ꓦꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓖꓪ ꓙꓱ ꓜꓲꓼ ꓔ ꓟ ꓠꓯꓸꓼ ꓗꓪ (ꓠꓳꓸ 53) ꓗꓪ ꓠꓬ ꓡꓲꓽ ꓒꓰꓼ ꓚꓱꓹ ꓔꓯ ꓟꓳꓸ ꓕꓱ ꓡꓰ ꓐꓯ ꓔ ꓟ ꓙꓳˍ ꓐꓭ=
1ꓸ ꓞꓳ ꓤꓽ ꓕꓲ ꓤꓳ ꓧꓪꓽ ꓖꓳ ꓓꓱꓽˍ ꓐꓰ ꓠꓲꓹ ꓟ ꓓꓵꓽ ꓙˍ ꓟ ꓔꓯ ꓟꓳꓸ ꓟꓬꓽ ꓠꓬꓲ ꓐꓷꓹ ꓠꓬꓲ ꓐꓲ ꓜꓲꓼ ꓡꓰ ꓠ ꓪꓴꓽ ꓡ ꓟꓴ ꓡ ꓝꓲˍ ꓟ ꓚꓱꓹ ꓥ ꓕ ꓑꓳꓸ ꓔꓯ ꓡꓲꓽ ꓒꓲꓼ ꓐꓯˍ ꓟ ꓥˍ ꓡꓳ꓾ ꓐꓰ ꓕꓱ ꓡꓰ ꓐꓯ ꓔ ꓡꓳ=
2ꓸ ꓟꓲ ꓠꓯ ꓕꓱ ꓟ ꓔꓯ ꓡꓳꓸ ꓐꓲꓻ ꓠ꓾ ꓮꓽ ꓘꓶꓸ ꓐꓲ ꓠ ꓮꓽ ꓘꓶꓸ ꓙꓲꓻ ꓠ ꓡꓳꓸ ꓙ ꓟꓳꓽ ꓙ ꓗꓽ ꓕꓸ ꓙˍ ꓟ ꓠꓯꓸꓼ ꓗꓪ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓢꓳ ꓣꓴˍ ꓟ ꓟꓬꓱꓽ ꓚꓱꓹ ꓥ ꓕ ꓑꓳꓸ ꓔꓯ ꓐꓯˍ ꓟ ꓥ ꓐꓭ=
3ꓸ ꓟꓲ ꓠꓯ ꓞꓳ ꓤꓽ ꓐꓯˍ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓬꓲ ꓜꓴ ꓬꓲ ꓟꓯꓼ ꓔꓶˍ ꓟ꓾ ꓕꓲꓽ ꓦꓲꓺ ꓡꓽ ꓞꓳ ꓔꓶˍ ꓟ꓾ ꓘꓹ ꓘꓴꓽ ꓡꓳ ꓛꓳꓽ ꓞꓳ ꓘꓹ ꓕꓱ ꓡꓰ ꓔꓶ ꓢꓲ ꓠꓬꓲ ꓚꓲꓸ ꓛꓬꓽ ꓡꓲꓽ ꓒꓰꓼˍ ꓐꓰ ꓛꓳ ꓚꓱꓹ ꓔꓯ ꓟꓬꓽ ꓠꓬꓲ ꓛꓳ ꓫꓱꓽ ꓐ ꓡ ꓠꓹ ꓟ ꓢꓯꓼ ꓕꓵꓼˍ ꓟ ꓔꓯ ꓐꓯˍ ꓟ ꓥ ꓐꓭ=
4ꓸ ꓚꓲꓸ ꓛꓬꓽ ꓞꓲꓼˍ ꓐꓰ ꓞꓳ ꓫꓵꓽ ꓞꓳ ꓙꓰꓽ ꓮꓽ ꓙꓵꓽ ꓐꓱ ꓶ ꓕꓲꓽ ꓦꓲ ꓡꓽ ꓞꓳˍ ꓡꓰ ꓐꓰ ꓒꓬꓱꓼ ꓡ ꓠꓹ ꓟ ꓐꓱ ꓶ ꓪꓴꓽ ꓡ ꓟꓴ ꓡ ꓠ ꓪ ꓙꓵꓽ ꓪꓽ ꓐꓱ ꓶ ꓣꓳꓽ ꓬꓰˍ ꓟ ꓠꓯꓸꓼ ꓗꓪ ꓦ ꓕꓲꓽ ꓒꓳꓹ ꓢꓲ ꓔꓳꓹ ꓜꓳꓽˍ ꓟ꓾ ꓚꓲꓸ ꓛꓬꓽ ꓒꓬꓱꓼ ꓠꓲꓹ ꓫꓵˍ ꓟ ꓐꓱ ꓶ ꓬꓲ ꓙꓵ, ꓖꓶˍ ꓟ꓾ ꓝꓸ ꓡꓯꓽ ꓘꓳˍ ꓟ꓾ ꓡꓳꓸ ꓙ ꓟꓳꓽ ꓙ ꓗꓽ ꓕꓸ ꓙ ꓖꓶˍ ꓟ ꓮꓽ ꓙꓵꓽ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ꓾ ꓐꓰ ꓕꓱ ꓡꓰ ꓐꓯ ꓔ ꓡꓳ=
ꓦꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓡꓲꓽ ꓒꓰꓽ ꓔꓯ 4 ꓫꓵꓽ ꓕꓱ ꓡꓰ ꓙꓳˍ ꓡꓳ꓾ ꓐꓰ ꓐꓯ ꓟꓸ ꓖꓶˍ ꓡꓳ=
1ꓸ ꓞꓳ ꓤꓽ ꓠꓬ ꓟꓬꓽ ꓠꓬꓲ ꓐꓷˍ ꓠꓬꓲ ꓐꓲ ꓜꓲꓼˍ ꓟ ꓠꓯꓸꓼ ꓗꓪ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓦ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓥˍ ꓟꓲ ꓧꓪꓽ ꓖꓳ ꓓꓱꓽ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓥˍ ꓟꓲ ꓢꓯꓼ ꓕꓵꓼˍ ꓟ ꓮꓽ ꓙꓵꓽ ꓔꓯ ꓐꓯˍ ꓟ ꓥ ꓐꓭ= ꓕꓱ ꓡꓰ ꓐꓯˍ ꓟ ꓠꓯꓸꓼ ꓗꓪ ꓧꓪꓽ ꓖꓳ ꓓꓱꓽ ꓡꓲꓽ ꓒꓰꓼ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓔꓯ ꓟꓳꓸ ꓡꓲꓽ ꓒꓰꓼ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳꓽˍ ꓟ ꓔꓯ ꓟꓳꓸ ꓕꓱ ꓟ ꓔꓯ ꓪꓴꓸ ꓓꓵ ꓛꓹ ꓔ ꓟ ꓔꓯ ꓡꓳꓸ ꓟꓳˍ ꓡꓳ=
2ꓸ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓕ ꓑꓳꓸ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓙꓳˍ ꓟ ꓮꓽ ꓙꓵꓽ ꓔꓯ ꓞꓳ ꓤꓽ ꓢꓷꓸ ꓠꓲꓹ ꓞꓳ ꓤꓽ ꓢꓯꓼ ꓪꓽ ꓞꓳ ꓤꓽ ꓠꓵꓻ ꓠꓲꓹ ꓗꓪ ꓐꓰ ꓡꓳꓸ ꓙ ꓟꓳ ꓙ ꓗꓽ ꓕꓸ ꓙ ꓢꓲ ꓟꓲ ꓠꓯ ꓕꓱ ꓟ ꓔꓯ ꓮꓽ ꓘꓶꓸ ꓗꓹ ꓛꓲ ꓠ꓾ ꓙꓳ ꓢꓻ ꓔꓬꓹ ꓢꓻ ꓠˍ ꓟ ꓐꓱ ꓶ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓒꓳꓹ ꓡꓶꓸ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓐꓭ= ꓖꓳ ꓟ ꓡꓰꓽ ꓟꓽ ꓞꓲ ꓚꓰꓼ ꓢꓴ ꓢꓲꓺ ꓒꓽ ꓠꓬ ꓟꓲ ꓠꓯ ꓕꓱ ꓟ ꓔꓯ ꓟꓲ ꓠꓯ ꓞꓳ ꓤ ꓐꓱ ꓶ ꓚꓰꓼ ꓔ ꓟ ꓥ ꓢꓲ꓾ ꓕꓱ ꓟ ꓔꓯ ꓙꓳ ꓢꓻ ꓔꓬꓹ ꓢꓻˍ ꓟ ꓒꓬꓱꓼ ꓡ ꓠ, ꓟ ꓐꓱ ꓶ ꓮ ꓕꓯ ꓥˍ ꓟꓲ ꓡꓳꓸ ꓙ ꓟꓳ ꓙ ꓗꓽ ꓕꓸ ꓙ ꓖꓶ ꓢꓲ ꓟꓬꓽ ꓠꓬꓲ ꓙꓲꓻ ꓠ ꓒꓳꓹ ꓡꓶꓸ ꓠ, ꓟ ꓐꓰ ꓟꓲ ꓠꓯ ꓕꓱ ꓟ ꓔꓯ ꓙꓵꓽ ꓠꓹ ꓟ ꓐꓱ ꓶ ꓙꓵꓽ ꓪꓽ ꓒ ꓐꓲ ꓖꓶ ꓔ ꓡꓳ ꓐꓰ ꓬꓲ ꓚꓰ ꓬꓲ ꓪꓴꓸ ꓕꓳ ꓶ (1ꓽ28) ꓗꓪ ꓐꓯ ꓔ ꓡꓳ=
3ꓸ ꓞꓳ ꓤ ꓮꓽ ꓟꓬꓹ ꓐꓱ ꓶ ꓓꓵꓽ ꓙꓽ ꓢꓲ ꓚiꓸ ꓛꓬꓽ ꓐꓱ ꓶ ꓡꓰ: ꓟꓽ ꓥ ꓬꓲ ꓜꓴ ꓬꓲ ꓟꓯꓼ ꓐꓱ ꓶ ꓞꓳ ꓤ ꓮꓽ ꓟꓬꓹ ꓐ ꓪ ꓠ ꓬꓰˍ ꓟ ꓚꓱꓹ ꓥ ꓪ= ꓖꓳ ꓡꓰ ꓬꓰˍ ꓕꓯ ꓠꓬ ꓙꓲY ꓖꓴ ꓙꓳˍ ꓟ ꓛꓳ ꓚꓱꓹ ꓡꓰ ꓡꓲꓽ ꓒꓰ; ꓗ ꓫꓵ ꓛꓳ ꓚꓱꓹ ꓕꓱ ꓡE ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=
4ꓸ ꓡꓲꓽ ꓒꓰꓼ ꓐꓯˍ ꓟ ꓠꓬ ꓟꓬꓱꓽ ꓬꓰˍ ꓟ ꓟꓬꓱꓽ ꓮ ꓟꓬ ꓗꓪ ꓛꓲ ꓒꓵꓽˍ ꓟ꓾ ꓔꓳꓹ ꓜꓳ:ˍ ꓟ ꓮ ꓟꓬ ꓗꓪ ꓛꓲ ꓒꓵꓽˍ ꓟ꓾ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓮ ꓟꓬ ꓗꓪ ꓛꓲ ꓒꓵꓽˍ ꓟ꓾ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓮ ꓟꓬ ꓗꓪ ꓛꓲ ꓒꓵꓽˍ ꓟ꓾ ꓕꓱ ꓟ ꓔꓯ ꓟꓸ ꓖꓶˍ ꓟ ꓕꓱ ꓟ ꓔꓯ ꓐꓳ ꓒꓬꓱꓻ ꓩꓴˍ ꓟ꓾ ꓕꓱ ꓟ ꓔꓯ ꓡꓳꓸ ꓙ ꓟꓳ ꓙ ꓗꓽ ꓕꓸ ꓙ ꓖꓶˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓱ ꓡꓰ ꓬꓰˍ ꓕꓯ ꓠꓬ ꓛꓲ ꓡˍ ꓟ ꓤꓶꓻ ꓗꓪ ꓟ ꓤ ꓠꓱ ꓤ ꓐꓴ ꓔꓯ ꓟꓸ ꓖꓶˍ ꓟ ꓚꓱꓹ ꓥ ꓡꓳ= ꓖꓳ ꓡꓰ ꓬꓰˍ ꓟ ꓗꓪ ꓐꓰ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓠꓬ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓬꓰ ꓙ ꓔ ꓙˍ ꓟ ꓔꓯ ꓡꓲꓽ ꓒꓰꓼ ꓐꓰ ꓕꓱ ꓡꓰ ꓐꓯˍ ꓟ ꓥ ꓐꓭ=
