ꓟꓵꓽ ꓗꓳ, ꓓꓵ ꓓꓵ ꓙꓻ ꓡꓯ ꓘꓳˍ ꓟ ꓠꓬꓲ (World Communication Day) ꓕꓯ ꓬꓮꓥ‐ꓖꓳꓥ ꓡꓳ ꓒꓱ St. Mary Cathedral ꓪꓽ ꓘꓴ ꓦꓲꓻ ꓗꓪ ꓟꓲ‐ꓢ ꓬꓰ ꓪꓽ ꓘꓴˍ ꓕꓯ꓾ ꓔꓲꓺ ꓒ ꓓꓽ Maurice Nyunt Wai ꓡꓰ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ꓾ (59) ꓧꓪ, ꓟ ꓟꓵꓽ ꓗꓳ, ꓓꓵ ꓓꓵ ꓙꓻ ꓡꓯ ꓘꓳˍ ꓟ ꓠꓬꓲ (World Communication Day) ꓐꓱ ꓶ ꓔꓲ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓐꓯ ꓘꓶꓽ ꓔꓯ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿
(59) ꓧꓪ, ꓟ ꓟꓵꓽ ꓗꓳ, ꓓꓵ ꓓꓵ ꓙꓻ ꓡꓯ ꓘꓳˍ ꓟ ꓠꓬꓲ (World Communication Day) ꓐꓱ ꓶ ꓔꓲ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓐꓯ ꓘꓶꓽ ꓠꓬ “ꓠꓴ ꓠꓲ, ꓟ ꓠꓯꓸꓼ ꓗꓪ ꓓꓯˍ ꓟ ꓥꓳ ꓡꓳ. ꓓꓴ ꓔꓯ ꓠꓲ, ꓡꓱꓻ ꓡꓱˍ ꓡꓰ ꓐꓱꓻ ꓖꓶ” ꓥ ꓡꓳ꓿ ꓐꓯ ꓘꓶꓽ ꓕꓱ ꓟ ꓠꓬ 1 ꓒꓲ‐ꓕꓱ ꓕꓳꓽ ꓶ ꓗꓪ 3ꓽ15 ꓔꓯ ꓬꓲ ꓚꓰ ꓣꓴ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓵꓻ ꓗꓷ ꓟ ꓢꓲꓽ ꓫꓬ ꓕꓳꓽ ꓶ ꓬꓲ ꓪꓴ. ꓕꓲ ꓕꓱꓻ ꓟ (ꓠꓰ‐ꓬꓴ‐ꓟꓷ 8ꓽ2‐10) ꓗꓪ ꓔꓲ ꓒ ꓐꓰ ꓙꓵꓽ ꓗ ꓕꓳꓽ ꓶ ꓢꓷ. ꓢꓴ ꓥ ꓟ ꓱ‐ꓢꓶ‐ꓡ ꓠꓬ ꓬꓲ ꓠꓲ, ꓟ ꓠꓯꓸꓼ ꓗꓪ ꓟ ꓥꓳ ꓡꓳ. ꓓꓴ ꓔꓯ ꓟꓳ‐ꓫꓲ ꓬꓲ ꓙꓵꓽ ꓗ ꓕꓳꓽ ꓶ ꓵꓻ ꓟ. ꓖꓶˍ ꓟ ꓗꓪ ꓐꓰ ꓑ ꓙꓽ ꓗꓷ ꓟ ꓑ ꓫꓬ ꓠꓬ ꓠꓲ, ꓟ ꓜꓲ ꓡꓰ ꓢꓲ ꓥꓴꓻˍ ꓡꓳ꓾ ꓐꓰ ꓐꓯ ꓔ ꓡꓳ꓿
539 ꓐꓚꓰ ꓕꓯ ꓒ‐ꓫ ꓪ ꓔꓲ. ꓢꓬꓣꓴꓢ ꓠꓬ ꓐ‐ꓐꓲ‐ꓡꓶ ꓰꓟꓑꓰꓣꓳꓣ ꓔꓯ ꓓꓶꓽ ꓧꓪ. ꓡꓰ ꓗꓷꓳ꓿ 538 ꓐꓚꓰ ꓕꓯ ꓪ ꓔꓲ. ꓢꓬꓣꓴꓢ ꓔꓧꓰ ꓖꓣꓰꓮꓔ ꓠꓬ ꓚꓳ ꓑ. ꓕꓲ ꓣꓳˍ ꓡꓰ ꓐꓰ ꓐ‐ꓐꓲ‐ꓡꓶ ꓗꓪ ꓘꓴꓻ ꓔꓯ, ꓙꓰ ꓟꓶ ꓗꓷꓳ꓿ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓔꓯ ꓚꓲ. ꓛꓬ ꓟꓵꓽ ꓗꓪ ꓬꓲꓼ ꓙꓰ ꓝꓲ ꓗꓷꓳ꓿ ꓙꓵꓽ ꓗ ꓢꓷ. ꓒ ꓐꓰ ꓔꓲ ꓒ ꓥ ꓟ ꓱ‐ꓢꓶ‐ꓡ ꓡꓰ ꓧꓳꓽ ꓣꓱꓽˍ ꓟ ꓕꓲ ꓜꓴꓻ ꓠꓬ ꓬꓲ ꓪ ꓟꓵꓽ ꓗꓪ ꓬꓲꓼ ꓙꓰˍ ꓟ ꓠꓯꓸꓼ ꓗꓪ (3) ꓜꓴꓻ ꓕꓲ ꓜꓴꓻ ꓟ ꓥ ꓡꓳ꓿ 457 ꓐꓚꓰ ꓕꓯ ꓬꓲꓼ ꓡ ꓗꓷ ꓟ ꓕꓲ ꓜꓴꓻ ꓕꓲ ꓧꓳꓽ ꓥ ꓡꓳ꓿
ꓐꓬ ꓡꓰ ꓟ ꓙꓱ‐ꓡꓱ‐ꓢ‐ꓡꓱ ꓡꓳ ꓒꓱ ꓘꓴꓽ ꓗꓪ ꓐꓰ ꓑ ꓫꓬꓼ ꓐꓴ ꓔꓯ ꓔꓲ ꓒ ꓐꓰ ꓙꓵꓽ ꓗ ꓢꓷ. ꓒ ꓥ ꓟ ꓱ‐ꓢꓶ‐ꓡ ꓠꓬ ꓟꓳ‐ꓫꓲ ꓙꓵꓽ ꓗ ꓕꓳꓽ ꓶ ꓔꓯ ꓵꓻ ꓟ. ꓖꓶˍ ꓡꓳ꓿ ꓬꓲ ꓘꓳꓼ (70) ꓘꓳꓼ ꓛꓲ ꓐ‐ꓐꓲ‐ꓡꓶ ꓗꓪ ꓫ. ꓙꓵ ꓗꓷ ꓟ꓾ ꓘꓶꓻ ꓙꓵ ꓟꓶ ꓗꓷ ꓟ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓠꓬ ꓚꓲ. ꓛꓬ ꓟꓵꓽ ꓗꓪ ꓛꓲ ꓬꓰ ꓢꓲ ꓪꓴ‐ꓢ ꓐꓯ ꓘꓶꓽ ꓔꓯ ꓑ ꓙꓽ ꓡꓰ ꓕꓯ ꓠꓬ ꓥꓳ ꓡꓳ. ꓓꓴ ꓛꓲ ꓡꓯꓼ ꓠꓬ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓐꓲ ꓡꓶ ꓡ ꓢꓲ ꓠꓬꓲ꓾ ꓥꓴꓻ ꓔꓴ ꓡˍ ꓡꓳ꓿ ꓗ, ꓛꓲꓽ ꓠꓬꓲ ꓓꓳ ꓡˍ ꓟ ꓟꓬ ꓐꓲ ꓥ ꓡꓳ꓿ ꓕꓱ ꓟ ꓔꓯ “ꓘꓴꓽ ꓦꓻ ꓕꓯꓽ ꓢꓲ ꓗꓪ ꓟ ꓥꓳ ꓡꓳ. ꓓꓴ ꓟꓬ ꓐꓲ” ꓐꓰ ꓥꓪ ꓡꓰ ꓔꓯꓺ ꓢꓲ ꓐꓯ ꓠꓲ, ꓫꓵˍ ꓡꓳ꓿
ꓐꓬ ꓡꓰ ꓟ ꓡꓳ ꓒꓱ ꓔꓯ ꓥꓳ ꓡꓳ. ꓓꓴ ꓡꓰ ꓝꓮꓲ ꓕꓲ ꓧꓪ, ꓫꓬ, ꓜꓶˍ ꓡꓳ꓿ ꓕꓱ ꓥꓳ ꓡꓳ. ꓓꓴ ꓗꓪ ꓐꓰ ꓢꓲꓽ ꓫꓬ ꓦꓲꓻ ꓐꓰ ꓡꓳ ꓒꓱ ꓚꓬ, ꓔꓯ ꓝꓮꓲ ꓕꓲ ꓧꓪ, ꓫꓬ, ꓜꓶˍ ꓡꓳ꓿ ꓝꓮꓲ ꓕꓲ ꓧꓪ, ꓬꓲ‐ꓢꓷ‐ꓡꓰ ꓡ ꓞꓳ ꓐꓰ ꓬꓲ‐ꓢꓷ‐ꓡꓰ ꓗꓴꓷꓼ ꓝꓮꓲ ꓕꓲ ꓧꓪ, ꓫꓬ, ꓜꓶ ꓡ ꓟ ꓠꓬ ꓬꓰ‐ꓢꓴ ꓙꓲ‐ꓢꓴ ꓦꓬꓼ ꓠꓬꓲ ꓗꓪ ꓛꓲ ꓥ ꓡꓳ꓿
ꓬꓰ‐ꓢꓴ ꓙꓲ‐ꓢꓴ ꓥˍ ꓟꓲ ꓬꓲ ꓠꓲ, ꓟ ꓠꓯꓸꓼ ꓗꓪ ꓓꓯˍ ꓟ ꓥꓳ ꓡꓳ. ꓓꓴ ꓔꓯ ꓠꓲ, ꓡꓱꓻ ꓡꓱˍ ꓡꓰꓽ ꓐꓱꓻ ꓖꓶ ꓠ, ꓟ ꓠ‐ꓢ‐ꓡꓱ ꓡꓳ ꓒꓱ ꓗꓪ ꓟ ꓜꓲꓼ ꓦꓲ ꓗꓪ ꓬꓲ‐ꓢ‐ꓬ ꓢꓲꓽ ꓫꓬ ꓕꓳꓽ ꓶ ꓔꓯ ꓵꓻ ꓟ. ꓖꓶˍ ꓡꓳ꓿ “ꓢꓲ ꓒ ꓬꓲ ꓦ ꓠꓬ ꓥꓪ ꓠꓯꓸꓼ ꓗꓪ ꓔꓬ ꓡꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓫ. ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓚ ꓟ. ꓖꓶ ꓠ, ꓟ ꓬꓲ ꓡꓰ ꓥꓪ ꓔꓯ ꓟꓰ ꓞꓶ ꓟꓰ ꓗꓷꓳ꓿” ꓕꓱ ꓡꓰ ꓐꓯ ꓢꓲ ꓬꓲ ꓥꓳ ꓡꓳ. ꓓꓴ ꓔꓯ ꓠꓲ, ꓡꓱꓻ ꓡꓱˍ ꓡꓰꓽ ꓐꓯ ꓟ. ꓖꓶˍ ꓡꓳ꓿ “ꓪꓳꓽ ꓞ, ꓢꓴ ꓔꓯ ꓩꓴ ꓗꓷˍ ꓟ ꓓꓳꓽ ꓚ ꓟ. ꓠ, ꓟ꓾ ꓟꓬ ꓔꓶ ꓠꓬꓲ ꓟꓳ ꓡ ꓠ, ꓟ꓾ ꓠꓬꓲ. ꓬꓯꓼ ꓢꓴ ꓔꓯ ꓩꓴ ꓗꓷ ꓠ, ꓟˍ ꓐꓰ꓾ ꓢꓲ ꓒ ꓡꓰ ꓬꓲ ꓣꓱꓽ ꓛꓰ ꓟꓳ. ꓖꓶˍ ꓟ ꓘꓳꓼ ꓙꓴꓐꓲꓡꓰꓰ ꓘꓳꓼ ꓚ ꓟ. ꓖꓶ ꓠ, ꓟ” ꓕꓱ ꓡꓱ ꓐꓯ ꓗꓷ ꓗ ꓠꓯ.꓾ ꓕꓱ ꓟ ꓠꓬ ꓮ ꓟꓶ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓐꓲ ꓡꓰꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿
ꓖꓳ ꓡꓱ ꓥ ꓟꓲ ꓬꓲ ꓐꓯ ꓖꓶˍ ꓟ ꓔꓯ ꓬꓲ ꓕꓲ ꓡꓳ ꓒꓱ ꓢꓴ ꓐꓴ ꓠꓬ ꓟꓽ ꓘꓳ ꓣꓴ꓿ ꓠ‐ꓢ‐ꓡꓱ ꓡꓳ ꓒꓱ ꓢꓴ ꓐꓴ ꓠꓬ ꓟꓽ ꓘꓳ ꓣꓴ꓿ ꓢꓲ ꓒ ꓐꓯ ꓘꓶꓽ ꓔꓯ ꓬꓲ ꓪ ꓓꓵꓽ ꓙ ꓮʼ ꓡꓰ ꓢꓲ “ꓕꓱ ꓕꓲ ꓣꓳ ꓟ ꓠꓬ ꓬꓳ‐ꓢꓷ ꓬꓲ ꓤ ꓟꓽ ꓥ ꓡ꓾ ꓬꓲ ꓮ ꓡꓲ ꓗꓪ ꓐꓰ ꓢꓷ. ꓠꓲ, ꓙꓽ ꓗꓴ. ꓠꓲ, ꓕꓱ ꓟ ꓔꓯ ꓟꓶ ꓔ ꓡ” ꓕꓱ ꓡꓱ ꓐꓯ ꓢꓲ ꓠꓬꓲ ꓬꓲ ꓔꓯ ꓟꓽ ꓘꓳ ꓣꓴ꓿ ꓢꓲ ꓒ ꓬꓰ‐ꓢꓴ ꓠꓽ ꓬꓲ ꓥꓳ ꓡꓳ. ꓓꓴ ꓔꓯ ꓡꓯꓼ ꓕꓲ ꓬꓰ ꓠ, ꓟ ꓮ ꓣꓳ ꓤˍ ꓡꓰ ꓐꓰ꓾ ꓢꓰꓼ ꓠ, ꓟ ꓣꓴ ꓔꓯ, ꓙꓰ ꓟꓶˍ ꓟ ꓮ ꓣꓳ ꓤˍ ꓡꓰ ꓐꓰ ꓠꓲ, ꓡꓱꓻ ꓡꓱˍ ꓡꓰꓽ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓬꓲ ꓢꓯꓼ ꓟꓬ ꓖꓶ ꓗꓷꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓥꓳ ꓡꓳ. ꓓꓴ ꓔꓯ ꓝ. ꓢꓲ ꓣꓱꓽ ꓬꓰ ꓢꓴ ꓠꓬ ꓒꓳ‐ꓡꓳ ꓥ ꓡꓳ꓿ ꓬꓲ ꓥꓳ ꓡꓳ. ꓓꓴ ꓠꓬ꓾ ꓙꓵꓻ ꓢꓴ ꓐꓴ ꓬꓰ‐ꓢꓴ ꓙꓲ‐ꓢꓴ ꓠꓯꓸꓼ ꓗꓪ ꓕꓲ ꓠꓲ, ꓕꓲ ꓪꓽ ꓕꓲ ꓖꓳ ꓓꓱꓽ ꓒꓬꓱꓼ ꓡ ꓠ, ꓟ (1 ꓘꓳ‐ꓡꓱ‐ꓕꓴ 12ꓽ) ꓗꓪ ꓟꓳꓻ ꓪ ꓓ, ꓡꓳ꓿ 12ꓽ12 ꓗꓪ ꓮ ꓡꓲ ꓐꓯ ꓔ ꓡ ꓐꓯˍ ꓠꓬ꓾ ꓖꓳ ꓓꓱꓽ ꓡꓯꓼ ꓗ. ꓮꓽ ꓟꓬ, ꓙꓳˍ ꓟꓲ ꓕꓲ ꓖꓳ ꓓꓱꓽˍ ꓡꓰꓽ ꓥ ꓟˍ ꓡꓰ ꓐꓰ꓾ ꓙꓲ‐ꓢꓴ ꓔꓯ ꓙꓵꓻ ꓢꓴ ꓐꓴˍ ꓟꓲ ꓖꓳ ꓡꓱ ꓥꓳ꓿ ꓖꓳ ꓓꓱꓽ ꓗꓪ ꓟ ꓡꓯꓼ ꓗ. ꓐꓴ ꓠꓬ ꓟꓽ ꓫꓱ. ꓡꓯ ꓘꓳ꓿ ꓖꓳ ꓡꓱ ꓥ ꓟꓲ ꓮ ꓙꓵꓽ ꓠꓬ ꓕꓲ ꓟ ꓐꓰ ꓕꓲ ꓟ ꓙꓻ ꓡꓯ ꓘꓳ ꓔꓬ ꓢꓲ ꓖꓳ ꓓꓱꓽ ꓕꓲ ꓟˍ ꓡꓰ ꓥ ꓟ ꓡꓰ ꓐꓰ꓾ ꓢꓲ ꓤ ꓐꓴ ꓮ ꓙꓵꓽ ꓥˍ ꓟꓲ ꓕꓲ ꓠꓲ, ꓕꓲ ꓪ ꓬꓰ ꓠ, ꓟ ꓔꓯ ꓐꓯ ꓠꓲ, ꓫꓵˍ ꓟ ꓥ ꓡꓳ꓿
“ꓛꓲ ꓒꓯ, ꓛꓲ ꓕꓲꓽ ꓗꓷ ꓕꓯ ꓟꓬ ꓢꓶꓽ ꓡꓰ ꓡꓳ. ꓢꓲ ꓠꓬꓲ ꓠꓻ ꓓꓴ ꓑ ꓖꓳ ꓟ ꓔꓯ ꓡꓯꓽ ꓒꓯ, ꓡꓰ ꓠꓯꓻ ꓞꓲꓼ ꓟꓰˍ ꓡꓳ꓿ ꓦꓰꓼ ꓛꓲꓽ ꓙꓲꓻˍ ꓠꓬ ꓪꓴ. ꓓꓵ ꓟꓽ ꓠꓻ” ꓕꓱ ꓟ ꓠꓬ ꓖꓳ ꓓꓱꓽ ꓬꓲ ꓡꓯꓼ ꓗ. ꓕꓲ ꓟ ꓐꓰ ꓕꓲ ꓟ ꓬꓲ ꓙꓵ ꓙꓳ ꓙꓳˍ ꓡꓰꓽ ꓙꓻ ꓡꓯ ꓘꓳ ꓔꓬ ꓟ ꓔꓯ ꓖꓴ ꓟ. ꓖꓶ ꓔꓬ ꓟ ꓥ ꓡꓳ꓿ ꓕꓱ ꓟ ꓠꓬ ꓙꓻ ꓡꓯ ꓘꓳˍ ꓟ (Communication) ꓐꓱ ꓶ ꓔꓯꓺ ꓢꓳ ꓠ, ꓟ ꓢꓷ. ꓡꓰ ꓓꓴ ꓕꓲ ꓟ ꓥ ꓡꓳ꓿ ꓙꓻ ꓡꓯ ꓘꓳˍ ꓟ (Communication) ꓐꓱ ꓶ ꓔꓯꓺ ꓢꓳ ꓠ, ꓟ ꓢꓷ. ꓡꓰ ꓓꓴ ꓠꓬ ꓞꓳ ꓤ ꓖꓳ ꓓꓱꓽˍ ꓡꓰꓽ ꓥ ꓡꓳ꓿ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳˍ ꓟ ꓠꓬ ꓞꓳ ꓤ ꓜꓴꓻ ꓐꓱ ꓶ ꓙꓲꓻ ꓖꓴ ꓖꓶˍ ꓟ ꓐꓱ ꓶ ꓡꓰ ꓒꓬꓱꓼ ꓠꓯ, ꓟ ꓡꓰꓽ ꓟꓽ ꓞꓲ꓾ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓙꓲꓻ ꓓꓴ ꓐꓱ ꓶ ꓥˍ ꓟꓲ ꓥ ꓠ ꓗ, ꓡꓳ꓿
ꓕꓱ ꓗꓪ ꓔꓲ ꓒ ꓪ ꓔꓲ. ꓝꓣꓮꓠꓚꓲꓢ ꓬꓲ. Communication ꓐꓰ ꓗꓴ. ꓙꓲꓽ ꓙꓳˍ ꓟ ꓥꓳ ꓡꓳ. ꓓꓴ ꓔꓯ ꓝ. ꓢꓲ ꓐꓯ ꓟ. ꓖꓶ ꓠꓲ, ꓫꓵˍ ꓡꓳ꓿ ꓬꓲ ꓐꓯ ꓘꓶꓽ ꓘꓴꓽ ꓗꓪ ꓙꓻ ꓡꓯ ꓘꓳˍ ꓟ (Communication) ꓔꓯ “ꓥꓳ ꓡꓳ. ꓓꓴ ꓖꓶˍ ꓟ ꓙꓻ ꓡꓯ ꓘꓳˍ ꓟ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓾” ꓐꓰ ꓐꓯ ꓔ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓙꓻ ꓡꓯ ꓘꓳˍ ꓟ (Communication) ꓠꓬ ꓞꓳ ꓤ ꓐꓴ ꓔꓯ ꓙꓳꓺ ꓡꓰ ꓝꓲˍ ꓟ꓾ ꓠꓲ, ꓟ ꓙꓬ ꓡꓰ ꓝꓲˍ ꓟ꓾ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓙꓵꓻ ꓡꓯ ꓘꓳ ꓝꓲˍ ꓟ꓾ ꓠꓲ, ꓟ ꓦꓶꓻ ꓝꓲˍ ꓟ꓾ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓧꓳ, ꓡꓯ ꓘꓳ ꓟ ꓔꓯ ꓐꓱꓻ ꓖꓶ ꓔꓬ ꓟ ꓑꓶ. ꓓꓴ꓾ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓐꓬ ꓡꓰ ꓝꓲˍ ꓟ꓾ ꓬꓲ ꓗꓪ ꓗꓪ ꓡꓰ ꓝꓲˍ ꓟ ꓑꓶ. ꓓꓴ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓠꓽ ꓗꓷ ꓠ, ꓟ ꓕꓵꓼ ꓪ ꓖꓶ ꓔ ꓡꓳ꓿
ꓥ ꓡꓳ꓿ ꓟꓰꓓꓲꓮ ꓐꓯˍ ꓟ ꓠꓬ ꓟꓽ ꓙꓲꓻ ꓟ ꓟꓽ ꓥ ꓥ꓾ ꓠꓵꓻ ꓠꓲ, ꓐꓱ ꓶˍ ꓡꓰꓽ ꓥ ꓠ ꓗ, ꓡꓳ꓿ ꓔꓲ ꓒ ꓪ ꓔꓲ. ꓬꓲ ꓙꓻ ꓡꓯ ꓘꓳˍ ꓟ (Communication) ꓔꓯ ꓟꓳ. ꓬꓲ ꓥꓳ ꓡꓳ. ꓓꓴ ꓔꓯ ꓮ ꓟꓶ ꓟ ꓡꓰ ꓐꓯ ꓟ. ꓖꓶ ꓔ ꓡꓳ꓿ “ꓫ. ꓙꓵˍ ꓟ ꓦꓬꓼ ꓠꓬꓲ ꓗꓪ ꓥꓳ ꓡꓳ. ꓓꓴ ꓐꓰ ꓕꓲ ꓪ ꓙꓻ ꓫꓱꓽ ꓔꓬ ꓢꓴ ꓐꓴ ꓒꓬꓱꓼ ꓡꓰ ꓝꓲˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿ ꓫꓬꓽ ꓫꓬꓽ ꓡꓬ. ꓡꓬ. ꓡꓰꓽ ꓗ, ꓟ꓾ ꓙꓲꓻ ꓔꓱ,ˍ ꓟ ꓔꓯ ꓟꓬꓽ ꓡ ꓝꓲ ꓢꓲ ꓠꓬꓲ꓾ ꓠꓲ, ꓟ ꓦꓶꓻ ꓠꓲ, ꓡꓰ ꓒꓳ, ꓖꓶˍ ꓟ ꓟꓽ ꓙꓳ ꓟ꓾ ꓠꓲ, ꓟ ꓗꓪ ꓕꓲꓺ ꓡꓰ ꓝꓲ ꓐ ꓡˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿ ꓠꓲ, ꓟ ꓙꓬ ꓓꓴ ꓘꓴꓽ ꓠꓯꓸꓼ ꓗꓪ ꓐꓰ ꓥꓳ ꓡꓳ. ꓓꓴ ꓔꓯ ꓖꓴ ꓟ. ꓖꓶ ꓐ ꓡˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿ ꓠꓱ. ꓐꓯ ꓢꓴ ꓐꓱ ꓶ ꓓꓵꓽ ꓙꓽˍ ꓟ꓾ ꓢꓴ ꓔꓯ ꓬꓰ ꓙ ꓠꓲ, ꓫꓵˍ ꓟ ꓠꓲ, ꓟ ꓙꓳ ꓡ ꓝꓲˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿
ꓣꓳ ꓔꓬ, ꓟ ꓕꓱ ꓟꓲ ꓠꓯ ꓦꓲꓻ ꓔꓯ ꓠꓬꓲ ꓡꓳ. ꓗꓪꓼ ꓫꓵꓼˍ ꓟ ꓔꓯ ꓕꓲ ꓠꓲ, ꓕꓲ ꓪ ꓬꓰ ꓢꓲ ꓠꓬꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓒꓵꓽ ꓡꓯ ꓘꓳˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿ ꓕꓲ ꓣꓳ ꓐꓰ ꓕꓲ ꓣꓳ ꓓꓵꓽ ꓙꓽ ꓥꓳꓽ ꓡꓰˍ ꓟ꓾ ꓙꓳꓺˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓙꓻ ꓡꓯ ꓘꓳˍ ꓟ ꓟꓰꓓꓲꓮ ꓟꓽ ꓥ ꓥ꓾ ꓥꓳ ꓡꓳ. ꓓꓴ ꓐꓱ ꓶ ꓬꓰ ꓙ ꓔꓳ, ꓙˍ ꓟ ꓙꓻ ꓡꓯ ꓘꓳˍ ꓟ (Communication) ꓔꓯ ꓥꓳ ꓡꓳ.ˍ ꓡꓳ꓿
ꓕꓱ ꓡꓱ ꓒꓬꓱꓼ ꓡ ꓠ, ꓟ ꓣꓳꓽ ꓠꓯꓸꓼ ꓗꓪ ꓙꓳˍ ꓟ ꓠꓻ ꓔꓯ ꓧꓶ. ꓕꓯ ꓫꓬ, ꓠ ꓗ, ꓡꓳ꓾ ꓐꓰ ꓔꓲ ꓒ ꓪ ꓔꓲ. ꓡꓰ ꓐꓯˍ ꓡꓳ꓿ ꓠꓻ ꓕꓱ ꓟ ꓮ ꓫꓵꓽ ꓥ ꓡ ꓐꓯ ꓠꓬ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓬꓱ ꓓꓳꓽ ꓙꓳ ꓢꓴ ꓚꓬ, ꓟ꓾ ꓚꓲ. ꓛꓬ ꓙꓲꓻ ꓖꓴ ꓠꓯꓸꓼ ꓗꓪ ꓡꓰꓽ ꓞꓳ ꓙꓳ ꓔꓬ ꓟ꓾ ꓚꓲ. ꓛꓬ ꓖꓳ ꓓꓱꓽ ꓟꓬꓱ ꓓꓳꓽ ꓙꓳ ꓡ ꓠ, ꓟ ꓐꓱ ꓶ ꓠꓱ. ꓐꓯ ꓢꓴ ꓔꓯ ꓐꓯ ꓞꓷ,ˍ ꓟ꓾ ꓚꓲ. ꓛꓬ ꓢꓯꓼ ꓪꓽ ꓠꓬꓲ ꓡ ꓠ, ꓟ ꓐꓱ ꓶ ꓠꓱ. ꓐꓯ ꓢꓴ ꓔꓯ ꓢꓯꓼ ꓓꓽ ꓟ ꓡꓰ ꓘꓴꓻˍ ꓟ꓾ ꓕꓱ ꓟꓬ ꓟ ꓠꓻ ꓔꓯ ꓧꓶ. ꓕꓯ ꓫꓬ, ꓗꓷ ꓠ, ꓟ ꓕꓵꓼ ꓪ ꓖꓶ ꓔ ꓡꓳ꓿ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓧꓳ, ꓫꓵꓽ ꓧꓳ,ˍ ꓟ ꓐꓰ꓾ ꓠ ꓠ, ꓖꓶ ꓗꓴ.ˍ ꓟ ꓐꓰ ꓚꓲ. ꓛꓬ ꓠꓯꓸꓼ ꓗꓪ ꓙꓳˍ ꓟ ꓣꓱꓽ ꓛꓰꓽ ꓔꓯ ꓮ ꓟꓬ, ꓐꓱ ꓶ ꓣꓱꓽˍ ꓟ ꓗꓪ ꓐꓰ “Pilgrims of Hope ꓥꓳ ꓡꓳ. ꓓꓴ ꓬꓲ ꓟꓴꓽ ꓗꓪ ꓗꓴꓷꓼ ꓓꓴ ꓓꓳ ꓢꓴ ꓐꓴ” ꓒꓬꓱꓼ ꓠ, ꓟ ꓐꓱ ꓶ ꓔꓲ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓕꓵꓼ ꓪ ꓖꓶ ꓔ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓲ, ꓟ ꓗꓪ ꓓꓯˍ ꓟ ꓥꓳ ꓡꓳ. ꓓꓴ ꓔꓯ ꓱ‐ꓢꓶ‐ꓡ ꓔꓲ ꓒ ꓐꓰ ꓙꓵꓽ ꓗ ꓢꓷ. ꓢꓴˍ ꓡꓰ ꓐꓰ꓾ ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓐꓰ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓰ꓾ ꓔꓲ ꓒ ꓪ ꓔꓲ. ꓡꓰ ꓐꓰ ꓠꓲ, ꓡꓱꓻ ꓡꓱˍ ꓡꓰꓽ ꓐꓱꓻ ꓖꓶ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿
