ꓠꓲ, ꓫ ꓟꓬ ꓫ ꓔꓳ, ꓜꓳꓽˍ ꓟ ꓔꓯ ꓗꓳ. ꓙꓰ ꓠ, ꓟ ꓐꓱ ꓶ ꓢꓲꓽ ꓫꓬ ꓕꓳꓽ ꓶ ꓝꓲ. ꓗꓪ ꓐꓰ ꓢꓯꓼ ꓪ ꓣꓴ ꓓꓴ ꓥ ꓡꓳ   ꓿

ꓖꓳ ꓡꓱ ꓔꓳ, ꓜꓳꓽˍ ꓟ ꓠꓬ ꓣꓳ ꓐꓱ ꓶ ꓮ ꓘꓶ. ꓫ. ꓟ ꓥ ꓡꓳ꓿ ꓖꓳ ꓡꓱ ꓫ. ꓔꓬ ꓟ ꓔꓯ ꓗꓳ. ꓙꓰ ꓠ, ꓟ ꓐꓱ ꓶ ꓣꓳ ꓐꓱ ꓶ ꓦꓻ ꓢꓯꓼ ꓣꓴ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓝꓲ. ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿

ꓬꓳ‐ꓦ 16ꓽ22 ꓗꓪ꓾ ꓖꓳ ꓡꓱ ꓠꓬꓲ ꓠꓴ ꓪˍ ꓟꓲ ꓠꓲ, ꓫ ꓟꓬ ꓫˍ ꓟ ꓙꓳˍ ꓥꓳ꓿ ꓖꓳ ꓡꓱ ꓥˍ ꓟꓲ ꓠꓴ ꓪ ꓔꓯ ꓥꓪ ꓝꓮꓲ ꓟꓳˍ ꓕꓯ ꓠꓴ ꓪ ꓠꓽ ꓗ ꓛꓲˍ ꓥꓳ꓿ ꓠꓴ ꓪ ꓗ ꓛꓲ ꓠꓲ, ꓔꓯ ꓮꓽ ꓟˍ ꓟꓲ ꓣꓴ ꓔꓯ, ꓙꓰ ꓟꓽ ꓐ ꓡ꓿

ꓒꓲ‐ꓡꓲ‐ꓒꓲ ꓕꓳꓽ ꓶ 4ꓽ13 ꓗꓪ꓾ ꓥꓪ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓴ ꓗꓪ ꓐꓰ ꓮ ꓫꓵꓽˍ ꓟꓲ ꓥꓪ ꓬꓰ ꓐ ꓡˍ ꓡꓳ꓿

ꓟꓳ. ꓖꓶ ꓓꓴ ꓕꓳꓽ ꓶ 21ꓽ4 ꓗꓪ꓾ ꓬꓲ ꓪ ꓟꓬ ꓐꓲ ꓮ ꓙꓵꓽ ꓬꓲ ꓡꓰ ꓫꓵ, ꓦ ꓖꓶˍ ꓥꓳ꓿ ꓕꓱ ꓡꓱ ꓖꓳ ꓑꓳ. ꓫꓵꓻˍ ꓟ ꓟꓽ ꓙꓳꓻꓳ꓿ ꓠꓲ, ꓥꓴˍ ꓟˍ ꓐꓰ ꓮ ꓛꓬ, ꓙꓱˍ ꓟ ꓐꓰ ꓠꓻ ꓟˍ ꓟꓲ ꓟꓽ ꓙꓳꓻꓳ꓿ ꓮ ꓡꓲꓳ ꓐꓯ ꓠꓬ ꓧꓶ. ꓕꓯ ꓟ ꓠꓽ ꓗꓳ. ꓙꓰꓳ꓾ ꓐꓯˍ ꓡꓳ꓿

ꓣꓳ‐ꓟ ꓕꓳꓽ ꓶ 8ꓽ18 ꓗꓪ꓾ ꓮ ꓡꓲꓳ ꓐꓯ ꓠꓬ ꓮ ꓟꓶ ꓕꓱ ꓕꓲ ꓝꓲ. ꓫ. ꓙꓵˍ ꓟ ꓠꓽ꓾ ꓢ ꓖꓪ ꓣꓳ ꓔꓯ ꓟꓳ. ꓖꓶ ꓡ ꓠ, ꓟ ꓐꓬꓱꓼ ꓡꓱꓼ ꓡꓱꓼ ꓟ ꓟꓬꓱ ꓓꓳꓽ ꓔꓯ ꓔꓯꓺ ꓟꓽ ꓟꓵ꓾ ꓐꓰ ꓓꓵꓽ ꓙˍ ꓡꓳ꓿

ꓣꓳ‐ꓟ ꓕꓳꓽ ꓶ 12ꓽ2 ꓗꓪ꓾ ꓖꓳ ꓡꓱ ꓢꓲ ꓠꓴ ꓪ ꓠꓬ ꓟꓽ ꓦ ꓡꓱ ꓢꓴ ꓞꓳ ꓙꓳ ꓚꓱ, ꓔꓯ ꓕꓽ ꓔꓯꓺ ꓢꓳ꓿ ꓠꓴ ꓪ ꓠꓬ ꓪꓴ‐ꓢ ꓬꓲ ꓙꓲˍ ꓟˍ ꓐꓰ꓾ ꓬꓲ ꓠꓲ, ꓒꓴˍ ꓟˍ ꓐꓰ꓾ ꓬꓲ ꓙꓲꓻ ꓓꓰˍ ꓟ ꓠꓲ, ꓡꓶ ꓮ ꓡꓲ ꓥ ꓟ ꓢꓷ. ꓡꓰ ꓠ, ꓟ꓾ ꓠꓴ ꓪ ꓕꓲ ꓠꓲ, ꓟ ꓡꓱꓸꓼ ꓔꓯ ꓬꓲ ꓫꓵꓼ ꓑꓶ. ꓡꓰ ꓝꓲ꓿

ꓟꓴꓽ ꓖꓪ ꓕꓳꓽ ꓶ 34ꓽ18 ꓗꓪ꓾ ꓪꓴ‐ꓢ ꓠꓬ ꓠꓲ, ꓟ ꓐꓶꓽ ꓡꓰ ꓢꓴˍ ꓐꓰ ꓠꓲ, ꓥꓴ ꓢꓴ ꓔꓯ ꓠꓶꓽ ꓡ ꓢꓲ ꓚꓬꓴ ꓙˍ ꓡꓳ꓿

ꓟ‐ꓕꓲ 11ꓽ28‐30꓾ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲˍ ꓥꓳ꓿ ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳ ꓡꓯ꓿ ꓥꓪ ꓠꓬ ꓠꓲ, ꓟ ꓠꓴꓽ ꓢꓲ ꓙ ꓣꓳꓽˍ ꓡꓳ꓿ ꓖꓳ ꓡꓱ ꓠꓬ ꓠꓴ ꓪ ꓶ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢˍ ꓡꓳ꓿ ꓥꓪ ꓶꓻˍ ꓟꓲ ꓡꓳꓻˍ ꓡꓳ꓾ ꓐꓯˍ ꓡꓳ꓿

ꓬꓳ‐ꓦ ꓕꓳꓽ ꓶ 14ꓽ1 ꓗꓪ꓾ ꓠꓴ ꓪ ꓠꓲ, ꓟ ꓕꓽ ꓫ꓿ ꓪꓴ‐ꓢ ꓔꓯ ꓙꓵꓻ꓾ ꓥꓪ ꓔꓯˍ ꓟꓲ ꓙꓵꓻ꓿

ꓬꓳ‐ꓫꓴ ꓕꓳꓽ ꓶ 1ꓽ9 ꓗꓪ꓾ ꓥꓪ ꓡꓰ ꓕꓵꓼ ꓪ ꓖꓶ ꓗꓷ ꓟˍ ꓡꓰ ꓐꓰ ꓠꓲ, ꓪꓴꓽ ꓪꓴꓽ ꓡꓰꓽ ꓬꓰ꓿ ꓮ ꓫꓵꓽ ꓔꓯˍ ꓟꓲ ꓕꓽ ꓙꓳꓺ꓿ ꓠꓲ, ꓟ ꓕꓽ ꓣꓳ꓿ ꓮ ꓡꓲꓳ ꓐꓯˍ ꓠꓬ ꓠꓴ ꓪꓴ‐ꓢ ꓥꓪ ꓠꓬ ꓠꓴ ꓮ ꓡꓲ ꓗꓪ ꓙꓰˍ ꓟꓲ ꓠꓴˍ ꓐꓰ ꓕꓲꓽ ꓪˍ ꓔꓬ ꓥꓳ꓾ ꓐꓯ ꓡꓳ꓿

ꓣꓳ‐ꓟ ꓕꓳꓽ ꓶ 8ꓽ28 ꓗꓪ꓾ ꓝꓮꓲ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓢꓴˍ ꓐꓰ ꓬꓲ ꓔꓶ ꓙꓱꓼ ꓔꓯ ꓛꓳ ꓢꓲ ꓘꓴ ꓔ ꓢꓴ ꓐꓴ ꓐꓱ ꓶ ꓠꓬ꓾ ꓪꓴ‐ꓢ ꓡꓰ ꓮ ꓫꓵꓽ ꓗꓪˍ ꓟꓲ ꓙꓲˍ ꓟ ꓒꓬꓱꓼ ꓡ ꓝꓲˍ ꓟ ꓣꓳ ꓢꓷ.ˍ ꓡꓳ꓿

ꓟ‐ꓕꓲ ꓕꓳꓽ ꓶ 5ꓽ4 ꓗꓪ꓾ ꓠꓲ, ꓥꓴꓻ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓠꓲ, ꓗꓴ ꓖꓶˍ ꓟ ꓟꓶˍ ꓥꓳ꓿