ꓠꓬꓲ. ꓠꓬꓲ ꓡꓲꓽ ꓒꓰꓼ ꓐꓰ ꓫ. ꓕꓱˍ ꓟ ꓙꓵ, ꓗꓪ ꓐꓰ꓾ ꓡꓲꓽ ꓒꓰꓼ ꓐꓰ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓡˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥꓳ꓿ ꓟꓲ ꓠꓯ ꓤꓶꓻ ꓐꓰ ꓡꓲꓽ ꓒꓰꓼ ꓠꓬ ꓧ, ꓟꓽ ꓓꓻ ꓟ ꓕꓲ ꓟ ꓥ ꓡꓳ꓿ ꓟꓲ ꓠꓯ ꓕꓯꓽ ꓢꓲ ꓗꓪ ꓟꓽ ꓪꓽ ꓡꓯ ꓘꓳ ꓟ ꓞꓳ ꓫꓵꓽ ꓮ ꓟꓬ, ꓢꓯ. ꓔꓬ ꓟ ꓥ ꓢꓲ ꓠꓬꓲ꓾ ꓟꓽ ꓫꓱ. ꓡꓯ ꓘꓳ ꓟ ꓡꓲꓽ ꓒꓰꓼ ꓮ ꓟꓬ, ꓙꓳˍ ꓟ ꓥ ꓡꓳ꓿
ꓢꓯꓼ ꓐꓽ ꓢꓲ ꓠꓬꓲ ꓝꓴꓲ. ꓙꓳˍ ꓢꓴ ꓟꓲ ꓠꓯ ꓞꓳ ꓤ ꓡꓰ ꓫꓬ, ꓔ ꓟ ꓡꓲꓽ ꓒꓰꓼ ꓥ ꓢꓲ ꓠꓬꓲ꓾ ꓡꓲꓽ ꓒꓰꓼ ꓥ ꓕ ꓑꓳꓸꓼ ꓗꓪ ꓝꓴꓲ. ꓢꓯꓼ ꓥˍ ꓟꓲ ꓶꓻ ꓞ, ꓟ ꓥ ꓡꓳ꓿ ꓢꓯꓼ ꓐꓽˍ ꓟ ꓐꓰ ꓟꓽ ꓐꓲ ꓜꓲꓼ ꓟ ꓥˍ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓡꓲꓽ ꓒꓰꓼ ꓠꓯꓸꓼ ꓗꓪ ꓚꓺ ꓕꓯ ꓠꓬ ꓐꓯ ꓥꓳꓽˍ ꓟ꓾ ꓟꓽ ꓡꓳꓼ ꓟ ꓙꓳˍ ꓟ ꓥ ꓡꓳ꓿
ꓡꓲꓽ ꓒꓰꓼ ꓢꓯꓼ ꓐꓽˍ ꓟ ꓔꓯ ꓒꓳ, ꓡꓶ. ꓢꓲ ꓠꓬꓲ ꓡꓲꓽ ꓒꓰꓼ ꓔꓯ ꓟꓬꓽ ꓠꓬꓲ ꓬꓲ. ꓒꓵꓽ ꓒꓵꓽ ꓠ, ꓟ ꓣꓳ ꓠꓬ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓠ ꓔ ꓡꓳ꓿ ꓫꓬ, ꓑꓱ ꓠ, ꓔ ꓡꓳ꓾ ꓡꓳ. ꓙ ꓔꓳ, ꓙ ꓠ ꓔ ꓟ ꓔꓯ ꓢꓷ. ꓪˍ ꓡꓳ꓿ ꓝꓴꓲ. ꓐꓰ ꓐꓲ ꓞ, ꓟ ꓡ ꓞꓳ ꓥ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓥ ꓕ ꓑꓳꓸꓼ ꓗꓪ ꓢꓯꓼ ꓐꓽˍ ꓟ ꓟꓽ ꓐꓲ ꓜꓲꓼ ꓟ ꓕꓱ ꓟ ꓐꓰ ꓐꓲ ꓞ, ꓟ ꓥ ꓡꓳ꓿
ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳ ꓚꓺ ꓢꓲ ꓠꓬꓲ ꓡ ꓞꓳ ꓔꓯ ꓒꓳ, ꓡꓶ. ꓡ ꓠ, ꓟ ꓢꓯꓼ ꓕꓵꓼˍ ꓟ ꓙꓵ, ꓕꓯ ꓥ ꓟꓲ꓾ ꓝꓴꓲ. ꓐꓰ ꓶꓺ ꓞ, ꓟ ꓡꓲꓽ ꓒꓰꓼ ꓥ ꓕ ꓑꓳꓸꓼ ꓔꓯ ꓠꓬ ꓡꓳꓻ ꓗꓷ ꓠ ꓔ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓚꓺ ꓢꓲ ꓠꓬꓲ ꓡ ꓞꓳ ꓝꓴꓲ. ꓞꓲꓽ ꓫꓬ, ꓕꓯ ꓝꓴꓲ. ꓠꓯꓸꓼ ꓗꓪ ꓔꓲ. ꓞ, ꓟ ꓡꓲꓽ ꓒꓰꓼ ꓥ ꓕ ꓑꓳꓸꓼ ꓔꓯ ꓠꓬ ꓞꓲꓽ ꓫꓬ ꓩꓴ ꓠ ꓔ ꓡꓳ꓿
ꓠꓬꓲꓽ ꓧꓪ, ꓕꓲ ꓧꓪ, ꓦꓮꓔꓲꓚꓮꓠ ꓖꓪ ꓙꓱꓻ ꓜꓲꓼ ꓓꓴ ꓗꓪ ꓠꓬ꓾ “ꓡꓲꓽ ꓒꓰꓼ ꓐꓯˍ ꓟ ꓠꓬ ꓡ ꓞꓳ ꓡꓰ ꓫꓬ ꓔ ꓟ ꓐꓰ ꓔꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓔꓯ ꓬꓲ. ꓒꓵꓽ ꓒꓵꓽ ꓡꓰ ꓠ ꓛꓲ ꓫꓬ, ꓔꓶˍ ꓟ ꓐꓲ ꓜꓲꓼ ꓡꓰ ꓝꓲˍ ꓟ ꓣꓳ. ꓚꓵ.ˍ ꓡꓳ” ꓐꓰ ꓐꓯ ꓔ ꓡꓳ꓿
ꓖꓳ ꓟ ꓖꓴ ꓡꓰ ꓕꓯ ꓢꓲ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓕꓲ ꓚꓳ ꓡꓳ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓚꓺˍ ꓕꓯ ꓟꓽ ꓫꓱ. ꓡꓯ ꓘꓳ ꓟ ꓡꓲꓽ ꓒꓰꓼ ꓐꓰ ꓮ ꓕꓯ ꓥ ꓟꓲ ꓔꓳ, ꓜꓳꓽ ꓡ ꓟ ꓥ ꓢꓲ ꓠꓬꓲ ꓡꓲꓽ ꓒꓰꓼ ꓔꓯ ꓮ ꓘꓶ. ꓛꓲ ꓒꓵꓽ ꓗ ꓬꓰ ꓢꓲ꓾ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓟꓬꓽ ꓠꓬꓲ ꓬꓲ ꓟ. ꓟꓲꓽ ꓙꓳ ꓡꓰ ꓠ, ꓟ ꓢꓯꓼ ꓕꓵꓼˍ ꓟ ꓥ ꓪ꓿
ꓕꓱ ꓡꓱ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓚꓺˍ ꓕꓯ ꓘꓴ ꓜꓲꓼ ꓞꓳ ꓠꓬ ꓬꓲ. ꓪ ꓡꓲꓽ ꓒꓰꓼ ꓔꓯ ꓟꓬꓽ ꓠꓬꓲ ꓬꓲ. ꓒꓵꓽ ꓒꓵꓽ ꓡꓰ ꓠ꓾ ꓟꓬꓽ ꓠꓬꓲ ꓟꓬꓱꓺ ꓓꓳꓽ ꓙꓳ ꓡꓰ ꓠ ꓬꓰ ꓖꓶ ꓡ ꓟ ꓡꓰꓽ ꓟꓽ ꓞꓲ꓾ ꓡꓲꓽ ꓒꓰꓼ ꓬꓲ. ꓒꓵꓽ ꓒꓵꓽˍ ꓟ ꓔꓯ ꓧꓪ ꓢꓲ ꓠꓬꓲ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ ꓪ꓿
