ꓬ‐ꓗꓴꓠ ꓐꓰ ꓘꓴˍ ꓟ ꓬꓲꓻ ꓙꓬ ꓟꓶꓽ ꓛꓲ ꓔꓶ. ꓛꓵ ꓙꓲꓻ ꓖꓴ ꓙꓳˍ ꓟ
ꓬ‐ꓗꓴꓠ ꓜꓲ ꓠꓬ꓾ ꓠꓯ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓧꓪ ꓟꓰ, ꓠꓬꓲ ꓔ ꓟ ꓗꓪ꓾ ꓢꓰ,‐ꓛꓬꓳ ꓠꓻ ꓐꓱ ꓶ ꓮ ꓘꓶ. ꓙꓲꓻˍ ꓟ ꓬꓲ ꓢꓯꓼ ꓙꓳˍ ꓡꓳ꓾ ꓐꓰ ꓧꓪ ꓟꓳꓻ ꓔ ꓟ ꓑꓶ. ꓓꓴ ꓗꓳ. ꓡ ꓟ 4 5 ꓘꓳꓼ ꓘꓴꓽ ꓠꓯꓸꓼ ꓗꓪ ꓚꓳ. ꓮ ꓤ ꓮ ꓤ ꓐꓰ ꓞꓳ ꓤ ꓮ ꓟꓬ, ꓡꓰ ꓢꓷ. ꓡˍ ꓟ ꓬꓲ ꓜꓲ ꓕꓲ ꓙꓰꓽ ꓒꓬꓱꓼ ꓡˍ ꓡꓳ꓿
ꓬ‐ꓗꓴꓠ ꓜꓲ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲ ꓟꓴˍ ꓗꓷ ꓡꓰ ꓠ ꓬꓰ ꓖꓶˍ ꓡꓳ꓿ ꓬ‐ꓗꓴꓠ ꓗꓪ ꓝꓡꓮꓦꓮꓠꓳꓲꓓ꓾ ꓝꓣꓴꓚꓔꓳꓳꓡꓲꓖꓳꓢꓮꓚꓚꓧꓮꓣꓲꓓꓰ ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓓꓵˍ ꓟ꓾ ꓧꓪꓽ ꓖꓳ ꓓꓱꓽ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ꓾ ꓐꓰ ꓢꓷ. ꓙ ꓟꓳ ꓙ ꓔ ꓡꓳ꓿
ꓬ‐ꓗꓴꓠ ꓜꓲ ꓠꓬ ꓖꓴ ꓟꓶ. ꓮ‐ꓟꓰ,‐ꓣꓲ‐ꓗ ꓗꓪ ꓚꓳ. ꓬꓲ ꓪꓴ. ꓔꓴ ꓡˍ ꓟ ꓥ ꓢꓲ꓾ ꓟꓬ‐ꓟ ꓗꓴꓷꓼ ꓗꓪ ꓠꓬ ꓐꓶ‐ꓬꓲ ꓗꓴꓷꓼ ꓫꓴ ꓐꓰ ꓛꓲ, ꓗꓴꓷꓼ ꓫꓴ ꓗꓪ ꓟꓬꓽ ꓠꓬꓲ ꓔꓶˍ ꓟ ꓥ ꓡꓳ꓿ ꓬ‐ꓗꓴꓠ ꓬꓲ ꓒꓬꓽ ꓔꓯ ꓠꓬ ꓬꓲ ꓙꓴ ꓡꓱ. ꓗꓷ ꓢꓲ ꓠꓬꓲ꓾ ꓛꓽ‐ꓬꓰ, (ꓡꓽ‐ꓚꓬ.) ꓡꓰ ꓐꓰ ꓓꓳꓻ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓬ‐ꓗꓴꓠ ꓗꓪ ꓚꓮꓡꓳꓣꓲꓰꓢ ꓮ ꓔꓲ. ꓤ ꓡꓰ ꓙꓳˍ ꓟ ꓥ ꓢꓲ ꓑꓣꓳꓔꓰꓲꓠ꓾ ꓝꓲꓐꓰꓣ ꓢꓯꓼ ꓐꓰ ꓦꓲꓔꓮꓟꓲꓠ ꓮ꓾ ꓐ1꓾ ꓐ2 ꓐꓰ ꓦꓲꓔꓮꓟꓲꓠ ꓚ꓾ ꓕꓱ ꓡꓱ ꓫꓵꓽ ꓦꓲꓔꓮꓟꓲꓠ ꓢꓯꓼ ꓮ ꓟꓬ, ꓓꓵˍ ꓟ ꓥ ꓡꓳ꓿ ꓬ‐ꓗꓴꓠ ꓬꓲ ꓛꓵ ꓗꓪ ꓚꓮꓡꓚꓲꓴꓟ꓾ ꓑꓳꓔꓮꓢꓢꓲꓴꓟ꓾ ꓟꓮꓖꓠꓰꓢꓲꓴꓟ ꓐꓰ ꓑꓧꓳꓢꓑꓧꓳꓣꓴꓢ ꓢꓯꓼ ꓐꓴ ꓡꓰ ꓐꓰ꓾ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓳ ꓟꓽ ꓓꓻ ꓟ ꓟꓲꓠꓰꓣꓮꓡ ꓢꓯꓼ ꓮ ꓟꓬ, ꓓꓵˍ ꓟ ꓡꓰꓽ ꓟꓽ ꓞꓲꓺ ꓖꓳ ꓓꓱꓽ ꓐꓱ ꓶ ꓬꓳ. ꓚꓵˍ ꓟ ꓮꓟꓲꓠꓳ ꓮꓚꓲꓓ (20) ꓙꓰꓽ ꓛꓲ ꓓꓵˍ ꓟ ꓥ ꓡꓳ꓿
ꓬ‐ꓗꓴꓠ ꓠꓬ
ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓟ ꓡꓰ ꓐꓰ꓾ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓢꓯꓼ ꓔꓯ ꓥˍ ꓟꓲ ꓔꓲ ꓟꓴ. ꓗꓷ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓐꓲ ꓡ ꓝꓲ ꓢꓲ꓾ ꓦꓯ. ꓡꓰ ꓝꓱ ꓡꓰ ꓠ ꓬꓰ ꓙ ꓖꓶˍ ꓡꓳ꓿ ꓬ‐ꓗꓴꓠ ꓠꓬ ꓮ ꓘꓶ. ꓒꓵꓽˍ ꓟ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓢꓲ꓾ ꓬꓲ ꓑꓻ ꓔꓯ ꓥˍ ꓟꓲ ꓞꓼ ꓞꓼ ꓟꓲꓺ ꓡꓰ ꓝꓲˍ ꓟ ꓬꓲ ꓢꓯꓼ ꓙꓳˍ ꓡꓳ꓿ ꓬ‐ꓗꓴꓠ ꓠꓬ ꓠꓻ ꓙꓳ ꓢꓴ ꓐꓴ ꓪ ꓜꓲ ꓔꓬ, ꓢꓻ ꓡ ꓠ ꓔꓬ ꓙ ꓖꓶ ꓐ ꓡˍ ꓡꓳ꓿
ꓝꓮꓲ ꓠꓬ꓾ ꓠ ꓑ (2) ꓢꓰ,‐ꓛꓬꓳ ꓠꓻ ꓔꓯ ꓔꓲ ꓟꓴ. ꓗꓷ ꓡꓰ ꓝꓲˍ ꓟ꓾
ꓞꓼ ꓛꓵ (ꓞꓼ ꓐꓳ ꓐꓬꓽ) ꓐꓰ ꓟꓽ ꓕꓽ ꓢꓴ ꓐꓴ ꓐꓱ ꓶ ꓬ‐ꓗꓴꓠ ꓔꓯ ꓞꓼ ꓛꓵ (ꓞꓼ ꓐꓳ ꓐꓬꓽ) ꓡꓰ ꓐꓰ ꓣꓱꓽ ꓐ ꓡˍ ꓟ꓾
ꓚꓮꓠꓚꓰꓣ ꓠꓻ ꓔꓯ ꓗꓽ ꓕ. ꓐ ꓡˍ ꓟ꓾
ꓫꓵꓽ ꓒꓬ. ꓗꓪ ꓬꓲ ꓞꓶꓻ ꓟꓽ ꓑꓳ ꓡꓰ ꓠ (ꓟꓽ ꓑꓲ. ꓡꓰ ꓠ) ꓬꓰ ꓙ ꓖꓶ ꓐ ꓡˍ ꓟ꓾
ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓟꓽ ꓙꓳ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ (ꓔꓣꓲꓖꓡꓬꓚꓰꓣꓲꓔꓰꓢ) ꓔꓯ ꓠꓲ. ꓡꓰ ꓝꓲˍ ꓟ ꓢꓯꓼ ꓓꓯ,ˍ ꓟ꓾
ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓐꓰꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓟꓬꓽ ꓡꓰ ꓝꓲ ꓐ ꓡˍ ꓟ꓾
ꓦꓰꓼ ꓟ ꓙꓲꓺ ꓢꓻˍ ꓟ꓾
ꓠꓻ ꓤ ꓒꓬꓽ ꓤ ꓓꓵꓽ ꓡˍ ꓕꓯ ꓣꓳ ꓖꓳ ꓓꓱꓽ ꓡꓰ ꓗꓽ ꓕ. ꓐ ꓡˍ ꓟ ꓬꓲ ꓢꓯꓼ ꓕꓲ ꓙꓰꓽ ꓔꓯ ꓟꓬꓽ ꓠꓬꓲ ꓢꓯꓼ ꓡꓴꓽ ꓖꓶ ꓐ ꓡˍ ꓟ꓾
ꓳʼˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ꓾
ꓪꓳꓽ ꓔꓳ ꓐꓴ ꓔꓯ ꓪ ꓜꓲ ꓢꓯꓼ ꓙꓳ ꓪꓽ ꓠꓬꓲ ꓡꓰ ꓝꓲˍ ꓟ꓾
ꓫꓵꓽ ꓢꓯꓼ ꓠꓲ.ˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶˍ ꓟ꓾ ꓕꓱ ꓡꓱ ꓫꓵꓽ ꓙꓲꓻ ꓖꓴ ꓙꓳˍ ꓟ ꓥ ꓡꓳ꓿
ꓬ‐ꓗꓴꓠ ꓗꓪ ꓥˍ ꓟꓲ ꓠꓱ. ꓐꓯ ꓜꓽ ꓪꓳꓽ ꓡꓳ ꓪꓳꓽ꓾ ꓢꓲ, ꓢꓶꓽ ꓐꓴˍ ꓡꓰ ꓐꓰ ꓙꓲꓻ ꓖꓴ ꓙꓳˍ ꓟ ꓡꓰꓽ ꓟꓽ ꓞꓲꓺ꓾ ꓮ ꓟꓬ, ꓜꓽ ꓗꓷ ꓕꓯ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟˍ ꓟꓲ ꓒꓬꓱꓼ ꓡ ꓗꓴ.ˍ ꓡꓳ꓿
ꓬ‐ꓗꓴꓠ ꓬꓲ ꓒꓬꓽ ꓐꓰ ꓬꓲ ꓛꓵ ꓗꓪ ꓠꓬ ꓦꓰꓽ ꓟ ꓙꓲꓺ ꓜꓻˍ ꓟ ꓢꓯꓼ ꓙꓳˍ ꓟ ꓑꓶ. ꓓꓴ ꓮ ꓟꓬ, ꓜꓽ ꓗꓷ ꓕꓯ ꓦꓰꓽ ꓛꓲꓽ ꓧꓳ, ꓡ ꓗꓴ.ˍ ꓡꓳ꓿
ꓬ‐ꓗꓴꓠ ꓗꓪ ꓓꓵꓽˍ ꓟ ꓬꓲ ꓢꓯꓼ ꓐꓴ ꓐꓰ ꓟꓽ ꓕꓽ ꓢꓴ ꓠꓬ꓾ ꓜꓽ ꓗꓷˍ ꓕꓯ ꓟꓽ ꓕꓽ ꓟ ꓬꓲ ꓢꓷ. ꓡꓰ ꓓꓴ ꓮꓡꓡꓰꓣꓖꓲꓚ ꓒꓬꓱꓼ ꓡˍ ꓡꓳ꓿
ꓛꓽ‐ꓬꓰ, (ꓡꓽ‐ꓚꓬ.) ꓡꓰ ꓐꓰ ꓫꓬ, ꓔ ꓟ ꓬ‐ꓗꓴꓠ ꓬꓲꓻ ꓠꓬ ꓢꓰ,‐ꓛꓬꓳ ꓠꓻ ꓙꓳ ꓢꓴ ꓐꓴ ꓐꓱ ꓶ ꓮ ꓘꓶ. ꓙꓲꓻˍ ꓐꓯ ꓥˍ ꓟꓲ꓾ ꓪꓳꓽ ꓓꓲꓻ ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓠꓯꓻ ꓞꓲꓼ ꓔꓯ ꓟꓳ. ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓧꓪ ꓟꓳꓻ ꓔ ꓟ ꓥ ꓡꓳ꓿
