ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓿ ꓢ. ꓠꓯ ꓮꓓꓦꓰꓠꓔ ꓐꓯˍ ꓟ꓾ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓛꓵ, ꓣꓴ ꓠ, ꓟ ꓐꓱ ꓶ꓾ ꓘ‐ꓣꓲ‐ꓢ‐ꓟꓮꓢ ꓑꓮꓲꓽ ꓗꓪ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓳꓻ ꓡ ꓟ ꓔꓯ ꓘꓳ, ꓣꓴ ꓠ, ꓟ ꓐꓱ ꓶ꓾ ꓢ. ꓠꓯ ꓗꓪ ꓚꓳ. ꓮꓓꓦꓰꓠꓔꓴ ꓦꓬꓼ ꓠꓬꓲ ꓗꓪ ꓣꓳ ꓛꓲ ꓡꓺꓳ꓿ ꓮꓓꓦꓰꓠꓔ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓛꓲ ꓡ ꓠ, ꓟ꓾ ꓕꓲ ꓚꓱ, ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓟ ꓔꓯ ꓙꓽ ꓖꓶˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓣꓳ ꓠ ꓠ, ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓡꓴ‐ꓘ꓿21ꓽ25‐28,34‐36) ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓯꓼ ꓡˍ ꓕꓯ ꓟꓴꓽ ꓗꓪ ꓟꓲ ꓠꓯ ꓠꓬ ꓐꓬ ꓡꓰˍ ꓟ꓾ ꓟꓲꓽ ꓟꓲ ꓠꓬ ꓟꓽ ꓣꓳ ꓡ ꓟ꓾ ꓦ ꓐ ꓛꓲ ꓥˍ ꓟꓲ ꓐꓬ ꓡꓰˍ ꓟ꓾ ꓟꓲ ꓠꓯ ꓗꓪ ꓢꓯ. ꓫꓵꓽ ꓢꓯ. ꓙꓰꓽ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓟꓲꓽ ꓙꓬ ꓗꓪ ꓦꓰꓼ ꓞ, ꓠ ꓔ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓗ ꓠꓯ. ꓛꓳ ꓢꓴ ꓐꓴ ꓔꓯ꓾ ꓮ ꓕꓯ ꓥˍ ꓟꓲ ꓧꓪ. ꓛꓲꓽ ꓢꓲ ꓔꓬ꓾ ꓕꓽ ꓬꓲꓼ ꓟꓶ ꓔꓬ꓾ ꓙꓵ ꓓꓳꓻ ꓠꓬꓲ ꓬꓲꓼ ꓠꓬꓲ ꓔꓬ ꓢꓲ ꓠꓬꓲ ꓚꓲ. ꓛꓬ ꓮꓽ ꓔꓳ ꓔꓳ ꓕꓽ ꓒꓬ, ꓔꓬ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓠꓬꓲ ꓠꓬ ꓬꓲ ꓪꓻˍ ꓡꓰ ꓐꓰ ꓣꓳ ꓕꓯꓽ ꓢꓲ ꓗꓪ ꓪꓴꓻ ꓡꓰˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ ꓮ ꓕꓯ ꓥˍ ꓟꓲ ꓧꓪ. ꓛꓲꓽ ꓢꓲ ꓔꓬ꓾ ꓮ ꓕꓯ ꓥˍ ꓟꓲ ꓪꓽ ꓘꓴ ꓢꓲ ꓔꓬ꓾ ꓐꓰ ꓐꓯˍ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓣꓳ ꓠ ꓠ, ꓢꓲ ꓠꓬꓲ ꓮ ꓕꓯ ꓥˍ ꓟꓲ ꓧꓪ. ꓛꓲꓽ ꓢꓲ ꓔꓬ ꓠ, ꓟ ꓬꓳ. ꓚꓰꓽˍ ꓡꓳ꓿
ꓮ ꓠꓱ ꓕꓯ ꓤ ꓟꓶ ꓤ ꓕꓲ ꓣꓳ ꓟ ꓠꓬ ꓮ. ꓙꓵꓽ ꓕꓲ ꓟ ꓪꓴ ꓔꓯ, ꓡˍ ꓡꓳ꓿ ꓮ. ꓙꓵꓽ ꓖꓳ ꓟ ꓫ. ꓕꓱ ꓡ ꓠ, ꓟ ꓐꓱ ꓶ ꓬꓲ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓫ. ꓕꓱ ꓟ. ꓖꓶˍ ꓡꓳ꓿ ꓬꓲ ꓪꓴ. ꓕꓲ ꓠꓬꓲ ꓗꓪ ꓮ. ꓙꓵꓽ ꓖꓳ ꓟ ꓔꓯ ꓬꓲ ꓐꓱ ꓗꓪ ꓧꓳꓽ ꓗꓷ ꓢꓲ ꓠꓬꓲ ꓷ, ꓖꓴˍ ꓟꓲ ꓫꓬ, ꓖꓶˍ ꓡꓳ꓿ ꓬꓲꓼ ꓔ. ꓖꓴˍ ꓟꓲ ꓫꓬ, ꓖꓶˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓔꓯ꓾ ꓖꓳꓽ ꓙꓱ ꓤ ꓤˍ ꓟꓲ ꓕꓲ ꓟ ꓗꓶ ꓖꓶˍ ꓡꓳ꓿ ꓬꓲ ꓓꓯꓻ ꓓꓴ ꓬꓯꓼ ꓓꓴ ꓗꓽ ꓠꓯ, ꓓꓴ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓮ ꓡꓲ ꓟ. ꓖꓶˍ ꓥ ꓟꓲ ꓮ. ꓙꓵꓽ ꓖꓳ ꓟ ꓠꓬ ꓫ. ꓕꓱ ꓟꓽ ꓗꓴ. ꓡ꓿
ꓖꓳ ꓡꓱ ꓠꓬꓲ ꓬꓲ ꓠꓬ ꓮ. ꓙꓵꓽ ꓪꓴꓽ ꓢꓴ ꓔꓬ ꓗꓪ ꓙꓰ ꓢꓲ ꓠꓬꓲ꓾ “ꓠꓴ ꓮ. ꓙꓵꓽ ꓠꓬ ꓫ. ꓕꓱ ꓟ. ꓖꓶ ꓟꓽ ꓠ꓿ ꓬꓲ ꓠꓬ ꓮ ꓡꓲ ꓥˍ ꓟꓲ ꓫ. ꓕꓱ ꓟꓽ ꓓꓻ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓮ. ꓙꓵꓽ ꓪꓴꓽ ꓢꓴ ꓠꓬ “ꓒꓬꓱꓼ ꓡ ꓟꓽ ꓓ ꓐꓷ꓿ ꓮ ꓡꓲꓳ ꓐꓯˍ ꓠꓬ ꓥꓪ ꓔꓬ ꓗꓪ ꓚꓳ. ꓪꓴꓻ ꓔꓯ, ꓙꓰ ꓟ ꓮ. ꓙꓵꓽ ꓮ ꓙꓵꓽ ꓠꓬ ꓫ. ꓕꓱ ꓗꓴ.ˍ ꓫꓵꓽ ꓡꓰꓽ ꓥ ꓡꓳ꓿ ꓟ. ꓖꓶˍ ꓠꓬ ꓕꓱ ꓗꓴ.ˍ ꓡꓳ” ꓐꓰ ꓐꓯ ꓖꓶˍ ꓡꓳ꓿ ꓬꓲ ꓡꓰ꓾ “ꓠꓴ ꓮ. ꓙꓵꓽ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓫ. ꓕꓱ ꓟ. ꓖꓶ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓔꓬ, ꓖꓴ ꓷ, ꓖꓴˍ ꓟꓲ ꓷ, ꓖꓶ꓾” ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ “ꓥꓪ ꓠꓬ ꓮ ꓙꓵꓽ ꓬꓰ ꓖꓶ ꓗꓷꓳ꓿ ꓖꓳ ꓡꓱ ꓥˍ ꓟꓲ ꓮ. ꓙꓵꓽ ꓕꓱ ꓟ ꓠꓬ ꓫ. ꓕꓱ ꓟꓽ ꓗꓴ.” ꓐꓰ ꓐꓯ ꓖꓶˍ ꓡꓳ꓿
ꓝꓮꓲ ꓡꓯ ꓫꓵ ꓙꓰ ꓢꓲ ꓠꓬꓲ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ ꓮ. ꓙꓵꓽ ꓔꓯ ꓮ ꓡꓲ ꓟ. ꓖꓶˍ ꓥ ꓟꓲ ꓟ. ꓖꓶ ꓟꓽ ꓠ꓿ ꓗ ꓠꓯ. ꓕꓲ ꓠꓬꓲ ꓕꓯ ꓮ. ꓙꓵꓽ ꓖꓳ ꓟ ꓠꓬ ꓫꓵꓳ꓿ ꓖꓳ ꓕꓯ ꓬꓲ ꓡꓰ ꓮ. ꓙꓵꓽ ꓪꓴꓽ ꓢꓴ ꓔꓬ ꓗꓪ ꓡ ꓢꓲ ꓠꓬꓲ꓾ “ꓥꓪ ꓠꓴ ꓔꓬ, ꓗꓪ ꓚꓳ. ꓪꓴꓻ ꓔꓯ, ꓙꓰ ꓟ ꓮ. ꓙꓵꓽ ꓠꓬ ꓫꓵꓳ” ꓐꓰ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓮ. ꓙꓵꓽ ꓪꓴꓽ ꓢꓴ ꓠꓬ ꓓꓵꓽ ꓙ ꓟꓶ ꓡꓰ ꓢꓲ ꓠꓬꓲ “ꓮ. ꓙꓵꓽ ꓕꓱ ꓟ ꓮ ꓡꓲ ꓗꓷ ꓡꓰ ꓡ꓾ ꓕꓲ ꓘꓶꓽˍ ꓟꓲ ꓟꓽ ꓫ. ꓕꓱ ꓡ” ꓐꓰ ꓠ ꓠꓬꓲˍ ꓡꓳ꓿ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ “ꓬꓲ ꓫꓵꓻ ꓟꓳ.ˍ ꓕꓯ ꓠꓬ ꓕꓲ ꓘꓶꓽˍ ꓠꓬ ꓫ. ꓕꓱ ꓔꓲꓳ” ꓐꓰ ꓐꓯ ꓖꓶˍ ꓡꓳ꓿ ꓮ ꓡꓲ ꓐꓰ ꓐꓯ ꓔꓲ. ꓬꓰ ꓡ꓾ ꓐꓰ ꓠ ꓠꓬꓲˍ ꓕꓯ “ꓙꓵꓺ ꓗꓪ ꓮ. ꓙꓵꓽ ꓜꓻ ꓟꓽ ꓪꓴꓽ ꓡ” ꓐꓰ ꓐꓯ ꓔꓲ. ꓬꓰ ꓢꓲ꓾ ꓮ. ꓙꓵꓽ ꓖꓳ ꓟ ꓠꓬ ꓫꓵꓳ꓾ ꓐꓰ ꓒꓳ, ꓖꓶˍ ꓡꓳ꓿ ꓖꓳ ꓕꓯ ꓮ. ꓙꓵꓽ ꓪꓴꓽ ꓢꓴ ꓡꓰ ꓬꓲ ꓔꓯ “ꓠꓴ ꓠꓬ ꓮ. ꓙꓵꓽ ꓫ. ꓕꓱ ꓗꓴ. ꓡ ꓠ, ꓟ ꓐꓱ ꓶ ꓬꓲ ꓐꓱ ꓖꓴ ꓗꓪ ꓐꓱ ꓢꓲ ꓠꓬꓲ꓾ ꓬꓲꓼ ꓔ. ꓖꓴ ꓫꓬ, ꓖꓶˍ ꓥ ꓟꓲ꓾ ꓖꓳꓽ ꓙꓱ ꓤ ꓫꓬ, ꓖꓶˍ ꓥ ꓟꓲ ꓠꓴ ꓠꓬ ꓬꓲ ꓔꓯ ꓜꓻ ꓟꓽ ꓖꓶ ꓜ꓿ ꓜꓻ ꓖꓶ ꓜꓽ ꓠ, ꓟ ꓟꓲ ꓡꓰ, ꓗꓷ ꓐꓷ꓾” ꓐꓰ ꓐꓯ ꓖꓶˍ ꓡꓳ꓿
ꓥ ꓡꓳ꓾ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓮ. ꓙꓵꓽ ꓫ. ꓕꓱ ꓗꓴ. ꓡ ꓠ, ꓟ ꓐꓱ ꓶ ꓬꓲ ꓫꓵꓽ ꓬꓲ ꓙꓰꓽ ꓬꓰ ꓖꓶˍ ꓥ ꓟꓲ ꓬꓲ ꓔꓯ ꓜꓻ ꓟꓽ ꓖꓶ ꓜꓽ ꓪ ꓡꓰ꓿ ꓕꓱ ꓟˍ ꓡꓰ ꓐꓰ ꓣꓳ ꓤꓶꓻ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪ, ꓣꓳ ꓠꓬ꓾ ꓪꓴꓽ ꓡ ꓟꓴ ꓡ ꓠ, ꓟ ꓐꓱ ꓶ ꓚꓵ ꓚꓵ ꓢꓯꓼ ꓕꓵꓼˍ ꓡꓳ꓿ ꓝꓮꓲ ꓣꓳ ꓠꓬ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓗꓪ ꓐꓰ ꓡꓲ, ꓗꓷ ꓟꓶ ꓠ, ꓟ ꓐꓱ ꓶ ꓢꓯꓼ ꓕꓵꓼˍ ꓡꓳ꓿ ꓓꓵꓽ ꓙ ꓒꓳ, ꓬꓲ ꓡ ꓢꓲ ꓠꓬꓲ ꓪꓴ‐ꓢ ꓔꓬ ꓗꓪ ꓙꓰˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓠꓬ ꓣꓳ ꓮ ꓕꓯ ꓥˍ ꓟꓲ ꓬꓰ ꓔꓬ ꓟ ꓝꓴꓲ. ꓚꓳ ꓑ. ꓒꓬꓱꓼ ꓬꓰ ꓔꓬ ꓡꓳ꓿ ꓕꓱ ꓟ ꓠꓬ ꓣꓳ ꓠꓬ ꓮ ꓢꓳ ꓕꓯ ꓤ ꓟꓶ ꓤˍ ꓡꓰ ꓐꓰ ꓮ. ꓙꓵꓽ ꓔꓯ ꓜꓻ ꓟꓽ ꓖꓶ ꓜꓽ ꓟ ꓡꓰ ꓐꓰ꓾ ꓣꓳ ꓥ ꓟꓲ ꓣꓳ ꓢꓯꓼ ꓪ ꓥ ꓟ ꓪꓴ‐ꓢ ꓠꓯꓸꓼ ꓗꓪ ꓪꓽ ꓘꓴ ꓢꓲ ꓠꓬꓲ ꓜ ꓟꓽ ꓜꓽ ꓟ ꓑꓶ. ꓓꓴ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓪꓽ ꓘꓴ ꓠꓯ, ꓡꓳ꓿ ꓮ ꓡꓲ ꓐꓰ ꓘꓴ ꓠꓯ, ꓡ꓾ ꓮ ꓫꓵꓽ ꓐꓱ ꓶ ꓘꓴ ꓠꓯ, ꓡ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓞꓳ ꓤ ꓟꓲꓽ ꓙꓬ ꓗꓪ ꓦꓰꓼ ꓞ, ꓐ ꓡ ꓠ, ꓟ ꓐꓱ ꓶ꓾ ꓕꓱ ꓡꓱ ꓫꓵꓽ ꓦꓬꓼ ꓠꓬꓲ ꓔꓳ, ꓜꓳꓽ ꓡˍ ꓕꓯ ꓗꓳ. ꓙꓰ ꓐ ꓡ ꓠ, ꓟ ꓐꓱ ꓶ ꓠꓴ ꓪ ꓪꓽ ꓘꓴ ꓢꓲ ꓔꓬ꓾ ꓧꓪ. ꓛꓲꓽ ꓢꓲ ꓔꓬ꓾ ꓐꓰ ꓐꓯ ꓖꓶ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓮꓢꓦꓰꓠꓔꓴ ꓦꓬꓼ ꓠꓬꓲ ꓠꓬ꓾ ꓓꓵꓽ ꓙꓽ ꓒꓳ, ꓬꓲꓼ ꓡ ꓠ, ꓟ ꓦꓬꓼ ꓠꓬꓲˍ ꓟꓲ ꓥ ꓡꓳ꓿ ꓠꓬꓲ. ꓠꓬꓲ ꓠꓴꓻ ꓥꓪ ꓝꓴꓲ. ꓠꓯꓸꓼ ꓗꓪ ꓔꓲ, ꓓ, ꓫꓵꓽ꓾ ꓝꓴꓲ. ꓚꓳ ꓑ. ꓬꓰ ꓔꓬ ꓫꓵꓽ ꓥꓳ ꓐꓯ ꓠꓬ꓾ ꓠꓬꓲ. ꓠꓬꓲ ꓓꓵꓽ ꓙꓽ ꓒꓳ, ꓬꓲꓼ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓙꓰ ꓡꓯ꓿ ꓮ ꓕꓯ ꓥ ꓟꓲ ꓪꓽ ꓘꓴ ꓢꓲ ꓠꓬꓲ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
