ꓟꓬ‐ꓟ ꓗꓴꓷꓼ ꓖꓴ ꓪꓴ. ꓕꓲ ꓛꓱꓽ꓾ ꓗ‐ꓛꓲ ꓗꓴꓷꓼ ꓫꓴ ꓒ‐ꓗ. ꓡꓳ ꓒꓱ꓾ ꓢꓰꓲꓗ‐ꓟꓴ ꓞꓳ ꓘ, ꓘꓴꓽ ꓗꓪ ꓐꓰ ꓑꓳꓼ‐ꓠꓲ,‐ꓛꓵꓼ ꓓꓵꓽˍ ꓟ ꓗꓪ ꓐꓰ ꓓꓳ ꓡˍ ꓟ ꓠꓱ. ꓠꓲ ꓠꓴꓽ ꓬꓲꓻ ꓡꓴꓽ ꓐꓱ ꓡꓳꓽ ꓓꓳ ꓧꓳ, (ꓡꓽ ꓧꓳ, ꓧꓳ,) ꓗꓷ ꓟ ꓗꓪ ꓫ. ꓙꓵ ꓡꓰ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓡꓰ ꓕꓵꓼ ꓪ ꓖꓶ ꓗꓷꓳ꓿
ꓢꓰꓲꓗ‐ꓟꓴ ꓞꓳ ꓘ, ꓘꓴꓽ ꓗꓪ 2025 ꓘꓳꓼ 1 ꓦ 13 ꓠꓬꓲ꓾ ꓠꓽ‐ꓕꓲꓽ‐ꓠꓬꓲ ꓠꓯꓼ ꓠꓯꓼ ꓕꓯ ꓠꓱ. ꓠꓲ ꓠꓴꓽ ꓡꓳꓽ ꓓꓳ ꓧꓳ, (ꓡꓽ ꓧꓳ, ꓧꓳ,) ꓡ ꓟ ꓥ ꓢꓲ ꓠꓬꓲ꓾ ꓞꓳ ꓦꓲꓻ ꓕꓯꓽ ꓢꓲ ꓗꓪ ꓠꓱ. ꓠꓲ ꓠꓴꓽ ꓑꓲ. ꓗꓷ ꓟ ꓑꓶ. ꓓꓴ ꓫꓵꓻ ꓢꓴ ꓠꓬ 32 ꓣꓳ ꓗꓪ ꓛꓲ ꓙꓳ ꓡ ꓗꓷ ꓟ ꓥ ꓡꓳ꓿
“ꓫꓵꓽ ꓪꓴ ꓕꓱ ꓟ ꓗꓪ ꓫꓵꓻ ꓗꓷ ꓢꓴ ꓐꓴ ꓬꓲ ꓪ ꓕꓲ ꓦꓲꓻ ꓢꓴ ꓐꓰ ꓕꓲ ꓪꓽ ꓪꓽ ꓘꓴ ꓙ ꓔꓬ ꓡꓳ꓿ ꓕꓱ ꓬꓲꓼ ꓤ ꓠꓬꓲ ꓤ ꓐꓴ ꓠꓬ ꓟꓵꓽ ꓗꓳ, ꓓꓵ ꓓꓵ ꓗꓪ ꓟ ꓬꓰ ꓙ ꓜꓴꓻ ꓐꓴ ꓡꓰ ꓟꓽ ꓟꓲ ꓡꓰ, ꓡꓰ, ꓐꓰ꓾ ꓬꓰ ꓙ ꓔꓳ, ꓙ ꓟ ꓔꓯ ꓘꓳ ꓣꓴ ꓟꓶ ꓠ ꓗ, ꓡꓳ꓾” ꓐꓰ ꓔꓲ ꓒ ꓪ ꓔꓲ ꓡꓰ ꓠꓽ‐ꓢꓽ‐ꓠꓬꓲ (15.1.2025) ꓕꓯ ꓑ ꓫꓬ ꓐꓴ ꓐꓰ ꓜꓲ ꓡꓯ ꓘꓳ,ˍ ꓟ ꓙꓵ, ꓗꓪ ꓐꓯ ꓗꓷ ꓟ ꓥ ꓡꓳ꓿
ꓓꓳꓽ ꓗꓪ ꓐꓯ ꓔ ꓟ ꓠꓬ꓾ ꓡ ꓞꓳ ꓮ ꓟꓬ, ꓣꓳ ꓫꓵꓻ ꓢꓲ ꓮ ꓟꓬ, ꓣꓳ ꓒꓲꓼ ꓔꓬ ꓟ ꓡꓰꓽ ꓟꓽ ꓞꓲꓺ꓾ ꓞꓳ ꓦꓲꓻ 50 ꓦꓲꓻ ꓟꓽ ꓞꓲ ꓠꓬ ꓠꓱ. ꓠꓲ ꓠꓴꓽ ꓠꓯ. ꓘꓪ ꓔꓵ. ꓡꓰ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓔꓲ ꓒ ꓪ ꓔꓲ. ꓠꓬ ꓬꓲ ꓧꓶ. ꓕꓯ ꓐꓯ ꓗꓷ ꓟ ꓡꓰ ꓐꓰ ꓫꓵꓽ ꓪꓴ ꓔꓳ, ꓜꓳꓽ ꓔꓬ ꓢꓴ ꓐꓴ ꓐꓰ ꓟꓯꓼ ꓢꓰꓼ ꓡꓯ ꓘꓳ,ˍ ꓟ ꓑꓶ. ꓓꓴ ꓫ. ꓙꓵ ꓔꓬ ꓢꓴ ꓮ ꓙꓵꓽ ꓐꓱ ꓶ ꓪꓽ ꓘꓴ ꓙ ꓖꓶ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿
“ꓴꓗꓮꓣꓲꓠꓰ꓾ ꓟꓬ‐ꓟ꓾ ꓐꓰ ꓑꓮꓡꓰꓢꓔꓲꓠꓰ꓾ ꓬꓲ‐ꓢꓷ‐ꓡꓰ ꓗꓴꓷꓼ ꓐꓰ꓾ ꓟꓯꓼ ꓢꓰꓼ ꓡꓯ ꓘꓳ,ˍ ꓟ ꓗꓴꓷꓼ ꓐꓴ ꓔꓯ ꓕꓽ ꓟꓲ ꓡꓰ,” ꓐꓰ ꓬꓲ ꓡꓰ ꓝ. ꓢꓲ ꓬꓲꓼ ꓠꓬꓲ. ꓖꓶ ꓗꓷꓳ꓿ ꓝꓮꓲ ꓢꓲ ꓡꓲ ꓟ ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓠ, ꓟ ꓑ ꓫꓬ ꓮ ꓙꓵꓽ ꓔꓯ ꓕꓵꓼ ꓪ ꓖꓶ ꓗꓷ ꓢꓲ꓾ ꓟꓯꓼ ꓢꓰꓼ ꓡꓯ ꓘꓳ,ˍ ꓟ ꓠꓬ ꓮ ꓕꓯ ꓟꓲ ꓟ. ꓧꓪ. ꓡꓰ (ꓫꓴ ꓡꓰ) ꓟ ꓥ ꓡꓳ꓾ ꓐꓰ ꓐꓯ ꓡꓳ꓿
ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓠꓬ “ꓞꓳ ꓤ ꓐꓴ ꓔꓯ ꓫꓵꓻ ꓝꓲˍ ꓟ ꓑꓳ (ꓡꓽ ꓛꓬꓴ.) ꓫꓬ, ꓢꓴ ꓐꓴ ꓠꓲ, ꓟ ꓒꓳ, ꓡꓶ. ꓠ, ꓟ ꓐꓱ ꓶ ꓪꓽ ꓘꓴ ꓓꓴ ꓬꓰ ꓡꓯ꓾ ꓮ ꓡꓲꓳ ꓐꓯ ꓠꓬ ꓬꓲ ꓪ ꓫꓬ, ꓔ ꓟ ꓠꓬ ꓞꓳ ꓤ ꓔꓯ ꓢꓰꓼ ꓠ, ꓟ ꓬꓰ ꓙ ꓔꓬ ꓟ ꓑꓶ. ꓓꓴ ꓥ ꓡꓳ” ꓐꓰ ꓬꓲ ꓡꓰ ꓐꓯˍ ꓡꓳ꓿
Reference: Vatican News https://shorturl.at/5hLkI
