ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓳꓻ ꓔꓬ ꓟ ꓡꓽ ꓚꓬ. (ꓛꓽ ꓬꓰ,) ꓗꓪ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓔꓯ ꓢꓷ.ˍ ꓡ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓳꓻ ꓔꓬ ꓥ ꓟꓲ ꓣꓳ ꓚꓬ, ꓟꓽ ꓪ ꓔꓬ ꓟ ꓙꓲꓻ ꓖꓴ ꓐꓴ ꓔꓯ ꓐꓯ ꓟ. ꓖꓶ ꓠꓲ, ꓫꓵˍ ꓡꓳ꓿
ꓡꓽ ꓚꓬ. ꓠꓬ ꓣꓳ ꓡꓲ‐ꓢꓴ ꓫꓵꓽ ꓐꓴ ꓡꓰꓽ ꓟꓽ ꓞꓲ ꓠꓱ. ꓐꓯ ꓞꓳ ꓫꓵꓽ ꓐꓴˍ ꓟꓲ ꓓꓳꓻˍ ꓟ ꓓꓳꓻ ꓓꓴ ꓕꓲ ꓙꓰꓽ ꓥꓳ꓿ ꓮ ꓘꓶ. ꓙꓬˍ ꓟ ꓙꓬ ꓝꓲ. ꓕꓯ ꓮ ꓔꓳ. ꓤ ꓗꓳ. ꓠꓬꓲ ꓛꓽ ꓬꓰ, ꓓꓳꓻ ꓠꓬꓲ ꓬꓰˍ ꓕꓯ ꓕꓲ ꓖꓳ ꓓꓱꓽ ꓡꓱꓸꓼ ꓡꓱꓻ ꓡˍ ꓡꓳ꓿ ꓜꓻ ꓟꓽ ꓜꓻ ꓕꓯ ꓓꓳꓻˍ ꓟ ꓡꓰ ꓐꓰ ꓜꓻ ꓗꓷ ꓗ ꓠꓯ. ꓥˍ ꓟꓲ ꓠꓲ, ꓶꓻˍ ꓟ ꓓꓻ ꓡꓰ ꓠ, ꓟ ꓓꓳꓻ ꓔꓬ ꓡꓳ꓿ ꓠꓶꓽ ꓧꓪ ꓣꓳ ꓔꓬ ꓗꓪ ꓘ, ꓛꓬ, ꓚꓳꓻ ꓡˍ ꓕꓯ (ꓗ, ꓡ ꓕꓯ) ꓥ ꓟꓲ ꓛꓽ ꓬꓰ, ꓲʼ ꓖꓶ ꓓꓳꓻˍ ꓡꓳ꓾ ꓡꓽ ꓚꓬ. ꓖꓶˍ ꓡꓳ꓿
ꓣꓳ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓫꓵꓽ ꓪꓴ ꓮ ꓟꓬ, ꓟꓬꓽ ꓡ ꓑꓶ. ꓓꓴ ꓠꓲ, ꓟ ꓙꓬ ꓡꓰ ꓢꓻˍ ꓡꓳ꓿ ꓖꓳ ꓡꓱ ꓠꓬꓲ ꓠꓲ, ꓟ ꓙꓬˍ ꓟ ꓔꓯ ꓠꓲ. ꓡꓰ ꓝꓲ ꓠ, ꓟ ꓢꓻ ꓡꓰ ꓝꓲ ꓠ, ꓟ ꓐꓱ ꓶ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓖꓶ ꓠ ꓔ ꓡꓳ꓾ ꓐꓰ ꓐꓯ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓠꓬ ꓠꓲ, ꓟ ꓙꓬˍ ꓟ ꓘꓶꓻ ꓡꓶˍ ꓟ ꓐꓱ ꓶ ꓙꓲꓻ ꓖꓴ ꓙꓳ ꓟ ꓡꓰꓽ ꓟꓽ ꓞꓲ ꓧꓪꓽ ꓗꓴ, ꓙꓲꓻ ꓔꓯ ꓥˍ ꓟꓲ ꓐꓲꓻ ꓡ ꓝꓲˍ ꓡꓳ꓿ ꓬꓲꓻ ꓡꓱ ꓞꓻ ꓞꓻˍ ꓗꓪ ꓡꓽ ꓚꓬ. (ꓛꓽ ꓬꓰ,) ꓮ ꓔꓲ. ꓧꓳꓽ ꓗꓷ ꓢꓲ ꓓꓳꓻ ꓖꓶˍ ꓠꓬ ꓣꓳ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓟꓶˍ ꓟ ꓥ ꓡꓳ꓿
ꓡꓽ ꓚꓬ. (ꓛꓽ ꓬꓰ,) ꓓꓳꓻˍ ꓟ ꓗꓪ ꓐꓰ ꓚꓮꓠꓚꓰꓣ ꓠꓻ ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓖꓶˍ ꓕꓯ ꓚꓮꓠꓚꓰꓣ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿ ꓦꓰꓼ ꓟ ꓚꓮꓠꓚꓰꓣ꓾ ꓧꓪꓽ ꓗꓴ, ꓙꓲꓻ ꓚꓮꓠꓚꓰꓣ꓾ ꓐꓵꓼ ꓟꓵ ꓚꓮꓠꓚꓰꓣ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓫꓵꓽ ꓢꓯꓼ ꓔꓯ ꓥˍ ꓟꓲ ꓔꓲ ꓟꓴ. ꓗꓷ ꓡꓰ ꓝꓲ ꓐ ꓡˍ ꓡꓳ꓿ ꓫꓵꓽ ꓓꓯꓻ ꓠꓻ ꓙꓳ ꓢꓴ ꓐꓴ꓾ ꓫꓵꓽ ꓢꓯꓼ ꓮ ꓘꓶ. ꓓꓯꓻ ꓢꓴ ꓐꓴ ꓠꓬ ꓡꓽ ꓚꓬ. (ꓛꓽ ꓬꓰ,) ꓔꓯ ꓮ ꓕꓯ ꓟꓲ ꓓꓳꓻ ꓖꓶˍ ꓕꓯ ꓫꓵꓽ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓟ ꓪꓴ. ꓠꓬꓲ ꓫꓵꓽ ꓓꓯꓻ ꓠꓻ ꓙꓳ ꓢꓴ ꓐꓴ ꓐꓱ ꓶ ꓙꓲꓻˍ ꓟ ꓓꓳꓻ ꓓꓴ ꓕꓲ ꓙꓰꓽ ꓥ ꓡꓳ꓿
ꓧꓪꓽ ꓗꓴ, ꓙꓲꓻ ꓔꓯ ꓥˍ ꓟꓲ ꓔꓬ ꓢꓻ ꓡꓰ ꓝꓲˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓖꓶˍ ꓟ ꓠꓬ ꓧꓪꓽ ꓗꓴ, ꓙꓲꓻ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓿ ꓧꓪꓽ ꓗꓴ, ꓙꓲꓻ ꓐꓲꓻ ꓠꓲ, ꓫꓵ ꓢꓴ ꓠꓬ ꓡꓽ ꓚꓬ. (ꓛꓽ ꓬꓰ,) ꓔꓯ ꓓꓳꓻ ꓖꓶ ꓠ ꓔ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓢꓶꓽ ꓛꓲ ꓔꓯ ꓥˍ ꓟꓲ ꓔꓬ, ꓢꓻ ꓝꓲˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓔꓯ ꓓꓳꓻˍ ꓟ ꓗꓪ ꓐꓰ ꓢꓶꓽ ꓛꓲ ꓔꓯ ꓔꓬ, ꓢꓻ ꓝꓲˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓮ ꓕꓯ ꓟꓲ ꓓꓳꓻˍ ꓟ ꓠꓬ ꓢꓶꓽ ꓛꓲ ꓗꓪ ꓟ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓗꓽ ꓕ. ꓙ ꓖꓶ ꓐ ꓡ ꓢꓲ ꓠꓬꓲ꓾ ꓢꓶꓽ ꓛꓲ ꓐꓱ ꓶ ꓮ ꓘꓶ. ꓙꓲꓻˍ ꓟ ꓥ ꓡꓳ꓿
ꓮꓡꓜꓮꓟꓲꓰꓣ ꓠꓻ ꓔꓯ ꓥˍ ꓟꓲ ꓗꓽ ꓕ. ꓙ ꓐ ꓡˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓮ ꓕꓯ ꓟꓲ ꓓꓳꓻˍ ꓟ ꓠꓬ ꓮꓡꓜꓮꓟꓲꓰꓣ ꓐꓯˍ ꓟꓲ ꓞꓲꓼ ꓟꓳꓽ ꓡˍ ꓕꓯ ꓚꓲ. ꓟꓶ ꓓꓴ ꓢꓯꓼ ꓞꓰ ꓡꓰ ꓢꓲ ꓠꓬꓲ꓾ ꓟꓲ ꓡꓰ, ꓢꓻˍ ꓟ ꓔꓯ ꓗꓽ ꓙ ꓖꓶ ꓐ ꓡˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓖꓶˍ ꓕꓯ ꓪꓴ. ꓠꓶ. ꓗꓪ ꓙꓳˍ ꓟ ꓬꓲ ꓢꓯꓼ ꓔꓯ ꓪ ꓜꓲ ꓢꓯꓼ ꓙꓳ ꓡ ꓝꓲ ꓢꓲ ꓠꓬꓲ ꓮꓡꓜꓮꓟꓲꓰꓣ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓡꓽ ꓚꓬ. (ꓛꓽ ꓬꓰ,) ꓔꓯ ꓟꓳꓼ ꓡꓳ꓾ ꓟꓶꓽ ꓘꓶ ꓙꓵ, ꓟꓲꓽ ꓟꓲ ꓟꓽ ꓓꓵꓽ ꓡꓰ ꓕꓯ ꓓꓳꓻ ꓖꓶˍ ꓠꓬ ꓟꓶꓽ ꓘꓶ ꓕꓯ ꓬꓲꓼ ꓟꓶ ꓢꓻ ꓡꓰ ꓝꓲ ꓐ ꓡˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓖꓶˍ ꓕꓯ ꓟꓯ‐ꓡ‐ꓔꓳ‐ꓠꓲ ꓐꓯˍ ꓟ ꓬꓲꓼ ꓟꓶˍ ꓟ ꓧꓳꓟꓳꓠꓰꓢ ꓔꓯ ꓟꓬꓽ ꓠꓬꓲ ꓓꓳ ꓡ ꓝꓲˍ ꓟ ꓑꓶ. ꓓꓴ ꓪ ꓜꓲ ꓬꓲꓼ ꓟꓶ ꓢꓻ ꓡꓰ ꓝꓲ ꓐ ꓡˍ ꓡꓳ꓿
ꓡꓽ ꓚꓬ. (ꓛꓽ ꓬꓰ,) ꓓꓳꓻˍ ꓟ ꓠꓬ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓟ ꓬꓲ ꓞꓶꓻ ꓔꓯ ꓙꓲ ꓡꓰ ꓝꓲ ꓢꓲ ꓠꓬꓲ꓾ ꓞꓴꓻ ꓢꓯꓼ ꓔꓯ ꓥˍ ꓟꓲ ꓬꓯꓼ ꓡꓰ ꓝꓲˍ ꓡꓳ꓿ ꓦꓰꓼ ꓟ ꓘꓴꓽ ꓗꓪ ꓓꓵˍ ꓟ ꓜꓽ ꓧꓳꓽ ꓔ ꓟ꓾ ꓟꓽ ꓫꓬꓻ ꓟ ꓔꓯ ꓠꓱ ꓫꓳ. ꓟ. ꓗꓪ ꓢꓻ ꓢꓻ ꓡꓰꓽ ꓓꓳ ꓡꓰ ꓝꓲ ꓢꓲ ꓠꓬꓲ꓾ ꓖꓳ ꓓꓱꓽ ꓔꓯ ꓡꓳ ꓡꓳ ꓡꓰꓽ ꓗꓷ ꓡꓰ ꓝꓲˍ ꓡꓳ꓿ ꓚꓮꓡꓳꓣꓲꓰꓢ ꓔꓯ ꓥˍ ꓟꓲ ꓐꓬꓻ ꓡꓰ ꓝꓲˍ ꓡꓳ꓿
ꓕꓲ ꓫꓵꓽ ꓫꓵꓽ ꓬꓰˍ ꓟ ꓗꓪ ꓠꓲ, ꓟ ꓟꓽ ꓙꓳ ꓗꓷ ꓡꓰ ꓕꓯ ꓡꓽ ꓚꓬ. (ꓛꓽ ꓬꓰ,) ꓕꓲ ꓗꓶ. ꓓꓳꓻ ꓗꓷ ꓠꓬ ꓢꓰꓺ ꓢꓰꓺ ꓡꓰꓽ ꓗꓷ ꓡꓰ ꓢꓲ ꓬꓰ ꓔꓬ ꓟ ꓟꓬꓱꓽ ꓔꓯ ꓝ. ꓢꓲ ꓬꓰ ꓐ ꓡ ꓝꓲˍ ꓡꓳ꓿
ꓕꓲ ꓠꓬꓲ ꓡꓱꓸꓼ ꓗꓪ ꓡꓽ ꓚꓬ. (ꓛꓽ ꓬꓰ,) ꓠꓬꓲꓽ ꓗꓶ. ꓢ ꓗꓶ. ꓛꓲ ꓓꓳꓻ ꓠ ꓔ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓠꓬ ꓖꓳ ꓓꓱꓽ ꓔꓬ ꓢꓻ ꓓꓴ ꓐꓱ ꓶ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓪꓴ. ꓠꓬꓲ ꓕꓲ ꓠꓬꓲ ꓗꓪ ꓠꓬꓲꓽ ꓗꓶ. ꓢ ꓗꓶ. ꓛꓲ ꓠꓽ ꓓꓳꓻ ꓠ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓓꓳꓻ ꓟꓬꓽ ꓡꓰ ꓕꓯ ꓠꓽ ꓣꓳ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓗꓷ ꓡꓰˍ ꓥꓳ꓿ ꓡꓽ ꓚꓬ. (ꓛꓽ ꓬꓰ,) ꓠꓬ ꓚꓳꓝꓝꓰꓰ ꓢꓶ. ꓟꓽ ꓞꓲꓺ ꓚꓮꓝꓰ ꓢꓯꓼ ꓠꓲ.ˍ ꓐꓯ ꓥ ꓟꓲ꓾ ꓓꓳꓻ ꓟꓬꓽ ꓡꓰ ꓕꓯ ꓠꓽ ꓠꓲ, ꓟ ꓞꓼ ꓞꓼ ꓔꓷ, ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓫꓵꓽ ꓔꓯ ꓥˍ ꓟꓲ ꓟꓬꓽ ꓠꓬꓲ ꓓꓯꓻ ꓡ ꓝꓲˍ ꓡꓳ꓿ ꓫꓵꓽ ꓓꓯꓻ ꓠꓻ ꓙꓳ ꓢꓴ ꓐꓴ꓾ ꓠꓲ, ꓟ ꓫꓵꓽ ꓙꓴꓻ ꓣꓳˍ ꓟ ꓠꓻ ꓙꓳ ꓢꓴ ꓐꓴ ꓠꓬ ꓡꓽ ꓚꓬ. (ꓛꓽ ꓬꓰ,) ꓔꓯ ꓮ ꓟꓬ, ꓓꓳꓻˍ ꓠꓬ ꓟꓽ ꓙꓲꓻ ꓟ ꓥ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓓꓳꓻˍ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻˍ ꓐꓯ ꓥ ꓟꓲ꓾ ꓓꓳꓻ ꓟꓬꓽ ꓡꓰ ꓕꓯ ꓠꓽ ꓣꓳ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ꓿
ꓚꓮꓝꓰ ꓢꓯꓼ ꓮ ꓘꓶ. ꓟꓬꓽ ꓡ ꓕꓯ ꓬꓲꓼ ꓔ ꓬꓲꓼ ꓟꓶ ꓟꓽ ꓓꓻ ꓗꓷ ꓡꓰ ꓝꓲˍ ꓡꓳ꓿ ꓝꓮꓲ ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓟꓬꓽ ꓡꓰ ꓕꓯ ꓫꓵꓽ ꓒꓬ. ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓡꓳ꓿ ꓫꓵꓽ ꓒꓬ. ꓗꓪ ꓚꓮꓝꓰ ꓢꓯꓼ ꓡꓳꓽ ꓡ ꓠꓬ ꓫꓵꓽ ꓒꓬ. ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓕꓲ ꓠꓬꓲ ꓠꓯꓸꓼ ꓗꓪ ꓡꓽ ꓚꓬ. (ꓛꓽ ꓬꓰ,) 4 ꓗꓶ. ꓕꓯꓽ ꓢꓲ ꓓꓳꓻ ꓟꓽ ꓓꓻ ꓟ ꓥ ꓡꓳ꓿
ꓪꓳꓽ ꓔꓳ ꓔꓯ ꓥˍ ꓟꓲ ꓟꓽ ꓙꓲꓻ ꓗꓷ ꓡꓰ ꓝꓲˍ ꓡꓳ꓿
ꓡꓽ ꓚꓬ. (ꓛꓽ ꓬꓰ,) ꓮ ꓟꓬ, ꓓꓳꓻˍ ꓟ ꓠꓬ ꓪꓳꓽ ꓔꓳ ꓙꓵꓽˍ ꓟ꓾ ꓪꓳꓽ ꓔꓳ ꓘꓳ, ꓡꓰ ꓢꓻˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ꓿ ꓡꓽ ꓚꓬ. (ꓛꓽ ꓬꓰ,) ꓗꓪ ꓓꓵˍ ꓟ ꓚꓳꓟꓑꓳꓴꓠꓓ ꓐꓴ ꓠꓬ ꓚꓮꓡꓚꓲꓴꓟ ꓛꓵꓼ ꓣꓴˍ ꓟ ꓔꓯ ꓗꓽ ꓔ ꓟ ꓑꓶ. ꓓꓴ ꓥ ꓡꓳ꓿
ꓡꓽ ꓚꓬ. (ꓛꓽ ꓬꓰ,) ꓓꓳꓻ ꓟꓬꓽ ꓡꓰ ꓕꓯ ꓖꓳ ꓓꓱꓽ ꓠꓬ ꓜꓽ ꓓꓴ ꓘꓴꓽ ꓗꓪ ꓙꓳˍ ꓟ ꓲꓣꓳꓠ ꓢꓯꓼ ꓛꓵꓼ ꓣꓴˍ ꓟ ꓔꓯ ꓘꓶꓻ ꓡꓶ ꓡꓰ ꓝꓲ ꓢꓲ ꓠꓬꓲ꓾ ꓣꓰꓓ ꓐꓡꓳꓳꓓ ꓚꓰꓡꓡ ꓔꓯ ꓠꓲ. ꓡꓰ ꓝꓲ ꓢꓲ ꓠꓬꓲ꓾ ꓫꓵꓽ ꓢꓯꓼ ꓠꓲ.ˍ ꓟ ꓠꓻ ꓒꓬꓱꓼ ꓡꓰ ꓝꓲˍ ꓡꓳ꓿
ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓙꓲꓻ ꓖꓴ ꓙꓳ ꓠ, ꓟ ꓐꓱ ꓶ ꓠꓬ ꓡꓽ ꓚꓬ. (ꓛꓽ ꓬꓰ,) ꓔꓯ꓾ ꓕꓲ ꓠꓬꓲꓽ ꓗꓪ 3 ꓗꓶ. 4 ꓗꓶ. ꓗꓪ ꓛꓲˍ ꓡꓰꓽ ꓓꓳꓻ ꓠ ꓔ ꓡꓳ꓿
ꓖꓳ ꓓꓱꓽ ꓗꓪ ꓠꓻ ꓙꓳˍ ꓕꓯ ꓠꓬ ꓕꓲ ꓠꓬꓲ ꓗꓪ ꓕꓲ ꓗꓶ. ꓠꓬꓲꓽ ꓗꓶ. ꓡꓰꓽ ꓓꓳꓻ ꓠ ꓔ ꓥ꓾ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓠꓬꓲ ꓮ ꓫꓵꓽ ꓥ ꓟꓲ ꓖꓳ ꓓꓱꓽ ꓐꓱ ꓶ ꓡꓳꓼ ꓠ ꓛꓲˍ ꓡꓰꓽ ꓜꓽ ꓓꓳꓻˍ ꓕꓯ ꓣꓳ ꓐꓱ ꓶ ꓮ ꓘꓶ. ꓙꓲˍ ꓥ ꓟꓲ꓾ ꓜꓽ ꓟꓬꓽ ꓡꓰ ꓓꓳꓻ ꓟꓬ ꓡꓰ ꓠꓬ ꓬꓲ ꓓꓳꓼ ꓒꓬꓱꓼ ꓡ ꓝꓲˍ ꓟ ꓪꓴ. ꓠꓬꓲ꓾ ꓡꓽ ꓚꓬ. (ꓛꓽ ꓬꓰ,) ꓟꓽ ꓓꓳꓻ ꓟꓬꓽ ꓡꓰ ꓝꓲ ꓠ, ꓟ ꓚꓲ. ꓔ ꓢꓲ ꓓꓳꓻ ꓓꓴ ꓬꓰ ꓡꓯ꓿
