꓓꓻ ꓡꓰ ꓢꓻ ꓡꓰ ꓝꓲˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓗꓪ ꓑꓳꓔꓮꓢꓢꓲꓴꓟ ꓢꓯꓼ ꓮ ꓟꓬ, ꓓꓯ, ꓟ ꓪꓴ. ꓠꓬꓲ ꓪꓳꓽ ꓓꓲꓻ ꓘꓴꓽ ꓗꓪ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦˍ ꓟ ꓗꓪ ꓬꓰ ꓙ ꓔꓳ, ꓙ ꓖꓶˍ ꓡꓳ꓿ ꓫꓵꓽ ꓘꓴꓽ ꓗꓪ ꓴꓣꓲꓚ ꓮꓚꓲꓓ ꓢꓯꓼ ꓓꓵˍ ꓟ ꓔꓯ ꓠꓲ. ꓡꓰ ꓝꓲ ꓐ ꓡˍ ꓟ ꓑꓶ. ꓓꓴ꓾ ꓪꓳꓽ ꓓꓲꓻ ꓐꓬ ꓡꓰ ꓚꓱ, ꓔꓯ ꓠꓲ. ꓡꓰ ꓝꓲ ꓐ ꓡˍ ꓡꓳ꓿ ꓮ ꓒꓵꓽ ꓫꓵꓽ ꓫꓵꓽ ꓠꓬ ꓕꓲ ꓑ, ꓕꓲ ꓑ, ꓤꓲꓽ ꓫꓵ ꓫꓵ ꓝꓲˍ ꓟ ꓑꓶ. ꓓꓴ꓾ ꓪꓳꓽ ꓓꓲꓻ ꓘꓴꓽ ꓗꓪ ꓟ ꓬꓲ ꓓꓳꓼ ꓐꓴ ꓔꓯ ꓤꓲꓽ ꓗꓪ ꓐꓰ ꓕꓲꓽ ꓝ. ꓠꓱ ꓫꓳ. ꓟ. ꓗꓪ ꓓꓳ ꓙꓰ ꓝꓲˍ ꓡꓳ꓿ ꓢꓲ, ꓢꓶꓽ ꓕꓱ ꓟ ꓗꓪ ꓮꓠꓔꓲꓳꓫꓲꓓꓮꓠꓔꓢ ꓓꓯ,ˍ ꓟ ꓪꓴ. ꓠꓬꓲ ꓪꓳꓽ ꓓꓲꓻ ꓐꓴ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓿
ꓞ ꓢꓯꓼ ꓟꓶ. ꓡꓰ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓠꓬ ꓖꓳ ꓓꓱꓽ ꓞꓴ ꓢꓯꓼ ꓔꓯ ꓬꓯꓼ ꓡꓰ ꓝꓲ ꓐ ꓡˍ ꓟˍ ꓡꓰ ꓐꓰ꓾ ꓫꓵꓽ ꓢꓯꓼ ꓔꓯ ꓥˍ ꓟꓲ ꓞꓰꓻ ꓡꓰ ꓝꓲ ꓐ ꓡˍ ꓡꓳ꓿ ꓞ ꓟꓵꓽ ꓗꓪ ꓠꓬ꓾ ꓞ ꓝꓲ. ꓡꓰ ꓐꓰ ꓞˍ ꓟ ꓟꓳꓼ ꓡꓳꓼ ꓙꓵ, ꓗꓪ ꓞ ꓢꓯꓼ ꓟꓶˍ ꓟ ꓟꓽ ꓒꓬꓱꓼ ꓡꓰ ꓠ, ꓟ ꓢꓲ. ꓢꓶꓽ ꓕꓱ ꓟ ꓔꓯ ꓜꓽ ꓔꓬ ꓖꓴˍ ꓡꓳ꓿ ꓬꓲ. ꓢꓶꓽ ꓗꓪ ꓬꓲꓻ ꓙꓬ ꓢꓯꓼ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓥ ꓟꓲ ꓡꓴꓽ ꓖꓶˍ ꓟ ꓥ ꓡꓳ꓿
ꓫꓵꓽ ꓢꓯꓼ ꓔꓯ ꓔꓲ ꓟꓴ.ˍ ꓗꓷ ꓡꓰ ꓝꓲˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓗꓪ ꓑꓳꓔꓮꓢꓢꓲꓴꓟ ꓐꓰ ꓟꓮꓖꓠꓰꓢꓲꓴꓟ ꓢꓯꓼ ꓮ ꓟꓬ, ꓓꓯ,ˍ ꓟ ꓪꓴ. ꓠꓬꓲ ꓫꓵꓽ ꓢꓯꓼ ꓔꓯ ꓞꓰꓻ ꓡꓰ ꓝꓲ ꓐ ꓡˍ ꓡꓳ꓿ ꓢꓲ, ꓢꓶꓽ ꓕꓱ ꓟ ꓗꓪ ꓓꓵˍ ꓟ ꓚꓮꓣꓳꓔꓰꓠꓳꓲꓓꓢ ꓠꓬ ꓫꓵꓽ ꓙꓴꓽ ꓗꓳ,ˍ ꓟ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶˍ ꓟ ꓡꓰꓽ ꓟꓽ ꓞꓲ꓾ ꓫꓵꓽ ꓓꓯˍ ꓟ ꓐꓰ ꓫꓵꓽ ꓠꓶ ꓡꓰˍ ꓟ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶˍ ꓡꓳ꓿
ꓚꓮꓠꓚꓰꓣ ꓠꓻ ꓔꓯ ꓗꓽ ꓕ. ꓙ ꓖꓶˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓗꓪ ꓚꓮꓠꓚꓰꓣ ꓠꓻ ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓟ ꓡꓬꓚꓳꓑꓰꓠꓰ ꓐꓰ ꓚꓮꓣꓳꓔꓰꓠꓳꓲꓓꓢ ꓑꓧꓬꓔꓳꓠꓴꓔꓣꓲꓰꓠꓔꓢ ꓚꓳꓟꓑꓳꓴꓠꓓ ꓢꓯꓼ ꓙꓳˍ ꓟ ꓥ ꓡꓳ꓿ ꓡꓬꓚꓳꓑꓰꓠꓰ ꓠꓬ ꓤꓲꓽ ꓒꓴꓽ ꓚꓮꓠꓚꓰꓣ꓾ ꓮ ꓚꓵ, ꓚꓮꓠꓚꓰꓣ꓾ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ꓾ ꓐꓵꓼ ꓟꓵ ꓚꓮꓠꓚꓰꓣ ꓐꓰ ꓤꓽ ꓘꓶ ꓚꓮꓠꓚꓰꓣ ꓒꓬꓱꓼ ꓡ ꓟ ꓚꓱ, ꓔꓯ ꓢꓷ. ꓓꓻ ꓓꓻ ꓡꓰꓽ ꓠꓲ. ꓡꓰ ꓝꓲ ꓐ ꓡˍ ꓡꓳ꓿
ꓢꓰ,‐ꓛꓬꓳ ꓔꓯ ꓔꓲ ꓟꓴˍ ꓗꓷ ꓡꓰ ꓝꓲˍ ꓡꓳ꓾
ꓬꓲ ꓛꓵꓻ ꓢꓯꓼ꓾ ꓢꓔꓮꓣꓚꓧ ꓐꓰ ꓘꓴˍ ꓟ ꓗ‐ꓢꓲ ꓢꓯꓼ ꓐꓴ ꓐꓰ ꓟꓽ ꓕꓽ ꓟ (ꓟꓽ ꓪꓽ ꓟ) ꓢꓰ,‐ꓛꓬꓳ ꓠꓻ ꓙꓳ ꓢꓴ ꓐꓴ ꓠꓬ ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓔꓯ ꓜꓽ ꓖꓶ ꓐ ꓡˍ ꓡꓳ꓿ ꓢꓲ, ꓢꓶꓽ ꓕꓱ ꓟ ꓠꓬ ꓮ ꓘꓶ. ꓛꓵˍ ꓐꓯ ꓥ ꓟꓲ ꓚꓮꓡꓳꓣꓲꓰꓢ ꓢꓯꓼ ꓮ ꓘꓶ. ꓠꓲ.ˍ ꓟ ꓥ ꓡꓳ꓿ ꓢꓲ, ꓢꓶꓽ ꓕꓱ ꓟ ꓗꓪ ꓟꓬꓽ ꓠꓬꓲ ꓓꓵˍ ꓟ ꓠꓬ ꓬꓲꓻ ꓙꓬ ꓢꓯꓼ ꓥ ꓟ ꓪꓴ. ꓠꓬꓲ ꓢꓰ,‐ꓛꓬꓳ ꓠꓻ ꓙꓳ ꓢꓴ ꓐꓱ ꓶ ꓙꓲꓻ ꓓꓰ ꓡꓰˍ ꓟ ꓜꓽ ꓓꓴ ꓕꓲꓽ ꓙꓰꓽ ꓥ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓢꓲ, ꓢꓶꓽ ꓗꓪ ꓙꓳˍ ꓟ ꓑꓳꓔꓮꓢꓢꓲꓴꓟ ꓐꓰ ꓟꓮꓖꓠꓰꓢꓲꓴꓟ ꓐꓴ ꓐꓰ ꓦꓲꓔꓮꓟꓲꓠ ꓢꓯꓼ꓾ ꓟꓲꓠꓰꓣꓮꓡꓢ ꓢꓯꓼ ꓐꓴ ꓠꓬ ꓲꓠꓢꓴꓡꓲꓠ ꓔꓯ ꓜꓳꓽ ꓜꓳꓽ ꓟꓬꓱꓽ ꓬꓰ ꓐ ꓡ ꓠ, ꓟ ꓬꓰ ꓙ ꓖꓶˍ ꓡꓳ꓿
ꓠꓲ, ꓟ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓗꓪ ꓓꓵˍ ꓟ ꓡꓬꓚꓳꓑꓰꓠꓰ ꓠꓬ ꓠꓲ, ꓟ ꓟꓬꓱꓽ ꓬꓰ ꓚꓱ, ꓔꓯ ꓢꓯꓼ ꓙꓳ ꓡ ꓝꓲˍ ꓡꓳ꓿ ꓬꓲ ꓞꓲꓼ ꓟꓽ ꓙꓳ ꓡ ꓕꓯ ꓡꓰ ꓟꓳꓽ ꓡꓰ ꓢꓻ ꓝꓲˍ ꓟ ꓔꓯ ꓗꓽ ꓕ. ꓙ ꓖꓶˍ ꓟ ꓐꓰꓔꓮ‐ꓚꓮꓣꓳꓔꓰꓠꓰ ꓠꓬ ꓞꓲꓼ ꓣꓳˍ ꓟ ꓙꓵ, ꓕꓯ ꓠꓲ, ꓟ ꓔꓯ ꓔꓬ, ꓢꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓞꓲꓼ ꓙꓳ ꓡ ꓕꓯ ꓒꓬꓱꓼ ꓡ ꓟ ꓠꓲ, ꓟ ꓐꓰ ꓗꓴ. ꓙꓲꓽ ꓙꓳˍ ꓟ ꓠꓻ ꓒꓬꓱꓼ ꓡ ꓟ ꓚꓱ, ꓐꓴ ꓔꓯ ꓥ ꓟꓲ ꓠꓲ. ꓡꓰ ꓝꓲ ꓐ ꓡˍ ꓡꓳ꓿ ꓢꓲ, ꓢꓶꓽ ꓗꓪ ꓓꓯ,ˍ ꓟ ꓦꓲꓔꓮꓟꓲꓠ ꓚ꓾ ꓚꓮꓣꓳꓔꓰꓠꓳꓲꓓꓢ ꓐꓰ ꓑꓳꓔꓮꓢꓢꓲꓴꓟ ꓐꓴ ꓠꓬ ꓫꓵꓽ ꓘꓴꓽ ꓗꓪ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓔꓯ ꓠꓲ. ꓡꓰ ꓝꓲ ꓢꓲ ꓠꓬꓲ꓾ ꓞꓼ ꓞꓼ ꓠꓲ, ꓟ ꓠꓻ ꓡ ꓟ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶˍ ꓡꓳ꓿
ꓟꓬ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓗꓪ ꓐꓰ ꓗꓽ ꓕ. ꓙ ꓖꓶˍ ꓡꓳ꓾
ꓮ ꓒꓵꓽ ꓫꓵꓽ ꓫꓵꓽ ꓗꓪ ꓓꓵˍ ꓟ ꓐꓰꓔꓮ‐ꓚꓮꓣꓳꓔꓰꓠꓰ꓾ ꓦꓲꓔꓮꓟꓲꓠ ꓚ꓾ ꓡꓴꓔꓰꓲꓠ ꓐꓰ ꓜꓰꓮꓫꓮꓠꓔꓧꓲꓠ ꓐꓴ ꓠꓬ ꓟꓬ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓔꓯ ꓠꓲ. ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓝꓮꓲ ꓮ ꓒꓵꓽ ꓫꓵꓽ ꓫꓵꓽ ꓗꓪ ꓓꓵˍ ꓟ ꓮꓟꓲꓠꓳ ꓮꓚꓲꓓ ꓕꓲ ꓙꓰꓽ ꓥ ꓟ ꓚꓲꓔꓣꓴꓡꓡꓲꓠꓰ ꓠꓬ ꓧꓪꓽ ꓘꓴ. (ꓗꓬꓮꓪꓔ‐ꓔ) ꓠꓻˍ ꓟ ꓔꓯ ꓠꓲ. ꓡꓰ ꓝꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓿ ꓢꓲ. ꓢꓶꓽ ꓕꓱ ꓟ ꓗꓪ ꓓꓵˍ ꓟ ꓦꓲꓔꓮꓟꓲꓠ ꓮ ꓐꓰ ꓦꓲꓔꓮꓟꓲꓠ ꓚ ꓠꓬ ꓧꓪꓽ ꓗꓴ, ꓙꓲ ꓐꓰ ꓪꓴ. ꓞꓱꓻ ꓐꓱ ꓶ ꓮ ꓘꓶ. ꓙꓲꓻˍ ꓡꓳ꓿ ꓦꓲꓔꓮꓟꓲꓠ ꓚ ꓠꓬ ꓖꓳ ꓓꓱꓽ ꓗꓪ ꓟ ꓚꓳꓡꓡꓮꓖꓰꓠ ꓓꓳ ꓡ ꓠ ꓬꓰ ꓙ ꓖꓶ ꓢꓲ ꓠꓬꓲ꓾ ꓧꓪꓽ ꓗꓴ, ꓙꓲ ꓐꓰ ꓪꓴ. ꓞꓱ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓝꓮꓲ ꓠꓬ ꓮ ꓒꓵꓽ ꓫꓵꓽ ꓗꓪ ꓦꓰꓼ ꓟ ꓙꓲꓺ ꓢꓻ ꓓꓴ ꓐꓱ ꓶ ꓣꓱꓽ ꓬꓯꓼˍ ꓟ ꓬꓲ ꓢꓯꓼ ꓥ ꓟ ꓬꓲꓻ ꓙꓬ ꓢꓯꓼ ꓐꓰ ꓝꓲꓐꓰꓣ ꓢꓯꓼ ꓮ ꓟꓬ, ꓓꓵˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓕꓱ ꓗꓪ ꓚꓲ. ꓔ ꓓꓴ ꓕꓲ ꓫꓵꓽ ꓠꓬ꓾ ꓮ ꓒꓵꓽ ꓫꓵꓽ ꓫꓵꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓟꓬ, ꓙꓲꓻˍ ꓡꓳ ꓐꓰ ꓐꓯˍ ꓥ ꓟꓲ꓾ ꓜꓽ ꓟꓬꓽ ꓡꓰ ꓕꓯ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓗꓷ ꓡꓰ ꓝꓲˍ ꓡꓳ꓿ ꓖꓳ ꓓꓱꓽ ꓘꓴꓽ ꓗꓪ ꓦꓲꓔꓮꓟꓲꓠ ꓬꓲ ꓢꓯꓼ ꓕꓲ ꓐꓱ ꓮ ꓘꓶ. ꓟꓬꓽ ꓡ ꓕꓯ ꓢꓯꓼ ꓖꓳ ꓟ ꓐꓰ ꓝ. ꓓˍ ꓟ ꓫꓵꓽ ꓪꓴ ꓮ ꓟꓬ, ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿
ꓦꓲꓔꓮꓟꓲꓠ ꓚ ꓔꓯ ꓮ ꓟꓬ, ꓜꓽ ꓪ ꓡꓰ ꓣꓱꓽ ꓪ ꓡꓰ ꓕꓯ ꓠꓽ ꓦꓰꓽ ꓛꓲꓽ ꓧꓳ,ˍ ꓟ꓾ ꓜꓽ ꓓꓴ ꓚꓱ, ꓐꓰ ꓬꓲ ꓪꓴꓻ ꓚꓱ, ꓗꓪ ꓔꓬ, ꓟꓽ ꓢꓻ ꓗꓷ ꓡꓰˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ꓿
ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓮ ꓟꓬ, ꓮ ꓟꓬ, ꓜꓽˍ ꓕꓯ ꓠꓬ ꓖꓳ ꓓꓱꓽ ꓠꓯꓸꓼ ꓗꓪ ꓑꓳꓔꓮꓢꓢꓲꓴꓟ ꓢꓯꓼ ꓐꓰ ꓡꓬꓚꓳꓑꓰꓠꓰ ꓢꓯꓼ ꓮ ꓘꓶ. ꓟꓬꓽ ꓡꓰ ꓢꓲ ꓠꓬꓲ ꓖꓳ ꓓꓱꓽ ꓗꓪ ꓔꓬ ꓫ.ˍˍ ꓟ꓾ ꓦꓰꓽ ꓛꓲꓽ ꓧꓳ,ˍ ꓟ ꓐꓰ ꓦꓰꓼ ꓟ ꓙꓲꓺ ꓟꓽ ꓘꓴ ꓟ꓾ ꓦꓰꓽ ꓛꓲꓽ ꓗꓪ ꓟꓲꓽ ꓦꓲ ꓚꓳˍ ꓟ ꓕꓱ ꓟꓬ ꓫꓵꓽ ꓒꓬꓱꓼ ꓡꓰ ꓝꓲ ꓐ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓢꓺ ꓡꓰ ꓠ꓾ ꓟꓬꓽ ꓙꓲ ꓡꓰ ꓟ ꓟꓽ ꓜꓽ ꓪ ꓡꓰ ꓠ, ꓟˍ ꓟꓲ ꓤ ꓟꓳ ꓠ ꓔ ꓥ꓿
ꓮ ꓟꓶ ꓐꓯ ꓟꓳ. ꓖꓶ ꓗꓷ ꓟ ꓮ ꓒꓵꓽ ꓫꓵꓽ ꓫꓵꓽ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓠꓬ ꓧꓰꓡꓡꓳ ꓧꓰꓮꓡꓔꓧ ꓖꓣꓳꓴꓑ ꓗꓪ ꓐꓯ ꓟ. ꓔ ꓟ ꓔꓯ ꓕꓲ ꓝ. ꓡꓲ‐ꓢꓴ ꓢꓯꓼ ꓗꓪ ꓐꓰ꓾ ꓐꓯ ꓒꓬꓱꓻ ꓩꓴ ꓡˍ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓕꓲ ꓠꓬꓲ ꓕꓲ ꓠꓬꓲ ꓜꓽ ꓔꓬ ꓟ ꓜꓽ ꓓꓴ ꓗꓪ ꓐꓰ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓒꓬꓱꓼ ꓡ ꓝꓲ ꓢꓲ꓾ ꓧꓪꓽ ꓖꓳ ꓓꓱꓽ ꓔꓬ ꓢꓻˍ ꓟ ꓔꓯ ꓑꓯ, ꓟꓶ ꓡꓰ ꓝꓲ꓿
