ꓒꓴꓽ‐ꓡꓴ, ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓮ ꓟꓬ, ꓖꓶˍ ꓟ ꓪꓳꓽ ꓒꓬꓽ ꓕꓲꓽ ꓙꓰꓽ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓒꓴꓽ-ꓡꓴ, ꓗꓪ ꓬꓲꓻ ꓙꓬ ꓢꓯꓼ 92% ꓗꓪ ꓛꓲ ꓓꓵˍ ꓟ ꓑꓶ. ꓓꓴ ꓥ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ꓾ ꓒꓴꓽ‐ꓡꓴ, ꓘꓴꓽ ꓗꓪ ꓮ ꓟꓶ ꓟ ꓡꓰ ꓣꓳ ꓖꓳ ꓓꓱꓽ ꓐꓱ ꓶ ꓙꓲꓻˍ ꓟ ꓬꓲ ꓢꓯꓼ ꓥˍꓟꓲ ꓮ ꓟꓬ, ꓓꓵˍ ꓟ ꓥ ꓡꓳ꓿ ꓒꓴꓽ‐ꓡꓴ, ꓘꓴꓽ ꓗꓪ ꓝꓲꓐꓰꓣ ꓢꓯꓼ ꓾ ꓦꓲꓔꓮꓟꓲꓠ ꓮ꓾ꓐ꓾ꓚ꓾ꓰ꓾ ꓗ꓾ ꓲꓣꓳꓠ ꓢꓯꓼ꓾ ꓝꓳꓡꓮꓔꓰ꓾ ꓑꓳꓔꓮꓢꓢꓲꓴꓟ꓾ ꓟꓮꓖꓠꓰꓢꓰ꓾ ꓚꓮꓣꓐꓳꓧꓬꓓꓣꓮꓔꓰꓢ꓾ ꓚꓮꓡꓚꓲꓴꓟ ꓐꓰ ꓑꓣꓳꓔꓰꓲꓠ ꓢꓯꓼ ꓐꓴ ꓙꓳˍ ꓟ ꓥ ꓡꓳ꓿

ꓒꓴꓽ‐ꓡꓴ, ꓡꓰ ꓖꓶˍ ꓟ ꓙꓲꓻ ꓓꓴ ꓐꓴ ꓠꓬ

ꓖꓳ ꓓꓱꓽ ꓔꓯ ꓡꓬꓽ ꓡꓰ ꓝꓲˍ ꓡꓳ꓾

ꓒꓴꓽ ꓡꓴ, ꓠꓬ ꓖꓳ ꓓꓱꓽ ꓔꓯ ꓡꓬꓽ ꓡꓰ ꓝꓲ ꓢꓲ ꓬꓲꓻ ꓙꓬ ꓢꓯꓼ ꓡꓴꓽ ꓖꓶ ꓐ ꓡˍ ꓡꓳ꓿ ꓦꓰꓼ ꓟ ꓦꓰꓽ ꓛꓲꓽ ꓔꓯ ꓡꓬꓽ ꓡꓰ ꓝꓲ ꓐ ꓡˍ ꓟ ꓥ ꓢꓲ꓾ ꓖꓳ ꓓꓱꓽ ꓗꓪ ꓟ ꓞꓻ ꓢꓯꓼ ꓔꓯ ꓥˍ ꓟꓲ ꓡꓬꓽ ꓡꓰ ꓝꓲˍ ꓡꓳ꓿ ꓚꓵ, ꓬꓲꓻ ꓮ ꓘꓶ. ꓓꓳˍ ꓟ ꓞꓻ ꓝꓲ. ꓕꓯ ꓜꓽ ꓖꓶ ꓠꓯ, ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ꓿ ꓖꓳ ꓓꓱꓽ ꓗꓪ ꓐꓰ ꓓꓳ ꓙꓰ ꓟ ꓬꓲꓻ ꓙꓬ ꓢꓯꓼ ꓔꓯ ꓡꓴꓽ ꓖꓶ ꓐ ꓡˍ ꓡꓳ꓿

ꓠ ꓘꓴ ꓫꓵꓽ ꓓꓳˍ ꓟ꓾ ꓒꓬꓱꓽ ꓟꓬ ꓗꓪ ꓬꓲ ꓑ ꓓꓲꓻˍ ꓟ ꓐꓰ ꓟꓷꓽ ꓠꓷ, ꓘꓴꓽ ꓗꓪ ꓬꓲ ꓑꓻ ꓓꓲꓻˍ ꓟ ꓗꓪ ꓐꓰ ꓗꓽ ꓕ. ꓠ, ꓟ ꓐꓱ ꓶ ꓒꓴꓽ ꓡꓴ, ꓔꓯ ꓜꓽ ꓖꓶ ꓐ ꓡˍ ꓡꓳ꓿

ꓦꓰꓼ ꓟ ꓙꓲꓺˍ ꓟ ꓟꓬꓱꓽ ꓬꓰ ꓚꓱ, ꓔꓯ ꓬꓰ ꓙ ꓖꓶˍ ꓡꓳ꓾

ꓒꓴꓽ ꓡꓴ, ꓢꓶꓽ ꓗꓪ ꓠꓬ ꓝꓲꓐꓰꓣ ꓢꓯꓼ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓦꓰꓼ ꓟ ꓙꓲꓺ ꓟꓽ ꓢꓻ ꓟ ꓔꓯ ꓙꓲꓺ ꓢꓻ ꓡꓰ ꓝꓲ ꓢꓲ꓾ ꓦꓰꓽ ꓛꓲꓽ ꓐꓬ ꓦꓰꓽ ꓛꓲꓽ ꓧꓳ, ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓿

ꓜꓽ ꓓꓴ ꓐꓴ ꓔꓯ ꓢꓻ ꓢꓻ ꓡꓰ ꓙꓲꓺ ꓖꓶˍ ꓟ ꓑꓶ. ꓓꓴ ꓬꓲ ꓪꓴ ꓚꓱ, ꓕꓲ ꓟ ꓡꓱꓸꓼ ꓔꓯ ꓫꓬ ꓡꓰ ꓝꓲ ꓐ ꓡˍ ꓡꓳ꓿ ꓬꓲ ꓪꓴ. ꓓꓽ ꓟ ꓠꓬ ꓔꓬ, ꓢꓻ ꓢꓲ ꓠꓻ ꓟꓽ ꓙꓳ ꓠ, ꓟ ꓐꓱ ꓶ ꓒꓴꓽ ꓡꓴ, ꓔꓯ ꓜꓽ ꓐ ꓡˍ ꓟ ꓥ ꓡꓳ꓿

ꓦꓰꓽ ꓛꓲꓽ ꓘꓳꓼ ꓠꓻˍ ꓕꓯ ꓒꓴꓽ ꓡꓴ, ꓙꓲꓺ ꓔ ꓟ ꓬꓲ ꓬꓲꓻ ꓘꓴ ꓗꓪ ꓞꓼ ꓐꓳ ꓮ ꓔꓲ. ꓤ ꓧꓳꓽ ꓗꓷ ꓢꓲ ꓓꓳꓻ ꓖꓶ ꓐ ꓡˍ ꓡꓳ꓿ ꓖꓳ ꓡꓱ ꓓꓳꓻ ꓖꓶˍ ꓟ ꓗꓪ ꓐꓰ ꓖꓳ ꓓꓱꓽ ꓗꓪ ꓐꓰ ꓓꓳ ꓙꓰ ꓟ ꓬꓲꓻ ꓙꓬ ꓢꓯꓼ ꓐꓰ ꓞꓼ ꓐꓳ ꓢꓯꓼ ꓔꓯ ꓧꓳꓽ ꓡꓴꓽ ꓖꓶ ꓐ ꓡˍ ꓟ ꓥ ꓡꓳ꓿

ꓠꓲ, ꓟ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓾

ꓒꓴꓽ ꓡꓴ, ꓠꓬ ꓫꓵꓽ ꓘꓴꓽ ꓗꓪ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓔꓯ ꓞꓰꓻ ꓡꓰ ꓝꓲ ꓐ ꓡˍ ꓟ ꓑꓶ. ꓓꓴ ꓠꓲ, ꓟ ꓔꓬ, ꓢꓻ ꓓꓴ ꓐꓱ ꓶ ꓮ ꓟꓬ, ꓔꓳ, ꓙ ꓖꓶˍ ꓟ ꓥ ꓡꓳ꓿

ꓝꓮꓲ ꓠꓲ, ꓟ ꓓꓵꓽ ꓙ ꓪꓴꓽ ꓧꓶˍ ꓟ ꓔꓯ ꓥˍ ꓟꓲ ꓢꓻ ꓡꓰ ꓝꓲ ꓐ ꓡˍ ꓡꓳ꓾

ꓒꓴꓽ ꓡꓴ, ꓢꓶꓽ ꓗꓪ ꓪꓴ. ꓠꓷ. ꓐꓰ ꓮ‐ꓬꓳ‐ꓚꓬꓮꓪ ꓬꓲ ꓙꓴꓽ ꓐꓴ ꓔꓯ ꓔꓬ, ꓢꓻ ꓝꓲ ꓐ ꓡˍ ꓟ ꓚꓧꓳꓡꓲꓠꓰ ꓢꓯꓼ ꓓꓵˍ ꓟ ꓑꓶ. ꓓꓴ ꓚꓲ. ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡ ꓝꓲ ꓢꓲ꓾ ꓪꓴ. ꓠꓷ. ꓟꓬꓱꓽ ꓬꓰˍ ꓟ ꓔꓯ ꓥˍ ꓟꓲ ꓟꓬꓽ ꓠꓬꓲ ꓢꓯꓼ ꓙꓳ ꓡ ꓝꓲ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓠꓲ, ꓟ ꓓꓵꓽ ꓙ ꓪꓴꓽ ꓧꓶˍ ꓟ ꓐꓰ꓾ ꓠꓲ, ꓟ ꓙꓬꓻ ꓡꓰ ꓢꓻˍ ꓟ ꓔꓯ ꓥˍ ꓟꓲ ꓓꓻꓡꓰ ꓝꓲ ꓐ ꓡˍ ꓡꓳ꓿ ꓠꓲ, ꓟ ꓔꓬ, ꓢꓻ ꓠ, ꓟ ꓐꓱ ꓶ ꓜꓽ ꓖꓶ ꓠꓯ, ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ꓿

ꓬꓲꓻ ꓙꓬ ꓢꓯꓼ ꓡꓴꓽ ꓖꓶˍ ꓡꓳ꓾

ꓢꓯꓼ ꓩꓴˍ ꓟ ꓟꓬꓱꓽ꓾ ꓚꓵ, ꓬꓲꓻ ꓓꓳˍ ꓟ ꓟꓬꓱꓽ ꓬꓰ ꓗꓷ ꓗ ꓠꓯ. ꓓꓳ ꓙꓰ ꓟ ꓬꓲꓻ ꓙꓬ ꓢꓯꓼ꓾ ꓞꓼ ꓐꓳ ꓐꓬꓽ ꓢꓯꓼ (ꓞꓼ ꓛꓵꓻ ꓢꓯꓼ)꓾ ꓐꓰ ꓚꓮꓣꓐꓳꓧꓬꓓꓣꓮꓔꓰ ꓢꓯꓼ ꓐꓴ ꓔꓯ ꓝꓮꓲ ꓕꓲ ꓧꓪ, ꓡꓴꓽ ꓖꓶ ꓠ, ꓟ ꓐꓱ ꓶ ꓠꓬ ꓒꓴꓽ ꓡꓴ, ꓔꓯ ꓜꓽ ꓐ ꓡˍ ꓟ ꓥ ꓡꓳ꓿ ꓑꓣꓳꓔꓰꓲꓠ ꓐꓰ ꓠꓱ. ꓐꓯ ꓬꓲ ꓢꓯꓼ ꓮ ꓟꓬ, ꓓꓵˍ ꓟ ꓒꓴꓽ ꓡꓴ, ꓢꓶꓽ ꓠꓬ ꓧꓪꓽ ꓘꓴ. (ꓗꓪꓮꓔ ꓔꓮꓣ) ꓢꓯꓼ ꓙꓳ ꓡ ꓠ ꓬꓰ ꓙ ꓖꓶˍ ꓡꓳ꓿

ꓤꓲꓽ ꓒꓴꓽ ꓚꓱ, ꓗꓪ ꓐꓶꓽ ꓓꓲꓻ ꓓꓵꓽ ꓡˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾

ꓤꓲꓽ ꓒꓴꓽ ꓚꓱ, ꓗꓪ ꓐꓶꓽ ꓓꓲꓻ ꓓꓵꓽ ꓡꓰˍ ꓕꓯ ꓒꓴꓽ ꓡꓴ, ꓕꓲꓽ ꓢꓶ, ꓔꓯ ꓬꓲ ꓬꓲꓻ ꓓꓳ ꓡ ꓠ ꓙꓲꓺ ꓗꓷ ꓢꓲ ꓔꓯ‐ꓑ‐ꓬ ꓬꓲꓻ ꓮ ꓔꓲ. ꓧꓳꓽ ꓗꓷ ꓢꓲ ꓓꓳꓻ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓕꓱ ꓡꓱ ꓓꓳꓻ ꓖꓶˍ  ꓟ ꓠꓬ ꓤꓲꓽ ꓒꓴꓽ ꓚꓱ, ꓗꓪ ꓐꓶꓽ ꓓꓲꓻ ꓓꓵꓽ ꓡꓰˍ ꓟ ꓗꓪ ꓐꓰ ꓢꓷ. ꓓꓻ ꓓꓻ ꓡꓰꓽ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿

ꓝꓮꓲ ꓫꓵꓽ ꓒꓬ. ꓗꓪ ꓬꓲ ꓓꓳꓼ ꓐꓴ ꓔꓯ ꓥˍ ꓟꓲ ꓫꓬ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿