ꓡꓴ‐ꓘ꓿17ꓽ20‐25

ꓕꓲ ꓧꓪ, ꓙꓳˍ ꓠꓬ ꓒ‐ꓡꓲ‐ꓢꓷ ꓐꓴ ꓡꓰ꓾ ꓪꓴ‐ꓢ ꓗꓴꓷꓼ ꓮ ꓕꓯ ꓕꓲꓽ ꓝꓲ. ꓗꓪ ꓛꓲ ꓡˍ ꓥꓳ ꓪ? ꓐꓰ ꓠ ꓠꓬꓲˍ ꓠꓬꓲ꓾ ꓬꓰ‐ꓢꓴ ꓡꓰ ꓬꓲ ꓪ ꓔꓯ꓾ ꓪꓴ‐ꓢ ꓗꓴꓷꓼ ꓛꓲ ꓡˍ ꓟ ꓠꓬ ꓟꓬ ꓢꓶꓽ ꓡꓰ ꓡꓳ. ꓓꓳ ꓡˍ ꓡꓳ ꓫꓵꓽ ꓟꓽ ꓥ꓿ ꓢꓴ ꓡꓰ꓾ ꓠꓬꓲ ꓠ,꓾ ꓕꓱ ꓗꓪ ꓥ ꓡꓳ꓾ ꓥ ꓠꓬ ꓖꓳ ꓗꓪ ꓥ ꓡꓳ꓾ ꓐꓰˍ ꓟꓲ ꓟꓽ ꓐꓯ ꓖꓶ ꓡ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓗꓴꓷꓼ ꓠꓽ ꓠꓴ ꓪ ꓗꓳ ꓡꓳ ꓗꓪ ꓓ, ꓡꓳ꓾ ꓐꓯ ꓖꓶˍ ꓡꓳ꓿

ꓝꓮꓲ ꓠꓬ ꓬꓲ ꓡꓰ ꓛꓳꓽ ꓒꓯ, ꓐꓴ ꓔꓯ꓾ ꓠꓴ ꓪ ꓠꓬ ꓡ‐ꓞꓳ‐ꓮ‐ꓐꓲ ꓬꓲ ꓦꓬꓼ ꓠꓬꓲ ꓕꓲ ꓠꓬꓲ ꓤ ꓔꓯ ꓟꓳ ꓠꓲ, ꓫꓵˍ ꓟꓲ ꓟꓳ ꓪ ꓟꓽ ꓓ ꓟ ꓦꓬꓼ ꓠꓬꓲ ꓛꓲ ꓡˍ ꓥꓳ꓿ ꓖꓳ ꓕꓯ ꓢꓴ ꓡꓰ ꓠꓴ ꓪ ꓔꓯ꓾ ꓠꓬꓲ ꓠ,꓾ꓖꓳ ꓗꓪ ꓥꓳ꓾ ꓥ ꓠꓬ ꓕꓱ ꓗꓪ ꓥꓳ꓾ ꓐꓰ ꓐꓯ ꓡˍ ꓟꓲ ꓠꓴ ꓪ ꓕꓽ ꓓꓳ ꓙꓰ꓿ ꓬꓲ ꓪ ꓔꓯ ꓛꓳˍ ꓟꓲ ꓕꓽ ꓛꓳ ꓙꓰ꓿ ꓮ ꓡꓲꓳ ꓐꓯ ꓠꓬ ꓡ‐ꓞꓳ‐ꓮ‐ꓐꓲ ꓬꓯꓼ ꓡˍ ꓟ ꓦꓬꓼ ꓠꓬꓲ ꓗꓪ ꓠꓬ꓾ ꓟꓴ ꓗꓪ ꓕꓱ ꓕꓲ ꓛꓱꓽ ꓗꓪ ꓟꓲꓽ ꓐꓬꓱꓼ ꓤꓰꓽ ꓡ ꓟꓶꓽ ꓕꓯ꓾ ꓖꓳ ꓕꓲ ꓛꓱꓽ ꓗꓪˍ ꓟꓲ ꓡꓬ. ꓛꓲ ꓬꓰˍ ꓟˍ ꓡꓰ ꓐꓰ ꓗ, ꓥꓳ꓿ ꓖꓳ ꓡꓱ ꓥˍ ꓟꓲ ꓡ‐ꓞꓳ‐ꓮ‐ꓐꓲ ꓠꓬ ꓫ. ꓙꓵˍ ꓟ ꓮꓽ ꓟꓬ, ꓫꓵꓽ ꓜꓲꓽ ꓢꓲ꓾ ꓕꓱ ꓕꓲ ꓤꓶ ꓟ ꓡ ꓞꓳ ꓡꓰ ꓟꓽ ꓘꓳ ꓣꓴˍ ꓟ ꓧꓶ. ꓕꓯ ꓔꓳ, ꓜꓳꓽˍ ꓥꓳ꓿

———————————-

ꓪꓴ‐ꓢ ꓠꓬ ꓣꓳ ꓗꓳ ꓡꓳ ꓗꓪ ꓔꓬ ꓕꓯ꓾ ꓣꓳ ꓠꓬ ꓮ ꓫꓵꓽ ꓔꓯ ꓙꓳꓺ ꓠꓯ, ꓡ? ꓪꓴ‐ꓢ ꓗꓴꓷꓼ ꓠꓬ ꓠꓴ ꓪ ꓗꓳ ꓡꓳ ꓗꓪ ꓓ, ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓾ ꓟꓽ ꓥ ꓡ?

ꓙꓳꓺ ꓓꓴ ꓕꓲ ꓫꓵꓽ ꓫꓵꓽ ꓔꓳ, ꓜꓳꓽ ꓡ ꓕ ꓑꓳꓸꓼ꓾ ꓧꓶ. ꓕꓯ ꓟꓽ ꓔꓳ, ꓜꓳꓽ ꓠꓬꓲ ꓟ ꓫꓵꓽ ꓪꓴ ꓒꓬꓱꓼ ꓡ ꓕ ꓑꓳꓸꓼ꓾ “ꓡꓳ, ꓬꓰˍ ꓟ ꓦꓬꓼ ꓠꓬꓲ ꓛꓲ ꓡꓺꓳ” ꓐꓰ ꓢꓴ ꓡꓰ ꓮ ꓟꓬ, ꓐꓯ ꓔꓬ ꓟ ꓔꓯ ꓣꓳ ꓑ ꓙꓽ ꓪˍ ꓥ ꓟꓲ꓾ ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓠꓬ꓾ “ꓪꓴ‐ꓢ ꓗꓴꓷꓼ ꓠꓬ ꓟꓬ ꓢꓶꓽ ꓡꓰ ꓟꓳꓻ ꓓ, ꓟ ꓢꓷ. ꓡꓰ ꓓꓴ ꓟꓳ. ꓖꓶ ꓢꓲ ꓡˍ ꓟ ꓟꓽ ꓥ” ꓐꓰ ꓫꓬꓽ ꓫꓬꓽ ꓡꓰꓽ ꓐꓯ ꓖꓶ ꓡ ꓔꓬ ꓡꓳ꓿

ꓟꓷꓽ ꓠꓷ, ꓝ. ꓢꓴ꓾ ꓟ. ꓟꓲꓽ ꓚ ꓢꓴ ꓮ ꓟꓬ, ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓙꓳˍ ꓟ ꓡꓰ ꓕꓲ ꓡꓰ,꓾ ꓬꓲ ꓪ ꓟꓬꓱ ꓓꓳꓽ ꓪꓴꓽ ꓡ ꓠ, ꓟ ꓐꓱ ꓶ꓾ ꓬꓲ ꓪ ꓔꓯ ꓛꓳ ꓢꓴ ꓟꓬꓽ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼˍ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓗꓷ ꓟ ꓡꓰ ꓐꓰ꓾ “ꓢꓲ ꓒ ꓬꓰ‐ꓢꓴ ꓝꓮꓲ ꓕꓲ ꓧꓪ, ꓬꓯꓼ ꓡˍ ꓟ ꓦꓬꓼ ꓠꓬꓲ ꓛꓲ ꓡ ꓔꓬꓳ꓾ ꓟꓲ ꓠꓯ ꓐꓬ ꓡꓰˍ ꓟ ꓬꓲ ꓙꓵ, ꓛꓲ ꓡ ꓔꓬꓳ꓾” ꓐꓰ ꓐꓯ ꓢꓴ ꓮ ꓟꓬ, ꓓꓳ ꓡ ꓔꓬ ꓡꓳ꓿ ꓖꓳ ꓡꓱ ꓐꓯ ꓢꓲ ꓬꓲ ꓪ ꓔꓯ ꓛꓳ ꓢꓴ ꓟꓬꓽ ꓡ ꓠ, ꓟ ꓢꓯꓼ ꓕꓵꓼ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓡꓰ “ꓬꓲ ꓪ ꓔꓯ ꓕꓽ ꓛꓳ ꓙꓰ” ꓐꓰ ꓙꓳꓺ ꓗꓽ ꓖꓶ ꓔ ꓡꓳ꓿

ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓡꓰ꓾ “ꓪꓴ‐ꓢ ꓗꓴꓷꓼ ꓠꓬ ꓠꓴ ꓪ ꓗꓳ ꓡꓳ ꓗꓪ ꓓ, ꓡꓳ” ꓐꓰ ꓐꓯˍ ꓡꓳ꓿ ꓖꓳ ꓗꓪˍ ꓟꓲ ꓟꓽ ꓥ꓾ ꓕꓱ ꓗꓪˍ ꓟꓲ ꓟꓽ ꓥ꓾ ꓠꓴ ꓪ ꓗꓳ ꓡꓳ꓾ ꓣꓳꓽ ꓗꓳ ꓡꓰ ꓗꓪ ꓡꓰꓽ ꓓ, ꓡꓳ꓿ ꓣꓳ ꓠꓬ ꓣꓳ ꓠꓲ, ꓟ ꓔꓯ ꓢꓲꓽ ꓢꓲꓽ ꓫꓬꓽ ꓫꓬꓽ ꓡꓰ ꓗꓷ ꓔ ꓕꓯ꓾ ꓣꓳ ꓠꓲ, ꓟ ꓗꓪ ꓢꓲ ꓒ ꓔꓬ ꓡˍ ꓡꓳ꓿ ꓪꓴ‐ꓢ ꓗꓴꓷꓼ ꓠꓬ ꓣꓳ ꓠꓲ, ꓟ ꓗꓪ ꓓ, ꓡꓳ꓿ ꓣꓳ ꓤꓶꓻ ꓔꓯ ꓪꓴ‐ꓢ ꓔꓯ ꓙꓵꓽ ꓠ, ꓟ ꓡꓯꓼ ꓙꓱ ꓗꓷ ꓕꓯ꓾ ꓣꓳ ꓠꓬ ꓪꓴ‐ꓢ ꓙꓵꓽ ꓗ ꓔꓯ ꓛꓳˍ ꓕꓯ꓾ ꓢꓲ ꓒ ꓐꓯ ꓘꓶꓽ ꓙꓳˍ ꓟ ꓡꓰ ꓛꓳ ꓫꓱꓽˍ ꓕꓯ꓾ ꓪꓴ‐ꓢ ꓗꓴꓷꓼ ꓠꓬ ꓣꓳ ꓠꓯꓸꓼ ꓗꓪ ꓓ, ꓟ ꓥ ꓡꓳ꓿

ꓪꓴ‐ꓢ ꓗꓴꓷꓼ ꓠꓬ꓾ ꓣꓳ ꓠꓬ ꓣꓳ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓣꓳ ꓚꓲ. ꓛꓬ ꓠꓲ, ꓠꓵˍ ꓟ ꓡꓰ ꓠꓲ, ꓠꓵ ꓢꓲ꓾ ꓠꓵꓻ ꓠꓲ, ꓕꓱ ꓟ ꓔꓯ ꓪꓴꓽ ꓡ ꓝꓲˍ ꓕꓯ꓾ ꓣꓳ ꓠꓯꓸꓼ ꓗꓪ ꓪꓴ‐ꓢ ꓗꓴꓷꓼ ꓙꓳ ꓡˍ ꓡꓳ꓿ ꓪꓴ‐ꓢ ꓗꓴꓷꓼ ꓠꓬ ꓫ. ꓢꓴ ꓟꓷꓼ ꓢꓴ ꓐꓴ ꓐꓰ ꓣꓱꓽ ꓞ, ꓢꓴ ꓐꓴ ꓔꓯ ꓬꓰ ꓙˍ ꓟ ꓥ ꓡꓳ꓿ ꓪꓴ‐ꓢ ꓗꓴꓷꓼ ꓠꓬ ꓣꓳ ꓔꓯ ꓢꓴ ꓡꓰ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓟ ꓡꓰ ꓢꓴ ꓔꓯ ꓣꓳ ꓬꓰ ꓖꓶˍ ꓟ ꓥ ꓡꓳ꓿

ꓟꓴꓽ ꓖꓪ ꓕꓲ ꓚꓱ, ꓙꓳˍ ꓡꓳ꓿ “ꓗ, ꓛꓲꓽ ꓠꓯ, ꓟ ꓬꓲ ꓙꓵ, ꓠꓬ ꓮ ꓟꓶ ꓛꓲ ꓡꓺꓳ꓾ ꓗ, ꓛꓲ ꓖꓴ ꓠꓬ ꓕꓱ ꓗꓪ ꓙꓳˍ ꓟ ꓥ ꓢꓲ꓾ ꓗ, ꓛꓲ ꓓꓴ ꓚꓱ, ꓠꓬ ꓕꓲ ꓣꓳ ꓣꓳ ꓔꓯ ꓗ, ꓛꓲ ꓡꓰ ꓠ ꓬꓰ ꓖꓶˍ ꓟ ꓥ ꓢꓲ ꓠꓬꓲ꓾ ꓕꓱ ꓗꓪ ꓣꓳ ꓐꓱ ꓶ ꓟꓴꓽ ꓗꓪ ꓗꓴꓷꓼ ꓤ ꓕꓲ ꓟ ꓙꓳˍ ꓥꓳ”

ꓖꓳ ꓡꓱ ꓠꓬꓲ ꓣꓳ ꓗꓳ ꓡꓳ ꓗꓪ ꓟꓴꓽ ꓗꓪ ꓗꓴꓷꓼ ꓙꓳ ꓠ, ꓟ ꓐꓱ ꓶ꓾ ꓣꓳ ꓗꓳ ꓡꓳ ꓗꓪ ꓢꓲ ꓒ ꓔꓬ ꓡ ꓠ, ꓟ ꓐꓱ ꓶ ꓣꓳ ꓠꓲ, ꓟ ꓔꓯ ꓢꓲꓽ ꓢꓲꓽ ꓫꓬꓽ ꓫꓬꓽ ꓡꓰ ꓗꓷ ꓔ ꓢꓲ꓾ ꓣꓳ ꓤꓶꓻ ꓔꓯ ꓢꓲ ꓒ ꓔꓯ ꓙꓵꓽ ꓝꓲ꓿ ꓝꓮꓲ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓲ, ꓠꓵ꓾ ꓢꓴ ꓔꓯ ꓬꓰ ꓙ꓾ ꓣꓱꓽ ꓞ, ꓢꓴ ꓔꓯˍ ꓟꓲ ꓬꓰ ꓙ꓿ ꓢꓴ ꓡꓰ ꓣꓳ ꓔꓯ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓟ ꓡꓰ ꓣꓳ ꓥˍ ꓟꓲ ꓢꓴ ꓔꓯ ꓬꓰ ꓖꓶ꓿ ꓖꓳ ꓡꓱ ꓬꓰˍ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓣꓳ ꓗꓳ ꓡꓳ ꓗꓪ ꓞꓼ ꓓ, ꓥꓳ꓿