ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓓꓱꓽ ꓔꓬ, ꓢꓻˍ ꓟ ꓠꓬ ꓣꓱꓽ ꓛꓰꓽ ꓓꓽ ꓟ ꓕꓲꓽ ꓟ ꓥ ꓡꓳ꓾ ꓐꓰ ꓐꓯ ꓧꓪ. ꓘꓶꓽ ꓙꓳˍ ꓟ ꓡꓰ ꓟꓲ ꓠꓯ ꓕꓱ ꓟ ꓗꓪ ꓗ, ꓛꓲꓽ ꓓꓲ ꓡꓰ ꓢꓴ ꓠꓬ ꓧꓪꓽ ꓖꓳ ꓓꓱꓽ ꓠꓬ ꓟꓽ ꓠꓻ ꓟꓽ ꓒꓬ꓾ ꓔꓬ, ꓢꓻ ꓔꓬ ꓢꓴ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓔꓯ ꓐꓯˍ ꓕꓯ ꓠꓬ꓾ ꓣꓳ ꓜꓽ ꓔꓬ, ꓟ ꓜꓽ ꓓꓴ ꓜꓽ ꓙꓰꓽ ꓣꓱꓽ ꓬꓰ ꓔꓬ, ꓟ ꓚꓱ, ꓗꓪ ꓐꓰ ꓡꓰꓽ ꓟꓽ ꓞꓲꓺ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓓꓵꓽ ꓙ ꓪꓴꓽ ꓧꓶˍ ꓟ꓾ ꓠꓲ, ꓟ ꓦꓶˍ ꓟ ꓠꓲ, ꓟ ꓙꓬˍ ꓟ꓾ ꓠꓲ, ꓟ ꓙꓬˍ ꓟ꓾ ꓕꓱ ꓟꓬ ꓫꓵꓽ ꓗꓪ ꓐꓰˍ ꓟꓲ ꓣꓳ ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓔꓯ ꓐꓬ ꓡꓰ ꓝꓲˍ ꓡꓳ꓾ ꓐꓯˍ ꓟ ꓠꓴ ꓪ ꓢꓷ.ˍ ꓡ?
ꓠꓯ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯˍ ꓟ ꓠꓬ꓾ ꓠꓲ, ꓢꓲꓼˍ ꓟ ꓠꓲ, ꓟ ꓦꓶˍ ꓟ ꓠꓬ ꓣꓳ ꓫꓵꓽ ꓒꓬ. ꓔꓯ ꓢꓯꓼ ꓐꓽ ꓡꓰ ꓝꓲˍ ꓡꓳ꓿ ꓠꓲ, ꓫ. ꓟꓬ ꓫ.ˍ ꓟ ꓠꓬ ꓣꓳ ꓐꓵꓼ ꓟꓵ ꓔꓯ ꓢꓯꓼ ꓐꓽ ꓡꓰ ꓝꓲˍ ꓡꓳ꓿ ꓕꓲ ꓫꓵꓽ ꓫꓵꓽ ꓑꓶ. ꓓꓴ ꓠꓲ, ꓟ ꓓꓵꓽ ꓙꓽ ꓪꓴꓽ ꓧꓶˍ ꓟ ꓠꓬ ꓣꓳꓽ ꓠꓲ, ꓟ ꓐꓰ ꓪꓴ. ꓠꓶ. ꓔꓯ ꓐꓬ ꓡꓰ ꓝꓲˍ ꓡꓳ꓿ ꓙꓳꓺ ꓠꓲ, ꓣꓳꓽ ꓪꓳꓽ ꓓꓲꓻ ꓔꓯ ꓐꓬ ꓡꓰ ꓝꓲˍ ꓡꓳ꓿ ꓕꓲ ꓫꓵꓽ ꓫꓵꓽ ꓔꓯ ꓚꓬꓮꓪ ꓔꓬ,꓾ ꓙꓽ ꓫ. ꓟ ꓠꓬ ꓣꓳ ꓦꓰꓼ ꓟ ꓦꓰꓽ ꓛꓲ ꓔꓯ ꓐꓬ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓖꓳ ꓡꓱ ꓠꓬꓲ ꓞꓳ ꓤ ꓕꓲ ꓣꓳ ꓔꓬ, ꓢꓻ ꓠ, ꓟ ꓐꓱ ꓶ ꓠꓬ꓾ ꓠꓲ, ꓟ ꓔꓬ, ꓢꓻ ꓠ, ꓟ ꓥˍ ꓟꓲ ꓖꓳ ꓓꓱꓽ ꓔꓬ, ꓢꓻ ꓓꓴˍ ꓡꓰ ꓐꓰ ꓮ ꓘꓶ. ꓬꓳ. ꓚꓵˍ ꓟ ꓥ ꓡꓳ꓿ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓡꓰ ꓐꓰ ꓣꓳ ꓠꓲ, ꓟ ꓗꓪ ꓘꓶꓻ ꓡꓶꓽ ꓓꓴ ꓙꓳ ꓡˍ ꓕꓯ ꓪꓴꓽ ꓧꓶꓽ ꓠꓽ ꓗꓷ ꓠ, ꓟ (7) ꓚꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
- ꓖꓳ ꓓꓱꓽ ꓪꓴꓽ ꓧꓶꓽ ꓠꓽˍ ꓟ
ꓣꓳ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳ ꓔꓬ, ꓛꓳ ꓫꓱꓽ ꓔꓬ, ꓟ ꓠꓬ ꓣꓳ ꓖꓳ ꓓꓱꓽ ꓔꓯ ꓪꓴꓽ ꓧꓶ ꓡꓰ ꓝꓲˍ ꓡꓳ꓿ ꓧꓪꓽ ꓘꓴ. ꓠꓻˍ ꓟ꓾ ꓪꓴ. ꓓꓵ ꓠꓻˍ ꓟ꓾ ꓗꓶ. ꓝꓲ. ꓠꓻˍ ꓟ꓾ ꓕꓱ ꓟꓬ ꓫꓵꓽ ꓗ, ꓡˍ ꓕꓯ ꓕꓱ ꓟ ꓠꓬ ꓣꓳ ꓪꓴꓽ ꓧꓶ ꓔꓬ ꓡꓳ ꓐꓯˍ ꓟ ꓔꓯ꓾ ꓣꓳ ꓖꓳ ꓓꓱꓽ ꓡꓰ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
ꓕꓱ ꓟ ꓔꓯ ꓓꓻ ꓡꓰ ꓠ, ꓟ ꓪꓴꓽ ꓧꓶ ꓠꓽˍ ꓟ (2) ꓫꓵꓽ ꓙꓳˍ ꓡꓳ꓿ ꓬꓲ ꓪꓴ. ꓕꓲ ꓟ ꓠꓬ ꓮ ꓫꓵꓽˍ ꓟꓽ ꓬꓰ ꓬꓰ ꓠꓽ ꓗꓷˍ ꓟ ꓥ ꓡꓳ꓿ ꓔꓯ ꓥꓳꓽ ꓬꓲꓼ ꓔ ꓗꓷˍ ꓟ꓾ ꓕꓲ ꓟꓬꓱ ꓬꓲꓼ ꓟꓶˍ ꓟ ꓥ ꓡꓳ꓿ ꓝꓮꓲ ꓕꓲ ꓚꓱ, ꓠꓬ ꓖꓳ ꓓꓱꓽ ꓗꓪ ꓟ ꓬꓲ ꓙꓴꓽ ꓔꓯ ꓢꓻ ꓡꓰ ꓠ ꓬꓰˍ ꓟ꓾ ꓬꓳ‐ꓖ ꓗꓽ ꓠꓯ, ꓟ꓾ ꓙꓻ ꓖꓴ ꓫꓱꓽˍ ꓟ꓾ ꓝꓮꓲ ꓖꓳ ꓓꓱꓽ ꓖꓳ ꓟꓲ ꓠꓵˍ ꓟ ꓕꓱ ꓡꓱ ꓫꓵꓽ ꓬꓰ ꓐ ꓡˍ ꓡꓳ꓿
- ꓠꓲ, ꓟ ꓪꓴꓽ ꓧꓶ ꓠꓽˍ ꓟ
ꓮ ꓟꓶ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓠꓽ ꓠꓲ, ꓟ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓮ ꓟꓬ, ꓙꓳˍ ꓡꓳ ꓟꓽ ꓥ ꓡ꓿ ꓖꓳ ꓓꓱꓽ ꓪꓴꓽ ꓧꓶ ꓠꓽ ꓗꓷ ꓥˍ ꓟꓲ꓾ “ꓠꓲ, ꓟ ꓠꓽ ꓖꓳ ꓟ ꓓꓵꓽ ꓙꓽ ꓕꓱ ꓕꓲ ꓚꓱ, ꓟ ꓔꓯ ꓓꓵꓽ ꓙꓽ” ꓬꓰ ꓗꓷ ꓠꓬ ꓠꓲ, ꓟ ꓠꓬ ꓪꓴꓽ ꓧꓶ ꓠꓽ ꓟꓽ ꓟꓶꓳ꓿ ꓠꓲ, ꓟ ꓐꓯˍ ꓟ ꓠꓬ ꓮ ꓕꓯ ꓟꓲ ꓓꓵꓽ ꓙꓽ ꓔꓬ, ꓠꓬꓲ ꓬꓲ ꓔꓯ ꓠꓽ ꓙꓵ, ꓖꓶ ꓠ ꓔ ꓡꓳ꓿
ꓕꓱ ꓟ ꓠꓬ ꓣꓳꓽ ꓑꓧꓳꓠꓰ ꓔꓯ ꓕꓲ ꓑ, ꓤ ꓚꓵ. ꓗꓷˍ ꓟ꓾ ꓝꓐ ꓬꓳꓴꓔꓴꓐꓰ ꓡꓰ ꓐꓰ ꓢꓳꓚꓲꓮꓡ ꓟꓰꓓꓲꓮ ꓣꓱꓽˍ ꓟ ꓗꓪ ꓐꓰ ꓕꓲꓽ ꓑ, ꓤ ꓠꓽ ꓗꓷˍ ꓟ꓾ ꓝꓮꓲ ꓟꓬ ꓢꓶꓽ ꓑꓲ. ꓔ ꓢꓲ ꓣꓳ ꓖꓳ ꓓꓱꓽ ꓔꓯ ꓠ ꓠ, ꓟ꓾ ꓢꓯꓼ ꓦ ꓧꓳꓽ ꓢꓯꓼ ꓦ ꓓꓳꓻˍ ꓟ ꓔꓯ ꓬꓰˍ ꓟ꓾ ꓕꓱ ꓟꓬ ꓫꓵꓽ ꓔꓯ ꓬꓰ ꓐ ꓡˍ ꓟ ꓥ ꓡꓳ꓿ ꓠꓲ, ꓟ ꓔꓯ ꓮ ꓟꓬ, ꓟꓽ ꓓꓵꓽ ꓙꓽ ꓙꓽ ꓕꓲ ꓙꓰꓽ ꓤ ꓕꓲ ꓫꓵꓽ ꓤ ꓗꓪ ꓡꓰꓽ ꓗꓷ ꓔ ꓕꓯ ꓣꓳ ꓪꓴ. ꓠꓶ. ꓠꓬ ꓪꓴꓽ ꓧꓶ ꓠꓽ ꓟꓶ ꓡꓰ ꓝꓲˍ ꓡꓳ꓿
- ꓰꓟꓳꓔꓲꓳꓠꓮꓡ ꓣꓰꓢꓔ ꓐꓰ ꓐꓯˍ ꓟ ꓣꓳ ꓠꓲ, ꓟ ꓓꓵꓽ ꓙꓽ ꓚꓱ, ꓔꓯ ꓟꓳ. ꓪꓴꓽ ꓧꓶ ꓠꓽˍ ꓟ
ꓣꓳ ꓞꓳ ꓙꓳ ꓔꓬ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓣꓳ ꓠꓲ, ꓟ ꓗꓪ ꓗ, ꓛꓲꓽˍ ꓟˍ ꓟꓲ ꓙꓳˍ ꓥꓳ꓾ ꓟꓽ ꓗ, ꓛꓲꓽ ꓟˍ ꓟꓲ ꓙꓳˍ ꓥꓳ꓿ ꓮ ꓡꓲ ꓥꓽ꓾ ꓧꓪ. ꓧꓪꓸꓼ ꓔꓬ, ꓡ? ꓐꓰ ꓠ ꓠꓬꓲˍ ꓠꓬ ꓱꓽ ꓧꓪ. ꓧꓪꓸꓼ ꓡꓰꓽ ꓥꓳ꓾ ꓐꓰ ꓒꓳ, ꓖꓶ ꓔꓬ ꓥˍ ꓟꓲ ꓠꓲ, ꓟ ꓗꓪ ꓠꓲ, ꓫ. ꓟꓬ ꓫ.ˍ ꓟ ꓙꓳˍ ꓟ ꓡꓰ ꓐꓰ꓾ ꓣꓳ ꓚꓲ. ꓛꓬ ꓣꓳ ꓦ ꓡꓱ ꓟꓽ ꓐꓳ ꓟ꓾ ꓚꓲ. ꓛꓬ ꓔꓯ ꓚꓲ. ꓛꓬ ꓝꓴꓲ. ꓐꓯ ꓠꓲ, ꓫꓵˍ ꓟˍ ꓟꓲ ꓙꓳˍ ꓥꓳ꓿ ꓕꓱ ꓡꓱ ꓟꓽ ꓙꓲꓻ ꓟ ꓠꓲ, ꓟ ꓥˍ ꓟꓲ ꓞꓳ ꓤ ꓔꓯ ꓪꓴꓽ ꓧꓶ ꓡꓰ ꓝꓲˍ ꓟ ꓕꓲ ꓫꓵꓽ ꓥ ꓡꓳ꓿
ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓕꓯ ꓠꓬ ꓕꓲ ꓣꓳ ꓔꓵꓸꓼ ꓔꓬ ꓠꓬꓲ꓿ ꓠꓲ, ꓟ ꓔꓯ ꓘꓶꓻ ꓡꓶ ꓝꓲˍ ꓟ ꓚꓱ, ꓣꓳ ꓠꓲ, ꓟ ꓠꓯꓸꓼ ꓗꓪ ꓕꓽ ꓓꓵꓽ ꓡꓰ ꓝꓲ꓿ ꓣꓳꓽ ꓠꓲ, ꓟ ꓗꓪ ꓘꓶꓻ ꓡꓶ ꓡꓰ ꓝꓲˍ ꓟ ꓔꓯ ꓕꓳꓽ ꓶ ꓒꓬꓽ ꓗꓪ ꓐꓳˍ ꓟ ꓬꓲ ꓫꓱ, ꓔꓯ ꓬꓰ ꓢꓳ꓿ ꓝꓮꓲ ꓢꓲ, ꓜꓲ ꓡꓳ ꓜꓲ꓾ ꓬꓲꓻ ꓙꓬ ꓕꓱ ꓡꓱ ꓫꓵꓽ ꓔꓯ ꓡꓳ. ꓠꓬꓲˍ ꓟ ꓬꓰ꓿
ꓮ ꓫꓵꓽ ꓔꓯ ꓫ. ꓔꓬ, ꓟꓽ ꓢꓷ. ꓢꓷ. ꓐꓰ ꓠꓲ, ꓟ ꓠꓯꓸꓼ ꓗꓪ ꓦꓻ ꓡꓽ ꓡꓽ꓾ ꓙꓻ ꓖꓴ ꓒꓲꓼ ꓓ,ˍ ꓟ ꓡꓰ꓾ ꓡꓲꓽ ꓡꓲꓽ ꓡꓰꓽ ꓗ, ꓡˍ ꓕꓯ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓚꓱ, ꓠꓬ ꓣꓱꓽ ꓬꓯꓼˍ ꓟ ꓥ ꓡꓳ꓿ ꓖꓳ ꓡꓱ ꓬꓰˍ ꓕꓯ ꓣꓳ ꓠꓲ, ꓟ ꓠꓯꓸꓼ ꓗꓪ ꓒꓬꓱꓼ ꓔꓬ ꓟ ꓔꓯ ꓫꓬꓽ ꓫꓬꓽ ꓡꓰꓽ ꓢꓷ. ꓡ ꓝꓲ ꓢꓲ꓾ ꓠꓲ, ꓟ ꓥˍ ꓟꓲ ꓔꓬ, ꓢꓻ ꓡꓰ ꓝꓲˍ ꓡꓳ꓿
- ꓣꓳꓽ ꓔꓯ ꓡꓵ, ꓫꓴ ꓖꓶˍ ꓡˍ ꓟ ꓗꓪ ꓐꓰ ꓪꓴꓽ ꓧꓶ ꓠꓽˍ ꓟ
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓖꓳ ꓗꓪ ꓕꓱ ꓗꓪ ꓐꓰ ꓣꓳꓽ ꓔꓯ ꓡꓵ, ꓫꓴ ꓖꓶ ꓡˍ ꓟ ꓠꓬ ꓣꓳ ꓖꓳ ꓓꓱꓽ ꓠꓯꓸꓼ ꓗꓪ ꓕꓲ ꓓꓶꓽˍ ꓓꓵꓽ ꓡ ꓔꓬ ꓟ ꓔꓯ ꓠꓽ ꓣꓳ ꓚꓬ, ꓟꓽ ꓪ꓿ ꓠꓳ. ꓟꓲˍ ꓟ ꓢꓯꓼ ꓐꓴ꓾ ꓠꓬꓲ ꓟꓳꓻ ꓓꓴ ꓐꓴ꓾ ꓞꓻˍ ꓟ ꓙꓬˍ ꓟ ꓐꓴ꓾ ꓬꓲ ꓐꓵꓽ ꓐꓴ꓾ ꓕꓱ ꓡꓱ ꓫꓵꓽ ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓮ ꓟꓬ, ꓙꓳˍ ꓟ ꓥ ꓡꓳ꓿ ꓕꓱ ꓡꓱ ꓡꓵ, ꓫꓴ ꓖꓶ ꓡˍ ꓟ ꓔꓯ ꓖꓳ ꓓꓱꓽ ꓡꓰ ꓓꓽ ꓔꓳ, ꓗꓷ ꓕꓯ꓾ ꓣꓳ ꓚꓲ. ꓛꓬ ꓣꓳꓽ ꓟꓽ ꓢꓷ. ꓢꓷ. ꓪꓴꓽ ꓧꓶ ꓡˍ ꓟ ꓒꓬꓱꓼ ꓡ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓕꓱ ꓡꓱ ꓣꓳ ꓔꓯ ꓡꓵ, ꓫꓴ ꓖꓶˍ ꓟ ꓗꓪ ꓐꓰ ꓪꓴꓽ ꓧꓶ ꓠꓽ ꓠ, ꓟ ꓐꓱ ꓶ ꓠꓬ꓾ ꓔꓦ ꓑꓧꓳꓠꓰ ꓐꓴ ꓔꓯ ꓕꓲ ꓝꓲ. ꓤ ꓚꓵ. ꓔ ꓟ꓾ ꓟꓬ ꓢꓶꓽ ꓑꓲ. ꓔ ꓟ꓾ ꓢꓲꓺ ꓡꓲˍ ꓟ ꓗꓶ, ꓖꓴꓽ ꓗꓪ ꓪꓴꓽ ꓧꓶ ꓠꓽˍ ꓟ꓾ ꓖꓳ ꓓꓱꓽ ꓛꓲꓽˍ ꓟ꓾ ꓠ ꓢꓻˍ ꓟ ꓟꓴꓽ ꓖꓪ ꓢꓯꓼ ꓔꓯ ꓠ ꓠ, ꓟ꓾ ꓢꓯꓼ ꓦ ꓧꓳꓽ ꓢꓯꓼ ꓦ ꓓꓳ ꓬꓰˍ ꓟ꓾ ꓕꓱ ꓟꓬ ꓫꓵꓼ ꓔꓯ ꓬꓰ ꓖꓶ ꓐ ꓡˍ ꓡꓳ꓿
- ꓫꓪ.ˍ ꓠꓬꓲˍ ꓟ ꓪꓴ. ꓠꓶ. ꓣꓱꓽ ꓠ ꓔ ꓟ ꓟꓬꓱꓽ ꓗꓪ ꓐꓰ ꓪꓴꓽ ꓧꓶ ꓠˍ ꓟ
ꓐꓲꓻ ꓜꓳꓽ ꓠꓴꓽ ꓐꓴ꓾ ꓕꓳꓽ ꓶ ꓐꓳ ꓢꓴ ꓐꓴ꓾ ꓖꓪ ꓫꓵꓽ ꓖꓪ ꓙꓰꓽ ꓐꓰ ꓐꓲꓻ ꓫꓴꓽˍ ꓟ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓠꓬ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓫꓵꓼ ꓬꓲ ꓫꓵꓼ ꓔꓯ ꓓꓵꓽ ꓙ ꓢꓲ ꓫꓬ, ꓔꓬ, ꓪˍ ꓟ ꓥ ꓡꓳ꓿ ꓬꓲ ꓑꓶ. ꓟꓽ ꓞꓷ, ꓞꓷ, ꓓꓵꓽ ꓙ ꓔꓬ, ꓪ꓾ ꓫꓬ, ꓔꓬ ꓪˍ ꓕꓯ ꓪꓴ. ꓠꓶ. ꓠꓬ ꓪꓴꓽ ꓧꓶ ꓡˍ ꓡꓳ꓿ ꓕꓱ ꓡꓱ ꓗ, ꓡˍ ꓟ ꓗꓪ ꓐꓰ ꓪꓴꓽ ꓧꓶ ꓠꓽ ꓠ, ꓟ ꓐꓱ ꓶ ꓠꓬ꓾ ꓬꓰ ꓔꓬ ꓟ ꓟꓬꓱꓽ ꓗꓪ ꓐꓰ ꓕꓲ ꓑ, ꓤ ꓠꓽ ꓗꓷˍ ꓟ꓾ ꓟꓬꓱꓽ ꓟꓽ ꓥ ꓥ ꓠꓱ. ꓐꓯ ꓣꓳ ꓠꓲ, ꓫꓵˍ ꓟ ꓔꓯ ꓬꓰˍ ꓟ꓾ ꓧꓶ. ꓕꓯ ꓟꓽ ꓬꓰ ꓗꓳ. ꓗꓷ ꓟ ꓪꓳꓽ ꓒꓬꓽ ꓚꓬ. ꓚꓱ, ꓬꓲ ꓫꓵꓼ ꓔꓯ ꓢꓳ ꓣꓴˍ ꓟ꓾ ꓐꓬꓱꓽ ꓐꓳˍ ꓟ ꓕꓱ ꓡꓱ ꓫꓵꓽ ꓔꓯ ꓬꓰˍ ꓟ ꓗꓪ ꓐꓰ꓾ ꓪꓴ. ꓠꓶ. ꓔꓯ ꓪꓴꓽ ꓧꓶ ꓠꓽ ꓡꓰ ꓝꓲˍ ꓟ ꓥ ꓡꓳ꓿
- ꓞꓳ ꓤ ꓗꓳ ꓡꓳ ꓗꓪ ꓐꓰ ꓪꓴꓽ ꓧꓶ ꓠꓽˍ ꓟ
ꓞꓳ ꓤ ꓐꓴ ꓐꓰ ꓕꓲ ꓠꓬꓲ ꓕꓲ ꓠꓬꓲ ꓙꓻ ꓡꓯ ꓘꓳˍ ꓟ ꓟꓶ ꓫꓵ ꓡˍ ꓕꓯ ꓖꓳ ꓓꓱꓽ ꓐꓰ ꓠꓲ, ꓟ ꓪꓴꓽ ꓧꓶ ꓡˍ ꓡꓳ꓿ ꓕꓱ ꓟ ꓠꓬ ꓞꓳ ꓤ ꓮ ꓟꓬ, ꓐꓰ ꓔ, ꓗꓴ.ˍ ꓟ꓾ ꓟꓽ ꓥ ꓠꓬ꓾ ꓞꓳ ꓤ ꓮ ꓟꓬ, ꓐꓰ ꓔ, ꓟꓽ ꓗꓴ. ꓟ ꓐꓰ ꓟꓽ ꓫꓰꓽ ꓟ ꓥ ꓡꓳ꓿ ꓬꓲ ꓫꓱ, ꓟꓽ ꓫꓱ. ꓡꓯ ꓘꓳ ꓢꓴ ꓮ ꓟꓬ, ꓐꓰ ꓙꓻ ꓡꓯ ꓘꓳ ꓟꓶ ꓫꓵ ꓡˍ ꓕꓯ ꓪꓴꓽ ꓧꓶ ꓡˍ ꓟ ꓠꓬ ꓬꓲ ꓝꓳꓽ ꓥ ꓡꓳ꓾ ꓬꓲ ꓡꓲꓽ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓪꓴꓽ ꓧꓶ ꓠꓽ ꓟꓶ ꓠ, ꓟ ꓠꓬ꓾
ꓕꓲ ꓣꓳ ꓔꓵꓸꓼ ꓔꓬ, ꓠꓬꓲˍ ꓟ꓾ ꓞꓳ ꓤ ꓟꓬꓽˍ ꓟ ꓑꓮꓲꓽ ꓕꓱ ꓡꓱ ꓫꓵꓽ ꓔꓯ ꓤ ꓟꓳˍ ꓟ꓾ ꓠꓲ, ꓠꓵ ꓢꓴ ꓐꓴ ꓛꓳꓽ ꓒꓯ, ꓐꓴ ꓦꓲꓻ ꓘꓴꓽ ꓢꓴ ꓐꓴ ꓔꓯ ꓬꓲ ꓙꓵ, ꓖꓶˍ ꓟ꓾ ꓕꓲ ꓣꓳ ꓔꓵꓸꓼ ꓕꓲ ꓖ ꓖ ꓗꓪ ꓙꓰˍ ꓟ꓾ ꓚꓲ. ꓛꓬ ꓔꓯ ꓚꓲ. ꓛꓬ ꓗꓪꓼ ꓫꓵꓼˍ ꓟ꓾ ꓕꓱ ꓡꓱ ꓫꓵꓽ ꓬꓰ ꓐ ꓡˍ ꓡꓳ꓿
ꓕꓲ ꓣꓳ ꓔꓵꓸꓼ ꓔꓬ ꓢꓲ ꓪꓴꓽ ꓧꓶ ꓠꓽˍ ꓕꓯ ꓠꓲ, ꓟ ꓠꓬ ꓪꓴꓽ ꓧꓶ ꓠꓽ ꓟꓶ ꓢꓲ ꓠꓬꓲ꓾ ꓘꓶꓻ ꓡꓶ ꓓꓴˍ ꓟꓲ ꓟꓽ ꓙꓳ ꓟ ꓑꓶ. ꓓꓴ ꓪ ꓜꓲ ꓔꓬ, ꓢꓻ ꓡˍ ꓥꓳ꓿
- ꓢꓲ ꓡꓲ ꓟ ꓔꓯ ꓧꓪˍ ꓟ
ꓢꓲ ꓡꓲ ꓟ ꓔꓯ ꓧꓪˍ ꓟ ꓗꓪ ꓠꓬ ꓚꓲ. ꓛꓬ ꓙꓵꓻ ꓠꓲ, ꓚꓱ, ꓔꓯ ꓖꓼ ꓢꓲ꓾ ꓪꓽ ꓘꓴˍ ꓟ꓾ ꓢꓲꓽ ꓫꓬ ꓕꓳꓽ ꓶ ꓵˍ ꓟ꓾ ꓝꓮꓲ ꓟꓰꓓꓲꓔꓮꓲꓳꓠ ꓐꓰ ꓐꓯˍ ꓟ ꓟꓬ ꓢꓶ ꓑꓲ. ꓢꓲ ꓕꓲ ꓫꓵꓽ ꓤ ꓔꓯ ꓡꓰꓽ ꓓꓵꓽ ꓙꓽˍ ꓟ꓾ ꓬꓳ‐ꓖ ꓗꓽ ꓠꓯ, ꓟ꓾ ꓢꓲ, ꓜꓲ ꓡꓳ ꓜꓲ ꓬꓲꓻ ꓙꓬ ꓕꓱ ꓡꓱ ꓫꓵꓽ ꓗꓪ ꓙꓰˍ ꓟ꓾ ꓮ ꓫꓵꓽ ꓔꓯ ꓥˍ ꓟꓲ ꓙꓲꓻˍ ꓟ ꓚꓱ, ꓗꓪ ꓡꓰꓽ ꓓꓵꓽ ꓙꓽ ꓢꓲ ꓠꓬꓲ ꓞꓳ ꓙꓳˍ ꓟ꓾ ꓕꓱ ꓟꓬ ꓫꓵꓽ ꓔꓯ ꓬꓰ ꓐ ꓡˍ ꓟ ꓥ ꓡꓳ꓿
ꓪꓴꓽ ꓧꓶ ꓠꓽˍ ꓟ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓟꓲ ꓠꓯ ꓞꓳ ꓤ ꓣꓳꓽ ꓐꓴ ꓐꓱ ꓶ ꓟꓽ ꓙꓳ ꓟꓽ ꓓꓻ ꓟ ꓣꓱꓽ ꓞ, ꓟ ꓥ ꓡꓳ꓿ ꓕꓱ ꓠꓲ, ꓟ ꓪꓴꓽ ꓧꓶ ꓠꓽ ꓚꓱ, (7) ꓚꓱ, ꓔꓯ ꓚꓲ. ꓛꓬ ꓤꓶꓻ ꓗꓪ ꓛꓳ ꓫꓱꓽˍ ꓠꓬ ꓪ ꓜꓲ ꓗ, ꓛꓲꓽ ꓔꓬ, ꓢꓻˍ ꓟ ꓤꓶꓻ ꓔꓯ ꓘꓳ, ꓣꓴ ꓟꓶ ꓡˍ ꓥꓳ꓿
