ꓠꓬꓲꓽ ꓫꓵ. ꓡ ꓞꓳ ꓐꓯˍ ꓟ ꓠꓬ ꓕꓲ ꓪ ꓔꓬ ꓟ ꓬꓲ ꓦꓬꓼ ꓠꓬꓲ ꓟꓬꓽ ꓡ ꓠꓲ, ꓙꓳꓺ ꓡꓰˍ ꓟ ꓟꓽ ꓥ ꓥ꓾ ꓕꓲ ꓪ ꓔꓬ ꓟ ꓬꓲ ꓦꓬꓼ ꓠꓬꓲ ꓟꓶ ꓫꓵ ꓡ ꓪ ꓜꓲ ꓠꓲ, ꓠꓵ ꓡꓯ ꓘꓳ ꓠ ꓔ ꓡꓳ꓾ ꓐꓯ ꓟ ꓕꓲ ꓒꓳ, ꓗꓪ ꓐꓰ ꓢꓷ. ꓙ ꓟꓳ ꓙ ꓩꓴ ꓡˍ ꓥꓳ꓿
ꓕꓲꓽ ꓦꓲꓻ ꓘꓴꓽ ꓠꓯꓸꓼ ꓗꓪ ꓫ. ꓓꓴ ꓠꓬ ꓙꓳˍ ꓥꓳ꓿ ꓫ. ꓓꓴ ꓟꓬ ꓓꓴ ꓠꓲ, ꓟ ꓫ. ꓓꓴ ꓕꓱ ꓡꓱ ꓫꓵꓽ ꓠꓬ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓮ ꓟꓬ, ꓔꓳ, ꓜꓳꓽ ꓔꓬ ꓟ ꓥ ꓡꓳ꓿ ꓮ ꓡꓲ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓥˍ ꓟꓲ ꓟꓽ ꓫ. ꓔ ꓐꓯ ꓟ ꓟꓽ ꓙꓳ꓿ ꓮ ꓙꓵꓽ ꓢꓴ ꓔꓳ, ꓜꓳꓽ ꓔꓬ ꓟ ꓥ ꓡꓳ꓿ ꓕꓲ ꓖ ꓕꓲ ꓧꓪ, ꓦꓲꓻ ꓢꓲ ꓒ ꓦꓲꓻ ꓢꓲ ꓟ ꓫ. ꓪ ꓟꓬꓽˍ ꓟ꓾ ꓐꓯ ꓡꓯ ꓘꓳ,ˍ ꓟˍ ꓟꓲ ꓙꓳ ꓚꓰꓼˍ ꓡꓳ꓿ ꓟꓬꓽ ꓠꓬꓲ ꓐꓷ, ꓠꓬꓲ ꓕꓲ ꓦꓲꓻ ꓡ ꓞꓳ ꓘꓴꓽ ꓠꓯꓸꓼ ꓗꓪ ꓕꓲ ꓫꓵꓽ ꓟꓽ ꓥ ꓕꓲ ꓫꓵꓽ ꓗꓪ ꓐꓰ ꓤ, ꓠꓬꓲ ꓫꓵꓽ ꓠꓬꓲ ꓓꓴ꓾ ꓕꓱ ꓡꓱ ꓫꓵꓽ ꓔꓳ, ꓜꓳꓽ ꓔꓬ ꓟ ꓥ ꓡꓳ꓿
ꓮ ꓙꓵꓽ ꓢꓴ ꓠꓯꓸꓼ ꓗꓪ ꓕꓲ ꓦꓲꓻ ꓡ ꓞꓳ ꓘꓴꓽ ꓗꓪ ꓕꓱ ꓡꓱ ꓔꓳ, ꓜꓳꓽ ꓡˍ ꓕꓯ ꓮ ꓡꓲ ꓐꓰ ꓬꓰ ꓠ ꓔ꓾ ꓐꓯ ꓟ ꓔꓯ ꓐꓯ ꓟꓳ. ꓖꓶ ꓠꓲ, ꓫꓵˍ ꓡꓳ꓿
ꓓꓽ ꓪꓴ. ꓠꓬ ꓪꓴ‐ꓢ ꓔꓯ ꓕꓲ ꓠꓲ, ꓟ ꓡꓱꓸꓼ ꓡꓯꓼ ꓙꓱ ꓗꓷ꓿ ꓪꓴ‐ꓢ ꓔꓯ ꓪꓽ ꓘꓴ꓿ ꓦꓲꓻ ꓢꓲ ꓒ ꓥˍ ꓟꓲ ꓦꓲꓻ ꓢꓲ ꓟ ꓐꓱ ꓶ ꓪꓽ ꓘꓴ ꓙꓻ꓾ ꓦꓲꓻ ꓢꓲ ꓟ ꓥˍ ꓟꓲ ꓦꓲꓻ ꓢꓲ ꓒ ꓐꓱ ꓶ ꓪꓽ ꓘꓴ ꓙꓻ꓿ ꓕꓱ ꓡꓱ ꓬꓰˍ ꓠꓬ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓫ. ꓓꓴ ꓗꓪ ꓐꓰ ꓡꓲ, ꓙꓰ ꓐ ꓡ ꓢꓲ꓾ ꓪꓴ‐ꓢ ꓠꓲ, ꓒꓴˍ ꓟ ꓦꓲꓻ ꓘꓴꓽ ꓒꓬꓱꓼ ꓡˍ ꓥꓳ꓿ ꓗ, ꓛꓲꓽˍ ꓟ ꓦꓲꓻ ꓘꓴꓽ ꓒꓬꓱꓼ ꓡˍ ꓥꓳ꓿
ꓕꓲ ꓣꓳ ꓐꓰ ꓕꓲ ꓣꓳ ꓮ ꓕꓯ ꓥ ꓟꓲ ꓖꓽ ꓖꓶ ꓡꓯ ꓘꓳ꓿ ꓠꓲ, ꓟ ꓕꓽ ꓣꓳ꓿ ꓕꓲ ꓣꓳ ꓠꓲ, ꓟ ꓦꓶˍ ꓕꓯ ꓕꓲ ꓣꓳ ꓠꓬ ꓐꓯ ꓘꓶꓽ ꓠꓴꓽ ꓠꓴꓽ ꓤ ꓫ. ꓕꓱ꓿ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓗꓪ ꓐꓰ ꓡꓲ, ꓙꓰ ꓐ ꓡˍ ꓥꓳ꓿ ꓕꓱ ꓡꓱ ꓟꓽ ꓥ꓾ ꓕꓲ ꓣꓳ ꓐꓰ ꓕꓲ ꓣꓳ ꓠꓲ, ꓦꓶ ꓡꓯ ꓘꓳ ꓔꓬ ꓠꓬ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓢꓲ ꓡꓲ ꓗ, ꓛꓲꓽˍ ꓟ ꓟꓽ ꓙꓳ ꓡ꓿ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓓꓵꓽ ꓙꓽ ꓫ. ꓓꓴˍ ꓡꓰꓽ ꓗꓷ ꓡꓰˍ ꓥꓳ꓿
ꓮ ꓫꓵꓽˍ ꓟꓲ ꓙꓲꓻ ꓖꓴ ꓟꓽ ꓙꓳ ꓟ ꓐꓯ ꓘꓶꓽ ꓕꓲ ꓘꓶꓽ ꓗꓪ ꓐꓰ ꓕꓲ ꓦꓲꓻ ꓡ ꓞꓳ ꓬꓲ ꓗꓪ ꓕꓽ ꓗꓪ ꓡꓰ ꓝꓲ꓿ ꓪꓴ‐ꓢ ꓡꓰ ꓜꓶ ꓔ ꓟ ꓔꓯ ꓕꓽ ꓐꓬ ꓡꓰ ꓝꓲ꓿ ꓮ ꓫꓵꓽ ꓡꓰ. ꓟꓽ ꓥ ꓟ ꓫ. ꓪ ꓕꓲ ꓘꓶꓽ ꓗꓪ ꓐꓰ ꓪꓴ‐ꓢ ꓡꓰ ꓜꓶ ꓔ ꓟ ꓔꓯ ꓧ, ꓡꓰ ꓝꓲˍ ꓠꓬ ꓕꓱ ꓟ ꓠꓬ ꓝꓴꓲ. ꓓꓽ ꓟ ꓥ ꓡꓳ꓿
ꓕꓱ ꓡꓱ ꓟꓽ ꓗꓷ ꓡꓰ ꓠ, ꓟ ꓐꓱ ꓶ ꓬꓰ‐ꓢꓴ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓕꓲ ꓦꓲꓻ ꓡ ꓞꓳ ꓐꓴ꓾ ꓣꓳ ꓮ ꓕꓯ ꓟꓲ ꓪꓴ‐ꓢ ꓔꓯ ꓶꓼ ꓓꓰꓽ ꓪꓽ ꓘꓴ ꓡꓯ꓿ ꓦꓲꓻ ꓘꓴꓽ ꓠꓯꓸꓼ ꓗꓪ ꓔꓬ ꓢꓻ ꓙꓳꓻ ꓢꓻ ꓠꓲ, ꓟ꓾ ꓢꓲ ꓡꓲ ꓗ, ꓛꓲꓽ ꓠ, ꓟ ꓪꓴ‐ꓢ ꓔꓯ ꓡꓯꓼ ꓙꓱ ꓡꓯ꓿
