ꓠꓬꓲꓸ ꓠꓬꓲ ꓠꓬ ꓬꓲꓸ ꓖ ꓙꓳˍ ꓐꓯ ꓟ ꓚꓱꓹ ꓔꓯ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓬꓲꓸ ꓖ ꓙꓳˍ ꓟ ꓠꓬ ꓦꓲꓸꓹ ꓘꓴ: ꓗꓪ ꓐꓰ ꓪꓴꓸ ꓔꓴˍ ꓟ ꓥ ꓡꓳ= ꓣꓳ ꓞꓲꓼ ꓣꓳˍ ꓟ ꓕꓲ ꓙꓵꓹ ꓗꓪ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓣꓳ ꓬꓰ ꓠꓲꓹ ꓫꓵꓽ ꓟ꓾ ꓜꓽ ꓠꓲꓹ ꓫꓵꓽ ꓟ ꓔꓯ ꓟꓽ ꓜ ꓪ ꓡꓰ ꓠꓬ ꓮ ꓘꓶꓸ ꓠꓲꓹ ꓘꓪ ꓟꓽ ꓫꓵ ꓡꓳ= ꓖꓳ ꓡꓰ ꓐꓯ ꓥˍ ꓟꓲ ꓞꓳ ꓟꓳꓽ ꓐꓴ ꓠꓬ ꓞꓲꓼ ꓣꓳˍ ꓟ ꓪꓴꓸ ꓠꓬꓲ ꓥ ꓐꓭ ꓥꓳ ꓐꓰ ꓕꓱ ꓡꓱ ꓓꓵꓽ ꓙˍ ꓡꓳ= ꓞꓲꓼ ꓪꓴ ꓡ ꓕꓯ ꓬꓲꓸ ꓖ ꓙꓳ ꓡ ꓥꓳ꓾ ꓙ ꓟꓶ ꓗꓴꓸ ꓡ ꓥꓳ ꓐꓰ ꓓꓵ ꓔꓬ ꓢꓴ ꓙꓳ ꓡꓳ= ꓖꓳ ꓡꓰ ꓠꓬ ꓟꓽ ꓥ꓾ ꓞꓲꓼ ꓣꓳ ꓟ ꓕꓲ ꓙꓵꓹ ꓗꓪ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓣꓳ ꓤ ꓠꓱ ꓔꓯ ꓬꓲꓸ ꓖ ꓙꓳ ꓠ ꓟꓸ ꓖꓶ ꓠꓹ ꓗꓹ ꓡꓳ=
ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓮꓽ ꓐ ꓮ ꓟ ꓔꓯ ꓮ ꓡꓰ ꓞꓳ ꓒꓵꓽ ꓠꓹ ꓟ꓾ ꓢꓴ ꓔꓯ ꓮ ꓡꓰ ꓬꓰ ꓙ ꓠꓹ ꓟ꓾ ꓙꓲˍ ꓟ ꓠꓲꓹ ꓟ ꓙꓳ ꓠ ꓗꓹ ꓟ꓾ ꓫꓸ ꓪ ꓔꓯ ꓙꓲꓻ ꓙꓲꓻ ꓕꓱ ꓗꓴꓸ ꓠꓹ ꓟ꓾ ꓢꓴ ꓔꓯ ꓞꓳ ꓒꓵꓽ ꓠꓹ ꓟ꓾ ꓟꓬꓱꓽ ꓕꓲ ꓫꓵꓽ ꓬꓰˍ ꓠꓬ ꓙ ꓟꓶ ꓢꓲ ꓬꓰ ꓗꓴꓸ ꓠꓹ ꓟ꓾ ꓕꓱ ꓡꓱ ꓫꓵꓽ ꓔꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓟꓸ ꓖꓶ ꓠꓹ ꓟ ꓮ ꓓꓲꓽ ꓣꓳꓸ ꓚꓵˍ ꓡꓳ= ꓕꓱ ꓟ ꓡꓰ ꓐꓰ ꓞꓲꓼ ꓣꓳˍ ꓟ ꓕꓲ ꓙꓵꓹ ꓗꓪ ꓟꓸ ꓖꓶ ꓑꓱ ꓖꓶ ꓐꓯ ꓠꓬ ꓞꓲꓼ ꓪꓴꓽ ꓡ ꓢꓲ꓾ ꓢꓴ ꓟꓵꓽ ꓢꓴ ꓡꓳ ꓗꓪ ꓛꓲ ꓬꓰ ꓕꓯ ꓬꓲꓸ ꓖ ꓙꓳˍ ꓟ ꓚꓲ. ꓛꓬ ꓔꓯ ꓙꓵꓽ ꓗꓴꓸ ꓢꓴ ꓕꓲ ꓣꓳ ꓒꓬꓱꓼ ꓡ ꓥꓳ= ꓮ ꓫꓵꓽ ꓟꓵꓽ ꓗꓪ ꓮ ꓡꓰ ꓕꓲ ꓖ ꓗꓪ ꓥ ꓟꓲ ꓬꓲꓸ ꓖ ꓙꓳ ꓢꓴ ꓔꓯ ꓠꓬ ꓮ ꓘꓶꓸ ꓠꓲꓹ ꓠꓵˍ ꓡꓳ= ꓟꓽ ꓞꓲ ꓞꓳ ꓟꓳꓽ ꓟꓲꓽ ꓙꓬ ꓗꓪ ꓙꓰˍ ꓠꓬ ꓪꓴꓸ ꓓꓵ ꓟꓳꓼ ꓢꓲ ꓙꓰ꓾ ꓬꓲꓸ ꓖ ꓙꓳˍ ꓟ ꓐꓰ ꓡꓲꓽ ꓒꓰꓼ ꓠꓬ ꓫꓱ. ꓡꓯ ꓘꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲꓹ ꓠꓵˍ ꓟ ꓮꓽ ꓐ ꓮ ꓟ ꓐꓴ ꓣꓳ ꓤ ꓣꓳ ꓠꓱ ꓐꓴ ꓬꓲꓸ ꓖ ꓙꓳ ꓠꓹ ꓟ ꓐꓱ ꓶ ꓞꓲꓼ ꓣꓳˍ ꓟ ꓕꓲ ꓙꓵꓹ ꓗꓪ ꓐꓰ ꓐ ꓡ ꓟꓬ ꓛꓲ ꓟꓸ ꓖꓶ ꓑꓱ ꓖꓶ ꓓꓴ ꓬꓰ ꓡꓯ= ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓕꓲ ꓙꓵꓹ ꓗꓪ ꓬꓲꓸ ꓖ ꓙꓳˍ ꓟ ꓟꓲ ꓮ ꓓꓲꓽ ꓣꓳꓸ ꓚꓵˍ ꓟ ꓕꓲ ꓫꓵꓽ ꓥ ꓡꓳ=
