ꓪꓴ‐ꓢ ꓐꓰ ꓞꓳ ꓤ ꓘꓶꓽ ꓫꓵꓽ ꓬꓰˍ ꓟ ꓚꓱ, ꓗꓪ ꓐꓰ꓾ ꓘꓶꓽ ꓫꓵꓽ ꓮ ꓡꓲ ꓐꓰ ꓬꓰˍ ꓡ꓾ ꓐꓯˍ ꓟ ꓚꓱ, ꓔꓯ ꓐꓯ ꓟ. ꓖꓶˍ ꓥꓳ꓿
ꓡ ꓞꓳ ꓕꓲ ꓣꓳ ꓠꓬ ꓝꓮꓲ ꓕꓲ ꓣꓳ ꓐꓰ ꓘꓶꓽ ꓫꓵꓽ ꓬꓰˍ ꓕꓯ꓾ ꓬꓲ ꓝꓲ. (9) ꓝꓲ. ꓙꓳˍ ꓡꓳ꓿
ꓬꓲ ꓪꓴ. ꓕꓲ ꓝꓲ. ꓗꓪ ꓠꓬ ꓐꓵ ꓞꓶꓽ ꓑꓺ ꓡꓯꓽ ꓘꓳ,ˍ ꓟ꓾
ꓡ ꓞꓳ ꓠꓬꓲꓽ ꓣꓳ ꓘꓶꓽ ꓫꓵꓽ ꓬꓰˍ ꓕꓯ꓾ ꓬꓲ ꓐꓵ ꓞꓶꓽ ꓠꓬ ꓥꓪ ꓐꓵ ꓞꓶꓽ꓾ ꓥꓪ ꓐꓵ ꓞꓶꓽ ꓠꓬ ꓬꓲ ꓐꓵ ꓞꓶꓽ꓾ ꓕꓱ ꓡꓱ ꓑꓺ ꓡꓯ ꓘꓳ ꓢꓲ ꓠꓬꓲ ꓬꓰ ꓪꓴ. ꓔꓴˍ ꓡꓳ꓿ ꓖꓳ ꓡꓱ ꓬꓰˍ ꓟ ꓠꓬ “ꓥꓪ ꓤꓶꓻ ꓠꓬ ꓠꓴ ꓔꓯ ꓡꓯꓼ ꓙꓱ ꓖꓶˍ ꓥꓳ꓾ ꓠꓴ ꓤꓶꓻ ꓥˍ ꓟꓲ ꓥꓪ ꓔꓯ ꓡꓯꓼ ꓙꓱ ꓖꓶ ꓡꓯ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓝꓮꓲ ꓕꓲ ꓚꓱ, ꓟ ꓠꓬ꓾ ꓙꓽ ꓧꓷ, ꓑꓺ ꓡꓯ ꓘꓳ,ˍ ꓟ ꓥ ꓡꓳ꓿ ꓕꓱ ꓡꓱ ꓬꓰˍ ꓟ ꓬꓲ ꓟ. ꓟꓲꓽ ꓠꓬ ꓣꓳ ꓙꓽ ꓧꓷ, ꓗꓪ ꓠꓬ ꓮ. ꓕꓽ ꓑꓬ, ꓖꓴ꓾ ꓮ. ꓕꓽ ꓗꓷ ꓖꓴ꓾ ꓥ ꓠꓬ꓾ ꓛꓬ, ꓢꓶꓽ ꓗꓷ ꓖꓴ ꓙꓳˍ ꓡꓳ꓿ ꓬꓲ. ꓬꓲ ꓢꓲ ꓠꓬ ꓙꓽ ꓧꓷ, ꓑꓺ ꓡꓯ ꓘꓳ,ˍ ꓟ ꓗꓪ ꓐꓰ꓾ ꓥꓪ ꓙꓳˍ ꓟ ꓙꓵꓽ ꓪ꓾ ꓥꓪ ꓙꓳˍ ꓟ ꓢꓷ. ꓠꓲ,꓾ ꓥꓪ ꓙꓳˍ ꓟ ꓮ ꓙꓵꓽ ꓗꓪ ꓐꓰ ꓠꓴ ꓔꓯ ꓠꓬꓲ ꓙ ꓡꓳ. ꓙˍ ꓥꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓙꓽ ꓧꓷ, ꓐꓯˍ ꓟ ꓠꓬ ꓙꓵꓽ ꓪ ꓐꓯˍ ꓟ ꓬꓲ. ꓟ. ꓟꓲꓽ ꓥ ꓡꓳ꓿ ꓙꓽ ꓧꓷ, ꓑꓺ ꓡꓯ ꓘꓳ,ˍ ꓟ ꓗꓪ ꓐꓰ “ꓥꓪ ꓙꓽ ꓧꓷ, ꓠꓬ ꓠꓴ ꓙꓽ ꓧꓷ,꓾ ꓠꓴ ꓙꓽ ꓧꓷ, ꓠꓬ ꓥꓪ ꓙꓽ ꓧꓷ,” ꓕꓱ ꓡꓱ ꓒꓬꓱꓼ ꓙꓰ ꓗ ꓠꓯ.꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳ,ˍ ꓥꓳ꓾ ꓔꓳ, ꓙ ꓡꓯ ꓘꓳ,ˍ ꓥꓳ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓝꓮꓲ (3) ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓙꓱꓽ ꓤ ꓢꓰꓼ ꓢꓲ ꓠꓬꓲ ꓫꓵꓽ ꓓꓳꓺ ꓝꓲˍ ꓟ ꓥ ꓡꓳ꓿ ꓙꓱꓽ ꓤ ꓠꓬꓲꓽ ꓟ ꓔꓯ ꓢꓰꓼ ꓗꓷ ꓢꓲ ꓘꓶꓽ ꓫꓵꓽ ꓬꓰ ꓢꓴ ꓠꓬꓲꓽ ꓣꓳ ꓠꓬ ꓙꓱꓽ ꓤ ꓖꓳ ꓠꓬꓲꓽ ꓟ ꓔꓯ ꓚꓳꓻˍ ꓡꓳ꓿ ꓥꓪ ꓢꓯ. ꓔꓬ ꓕ ꓑꓳꓸꓼ ꓠꓴ ꓔꓯ ꓬꓰ ꓙˍ ꓥꓳ꓿ ꓮ ꓟꓶ ꓕꓱ ꓗꓪ ꓢꓰꓼ ꓔꓲ ꓔ ꓟ ꓙꓱꓽ ꓤ ꓔꓯ ꓬꓲ. ꓢꓽ ꓫꓰꓽ ꓗꓷ ꓔ ꓢꓲ ꓠꓬꓲ꓾ ꓠꓴ ꓔꓯ ꓬꓰ ꓙˍ ꓥꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓝꓮꓲ ꓘꓶꓽ ꓫꓵꓽ ꓬꓰˍ ꓟ (4) ꓝꓲ. ꓟ ꓠꓬ꓾ ꓫꓵꓽ ꓔꓯ ꓑꓯ. ꓡꓯ ꓘꓳ ꓝꓲˍ ꓟ ꓥ ꓡꓳ꓿ ꓥꓪ ꓡꓯꓽ ꓒꓯ, ꓔꓯ ꓮ ꓔꓲ. ꓧꓶ.꓾ ꓠꓴ ꓡꓯꓽ ꓒꓯ, ꓔꓯ ꓮ ꓔꓲ. ꓧꓶ. ꓗꓷ ꓢꓲ ꓠꓬꓲ꓾ ꓫꓵꓽ ꓔꓯ ꓑꓯ. ꓡꓯ ꓘꓳ ꓝꓲ ꓢꓲ ꓠꓬꓲ ꓡꓯꓽ ꓒꓯ, ꓝ. ꓟ ꓥ ꓡꓳ꓿ ꓬꓲ. ꓬꓲ ꓢꓲ ꓠꓬ꓾ ꓫꓵꓽ ꓠꓬꓲꓽ ꓙꓰꓽ ꓕꓱ ꓡꓱ ꓑꓯ. ꓡꓯ ꓘꓳ,ˍ ꓟ ꓑꓶ. ꓓꓴ ꓤꓶꓻ ꓐꓰꓽ ꓗꓪ ꓟ ꓬꓲ ꓫꓱ, ꓔꓯ ꓡꓳ ꓗꓷ ꓢꓲ ꓠꓬꓲ꓾ ꓮ ꓟꓶ ꓫꓵꓽ ꓑꓯ. ꓡꓯ ꓘꓳ, ꓟ ꓑꓶ. ꓓꓴ꓾ ꓚꓲ. ꓛꓬ ꓐꓱ ꓶ ꓚꓲ. ꓛꓬ ꓡꓰꓽ ꓟꓽ ꓧꓪ ꓧꓪ ꓐꓰ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓫꓵˍ ꓟ ꓔꓯ ꓬꓰ ꓙ ꓡꓯ ꓘꓳ,ˍ ꓟ ꓔꓯ ꓐꓯˍ ꓟ ꓥ ꓡꓳ꓿
ꓝꓮꓲ ꓘꓶꓽ ꓫꓵꓽ ꓬꓰˍ ꓟ (5) ꓝꓲ. ꓕꓲ ꓝꓲ. ꓟ ꓠꓬ꓾ ꓬꓲ ꓟꓬꓱ ꓑꓯ ꓡꓯ ꓘꓳ,ˍ ꓡꓳ꓿ ꓬꓲ ꓟꓬꓱ ꓑꓯ ꓡꓯ ꓘꓳ, ꓟ ꓠꓬ꓾ ꓠꓴ ꓟꓬꓱ ꓗꓪ ꓓꓵˍ ꓟ ꓬꓲ ꓟꓬꓱ ꓮ ꓔꓲ.꓾ ꓥꓪ ꓟꓬꓱ ꓗꓪ ꓐꓰˍ ꓟꓲ ꓮ ꓔꓲ.꓾ ꓕꓱ ꓡꓱ ꓬꓲ ꓟꓬꓱ ꓑꓯ ꓡꓯ ꓘꓳ, ꓡꓳ꓿ ꓔꓯ ꓥꓳꓽ ꓐꓯ ꓠꓬ ꓣꓳ ꓡꓳꓽ‐ꓟꓲ ꓟꓵꓽ ꓗꓪ ꓮꓽ ꓐ ꓟꓬꓱ ꓮ ꓔꓲ. ꓮ ꓟ ꓟꓬꓱ ꓮ ꓔꓲ. ꓣꓴ ꓢꓲ꓾ ꓚꓲ. ꓛꓬ ꓤ ꓠꓱ ꓔꓯ ꓬꓲ ꓟꓬꓱ ꓟꓬꓱ ꓖꓶˍ ꓟ ꓥ ꓡꓳ꓿ ꓖꓳ ꓟˍ ꓡꓰ ꓐꓰ ꓘꓶꓽ ꓫꓵꓽ ꓬꓰˍ ꓟ ꓕꓱ (5) ꓝꓲ. ꓗꓪ ꓥˍ ꓟꓲ ꓞꓳ ꓤ ꓠꓬꓲ ꓣꓳ ꓬꓲ ꓟꓬꓱ ꓑꓯ ꓡꓯ ꓘꓳ,ˍ ꓟ ꓔꓯ ꓣꓳ ꓟꓳˍ ꓡꓳ꓿
ꓝꓮꓲ ꓕꓲ ꓝꓲ. ꓟ ꓠꓬ꓾ ꓬꓲ ꓑꓻ ꓓꓴ ꓡꓰ ꓝꓲˍ ꓟ ꓥ ꓡꓳ꓿ ꓡ ꓞꓳ ꓠꓬꓲꓽ ꓣꓳ ꓘꓶꓽ ꓫꓵꓽ ꓬꓰˍ ꓕꓯ ꓮ. ꓕꓽ ꓧꓶ. ꓑꓺ꓾ ꓟꓽ ꓥ ꓠꓬ꓾ ꓬꓲ ꓑꓻ ꓓꓴ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓑꓻ ꓕꓱ ꓟ ꓔꓯ ꓟꓳꓻˍ ꓕ ꓑꓳꓸꓼ ꓥꓪ ꓥˍ ꓟꓲ ꓕꓲ ꓤꓶꓻ ꓡꓱꓸꓼ ꓠꓴ ꓐꓰ ꓕꓲ ꓡꓰ, ꓔꓬ ꓥꓳ꓾ ꓠꓴ ꓔꓯ ꓬꓰ ꓙˍ ꓥꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓘꓶꓽ ꓫꓵꓽ ꓬꓰˍ ꓟ ꓗꓪ ꓝꓮꓲ. (7) ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓟꓷꓽ ꓠꓷ, ꓗꓪ ꓐꓰ ꓮ ꓫꓵꓽ ꓬꓰ ꓙ ꓡꓯ ꓘꓳ,ˍ ꓐꓯˍ ꓟ ꓥ ꓡꓳ꓿ ꓥꓪ ꓔꓯ ꓙꓳˍ ꓟ ꓠꓬ ꓠꓴ ꓔꓯ ꓟ ꓥꓳ꓾ ꓠꓴ ꓔꓯ ꓙꓳˍ ꓟ ꓠꓬ ꓥꓪ ꓔꓯ ꓟ ꓥꓳ꓾ ꓖꓳ ꓡꓱ ꓠꓬ ꓬꓲ ꓪ ꓠꓬꓲꓽ ꓣꓳ ꓟ ꓶꓻ ꓤ ꓚꓬ, ꓢꓲ. ꓠꓬ ꓕꓲ ꓡꓰ, ꓗꓷ ꓡꓰꓳ꓾ ꓐꓯˍ ꓟ ꓥ ꓡꓳ꓿
ꓝꓮꓲ (8) ꓝꓲ. ꓕꓲ ꓝꓲ. ꓠꓬ꓾ ꓦꓻ ꓜ ꓜꓽˍ ꓟ ꓥ ꓡꓳ꓿ ꓦꓻ ꓜ ꓜꓽˍ ꓐꓯˍ ꓟ ꓠꓬ ꓬꓲ ꓪ ꓠꓬꓲꓽ ꓣꓳ ꓘꓶꓽ ꓫꓵꓽ ꓬꓰ ꓓꓳ ꓡꓰ ꓠꓬ꓾ ꓑ ꓑ ꓕꓲ ꓘꓴ. ꓔꓯ ꓣꓴ ꓢꓲ ꓕꓲ ꓣꓳ ꓔꓯ ꓕꓲ ꓣꓳ ꓖꓶ ꓜꓽˍ ꓡꓳ꓿ ꓕꓱ ꓟˍ ꓡꓰ ꓐꓰ ꓛꓱꓼ ꓡꓱꓼ ꓬꓲꓻ ꓔꓯ ꓥˍ ꓟꓲ ꓠꓴ ꓮ ꓔꓲ. ꓥꓪ ꓮ ꓔꓲ. ꓓꓳꓻˍ ꓡꓳ꓿ ꓕꓱ ꓡꓱ ꓬꓰˍ ꓟ ꓔꓯ ꓦꓻ ꓜ ꓜꓽˍ ꓐꓰ ꓐꓯˍ ꓡꓳ꓿
ꓝꓮꓲ (9) ꓝꓲ. ꓕꓲ ꓝꓲ. ꓠꓬ ꓬꓲ ꓢꓷ. ꓡꓰ ꓓꓴ ꓕꓲ ꓙꓰꓽ ꓔꓶˍ ꓡꓳ꓿ ꓘꓶꓽ ꓫꓵꓽ ꓬꓰ ꓢꓴ ꓠꓬꓲꓽ ꓣꓳ ꓦꓻ ꓜ ꓜꓽ ꓓꓳ ꓡꓰ ꓗ ꓠꓯ. ꓠꓬ꓾ ꓢꓲ, ꓜꓲ ꓔꓶˍ ꓟ꓾ ꓭ. ꓑ. ꓜꓶˍ ꓟ꓾ ꓕꓱ ꓡꓱ ꓬꓰˍ ꓡꓳ꓿ ꓕꓱ ꓟ ꓔꓯ ꓟꓳꓻˍ ꓕꓯ꓾ ꓕꓱ ꓟ ꓔꓯ ꓡꓳ. ꓠꓬꓲ ꓗꓷ ꓕꓯ ꓘꓶꓽ ꓫꓵꓽ ꓬꓰ ꓔ ꓡꓳ꓾ ꓐꓯˍ ꓟ ꓬꓲ ꓢꓷ. ꓡꓰ ꓓꓴ ꓥ ꓡꓳ꓿
ꓖꓳ ꓡꓱ ꓠꓬꓲ ꓘꓶꓽ ꓫꓵꓽ ꓬꓰˍ ꓟ ꓗꓪ (9) ꓝꓲ. ꓙꓳˍ ꓡꓳ ꓐꓯˍ ꓟ ꓔꓯ ꓕꓱ ꓗꓪ ꓠꓽ ꓓꓴ ꓥꓳ꓿
