ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ꓾ ꓠꓬꓲꓸ ꓠꓬꓲ ꓟ ꓐꓱ ꓶ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ-ꓘ 19ꓽ1-10 ꓥ ꓡꓳ= ꓟꓸ ꓟꓲꓽ ꓘꓴꓽ ꓗꓪ ꓠꓬ ꓬꓲ ꓘꓳꓸ ꓖꓳ ꓢꓴ꓾ ꓝꓲꓸ ꓫ ꓢꓴ ꓬꓲ ꓪꓴꓸ ꓓꓵ ꓣꓱꓽ ꓢꓴ ꓥ ꓟ ꓢ-ꓘꓰ-ꓬꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪ ꓔꓬ ꓡꓳ꓾ ꓢꓲ ꓒ ꓬꓰ-ꓢꓴ ꓠꓬ ꓝꓴꓲꓸ ꓙꓳ ꓢꓴ ꓔꓯ ꓫꓱꓸ ꓤˍ ꓡꓳ꓾ ꓝꓴꓲꓸ ꓙꓳ ꓢꓴ ꓔꓯ ꓠꓲꓹ ꓠꓵˍ ꓡꓳ꓾ ꓐꓯ ꓟ ꓟꓸ ꓟꓲꓽ ꓥ ꓡꓳ= ꓢ-ꓘꓰ-ꓬꓴ ꓔꓯ ꓠꓬ ꓮ ꓟˍ ꓟꓲ ꓠꓲꓹ ꓐꓴˍ ꓡꓳ= ꓮꓽ ꓟˍ ꓟꓲ ꓬꓲ ꓔꓯ ꓟꓽ ꓠꓵꓻ= ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓣꓳ-ꓟ ꓡ ꓞꓳ ꓐꓱ ꓶ ꓝꓲꓸ ꓒꓴ ꓖꓳ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓘꓳꓸ ꓖꓳ ꓢꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓣꓳ-ꓟ ꓡ ꓞꓳ ꓐꓱ ꓶ ꓚꓲꓸ ꓛꓬ ꓫꓵꓽ ꓔꓯ ꓟꓽ ꓫꓱꓸ ꓤ ꓢꓴ ꓥ꓾ ꓐꓯ ꓢꓲ ꓠꓬꓲ ꓑ ꓫꓬ ꓐꓴ ꓡꓰ ꓬꓲ ꓔꓯ ꓡꓳ ꓒꓰ, ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓤꓶꓻ ꓗꓪ ꓕꓲ ꓣꓳ ꓔꓵꓸꓼ ꓡꓰꓽ ꓞꓳ ꓙꓳ ꓔꓬ ꓪˍ ꓟ ꓥ ꓡꓳ=
ꓕꓲ ꓠꓬꓲ ꓙꓳˍ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓦꓲꓻ ꓗꓪ ꓛꓲꓺ ꓛꓲ ꓡˍ ꓡꓳ= ꓖꓳ ꓕꓯ ꓑ ꓫꓬ ꓐꓴ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓱꓽ ꓠꓱꓽˍ ꓡꓳ= ꓬꓲ ꓠꓬ ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪꓽ ꓔꓬ ꓡꓳ= ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪꓽ ꓜꓻ ꓜꓽˍ ꓡꓳ= ꓝꓴꓲꓸ ꓙꓳ ꓢꓴ ꓦꓲꓻ ꓗꓪ ꓠꓽ ꓙꓰˍ ꓡꓳ꓾ ꓪꓰ ꓤ ꓟꓴ ꓙꓰˍ ꓡꓳ꓾ ꓐꓰ ꓬꓲ ꓔꓯ ꓐꓯ ꓕꓯ ꓢꓲ ꓒ ꓬꓰ-ꓢꓴ ꓠꓬ꓾ “ꓥꓪ ꓠꓬ ꓝꓴꓲꓸ ꓙꓳ ꓢꓴ ꓐꓱ ꓶ ꓬꓯꓼ ꓡ ꓟ ꓥ ꓡꓳ= ꓝꓴꓲꓸ ꓙꓳ ꓢꓴ ꓔꓯ ꓪꓴ-ꓢ ꓔꓬ ꓗꓪ ꓘꓴ ꓠꓹ ꓟ꓾ ꓝꓴꓲꓸ ꓙꓳ ꓢꓴ ꓪꓴ-ꓢ ꓔꓬ ꓗꓪ ꓙꓰ ꓠꓹ ꓟ ꓥꓪ ꓡꓰ ꓬꓯꓼ ꓡ ꓟ ꓥ ꓡꓳ꓾” ꓐꓰ ꓒꓳꓹ ꓖꓶˍ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓒꓲꓼ ꓬꓰ ꓟ ꓮ ꓣꓳ ꓔꓯ ꓧꓪ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓙ ꓖꓴ ꓪꓴꓸ ꓢꓴ꓾ ꓙ ꓖꓴ ꓛꓬꓻ ꓢꓴ ꓐꓴ ꓔꓯ ꓧꓪ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ= ꓣꓳ ꓝꓴꓲꓸ ꓮ ꓡꓰ ꓘꓶ ꓛꓲ ꓙꓳˍ ꓥ ꓟꓲ꓾ ꓮ ꓡꓰ ꓘꓶ ꓛꓲ ꓬꓲ ꓔꓯ ꓛꓬꓻ ꓗꓷ ꓥˍ ꓟꓲ ꓬꓲ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ ꓐꓯ ꓟ꓾ ꓣꓳ ꓢꓷꓸ ꓠ ꓗꓹ ꓡꓳ=
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓢ‐ꓘꓰ‐ꓬꓴ ꓦꓲ ꓗꓪ ꓙꓰˍ ꓟ ꓡꓰ ꓐꓰ꓾ ꓢꓲ ꓒ ꓠꓬ ꓣꓳ ꓔꓬ ꓗꓪ ꓥˍ ꓟꓲ ꓡ ꓔꓬ ꓟ ꓥ ꓡꓳ꓿ ꓣꓳ ꓠꓲ, ꓟ ꓗ ꓘꓶꓽ ꓒꓴ ꓢꓲ ꓬꓲ ꓔꓯ ꓘꓳ, ꓣꓴ ꓡꓯ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰ ꓢꓴ ꓥ ꓕ ꓑꓳꓸꓼ ꓠꓬ ꓠꓲ, ꓟ ꓒꓳ, ꓬꓲꓼ ꓡˍ ꓡꓳ꓿ ꓠꓲ, ꓟ ꓡꓶ. ꓙꓰˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓵꓻ ꓠꓲ, ꓕꓱ ꓟ ꓘꓳ ꓣꓴ ꓟꓶ ꓢꓴ ꓠꓬ꓾ ꓚꓲ. ꓛꓬ ꓤꓶꓻ ꓔꓯ ꓟꓽ ꓡꓶ. ꓙꓰ ꓙꓰ꓾ ꓟꓽ ꓒꓳ, ꓙꓰ ꓙꓰ ꓐꓰ ꓦꓬꓼ ꓠꓬꓲ ꓗꓳ. ꓟꓽ ꓐ ꓡ ꓟ ꓪꓴ. ꓠꓬꓲ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓫꓬ ꓕꓳꓽ ꓶ ꓗꓪ ꓢ‐ꓘꓰ‐ꓬꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰ ꓗ ꓠꓯ. ꓠꓲ, ꓟ ꓒꓳ, ꓡꓶ. ꓙꓰˍ ꓡꓳ꓿ ꓬꓲ ꓠꓬ ꓢꓴ ꓔꓯ ꓠꓬꓲ. ꓜꓽ ꓗꓷ ꓟ ꓔꓯ ꓡꓲ ꓝ. ꓡꓲ. ꓖꓶˍ ꓥꓳ꓾ ꓐꓰ ꓬꓲ ꓡꓰ ꓐꓯˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓤꓶꓻ ꓗꓪ ꓘꓳ ꓣꓴˍ ꓕꓯ꓾ ꓣꓳ ꓥˍ ꓟꓲ ꓪꓴ‐ꓢ ꓣꓱꓽ ꓛꓰꓽ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓣꓳ ꓤꓶꓻ ꓔꓯ ꓡꓶ. ꓙꓰ ꓐ ꓡˍ ꓡꓳ꓾ ꓐꓯ ꓟ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳ ꓙꓰˍ ꓕꓯ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓠꓲ, ꓠꓵꓻ ꓔꓬ ꓡꓳ꓾ ꓣꓳ ꓮ ꓡꓲ ꓘꓶ ꓛꓲ ꓝꓴꓲ. ꓬꓰ ꓗꓷ ꓥˍ ꓟꓲ꓾ ꓪꓴ‐ꓢ ꓐꓰ ꓮ ꓡꓲ ꓘꓶ ꓛꓲ ꓶꓽ ꓙꓰ ꓗꓪꓺ ꓙꓰ ꓥˍ ꓟꓲ꓾ ꓬꓲ ꓠꓬ ꓣꓳ ꓔꓯ ꓠꓲ, ꓠꓵˍ ꓡꓳ ꓐꓯ ꓟ ꓔꓯ ꓣꓳ ꓢꓷ. ꓔ ꓢꓲ ꓠꓬꓲ꓾ ꓣꓳ ꓛꓬꓻ ꓗꓷ ꓥꓳꓽ ꓗꓷ ꓓꓴ ꓙꓳˍ ꓥ ꓟꓲ ꓬꓲ ꓔꓯ ꓚꓱ, ꓬꓲꓼ ꓙꓰ ꓐ ꓡ ꓠ, ꓟ ꓢꓯꓼ ꓪ ꓣꓳ ꓪꓴ‐ꓢ ꓔꓯ ꓓꓰꓽ ꓡꓯ ꓐꓰ꓾ ꓬꓲꓼ ꓠꓬꓲ. ꓖꓶ ꓠꓲ, ꓫꓵˍ ꓡꓳ꓿
