ꓡꓲ ꓒꓲꓼ ꓐꓰ ꓫꓹ ꓕꓱˍ ꓟ ꓙꓵ, ꓗꓪ ꓠꓬ ꓘꓴ-ꓜꓲ ꓞꓳ ꓡꓰ ꓟ. ꓖꓶ ꓡ ꓟ ꓛꓳ ꓙꓳ ꓢꓯꓸ ꓔꓬ ꓚꓱꓹ ꓠꓯꓸꓼ ꓗꓪ ꓚꓳ. ꓡꓲꓽ ꓒꓰꓼ ꓠꓯꓸꓼ ꓗꓪ ꓚꓲ. ꓛꓬ ꓠꓲꓹ ꓫꓵˍ ꓟ ꓡꓰ ꓐꓰ ꓟ. ꓐ ꓡˍ ꓟ꓾ ꓬꓰ ꓐ ꓡˍ ꓟ ꓙꓵꓽ ꓪ ꓐꓯ ꓟ ꓔꓯ ꓪꓴ. ꓓꓵ ꓛꓹ ꓢꓲ ꓐꓯ ꓓꓴ ꓥꓳ=
ꓡꓲꓽ ꓒꓰꓼ ꓐꓯ ꓟ ꓠꓬ ꓞꓳ ꓤ ꓕꓲ ꓣꓳ ꓐꓱ ꓶ꓾ ꓞꓳ ꓫꓵꓽ ꓕꓲ ꓫꓵꓽ ꓐꓱ ꓶ꓾ ꓗꓴꓷꓼ ꓕꓲ ꓗꓴꓷꓼ ꓐꓱ ꓶ ꓮ ꓘꓶꓸ ꓬꓳ. ꓚꓵˍ ꓟ ꓥ ꓪ= ꓡꓲꓽ ꓒꓰꓼ ꓗꓪ ꓐꓰ ꓣꓳ ꓢꓯꓸ ꓔꓬ ꓟ ꓣꓳ ꓪꓴꓽ ꓡ ꓟꓴ ꓡ ꓟ꓾ ꓖꓳ ꓟ ꓡꓰꓽ ꓟꓽ ꓞꓲ ꓕꓱ ꓕꓲ ꓙꓵꓹ ꓗꓪ ꓣꓳ ꓮ ꓡꓲ ꓢꓲ ꓢꓯꓸ ꓔꓬ ꓟ ꓔꓯ ꓟꓸ ꓖꓶ ꓐ ꓡ ꓢꓷꓸ ꓝꓲ ꓐ ꓡ ꓡꓳ= ꓡꓲꓽ ꓒꓰꓼ ꓐꓯ ꓟ ꓠꓬ ꓞꓳ ꓤ ꓐꓰ ꓕꓲ ꓪꓽ ꓙꓳˍ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓔꓯ ꓞꓳ ꓤ ꓗꓪ ꓐꓰ ꓧꓹ ꓗꓷ ꓟꓽ ꓐ ꓡ= ꓖꓳ ꓟ ꓪꓴꓸ ꓠꓬꓲ ꓞꓳ ꓤ ꓪ ꓙꓵꓽ ꓪꓽ ꓐꓯ ꓕꓯ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓬꓲ ꓪ ꓡꓲꓽ ꓒꓰꓼ ꓔꓯ ꓮ ꓕꓯ ꓥ ꓟꓲ ꓒꓵꓽ ꓗ ꓬꓰ ꓢꓲ ꓠꓬꓲ ꓬꓲ ꓪ ꓡꓲꓽ ꓒꓰꓼ ꓔꓯ ꓮ ꓕꓯ ꓥ ꓟꓲ ꓢꓴ ꓔꓯ ꓟꓸ ꓐ ꓡ ꓠ꓾ ꓢꓴ ꓟꓲꓽ ꓙꓬ ꓗꓪ ꓬꓰ ꓐ ꓡ ꓠꓹ ꓟ ꓐꓱ ꓶ꓾ ꓪ ꓙꓵꓽ ꓪꓽ ꓙꓳ ꓠ ꓔ ꓡꓳ= ꓕꓱ ꓡꓱ ꓬꓰˍ ꓕꓯ ꓢꓴ ꓔꓯ ꓙꓳꓺ ꓓꓴ ꓟꓽ ꓙꓳ꓾ ꓒꓴ ꓒꓴ ꓡꓯꓽ ꓡꓯꓽ ꓬꓰ ꓐ ꓡ ꓟ ꓙꓳ ꓠ ꓔ ꓡꓳ=
ꓞꓳ ꓫꓵꓽ ꓞꓳ ꓙꓰꓽ ꓮ ꓟꓬꓹ ꓙꓳˍ ꓟ ꓗꓴꓷꓼ ꓠꓯꓸꓼ ꓗꓪ ꓔꓬ ꓢꓴ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓠꓬ ꓞꓳ ꓫꓵꓽ ꓟꓽ ꓓ ꓟꓬꓽ ꓖꓴ ꓡꓰ ꓢꓴ ꓬꓲ ꓪ ꓡꓲꓽ ꓒꓰꓼ ꓔꓯ ꓗꓴꓷꓼ ꓡꓲꓽ ꓒꓰꓼ ꓐꓰ ꓕꓱ ꓡꓱ ꓢꓪꓼ ꓢꓲ ꓠꓬꓲ ꓬꓰ ꓝꓲˍ ꓟ꓾ ꓖꓳ ꓟ ꓡꓲꓽ ꓒꓰꓼ ꓡꓰ ꓐꓰ ꓔꓬ ꓝꓲˍ ꓟ ꓙꓳˍ ꓡꓳ=
ꓵꓸꓹ ꓣꓳ ꓟꓽ ꓟꓬꓽ ꓟ ꓞꓳ ꓣꓳ ꓞꓳ ꓫꓵꓽ ꓐꓴ ꓡꓲꓽ ꓒꓰꓼ ꓔꓯ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓟꓽ ꓬꓰ ꓟ꓾ ꓬꓰ ꓝꓲˍ ꓟ ꓟꓽ ꓖꓶ ꓝꓲ ꓟ ꓕꓱ ꓡꓱ ꓫꓵꓽ ꓙꓳˍ ꓡꓳ= ꓵꓸꓹ ꓣꓳ ꓟꓽ ꓟꓬꓽ ꓟ ꓞꓳ ꓫꓵꓽ ꓐꓴ ꓫꓸ ꓪ ꓬꓲ ꓪ ꓣꓱꓽ ꓡ ꓟ ꓡꓲꓽ ꓒꓰꓼ ꓥ ꓕ ꓑꓳꓸ ꓔꓯ꓾ ꓖꓳ ꓟ ꓡꓰꓽ ꓟꓽ ꓞꓲ ꓬꓲ ꓪ ꓕꓳꓽ ꓶ ꓔꓯ ꓥ ꓟꓲ ꓤ ꓠꓱ ꓐꓴ ꓔꓯ ꓟꓸ ꓖꓶ ꓠꓹ ꓟ ꓐꓰ꓾ ꓕꓳꓽ ꓶ ꓫꓬꓹ ꓠꓹ ꓟ ꓕꓱ ꓡꓱ ꓫꓵꓽ ꓑꓶ ꓔ ꓟˍ ꓟꓲ ꓗꓴꓷꓼ ꓘꓴꓽ ꓗꓪ ꓙꓳˍ ꓡꓳ= ꓚꓵ ꓚꓵ ꓐꓯˍ ꓠꓬ ꓕꓱ ꓡꓱ ꓬꓰˍ ꓟ ꓑꓶ. ꓓꓴ ꓵꓸꓹ ꓢꓴ ꓟꓽ ꓟꓬꓽ ꓟ ꓞꓳ ꓫꓵꓽ ꓐꓴ ꓔꓯ ꓐꓬ ꓡꓰ ꓠ ꓬꓰˍ ꓟ ꓥ ꓡꓳ=
ꓬꓲ ꓪ ꓚꓺ ꓟꓲꓽ ꓟꓽ ꓙꓳ ꓡꓰ ꓠ ꓬꓰˍ ꓟ꓾ ꓬꓲ ꓪ ꓫꓸ ꓪ ꓟꓽ ꓙꓳ ꓡꓰ ꓠ ꓬꓰˍ ꓟ꓾ ꓬꓲ ꓪ ꓮꓽ ꓠꓱ ꓗꓪ ꓐꓰ ꓮ ꓟꓶ ꓗꓪ ꓛꓲ ꓣꓱꓽ ꓡ ꓟ ꓡꓲꓽ ꓒꓰꓼ ꓗ ꓟꓲꓽ ꓮ ꓙꓵꓽ ꓟꓶꓽ ꓡꓰ ꓝꓲˍ ꓟ ꓕꓱ ꓡꓱ ꓗꓷ ꓡꓰ ꓢꓲ꓾ ꓞꓳ ꓫꓵꓽ ꓥ ꓟꓲ ꓟꓶꓽ ꓡꓰ ꓠ ꓕꓱ ꓡꓱ ꓬꓰˍ ꓟ ꓥ ꓪ= ꓖꓳ ꓟ ꓑꓶ. ꓓꓴ ꓡꓲꓽ ꓒꓰꓼ ꓬꓲ ꓒꓵꓽ ꓔꓯ ꓣꓳ ꓠꓬ ꓟꓬꓽ ꓠꓬꓲ ꓐꓷ, ꓠꓬꓲ ꓒꓵꓽ ꓗ ꓬꓰ ꓢꓲ ꓠꓬꓲ ꓘꓳꓹ ꓣꓴ ꓢꓲ ꓠꓬꓲ꓾ ꓞꓳ ꓫꓵꓽ ꓕꓲ ꓫꓵꓽ ꓬꓲ ꓪ ꓙꓵꓻ ꓔꓬ ꓟ ꓙꓵꓻ ꓠꓲꓹ ꓔꓯ ꓥ ꓟꓲ ꓮ ꓕꓯ ꓥ ꓟꓲ ꓡꓳꓸ ꓙ ꓠꓬꓲ ꓙ ꓔ, ꓙ ꓖꓶ ꓢꓲ꓾ ꓡꓳꓸ ꓙ ꓠꓹ ꓟ ꓬꓳꓹ ꓚꓵˍ ꓡꓳ= ꓖꓳ ꓟ ꓡꓰ ꓐꓰ ꓕꓱ ꓡꓱ ꓵꓸꓹ ꓣꓳ ꓟꓽ ꓟꓬꓽ ꓟ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓡꓲꓽ ꓒꓰꓼ꓾ ꓬꓲ ꓪ ꓫꓸ ꓪ꓾ ꓬꓲ ꓪ ꓕꓳꓽ ꓶ꓾ ꓬꓲ ꓪ ꓙꓵꓻ ꓠꓲꓹ ꓔꓯ ꓟꓽ ꓐꓬ ꓡꓰ ꓠ ꓡꓳꓸ ꓙˍ ꓟ ꓗꓪ ꓐꓰ ꓢꓰꓼ ꓡꓯꓼ ꓘꓳ ꓓꓶꓽ ꓡꓯ ꓘꓳ ꓓꓴ ꓗꓴꓷꓼ ꓘꓴꓽ ꓗꓪ ꓕꓱ ꓡꓱ ꓔꓳꓹ ꓜꓳꓽ ꓡˍ ꓟ ꓥ ꓡꓳ=
