ꓢꓲꓺ ꓒ ꓬꓰ-ꓢꓴ ꓠꓬ ꓕꓳꓼ ꓡ ꓟꓵꓽ ꓤ ꓜꓶꓽ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓓꓵꓽ ꓡˍ ꓟ ꓥ ꓪ(ꓟ-ꓘꓳ 21)= ꓖꓳ ꓟ ꓟ-ꓘꓳ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓐꓴ ꓔꓯ “ꓠꓴ ꓪ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓙꓰ ꓢꓲ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓪꓴ-ꓢ ꓶꓼ ꓓꓳꓽ ꓫꓱ, ꓓꓳꓽ ꓚ ꓒꓬꓱꓻ ꓙꓰ” ꓐꓰ ꓕꓱ ꓡꓰ ꓐꓯ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓫꓵˍ ꓟ ꓠꓬ꓾ ꓬꓲ ꓠꓬ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓞꓳ ꓤ ꓮ ꓡꓰ ꓫꓵˍ ꓟ ꓖꓳ ꓡꓰ ꓫꓵˍ ꓟ ꓥ ꓢꓲ ꓠꓬꓲ 3 ꓦꓬꓽ ꓗꓸ ꓠꓯꓸ ꓢꓯꓸ ꓬꓲꓼ ꓡˍ ꓟ ꓥˍ ꓟ ꓪꓴ. ꓠꓬꓲ ꓕꓱ ꓟ ꓠꓬ ꓚꓵ ꓘꓶꓽ ꓓꓽ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓕꓲꓽ ꓣꓳ ꓠꓬ ꓞꓳ ꓤꓽ ꓕꓲꓽ ꓣꓳ ꓫꓵꓻˍ ꓟ ꓡꓰ ꓐꓰ ꓕꓲꓽ ꓡꓰ, ꓫꓵˍ ꓟ ꓥˍ ꓟ ꓪꓴꓸ ꓠꓬꓲ ꓬꓲ ꓠꓬ ꓟꓵꓽ ꓘꓳꓼ ꓔꓯ ꓮꓽ ꓘꓶꓸ ꓒꓵꓽ ꓢꓴ ꓥˍ ꓡꓳ꓾ ꓐꓯˍ ꓟ ꓬꓲ ꓢꓷꓸ ꓡꓰ ꓓꓴ ꓕꓲꓽ ꓟ ꓥ ꓪ=
ꓢꓲꓺ ꓒ ꓬꓰ-ꓢꓴ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓬꓰˍ ꓟ ꓟꓬꓱꓽ ꓥ ꓕ ꓑꓳꓸ ꓠꓬ ꓞꓳ ꓤ ꓐꓰ ꓚꓰꓼ ꓢꓴ ꓢꓲꓺ ꓒ ꓪꓴ-ꓢ ꓠꓬꓲꓽ ꓗꓴꓸ ꓚꓸꓼ ꓗꓪ ꓧꓳꓹ ꓡꓯꓽ ꓘꓳ ꓝꓲˍ ꓟ꓾ ꓠꓻ ꓓꓴ ꓒꓬꓽ ꓓꓴ ꓔꓯ ꓠꓻ ꓫꓬ, ꓒꓬꓽ ꓫꓬ, ꓖꓶˍ ꓟ꓾ ꓞꓳ ꓤꓽ ꓠꓲꓹ ꓟ ꓒꓳꓹ ꓡꓰꓼ ꓡ ꓠꓹ ꓟ ꓐꓱ ꓶ ꓟꓸ ꓖꓶˍ ꓟ ꓕꓱ ꓡꓰ ꓬꓰˍ ꓟ ꓠꓯꓸꓼ ꓗꓪ ꓮ ꓕꓯ ꓥˍ ꓟꓲ ꓕꓱ ꓡꓰ ꓬꓰ ꓓ ꓥ ꓐꓯˍ ꓟ ꓟꓽ ꓙꓳ꓿ ꓬꓲ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓮꓽ ꓙꓵꓽ ꓢꓴ ꓐꓱ ꓶ ꓕꓱ ꓡꓰ ꓬꓰˍ ꓟ ꓥ ꓪ= ꓬꓲ ꓕꓲꓽ ꓞꓲꓼ ꓡꓱꓸꓼ ꓪꓴ-ꓢ ꓐꓱ ꓶ ꓢꓯꓼ ꓕꓵꓼˍ ꓟ ꓚꓬꓴ. ꓙˍ ꓟ ꓟꓬꓱꓽ ꓬꓰˍ ꓟ ꓮꓽ ꓙꓵꓽ ꓠꓬ ꓟꓽ ꓓ ꓪꓴꓽ ꓖꓴ ꓡꓰ ꓟ ꓙꓲꓻ ꓖꓴ ꓙꓳˍ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓝꓲ ꓓꓴ ꓒꓳ-ꓡꓳ ꓡꓰ ꓮ ꓡꓰ ꓐꓯꓹ ꓡ ꓐꓯˍ ꓠꓬ “ꓢꓲꓺ ꓒꓽ ꓬꓰ-ꓢꓴ ꓠꓬ ꓚꓰꓼ ꓔ ꓟ ꓮꓽ ꓙꓵꓽ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓬꓲ ꓝꓳꓹ ꓟꓶ ꓠꓯꓸꓼ ꓗꓪ ꓔꓬ ꓡꓳ”꓾ ꓐꓰ ꓕꓱ ꓡꓰ ꓟꓸ ꓟꓲꓽ ꓚ ꓔ ꓟ ꓥ ꓡꓳ=
ꓢꓲꓺ ꓒ ꓬꓰ-ꓢꓴ ꓠꓬ ꓣꓳꓽ ꓟꓲ ꓠꓯ ꓞꓳ ꓤ ꓡꓰ ꓟꓳ ꓪ ꓟꓽ ꓓꓻ ꓟ ꓪꓴ-ꓢ ꓡꓰ ꓚꓰꓼ ꓔ ꓟ ꓚꓱꓹ ꓠꓯꓸꓼ ꓗꓪ ꓓꓽ ꓪꓴꓸ ꓥˍ ꓡꓳ= ꓟꓴ ꓗꓪ ꓐꓰ ꓟꓲ ꓠꓯ ꓗꓪ ꓟꓳ ꓪ ꓓˍ ꓟ ꓐꓰ ꓟꓳ ꓪ ꓟꓽ ꓓꓻ ꓟ ꓮꓽ ꓙꓵꓽ ꓠꓬ ꓬꓲ ꓡꓰ ꓚꓰꓼ ꓔ ꓟ ꓔꓯ ꓑꓯꓹ ꓟꓶˍ ꓡꓳ= ꓙꓵꓽ ꓠꓬꓲꓸ ꓕꓲ ꓗꓪ ꓔꓬ ꓢꓴ ꓥˍ ꓟꓲ꓾ ꓗꓴꓷꓼ ꓔꓯ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓥˍ ꓟꓲ꓾ ꓙꓵꓽ ꓪ ꓙꓳ ꓢꓴ ꓥˍ ꓟꓲ ꓮꓽ ꓙꓵꓽ ꓠꓬ ꓬꓲ ꓠꓯꓸꓼ ꓗꓪ ꓥ ꓢꓲ ꓬꓲ ꓐꓱ ꓶ ꓚꓰꓼ ꓔ ꓟ ꓥ ꓡꓳ= ꓬꓲ ꓠꓬ ꓚꓰꓼ ꓔ ꓟ ꓕꓲꓽ ꓫꓵꓽ ꓡꓰ ꓟꓽ ꓙꓳ ꓢꓰꓽ ꓧꓶꓸ ꓕꓯ ꓗꓪ ꓔꓬˍ ꓟ ꓙꓳˍ ꓟ ꓥ ꓢꓲ꓾ ꓙꓳˍ ꓟ ꓮꓽ ꓙꓵꓽ ꓠꓬ ꓬꓲˍ ꓐꓰ ꓕꓲꓽ ꓪ ꓥˍ ꓡꓳ (1 ꓘꓳ-ꓡꓱ-ꓕꓴ)= ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓐꓯ ꓘꓶꓽ ꓥ ꓢꓲ ꓪꓴ-ꓢ ꓬꓲ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓥˍ ꓟꓲ ꓥˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓬꓲ ꓚꓰ ꓬꓲ ꓪꓴꓸ ꓕꓯ ꓡꓰ ꓪꓴ-ꓢ ꓐꓰ ꓕꓲꓽ ꓪ ꓔꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓵꓽ ꓘꓳꓼ ꓬꓲ ꓚꓰ ꓬꓲ ꓪꓴꓸ ꓟ ꓥ ꓢꓲ ꓟꓵꓽ ꓘꓳꓼ ꓮꓽ ꓙꓵꓽ ꓢꓲꓺ ꓒꓽ ꓠꓬ ꓬꓲ ꓥ ꓡꓳ=
