ꓮ ꓙꓵꓽ ꓔꓯ ꓧꓪ. ꓧꓪ.꓾ ꓕꓱ ꓕꓲ ꓠꓽ ꓔꓲ ꓒ ꓪ ꓔꓲ. ꓢꓷ. ꓙ ꓟꓳ ꓙ ꓘꓶꓽ ꓔꓯ ꓐꓯ ꓟꓳ. ꓖꓶˍ ꓟ ꓙꓵ, ꓗꓪ ꓠꓬ꓾ ꓔꓲ ꓒ ꓪ ꓔꓲ ꓡꓰ ꓐꓯˍ ꓟ ꓙꓲ‐ꓢꓴ ꓢꓲ ꓤ ꓐꓴ ꓮ ꓙꓵꓽ ꓔꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓶꓻ ꓙꓳˍ ꓡꓳ꓾ ꓐꓯˍ ꓟ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓠꓬ ꓪꓴ‐ꓢ ꓟꓬꓱꓽ ꓔꓯ ꓬꓰ ꓠ, ꓟ ꓶꓻ ꓙꓳˍ ꓡꓳ꓿ ꓢꓲ ꓤ ꓮ ꓙꓵꓽ꓾ ꓔꓲ ꓒ ꓔꓲ ꓟ ꓮ ꓙꓵꓽ꓾ ꓟ. ꓒ ꓟ. ꓟ ꓮ ꓙꓵꓽ ꓪꓴ‐ꓢ ꓟꓬꓱꓽ ꓬꓰ ꓠ ꓔ ꓡꓳ꓿ 2024 ꓘꓳꓼ 10 ꓦ ꓐꓱ ꓶ ꓔꓲ ꓒ ꓪ ꓔꓲ. ꓬꓲ ꓪꓽ ꓘꓴˍ ꓟ ꓬꓲ ꓔꓶ ꓙꓱꓼ ꓠꓬ “ꓪꓴ‐ꓢ ꓟꓬꓱꓽ ꓔꓯ ꓕꓲ ꓠꓲ, ꓕꓲ ꓪ ꓬꓰ ꓠ, ꓟ” ꓥ ꓡꓳ꓿
ꓣꓳ ꓔꓲ ꓒ ꓐꓴ ꓠꓬ ꓢꓲ ꓤ ꓐꓴ ꓬꓲ ꓪ ꓟ. ꓒ ꓓꓽ ꓟ ꓟꓽ ꓥ꓿ ꓬꓲ ꓪ ꓐꓴ ꓔꓯ ꓡꓳ. ꓙ ꓔꓬ ꓟ ꓮ ꓣꓳ ꓡꓳ. ꓢꓴˍ ꓡꓰꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓮ ꓙꓵꓽ ꓔꓯ ꓕꓲ ꓡꓰ, ꓘꓴꓻ ꓔꓬ ꓟ ꓥ ꓡꓳ꓿ ꓕꓲ ꓣꓳ ꓔꓯ ꓠꓬ ꓕꓲ ꓖꓳ ꓓꓱꓽ ꓡꓱꓸꓼ꓾ ꓕꓲ ꓣꓳ ꓔꓯ ꓠꓬ ꓕꓲ ꓐꓶ꓾ ꓝꓮꓲ ꓕꓲ ꓣꓳ ꓔꓯ ꓠꓬ ꓕꓲ ꓢꓷ,꓾ ꓖꓳ ꓡꓱ ꓘꓴꓻ ꓔ ꓟ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ꓾ ꓕꓲ ꓣꓳ ꓟꓽ ꓐꓲ ꓜꓲꓼ ꓟ ꓗꓪ ꓐꓲ ꓜꓲꓼ ꓡꓰ ꓝꓲ ꓢꓴˍ ꓡꓰꓽ ꓥ ꓡꓳ꓿ ꓣꓳ ꓐꓴ ꓠꓬ ꓬꓲ ꓜꓴꓻ ꓕꓲ ꓜꓴꓻ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓖꓪ ꓙꓱꓻ ꓜꓲꓼˍ ꓟ ꓚꓱ, ꓗꓪ ꓕꓲ ꓠꓲ, ꓕꓲ ꓪ ꓙꓻ ꓫꓱꓽ ꓠ, ꓟ ꓥ ꓡꓳ꓿
ꓪꓳꓽ ꓐꓱ ꓔꓶ ꓜꓽ ꓢꓴ꓾ ꓗ ꓧꓳ. ꓶꓻ ꓤ ꓪꓴꓽ ꓜꓽ ꓢꓴ꓾ ꓢꓲ, ꓠꓯ ꓔꓷ, ꓢꓴ ꓥꓪ ꓠꓬ ꓥꓪ ꓢꓷ. ꓔ ꓟ ꓢꓷ. ꓠꓲ, ꓗꓪ ꓐꓰ ꓪꓴ‐ꓢ ꓟꓬꓱꓽ ꓔꓯ ꓮ ꓡꓲ ꓬꓰ ꓢꓲ ꓬꓰ ꓐ ꓡˍ ꓡ꓾ ꓐꓰ ꓥꓪ ꓔꓯ ꓠꓴ ꓪ ꓠꓺ ꓠꓬꓲ ꓓꓴ ꓙꓳˍ ꓥꓳ꓿ ꓣꓳ ꓮ ꓙꓵꓽ ꓠꓬ ꓚꓲ. ꓛꓬ ꓞꓳ ꓙꓳ ꓚꓱ, ꓗꓪ ꓐꓰ ꓢꓷ. ꓙ ꓟꓳ ꓙ ꓠ, ꓟ ꓡꓰꓽ ꓣꓱꓽ ꓞ, ꓟ ꓥ ꓡꓳ꓿
ꓪꓴ‐ꓢ ꓟꓬꓱꓽ ꓔꓯ ꓕꓲ ꓠꓲ, ꓕꓲ ꓪ ꓬꓰ꓿ ꓖꓳ ꓓꓱꓽ ꓔꓲ, ꓟꓶ ꓔ ꓢꓴ ꓐꓴ ꓐꓰ꓾ ꓢꓲ ꓤ ꓐꓴˍ ꓡꓰꓽ ꓪꓴ‐ꓢ ꓟꓬꓱꓽ ꓡꓰꓽ ꓟꓽ ꓞꓲꓺ ꓬꓲ ꓪ ꓦꓲꓻ ꓘꓴꓽ ꓔꓯ ꓠꓬꓲ ꓡꓳ. ꓗꓪ ꓫꓵꓼ ꓠꓯ, ꓟ ꓥ ꓡꓳ꓿ ꓥꓪ ꓠꓴꓽ ꓔꓲ ꓒ ꓐꓴ ꓐꓰ ꓘꓴ ꓜꓲꓼ ꓞꓳ ꓟ. ꓒ ꓐꓴ ꓥˍ ꓟꓲ ꓕꓲ ꓡꓰ, ꓪꓴ‐ꓢ ꓟꓬꓱꓽ ꓬꓰ ꓠ ꓔ ꓟ ꓥ ꓡꓳ꓿
ꓮ ꓡꓲ ꓬꓰˍ ꓠꓬ ꓪ ꓜꓲ ꓙꓲꓻˍ ꓡ? ꓚꓲ. ꓛꓬ ꓮ ꓡꓲ ꓢꓷ.ˍ ꓮ ꓡꓲ꓾ ꓮ ꓡꓲ ꓬꓰ ꓗꓴ.ˍ ꓠꓬ ꓖꓳ ꓡꓱ ꓬꓰ ꓢꓲ ꓪꓴ‐ꓢ ꓟꓬꓱꓽ ꓬꓰ ꓠ ꓔ ꓟ ꓥ ꓡꓳ꓿ ꓣꓳ ꓐꓴ ꓠꓬ ꓘꓴ ꓜꓲꓼ ꓞꓳ ꓐꓰ ꓕꓲ ꓠꓲ, ꓕꓲ ꓪ ꓞꓳ ꓙꓳ ꓢꓲ꓾ ꓕꓲ ꓡꓰ, ꓣꓱꓽ ꓬꓰ ꓔꓬ ꓡꓳ꓿ ꓘꓴ ꓜꓲꓼ ꓞꓳ ꓠꓬ ꓖꓪ ꓙꓱꓻ ꓡꓯ ꓘꓳˍ ꓟ ꓚꓱ, ꓗꓪ ꓐꓰ꓾ ꓬꓲ ꓚꓱ, ꓮ ꓟꓬ, ꓗꓪ ꓐꓰ ꓢꓯꓼ ꓧꓳꓽ ꓗꓷ ꓢꓲ ꓠꓬꓲ꓾ ꓮ ꓙꓵꓽ ꓕꓲ ꓠꓲ, ꓕꓲ ꓪ ꓟꓬꓱꓽ ꓬꓰ ꓢꓲ꓾ ꓢꓷ. ꓡꓰ ꓓꓴ ꓕꓲ ꓟ꓾ ꓔꓯ ꓢꓴ ꓓꓴ ꓕꓲ ꓟ ꓒꓬꓱꓼ ꓠ, ꓟ ꓐꓱ ꓶ ꓪꓽ ꓡꓯ ꓘꓳ ꓕꓽ ꓡꓯ ꓘꓳˍ ꓟ ꓠꓲ, ꓟ ꓡꓰ ꓔꓲ ꓒ ꓐꓴ꓾ ꓔꓲ ꓟ ꓐꓴ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ ꓐꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓙꓵꓽ ꓕꓲ ꓡꓰ, ꓚꓲ. ꓛꓬ ꓐ ꓡˍ ꓟ ꓚꓱ, ꓗꓪ ꓐꓰ ꓪꓴ‐ꓢ ꓟꓬꓱꓽ ꓔꓯ ꓬꓰ ꓐ ꓡ ꓠ, ꓟ ꓪꓽ ꓘꓴ ꓙ ꓖꓶ ꓓꓴ ꓬꓰ ꓡꓯ꓾ ꓐꓰ ꓐꓯ ꓢꓲ ꓔꓲ ꓒ ꓪ ꓔꓲ. ꓠꓬ ꓬꓲ ꓢꓷ. ꓙ ꓟꓳ ꓙ ꓘꓶꓽ ꓔꓯ ꓬꓲ ꓟꓶꓽ ꓢꓰꓼ ꓗꓷ ꓟ ꓥ ꓡꓳ꓿
