ꓢꓲꓺ ꓒ ꓬꓰ-ꓢꓴ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓐꓴ ꓠꓬ ꓙꓵꓽ ꓪꓽ ꓔꓯ ꓧꓪ ꓠꓹ ꓟꓽ ꓥ= ꓢꓴ ꓔꓯ ꓠꓬꓲ. ꓠꓹ ꓟ ꓟꓽ ꓥ= ꓢꓴ ꓔꓯ ꓧꓪꓸ ꓡꓰ ꓠ ꓐꓱ ꓶ ꓬꓰ ꓠꓹ ꓟ ꓟꓽ ꓥ= ꓮꓽ ꓟ ꓥˍ ꓟꓲ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓠꓬ꓾ ꓮꓽ ꓟ ꓥꓪ ꓔꓯ ꓛꓳ ꓠꓲꓹ ꓫꓵˍ ꓠꓬ ꓬꓲ ꓚꓲ. ꓛꓬ ꓔꓯ ꓟꓽ ꓓꓽ ꓔꓳꓹ ꓢꓲ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓡꓯ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ (ꓡꓴ-ꓘ 9ꓽ23) ꓗꓪ ꓕꓱ ꓡꓱ ꓐꓯ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓱ ꓡꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯˍ ꓟ ꓠꓬ ꓝꓲ ꓓꓴ ꓐꓴ ꓔꓯ ꓢꓲ ꓚꓰ. ꓔ ꓟ ꓝꓲ ꓓꓴ ꓐꓴ ꓔꓯ ꓘꓴˍ ꓟ ꓢꓯꓼ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓘꓴˍ ꓟ ꓢꓲ ꓚꓰ. ꓔ ꓟ ꓐꓯˍ ꓟ ꓠꓬ ꓣꓱꓽ ꓙ ꓠꓹ ꓟ ꓐꓱ ꓶ ꓥ ꓢꓲ꓾ ꓟꓲ ꓠꓯ ꓕꓱ ꓟ ꓔꓯ ꓮ ꓕꓯ ꓥˍ ꓟꓲ ꓗꓽ ꓕꓸ ꓙ ꓠ, ꓟ ꓡꓳꓸ ꓙ ꓟꓳ ꓙ ꓠ, ꓟ ꓟꓬꓽ ꓠꓬꓲ ꓐꓶꓹ ꓠꓬꓲ ꓔꓱꓹ ꓚꓵˍ ꓟ ꓟꓲ ꓠꓯ ꓒꓬꓱꓼ ꓡ ꓠ, ꓟ ꓐꓱ ꓶ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓣꓳꓽ ꓔꓯ ꓘꓴˍ ꓟ ꓥ ꓪ=
(ꓬꓲ ꓚꓰ ꓬꓲ ꓪꓴ 1ꓽ26) ꓗꓪ ꓪꓴ-ꓢ ꓡꓰ ꓣꓳꓽ ꓠꓬ ꓣꓳꓽ ꓐꓬꓱꓽ ꓐꓰ ꓣꓳꓽ ꓒꓬꓱꓽ ꓔꓯ ꓛꓳ ꓢꓲ ꓞꓳ ꓤꓽ ꓚꓰꓼ ꓡꓯ = ꓖꓳ ꓡꓰ ꓢꓲ ꓬꓲꓻ ꓡꓴ ꓐꓱ ꓗꓪ ꓟ ꓥꓪ. ꓐꓰ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤ ꓙꓱꓽ ꓤ ꓐꓰ ꓟꓲ ꓠꓯ ꓗꓪ ꓟ ꓦꓵꓻ ꓙꓱꓽ ꓠꓲꓹ ꓙꓱꓽ ꓐꓰ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓚ ꓔꓬ ꓡꓳ ꓫꓵꓽ ꓐꓶꓽ ꓓꓲ ꓡꓯꓹ ꓓꓲ ꓥ ꓕ ꓑꓳꓸ ꓕꓯꓽ ꓢꓲ ꓗꓪ ꓬꓲ ꓪꓽ ꓔꓯ ꓙꓵꓽ ꓪꓽ ꓙꓳ ꓝꓲ ꓐꓰ ꓕꓱ ꓡꓰ ꓐꓯˍ ꓡꓳ=
ꓢꓲꓺ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓠꓬ ꓙꓵꓽˍˍ ꓟ ꓙꓵꓽ ꓪ ꓐꓯˍ ꓟ ꓠꓬ ꓚꓰꓼ ꓔ ꓟ ꓮꓽ ꓙꓵꓽ ꓐꓰ ꓕꓲꓽ ꓪ ꓐˍ ꓟ ꓢꓲꓹ ꓜꓲ ꓡꓳ ꓜꓲ꓾ ꓙꓱꓽ ꓤꓽ ꓟ ꓞꓲ ꓐꓰ ꓟꓵꓽ ꓘꓳꓹ ꓮꓽ ꓙꓵ ꓐꓯˍ ꓟ ꓰꓚꓳ ꓡꓳꓖꓲꓚꓮꓡ ꓡꓮꓪꓢ ꓐꓯˍ ꓟ ꓔꓯ ꓟꓬꓽ ꓠꓬꓲ ꓠꓯꓸ ꓠ ꓒꓵꓽ ꓠꓹ ꓟ ꓐꓱ ꓶ ꓐꓯ ꓠꓲꓹ ꓫꓵˍ ꓟ ꓥ ꓪ= ꓐꓯ ꓠꓲ, ꓫꓵˍ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓔꓯ ꓮꓽ ꓘꓶꓸ ꓒꓵꓽ ꓢꓲ ꓠꓬꓲ ꓟꓲ ꓠꓯ ꓞꓳ ꓤꓽ ꓠꓬ ꓡꓳꓸ ꓙ ꓟꓳ ꓙ ꓔ ꓙ ꓠꓹ ꓟ ꓕꓱ ꓡꓰ ꓬꓰˍ ꓕꓯ ꓣꓳꓽ ꓠꓬ ꓣꓱꓽ ꓙˍ ꓟ ꓠꓲꓹ ꓟ ꓐꓰ ꓬꓰ ꓠꓹ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=
ꓡꓲꓺ ꓓꓽ ꓟ ꓕꓯꓽ ꓢꓲ ꓗꓪ ꓙꓱꓽ ꓤꓽ ꓟ ꓞꓲ ꓮꓽ ꓙꓵꓽ ꓔꓯ ꓠꓳ-ꓪ ꓡꓰ ꓗꓶˍ ꓟ ꓡꓰ ꓐꓰ ꓕꓲꓽ ꓡꓰ, ꓣꓳ ꓥˍ ꓟꓲ ꓪꓴ-ꓢ ꓡꓰ ꓚꓰꓼ ꓔ ꓟ ꓮꓽ ꓙꓵꓽ ꓔꓯ ꓡꓳꓸ ꓙ ꓟꓳ ꓔ ꓙ ꓠꓹ ꓟ ꓕꓱ ꓡꓰ ꓬꓰ ꓠꓹ ꓟ ꓐꓱ ꓶ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓟꓽ ꓟꓶꓽ ꓟꓽ ꓐꓬ ꓡꓰ ꓠ ꓡꓳꓸ ꓙ ꓟꓳ ꓙ ꓠꓹ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=
