ꓕꓱ ꓕꓲ ꓠꓽ ꓔꓲ ꓒ ꓪ ꓔꓲ. ꓢꓷ. ꓙ ꓟꓳ ꓙ ꓘꓶꓽ ꓔꓯ ꓐꓯ ꓟ. ꓖꓶˍ ꓟ ꓙꓵ, ꓗꓪ ꓐꓰ ꓔꓲ ꓒ ꓪ ꓔꓲ. ꓡꓰ ꓐꓯˍ ꓟ “ꓕꓳꓽ ꓶ ꓔꓯ ꓠꓲ, ꓠꓵꓻ” ꓐꓯˍ ꓟ ꓔꓯ ꓝ. ꓢꓲ ꓐꓯ ꓟ. ꓖꓶ ꓠꓲ, ꓫꓵˍ ꓡꓳ꓿

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲꓻˍ ꓟ ꓕꓳꓽ ꓶ ꓑꓷꓠꓽ ꓠꓬ ꓙꓽ ꓜꓲꓼ ꓠꓲ, ꓔꓯ ꓒꓴ ꓖꓶˍ ꓡꓳ꓿ ꓠꓲ, ꓟ ꓔꓯ ꓡꓵ, ꓫꓴ ꓖꓶˍ ꓡꓳ꓿ ꓣꓳ ꓐꓴ ꓔꓯ ꓢꓯꓼ ꓟꓬ ꓐꓱ ꓶ ꓙꓽ ꓖꓶ ꓖꓶˍ ꓡꓳ꓾ ꓔꓲ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ “ꓡꓰꓔꓔꓰꓣ ꓔꓳ ꓝꓴꓔꓴꓣꓰ ꓑꓣꓲꓰꓢꓔꓢ” ꓟꓲꓽ ꓕꓯꓽ ꓢꓲ ꓟ ꓔꓲꓺ ꓒ ꓐꓴ ꓔꓯ ꓖꓶˍ ꓟ ꓕꓳꓽ ꓶ ꓗꓪ ꓐꓳ ꓗꓷꓳ꓿

ꓪꓴ‐ꓢ ꓟꓬꓱꓽ ꓟꓯꓻ ꓔꓬ ꓢꓴ ꓐꓴ꓾ ꓙꓲ‐ꓢꓴ ꓢꓲ ꓤ ꓐꓴ ꓥˍ ꓟꓲ ꓚ ꓟꓲꓽ ꓟꓴꓽ ꓖꓪ ꓕꓳꓽ ꓶ ꓐꓴ ꓔꓯ ꓵꓻˍ ꓟ ꓗꓪ ꓠꓲ, ꓘꓪ ꓫꓵˍ ꓥꓳ꓿ ꓕꓱ ꓟ ꓥˍ ꓟꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓞꓳ ꓙꓳ ꓚꓱ, ꓔꓯ ꓫꓬ, ꓔꓱ,ˍ ꓟ ꓥ ꓡꓳ꓿ ꓢꓳꓻ ꓜꓲꓼ ꓓꓴ ꓢꓳꓻ ꓦꓲꓻ ꓐꓴ ꓗꓪ ꓕꓳꓽ ꓶ ꓔꓯ ꓥˍ ꓟꓲ ꓟꓬꓽ ꓠꓬꓲ ꓧꓳꓽ ꓢꓲ ꓟ. ꓖꓶ ꓠ, ꓟ ꓐꓱ ꓶ ꓕꓵꓼ ꓪ ꓖꓶˍ ꓟ ꓕꓳꓽ ꓶ ꓔꓯꓲ ꓔꓲ ꓒ ꓪ ꓔꓲ. ꓠꓬ 7 ꓦ 17 ꓠꓬꓲ ꓕꓯ ꓐꓳ ꓗꓷ ꓢꓲ꓾ 8 ꓦ 4 ꓠꓬꓲ꓾ ꓢꓲ ꓒ ꓦꓬꓼ ꓠꓬꓲ ꓕꓯ ꓐꓱꓻ ꓖꓶ ꓗꓷ ꓟ ꓕꓳꓽ ꓶ ꓗꓪ ꓟꓳꓻ ꓪ ꓓ, ꓡꓳ꓿ ꓕꓳꓽ ꓶ ꓕꓱ ꓟ ꓔꓯ ꓐꓳˍ ꓟ ꓬꓲ ꓔꓶ ꓙꓱꓼ ꓠꓬ꓾ ꓕꓳꓽ ꓶ ꓔꓯ ꓠꓲ, ꓠꓵꓻˍ ꓟ ꓠꓲ, ꓟ ꓔꓯ ꓦꓵꓻ ꓓꓳ ꓖꓶˍ ꓟ ꓗꓪ ꓐꓰ ꓟꓲꓽ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓒꓬꓱꓼ ꓡ ꓠ, ꓟ ꓙꓽ ꓖꓶ ꓔꓬ ꓟ ꓐꓣꓳ ꓐꓴ ꓤꓶꓻ ꓔꓯ ꓬꓲ ꓚꓰ ꓗꓪ ꓐꓰ ꓒꓳ, ꓡꓶ. ꓙꓰ ꓠ, ꓟ꓾ ꓖꓳ ꓡꓱ ꓢꓲ.ˍ ꓡꓰꓽ ꓕꓳꓽ ꓶ ꓟꓬꓱꓽ ꓔꓯ ꓟꓬꓽ ꓠꓬꓲ ꓪꓴ. ꓓꓵ ꓗꓷ ꓔ ꓢꓲ ꓬꓰ ꓠ, ꓟ ꓔꓶ ꓙꓱꓼ ꓥ ꓡꓳ꓾ ꓐꓰ ꓐꓯˍ ꓡꓳ꓿

ꓕꓳꓽ ꓶ ꓠꓬ ꓔꓲꓺ ꓒ ꓐꓴ ꓤꓶꓻ ꓔꓯ ꓔꓱ, ꓚꓵˍ ꓟ ꓚꓱ, ꓗꓪ ꓛꓳ ꓫꓱꓽ ꓠ, ꓟ ꓢꓷ. ꓠꓲ, ꓖꓶ ꓢꓲ꓾ ꓫꓬ, ꓔꓱ, ꓖꓶˍ ꓡꓳ꓿ ꓖꓳ ꓟ ꓡꓰ ꓐꓰ ꓞꓳ ꓫꓵꓽ ꓥꓳꓽ ꓬꓲ ꓫꓵꓽ ꓬꓲ ꓙꓰꓽ ꓗꓪ ꓐꓰ ꓙꓲꓻ ꓖꓴ ꓮ ꓟꓬ, ꓟꓶ ꓡꓰ ꓝꓲˍ ꓡꓳ꓾ ꓐꓰ ꓐꓯˍ ꓡꓳ꓿

ꓡ ꓞꓳ ꓕꓲ ꓣꓳ ꓬꓲ ꓓꓵꓽ ꓙꓽˍ ꓟ ꓗꓪ ꓪꓴꓽ ꓡ ꓟꓴ ꓡ ꓝꓲ ꓢꓲ ꓠꓬꓲ ꓦꓻ ꓤꓶꓻ ꓗꓪ ꓥˍ ꓟꓲ ꓪ ꓜꓲ ꓙꓻ ꓖꓴ ꓒꓴ ꓖꓶˍ ꓡꓳ꓿

ꓔꓲ ꓒ ꓐꓴ ꓐꓰ ꓢꓲ ꓤ ꓐꓴ ꓬꓰ ꓠ ꓔ ꓟ ꓝꓲ ꓓꓴ ꓟꓬꓱꓽ ꓠꓬ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟ ꓟꓲ ꓠꓯ ꓞꓳ ꓤ ꓐꓴ ꓠꓲ, ꓟ ꓔꓯ ꓒꓴ ꓖꓶ ꓗꓷ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓔꓯ ꓞꓳ ꓤ ꓐꓴ ꓢꓷ. ꓡꓰ ꓠ ꓐꓯ ꓑꓶ ꓖꓶ ꓠ ꓔ ꓟ ꓥ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓠ, ꓟ ꓠꓬ ꓕꓳꓽ ꓶ ꓵꓻˍ ꓟ ꓗꓪ ꓐꓰ ꓵꓻ ꓖꓴ ꓟꓽ ꓓ ꓟ ꓙꓲꓻ ꓓꓴ ꓚꓱ, ꓐꓴ ꓔꓯ ꓟꓶ ꓡˍ ꓥꓳ꓾ ꓐꓰ ꓔꓲ ꓒ ꓪ ꓔꓲ. ꓡꓰ ꓐꓯˍ ꓡꓳ꓿

ꓔꓲꓺ ꓒ ꓪ ꓔꓲ. ꓡꓰ ꓬꓲ ꓕꓲꓽ ꓟꓴꓽ ꓤ ꓤ ꓗꓪ ꓐꓰ ꓢꓷ. ꓙ ꓟꓳ ꓙ ꓘꓶꓽ ꓖꓶ ꓗꓷꓳ꓿

• ꓠꓬ ꓕꓳꓽ ꓶ ꓵꓻˍ ꓟ ꓗꓪ ꓐꓰ ꓟꓶˍ ꓟ ꓙꓲꓻ ꓖꓴ ꓐꓯ ꓟ ꓗꓪ ꓐꓰ ꓢꓷ. ꓙ ꓟꓳ ꓗꓷꓳ꓿

ꓔꓲ ꓒ ꓪ ꓔꓲ. ꓠꓬ ꓝ. ꓢꓲ ꓕꓳꓽ ꓶ ꓵꓻˍ ꓟ ꓬꓲ ꓙꓲꓻ ꓖꓴ ꓐꓴ ꓔꓯ ꓖꓴ ꓟ. ꓖꓶ ꓔ ꓡꓳ꓿ ꓙꓲꓻˍ ꓟ ꓕꓳꓽ ꓶ ꓕꓲ ꓑꓷꓠꓽ ꓠꓬ ꓬꓲꓻ ꓙꓬ ꓟꓽ ꓙꓳ ꓟ ꓡꓲ ꓛꓲ ꓟꓵꓽ ꓛꓱ, ꓗꓪ ꓟ ꓬꓲꓻ ꓙꓬ ꓘꓴꓻ꓾ ꓬꓲꓻ ꓙꓬ ꓡꓳ ꓥ ꓡꓳ꓿ ꓡꓲ ꓛꓲ ꓟꓵꓽ ꓛꓱ, ꓗꓪ ꓠꓱ. ꓐꓯ ꓬꓲꓻ ꓙꓬ ꓓꓳꓻ ꓓꓴ ꓟꓽ ꓙꓳ ꓟ ꓑꓶ. ꓓꓴ ꓬꓲꓻ ꓙꓬ ꓡꓳ ꓔꓯ ꓡꓰꓽ ꓦ ꓡꓱ ꓔꓬ ꓪˍ ꓟ ꓡꓰ ꓐꓰ ꓥ ꓡꓳ꓿

ꓠꓲ, ꓟ ꓘꓶꓻ ꓡꓶꓽ ꓓꓴ꓾ ꓓꓵꓽ ꓙꓽ ꓪꓴꓽ ꓧꓶ ꓓꓴ꓾ ꓠꓲ, ꓟ ꓙꓬ ꓓꓴ꓾ ꓥꓳ ꓡꓳ. ꓔ ꓟ ꓡꓰ ꓟꓽ ꓒꓬꓱꓼ ꓡ ꓟ꓾ ꓪꓽ ꓘꓴˍ ꓟ ꓗꓪ ꓐꓰˍ ꓟꓲ ꓮ ꓫꓵꓽ ꓠꓲ, ꓗꓴ ꓟꓬ ꓗꓴ ꓟꓽ ꓟꓶ ꓟ ꓡꓰ ꓒꓬꓱꓼ ꓡˍ ꓟ ꓙꓵ, ꓗꓪ ꓙꓲꓻˍ ꓟ ꓕꓳꓽ ꓶ ꓕꓲꓽ ꓑꓷꓠꓽ ꓠꓬ ꓣꓳ ꓠꓲ, ꓟ ꓗꓪ ꓒꓬꓱꓼ ꓔꓬ ꓟ ꓘꓶꓻ ꓡꓶ ꓓꓴ꓾ ꓫ. ꓓꓴ ꓐꓴ ꓔꓯ꓾ ꓮ ꓡꓲ ꓬꓰ ꓢꓲ ꓗꓳ. ꓘꓳ ꓙꓰ ꓠ ꓔ ꓡ ꓐꓯ ꓟ ꓔꓯ ꓚꓴꓽ ꓬꓲ, ꓖꓶ ꓐ ꓡˍ ꓡꓳ꓾ ꓐꓰ ꓐꓯˍ ꓡꓳ꓿

ꓮ ꓟꓶ ꓟ ꓦꓬꓼ ꓠꓬꓲ ꓡꓰ ꓐꓰ ꓣꓳꓽ ꓣꓱꓽ ꓫꓵꓽ ꓥ ꓟ ꓟꓰꓓꓲꓮ꓾ ꓑꓧꓳꓠꓰ ꓐꓰ ꓠꓱ. ꓐꓯ ꓙꓼ ꓣꓱꓽ ꓫꓵꓽ ꓐꓴ ꓮ ꓟꓬ, ꓟꓽ ꓙꓳ ꓡ ꓟ ꓦꓬꓼ ꓠꓬꓲ ꓗꓪ ꓛꓲ ꓞꓳ ꓤ ꓐꓴ ꓠꓬ ꓕꓳꓽ ꓶ ꓔꓯ ꓡꓰꓽ ꓟꓬꓽ ꓠꓬꓲ ꓵꓻ ꓩꓴ ꓡ ꓗꓷ ꓟ ꓥ ꓡꓳ꓿ ꓙꓼ ꓣꓱꓽ ꓫꓵꓽ ꓗꓪ ꓐꓰ ꓓꓳꓻ ꓡˍ ꓟ ꓬꓲ ꓢꓯꓼ ꓬꓲ ꓐꓬꓱꓽ ꓐꓴ ꓠꓬ ꓞꓳ ꓤ ꓐꓴ ꓔꓯ ꓢꓷ. ꓠꓲ, ꓮ ꓟꓬ, ꓟꓽ ꓖꓶ꓿ ꓬꓲ ꓪ ꓖꓶˍ ꓟ ꓢꓷ. ꓠꓲ, ꓠꓬ ꓬꓲ ꓐꓱ ꓐꓱ ꓔ ꓟ ꓡꓰ ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓕꓳꓽ ꓶ ꓵꓻˍ ꓟ ꓠꓬ ꓬꓲ ꓪꓴ. ꓬꓲ ꓟꓶꓽ ꓟꓽ ꓙꓳ꓾ ꓡꓳ, ꓬꓰˍ ꓟ ꓟꓽ ꓙꓳ꓿ ꓕꓳꓽ ꓶ ꓗꓪ ꓐꓰ ꓓꓵꓽ ꓙꓽ ꓢꓷ. ꓠꓲ,꓾ ꓙꓽ ꓜꓲꓼ ꓠꓲ, ꓮ ꓟꓬ, ꓙꓳ ꓡ ꓢꓲ ꓠꓬꓲ ꓞꓳ ꓤ ꓠꓲ, ꓟ ꓔꓯ ꓟꓬꓽ ꓠꓬꓲ ꓢꓰꓺ ꓡꓰ ꓝꓲˍ ꓡꓳ꓿ ꓕꓳꓽ ꓶ ꓐꓳˍ ꓟ ꓵꓻˍ ꓟ ꓠꓬ ꓮ ꓕꓯ ꓟꓲ ꓢꓯ. ꓔꓬ, ꓟ ꓥ ꓢꓲ꓾ ꓬꓲ ꓪꓰꓻ ꓬꓲ ꓢꓶꓽ ꓥˍ ꓟꓲ ꓮ ꓟꓬ, ꓪꓰꓻ ꓡ ꓓꓱꓼ ꓡ ꓝꓲˍ ꓡꓳ꓿

ꓕꓳꓽ ꓶ ꓵꓻˍ ꓟ ꓗꓪ ꓐꓰ꓾ ꓵꓻ ꓢꓴ ꓠꓬ ꓕꓳꓽ ꓶ ꓐꓳ ꓢꓴ ꓡꓰ ꓖꓶˍ ꓟ ꓢꓷ. ꓠꓲ, ꓙꓽ ꓜꓲꓼ ꓠꓲ, ꓮ ꓙꓵꓽ ꓔꓯ ꓟꓶ ꓡꓰ ꓟ ꓪꓴ. ꓠꓬꓲ ꓬꓲ ꓢꓷ. ꓔ ꓟ ꓠꓬ ꓮ ꓟꓬ, ꓟꓬꓽ ꓡˍ ꓡꓳ꓿ ꓢꓷ. ꓠꓲ, ꓖꓳ ꓟ ꓔꓯ ꓚꓲ. ꓛꓬ ꓤꓶꓻ ꓗꓪ ꓣꓱꓽ ꓞ, ꓡˍ ꓕꓯ ꓣꓱꓽ ꓛꓰꓽ ꓙꓳ ꓙꓳˍ ꓡꓰꓽ ꓣꓱꓽ ꓢꓲ ꓠꓬꓲ꓾ ꓬꓲ ꓪ ꓤꓶꓻ ꓗꓪ ꓧꓪ. ꓡꓰˍ ꓟ ꓟꓶˍ ꓡꓳ꓾ ꓐꓰ ꓐꓯ ꓡꓳ꓿

ꓝꓮꓲ (2) ꓠꓬ ꓕꓳꓽ ꓶ ꓐꓱ ꓶ ꓬꓲ ꓙꓵ, ꓖꓶ꓾ ꓐꓯ ꓟ ꓬꓲ ꓕꓲꓽ ꓟꓴꓽ ꓤꓽ ꓗꓪ ꓐꓰ ꓢꓷ. ꓙ ꓟꓳ ꓙ ꓗꓷꓳ꓿

ꓕꓳꓽ ꓶ ꓵꓻˍ ꓟ ꓔꓯ ꓠꓬ ꓡꓯꓼ ꓕꓲꓺ ꓬꓰ ꓐ ꓡˍ ꓐꓯ ꓥ ꓟꓲ꓾ ꓔꓲꓺ ꓒ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓔꓬ ꓟ ꓐꓣꓳ ꓮ ꓟꓬ, ꓠꓬ꓾ ꓔꓦ ꓑꓧꓳꓠꓰ꓾ ꓚꓳꓟꓑꓴꓔꓰꓣ ꓐꓴ ꓗꓪ ꓐꓰ꓾ ꓬꓲ ꓑꓰ, ꓟꓽ ꓥ ꓟ ꓟ. ꓟꓲꓽ꓾ ꓚꓵ ꓚꓵ ꓟꓽ ꓥ ꓟ ꓬꓲ ꓓꓳꓽ ꓐꓴ꓾ ꓞꓳ ꓤ ꓠꓲ, ꓟ ꓔꓯ ꓬꓲ ꓓꓳꓼ ꓒꓬꓱꓼ ꓡꓰ ꓝꓲˍ ꓟ ꓞꓳ ꓤ ꓠꓲ, ꓟ ꓘꓶꓻ ꓡꓶ ꓡꓰ ꓝꓲˍ ꓟ ꓢꓯ. ꓐꓬꓱꓽ ꓐꓴ꓾ ꓜꓲꓽ ꓜꓲꓽ ꓑꓰ, ꓑꓰ, ꓬꓰˍ ꓟ ꓬꓲ ꓓꓳꓽ ꓐꓴ ꓔꓯ ꓡꓰꓽ ꓠꓲ, ꓥꓳ ꓔꓬ ꓟ ꓑꓶ. ꓓꓴ꓾ ꓮ ꓘꓶ. ꓒꓵꓽˍ ꓟ ꓕꓳꓽ ꓶ ꓐꓴ ꓔꓯ ꓵꓻ ꓠ, ꓟ ꓕꓲ ꓣꓳ ꓐꓰ ꓕꓲ ꓣꓳ ꓖꓪꓻ ꓙꓱ ꓡꓯ ꓘꓳ, ꓠ, ꓟ ꓬꓲ ꓙꓵ, ꓖꓶ ꓟꓽ ꓐ ꓡꓺꓳ꓾ ꓬꓲ ꓙꓵ, ꓟꓽ ꓙꓳꓻꓳ꓿

ꓕꓲ ꓠꓬꓲ ꓠꓬꓲ ꓗꓪ ꓗ‐ꓔꓳ‐ꓡꓲꓗ ꓔꓲꓺ ꓒ ꓒꓬꓱꓼ ꓡ ꓠ, ꓟ ꓐꓱ ꓶ ꓙꓽ ꓖꓶ ꓔꓬ ꓟ ꓔꓲꓺ ꓒ ꓒꓬꓱꓼ ꓢꓳꓻ ꓦꓲꓻ ꓐꓴ ꓗꓪ ꓠꓬ ꓕꓳꓽ ꓶ ꓐꓱ ꓶ ꓬꓲ ꓙꓵ, ꓡꓳꓼ ꓠ ꓛꓲ ꓖꓶ ꓠ ꓔ ꓡꓳ꓿

ꓕꓲ ꓖ ꓕꓲ ꓧꓪ, ꓕꓳꓽ ꓶ ꓠꓬ ꓝꓲ ꓓꓴ ꓟꓬꓱꓽ ꓬꓰˍ ꓟ ꓗꓪ ꓣꓱꓽ ꓟꓽ ꓬꓯꓼ ꓐꓰ ꓓꓵꓽ ꓙ ꓟꓶ ꓔꓬ ꓗꓴ.ˍ ꓡꓳ꓿ ꓕꓱ ꓡꓱ ꓠꓽ ꓓꓵꓽ ꓙꓽ ꓟꓽ ꓓꓻ ꓟ ꓥ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ ꓐꓯˍ ꓠꓬ꓾ ꓡ ꓠ, ꓟ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓒꓬꓱꓼ ꓡ ꓢꓴ ꓐꓴ ꓠꓬ ꓕꓳꓽ ꓶ ꓔꓯ ꓟꓳ.꓾ ꓦꓻ ꓚꓱ, ꓔꓯ ꓟꓳ. ꓮ ꓟꓬ, ꓢꓯꓼ ꓐꓽ ꓢꓴ ꓐꓴ ꓒꓬꓱꓼ ꓡˍ ꓥꓳ꓿ ꓖꓳ ꓕꓯ ꓑ ꓫꓬꓼ ꓐꓴ ꓬꓲ ꓪ ꓙꓵꓻ ꓠꓲ, ꓚꓱ,꓾ ꓙꓻ ꓡꓯ ꓘꓳ ꓚꓱ,꓾ ꓗ ꓟꓲꓽ ꓡꓲꓽ ꓒꓰꓼ ꓢꓷ. ꓠꓲ, ꓐꓴ ꓔꓯ ꓒꓶ ꓟ. ꓖꓶ ꓠ, ꓟ ꓢꓯꓼ ꓐꓽˍ ꓟ꓾ ꓟꓽ ꓢꓷ. ꓟ ꓮ ꓣꓳ ꓡꓳ. ꓢꓴ ꓐꓴ ꓒꓬꓱꓼ ꓡˍ ꓥꓳ꓿ ꓝꓮꓲ ꓠꓬ꓾ ꓢꓲ ꓒ ꓪꓴ‐ꓢ ꓔꓯ ꓟꓷꓼ ꓢꓲꓼ ꓔꓬ ꓢꓴ ꓐꓴ ꓔꓯ ꓐꓳ ꓡꓰ ꓠ, ꓟ ꓐꓱ ꓶ ꓔꓱ, ꓚꓵˍ ꓟ ꓚꓱ, ꓗꓪ ꓧꓳꓽ ꓣꓱꓽˍ ꓟ ꓢꓶ. ꓟꓽ ꓞꓲꓺ꓾ ꓥꓳꓽ ꓡꓰ ꓝꓲˍ ꓟ ꓚꓱ, ꓗꓪ ꓧꓳꓽ ꓣꓱꓽ ꓢꓴ ꓾ ꓥ ꓠꓬ꓾ ꓢꓲ ꓒ ꓬꓰ‐ꓢꓴ ꓐꓰ ꓶꓽ ꓡꓰ ꓝꓲˍ ꓟ ꓬꓲ ꓚꓱ, ꓗꓪ ꓧꓳꓽ ꓣꓱꓽ ꓢꓴˍ ꓡꓰꓽ ꓒꓬꓱꓼ ꓡˍ ꓥꓳ꓾ ꓐꓰ ꓐꓯ ꓢꓲ ꓠꓬꓲ꓾ ꓟꓲꓽ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓒꓬꓱꓼ ꓡ ꓠ, ꓟ ꓢꓳꓻ ꓔꓬ ꓢꓴ ꓐꓴ ꓠꓬ ꓚꓲ. ꓛꓬ ꓮ ꓣꓳ ꓜꓴꓻ ꓔꓯ ꓔꓱ, ꓚꓵˍ ꓟ ꓚꓱ, ꓗꓪ ꓧꓳꓽ ꓣꓱꓽ ꓐ ꓡ ꓠ, ꓟ ꓐꓱ ꓶ ꓕꓳꓽ ꓶ ꓔꓯ ꓠꓲ, ꓠꓵꓻ ꓢꓲ ꓙꓲꓻˍ ꓟ ꓕꓳꓽ ꓶ ꓮ ꓟꓬ, ꓵꓻ ꓡꓯ꓾ ꓐꓰ ꓐꓯ ꓢꓲ ꓔꓲꓺ ꓒ ꓪ ꓔꓲ. ꓠꓬ ꓬꓲ ꓢꓷ. ꓙ ꓟꓳ ꓘꓶꓽ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿