ꓬꓲ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓙꓲ‐ꓢꓴ ꓪ ꓔꓲ.꓾ ꓘ‐ꓣꓲ‐ꓢ‐ꓔꓴ ꓪ ꓔꓲ. ꓑꓮꓲꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓪ ꓔꓲ. ꓕꓯꓽ ꓢꓲ ꓗꓪ ꓪ ꓔꓲ. ꓥ ꓡꓳ꓿ ꓟꓲ ꓠꓯ ꓗꓪ ꓙꓳˍ ꓟ ꓪ ꓔꓲ. ꓮ ꓙꓵꓽ ꓟ ꓕꓯꓽ ꓢꓲ꓾ ꓮ ꓠꓱ ꓟꓵꓽ ꓚꓰꓼ ꓟꓲ ꓚꓰꓼ ꓕꓯ ꓡꓰ ꓙꓳ ꓗꓳ. ꓡˍ ꓟ ꓢꓯ. ꓫꓵꓽ ꓢꓯ. ꓙꓰꓽ꓾ ꓪ ꓔꓲ.꓾ ꓬꓲ ꓫꓵꓽ ꓬꓲ ꓙꓰꓽ ꓮ ꓙꓵꓽ ꓟ ꓕꓯꓽ ꓢꓲ꓾ ꓮ ꓟꓶ ꓢꓯ. ꓔꓬ ꓟ ꓪ ꓔꓲ. ꓟꓯꓼ ꓢꓲꓽ ꓒ ꓐꓴ ꓮ ꓙꓵꓽ ꓟ ꓕꓯꓽ ꓢꓲ ꓪꓴꓽˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓥ ꓡꓳ꓿ ꓪ ꓔꓲ. ꓕꓯꓽ ꓢꓲ ꓗꓪ ꓪ ꓔꓲ. ꓥ ꓡꓳ꓿ ꓣꓳ ꓪ ꓔꓲ ꓬꓰ‐ꓢꓴ ꓔꓯ ꓓꓳ ꓟꓴ,ˍ ꓟ ꓑꓮꓲꓽ꓾ ꓬꓲ ꓔꓯ ꓪꓴ. ꓓꓵ ꓕꓱꓼˍ ꓟ ꓑꓮꓲꓽ꓾ ꓬꓲ ꓔꓯ “ꓠꓴ ꓠꓬ ꓚꓵ ꓚꓵ ꓥꓪ ꓐꓱ ꓶ ꓥˍ ꓟꓲ ꓪ ꓔꓲ. ꓥꓳ” ꓐꓰ ꓪꓵꓼ ꓙꓱꓽˍ ꓟ ꓑꓮꓲꓽ ꓔꓯ ꓢ. ꓠꓯ ꓠꓬ ꓣꓳꓽ ꓬꓰˍ ꓥꓳ꓿
ꓮ ꓫꓵꓽ ꓑꓶ. ꓓꓴ ꓑꓮꓲꓽ ꓕꓱ ꓟ ꓔꓯ ꓣꓳꓽ ꓬꓰˍ ꓡ? ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓥˍ ꓟꓲ꓾ ꓥꓪ ꓠꓬ ꓪ ꓔꓲ. ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓫꓵꓻˍ ꓟ ꓦꓬꓼ ꓠꓬꓲ ꓡꓯꓽ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓥˍ ꓟꓲ “ꓬꓴ‐ꓔ ꓡ ꓞꓳ ꓐꓴ ꓪ ꓔꓲ.” ꓐꓯ ꓢꓲ ꓠꓬꓲ ꓕꓳꓽ ꓶ ꓕꓲ ꓚꓬ. ꓐꓳ ꓔ ꓡꓳ꓿ ꓣꓳ ꓢꓷ.ˍ ꓟ ꓣꓳ ꓙꓵꓻˍ ꓟ ꓪ ꓔꓲ. ꓠꓬ ꓮ ꓡꓲ ꓫꓵꓽ ꓪ ꓔꓲ. ꓥ ꓡ? ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓡꓳ. ꓠꓬꓲ ꓡꓯ꓿ ꓣꓳ ꓪ ꓔꓲ. ꓠꓬ ꓟꓲ ꓠꓯ ꓞꓳ ꓤ ꓡꓰ ꓢꓰꓼˍ ꓟ ꓟꓶˍ ꓟ꓾ ꓘꓳ, ꓣꓴˍ ꓟ꓾ ꓣꓳ ꓐꓱ ꓶ ꓟꓲ ꓠꓯ ꓞꓳ ꓤ ꓐꓴ ꓐꓱ ꓶ ꓢꓯꓼ ꓟꓬ ꓖꓶˍ ꓟ ꓪ ꓔꓲ ꓥ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓬꓳ‐ꓦ 18ꓽ33‐37 ꓥ ꓡꓳ꓿ ꓢꓲꓽ ꓒ ꓑꓲ‐ꓡ‐ꓔꓴ ꓡꓰ ꓢꓲ ꓒ ꓬꓰ‐ꓢꓴ ꓔꓯ꓾ ꓠꓴ ꓠꓬ ꓪ ꓔꓲ. ꓥ ꓡ꓾ ꓐꓰ ꓠ ꓠꓬꓲˍ ꓟ ꓟ. ꓟꓲꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ꓾ ꓠꓴ ꓐꓯˍ ꓟ ꓡꓰ ꓐꓰ ꓥꓪ ꓠꓬ ꓪ ꓔꓲ. ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓒꓳ, ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓪ ꓔꓲ. ꓠꓬ ꓟꓲ ꓠꓯ ꓗꓪ ꓟ ꓪ ꓔꓲ. ꓐꓴ ꓔꓯ ꓟꓽ ꓫꓱ.꓿ ꓟꓲ ꓠꓯ ꓪ ꓔꓲ ꓠꓬ ꓬꓲ ꓑ ꓫꓬ ꓐꓴ ꓔꓯ ꓜꓲꓽ ꓜꓲꓽ ꓑꓰ, ꓑꓰ, ꓬꓰ ꓠ, ꓟ ꓐꓱ ꓶ꓾ ꓧꓪ. ꓜꓽ ꓠ, ꓟ ꓐꓱ ꓶ꓾ ꓬꓲ ꓘꓳ. ꓖꓳ ꓠ, ꓟ ꓐꓱ ꓶ꓾ ꓚꓲ. ꓛꓬ ꓐꓱ ꓶˍ ꓡꓰꓽ ꓪ ꓔꓲ. ꓣꓱꓽˍ ꓡꓳ꓿ ꓖꓳ ꓡꓱ ꓥˍ ꓟꓲ ꓣꓳ ꓪ ꓔꓲ. ꓠꓬ ꓣꓳ ꓐꓱ ꓶ꓾ ꓣꓳ ꓝꓴꓲ. ꓐꓱ ꓶ ꓡꓰ. ꓬꓲ ꓠꓬ ꓟꓯꓻ ꓙ ꓢꓲ ꓠꓬꓲ ꓣꓳ ꓐꓱ ꓶ ꓢꓯꓼ ꓟꓬ ꓖꓶˍ ꓡꓳ꓿ ꓣꓳ ꓔꓯ ꓣꓱꓽ ꓙ ꓠ, ꓟ ꓬꓲ ꓬꓯꓼ ꓡˍ ꓡꓳ꓿ ꓟꓲ ꓠꓯ ꓪ ꓔꓲ. ꓠꓬ ꓬꓲ ꓙꓵꓽ ꓪ ꓗꓪ ꓐꓰ ꓞꓳ ꓤ ꓔꓯ ꓙꓵꓽˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓪ ꓔꓲ. ꓢꓲ ꓒ ꓠꓬ ꓠꓵꓻ ꓠꓲ, ꓗꓪ ꓐꓰ ꓣꓳ ꓠꓲ, ꓟ ꓠꓯꓸꓼ ꓗꓪ ꓙꓵꓽˍ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓗꓪ ꓓꓵꓽ ꓙꓽ ꓠꓬꓲ ꓡꓯ꓿ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓔꓯ ꓠꓴ ꓪ ꓔꓲ. ꓕꓲ ꓣꓳˍ ꓡꓰ ꓐꓰ ꓠꓴ ꓘꓳ ꓣꓴˍ ꓡ? ꓘꓳ ꓣꓴˍ ꓥꓳ ꓐꓰ ꓐꓯˍ ꓕꓯ ꓠꓴ ꓠꓬ ꓠꓴ ꓚꓲ. ꓛꓬ ꓓꓵꓽ ꓙꓽˍ ꓟ ꓡꓰꓽ ꓔꓱ, ꓜꓳꓽˍ ꓟ ꓐꓰ ꓟꓽ ꓚꓬ,꓿ ꓠꓴ ꓬꓰˍ ꓟ ꓡꓰꓽ ꓥꓳ꓾ ꓐꓰ ꓠꓴ ꓠꓬ ꓟꓽ ꓓꓵꓽ ꓙꓽ꓿ ꓥꓪ ꓬꓰˍ ꓟ ꓮ ꓙꓵꓽ ꓜꓳꓽˍ ꓥꓳ ꓐꓰ ꓐꓯ ꓢꓲˍ ꓟꓲ ꓠꓴ ꓘꓶꓽ ꓟꓽ ꓘ,꓿ ꓮ ꓫꓵꓽ ꓑꓶ. ꓓꓴ ꓥ ꓡ? ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓪ ꓔꓲ. ꓥ ꓟ ꓑꓶ. ꓓꓴ ꓣꓳ ꓬꓰˍ ꓟ ꓣꓳ ꓓꓵꓽ ꓙꓽˍ ꓟ ꓮ ꓙꓵꓽ ꓠꓬ ꓣꓳ ꓪ ꓔꓲ. ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓠꓯꓸꓼ ꓗꓪ ꓙꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓕꓱ ꓡꓱ ꓟꓽ ꓥ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓪ ꓔꓲ. ꓐꓰ ꓘꓳ ꓣꓴˍ ꓥˍ ꓟꓲ꓾ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓕꓯꓽ ꓢꓲ ꓗꓪ ꓪ ꓔꓲ. ꓣꓱꓽ ꓔꓬ ꓟˍ ꓡꓰ ꓐꓰ ꓗ, ꓡꓳ꓿
ꓣꓳ ꓠꓲ, ꓡꓶꓽ꓾ ꓣꓳ ꓬꓰˍ ꓟ ꓣꓳ ꓓꓵꓽ ꓙꓽˍ ꓟ ꓠꓬ ꓔꓱ, ꓜꓳꓽˍ ꓥꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓔ ꓟ ꓐꓯ ꓘꓶꓽ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓟ ꓢꓶ. ꓟꓽ ꓞꓲ ꓣꓳ ꓠꓬ ꓬꓲ ꓢꓯꓼ ꓪ ꓔꓯ ꓦ ꓡꓱˍ ꓕꓯ꓾ ꓣꓳ ꓢꓷ. ꓠꓲ, ꓔꓯ ꓦ ꓡꓱˍ ꓕꓯ ꓖꓳ ꓟ ꓠꓬ ꓣꓳ ꓠꓬ꓾ ꓢꓲ ꓒ ꓕꓯꓽ ꓢꓲ ꓗꓪ ꓣꓳꓽ ꓪ ꓔꓲ. ꓣꓱꓽ ꓔꓬ ꓟ ꓐꓰ ꓕꓲ ꓡꓰ, ꓥꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓔꓬ, ꓖꓴ ꓖꓶ ꓡꓯ꓿ ꓬꓲ ꓔꓯ ꓪ ꓔꓲ. ꓣꓱꓽ ꓝꓲ ꓡꓯ꓿ ꓣꓳ ꓓꓻˍ ꓟ꓾ ꓣꓳ ꓒꓴ ꓙꓳˍ ꓟ꓾ ꓣꓳ ꓟꓬꓱꓽ ꓬꓰˍ ꓟ꓾ ꓙꓰ ꓖꓴ ꓡ ꓖꓴ ꓮ ꓙꓵꓽ ꓟ ꓗꓪ ꓬꓲ ꓔꓯ ꓙꓵꓽ ꓝꓲ꓿ ꓣꓳꓽ ꓦꓲꓻ ꓗꓪ ꓬꓲ ꓔꓯ ꓔꓬ ꓖꓴ ꓫꓬ, ꓖꓶ ꓢꓲ ꓠꓬꓲ꓾ “ꓢꓲ ꓒ ꓬꓰ‐ꓢꓴꓳ꓾ ꓠꓬꓲ. ꓠꓬꓲ ꓥꓪ ꓠꓴꓽ ꓦꓲꓻ ꓗꓪ ꓬꓯꓼ ꓡꓯ꓿ ꓢꓲ ꓡꓲ ꓟ ꓖꓶ ꓡꓯ꓿ ꓪ ꓔꓲ. ꓣꓱꓽ ꓡꓯ” ꓐꓯ ꓢꓲ ꓠꓬꓲ ꓬꓲ ꓔꓯ ꓘꓳ, ꓣꓴ ꓡꓯ꓿ ꓚꓵ ꓚꓵ ꓢꓲ ꓒ ꓠꓬ ꓣꓳ ꓪ ꓔꓲ ꓬꓰ ꓡˍ ꓥꓳ꓿
ꓣꓳ ꓪ ꓔꓲ. ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓘꓳ, ꓣꓴˍ ꓕꓯ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓬꓲ ꓔꓯ ꓔꓬ ꓖꓴ ꓖꓶˍ ꓕꓯ꓾ ꓬꓲ ꓠꓬ ꓣꓳ ꓔꓯ ꓙꓵꓽ ꓐ ꓡ ꓢꓲ ꓠꓬꓲ ꓣꓳꓽ ꓔꓯ ꓙꓲ ꓣꓴꓽ ꓟꓬ ꓑꓬ ꓓꓴ꓾ ꓘꓶꓻ ꓡꓶꓽ ꓓꓴ꓾ ꓠꓲꓽ ꓪ ꓔꓲ. ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓕꓱ ꓡꓱ ꓫꓵꓽ ꓮ ꓙꓵꓽ ꓟ ꓗꓪ ꓐꓰ ꓗꓽ ꓔ ꓖꓶˍ ꓟ ꓡꓰꓽ ꓟꓽ ꓞꓲꓺ꓾ ꓣꓳ ꓔꓳ, ꓜꓳꓽ ꓠ ꓔ ꓟ ꓫ. ꓙꓵ ꓟꓶ ꓙꓵ ꓓꓴ꓾ ꓟꓬ ꓐꓲ ꓞꓰ ꓓꓴ꓾ ꓠꓲ, ꓫ. ꓟꓬ ꓫ. ꓓꓴ ꓕꓱ ꓡꓱ ꓫꓵꓽ ꓮ ꓙꓵꓽ ꓟ ꓠꓯꓸꓼ ꓗꓪ ꓐꓰ ꓣꓳ ꓔꓯ ꓗꓳ. ꓙ ꓙꓰ ꓐ ꓡ ꓠ, ꓟ ꓐꓱ ꓶ ꓢꓯꓼ ꓪ ꓖꓶ ꓡˍ ꓥꓳ꓿
ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓪ ꓔꓲ. ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿ ꓣꓳ ꓐꓱ ꓶ꓾ ꓣꓳ ꓝꓴꓲ. ꓐꓱ ꓶ ꓬꓲ ꓫꓵꓻ ꓙ ꓗꓷꓳ꓿ ꓬꓲ ꓠꓬ ꓠꓵꓻ ꓠꓲ, ꓡꓰ ꓣꓳ ꓔꓯ ꓠꓲ, ꓟ ꓠꓯꓸꓼ ꓗꓪ ꓙꓵꓽ ꓔꓬ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓙ ꓣꓳꓽˍ ꓟ ꓠꓲ, ꓟ ꓡꓰ ꓣꓳ ꓠꓵꓻ ꓠꓲ, ꓬꓲ ꓔꓯ ꓝꓮꓲ ꓕꓲ ꓧꓪ, ꓖꓶ ꓡꓯ꓿ ꓣꓳ ꓪ ꓔꓲ. ꓐꓰ ꓣꓳ ꓣꓷꓠ. ꓢꓲ ꓠꓬꓲ ꓣꓳ ꓬꓰˍ ꓟ ꓮ ꓙꓵꓽ ꓗꓪ ꓬꓲ ꓔꓯ ꓔꓬ, ꓖꓴ ꓖꓶ ꓢꓲ ꓠꓬꓲ ꓬꓲ ꓔꓯ ꓧꓳꓽ ꓣꓱꓽ ꓝꓲ꓿ ꓮ ꓙꓵꓽ ꓢꓴ ꓙꓲ‐ꓢꓴ ꓪ ꓔꓲ. ꓬꓲ ꓚꓬꓴ. ꓙ ꓟꓳ ꓙˍ ꓟ ꓟꓶ ꓢꓲ ꓠꓬꓲ꓾ ꓮ ꓕꓯ ꓥˍ ꓟꓲ ꓗ, ꓛꓲꓽ ꓐ ꓡ ꓝꓲ꓿ ꓫ. ꓟꓳ꓿
