ꓢꓲꓺ ꓒꓽ ꓬꓰ-ꓢꓴ ꓠꓬ ꓡꓳ ꓒꓱ ꓓꓽ ꓗꓪ ꓔꓬ ꓢꓴ ꓟꓽ ꓥ ꓮꓽ ꓖ ꓟꓵꓽ ꓗꓪ ꓞꓳ ꓘꓹ ꓗꓪ ꓔꓬ ꓢꓴ ꓥˍ ꓡꓳ= ꓖꓳ ꓕꓲꓽ ꓘꓴꓸ ꓗꓪ ꓛꓱꓽ ꓟꓳ ꓢꓴ ꓥˍ ꓡꓳ= ꓖꓳ ꓟ ꓑꓶꓸ ꓓꓴ ꓢꓲꓺ ꓒꓽ ꓬꓰ-ꓢꓴ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓙꓱ ꓤꓽ ꓟ ꓞꓲ ꓢꓯꓸ ꓫꓵꓽ ꓢꓯꓸ ꓙꓵꓽ ꓟꓵꓽ ꓘꓳꓼ ꓐꓰ ꓮ ꓕꓯ ꓥˍ ꓟꓲ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓔꓳꓹ ꓜꓳꓽ ꓠꓬꓲˍ ꓟ ꓟꓳ ꓠꓬꓲˍ ꓟ ꓥ ꓪ= ꓢꓲꓺ ꓒꓽ ꓬꓰ-ꓢꓴ ꓡꓰ ꓟꓸ ꓖꓶ ꓡꓹ ꓟ ꓠꓯꓸꓼ ꓗꓪ ꓟꓲ ꓠꓯ ꓚꓱꓹ ꓟꓵꓽ ꓘꓳꓼ ꓚꓱꓹ ꓔꓯ ꓥˍ ꓟꓲ ꓖꓳ ꓟ ꓡꓰ ꓟꓽ ꓞꓲ ꓞꓳ ꓤꓽ ꓔꓯ ꓥˍ ꓟꓲ ꓙꓵꓽ ꓠꓹ ꓟ ꓐꓱ ꓶ ꓟꓽ ꓥ ꓬꓲ ꓪꓽ ꓔꓯ ꓥꓸ ꓞ ꓠˍ ꓟ ꓐꓱ ꓶ ꓥˍ ꓟꓲ ꓟ ꓥ ꓐꓯˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓬꓲ ꓠꓬ ꓚꓰꓼ ꓔ ꓟ ꓮꓽ ꓙꓵꓽ ꓔꓯ ꓥˍ ꓟꓲ ꓒꓵꓽ ꓗꓴꓸ ꓔ ꓢꓴ ꓠꓲꓹ ꓠꓱ ꓗꓴꓸ ꓔ ꓢꓴ ꓥˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓚꓰꓼ ꓔ ꓟ ꓮꓽ ꓙꓵꓽ ꓠꓬ ꓪꓴ-ꓢ ꓠꓱ ꓠꓲꓹ ꓗꓪ ꓐꓰ ꓡˍ ꓟ ꓢꓲ ꓖꓳ ꓗꓪ ꓚꓳꓸ ꓫꓷꓸ ꓡˍ ꓟ ꓥˍ ꓡꓳ ꓐꓯˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓮꓸ ꓠꓯ ꓔꓯ ꓓꓵꓽ ꓙꓽ ꓠꓬꓲ ꓬꓲ ꓪꓽ ꓠꓽ ꓫꓵˍ ꓟꓲ ꓟꓽ ꓫꓵ ꓫˍ ꓟꓲ ꓟꓽ ꓫ꓾ ꓜ ꓦꓲˍ ꓟꓲ ꓟꓽ ꓙꓳ꓾ ꓜ ꓗˍ ꓟꓲ ꓟꓽ ꓙꓳ ꓪꓴ-ꓢ ꓠ ꓬꓲ ꓪ ꓔꓯ ꓦꓵ ꓔꓬ ꓡꓳ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓮꓸ ꓠꓯ ꓚꓱꓹ ꓔꓯ ꓕꓱ ꓡꓰ ꓐꓯˍ ꓟ ꓥ ꓪ= ꓢꓲꓽ ꓫꓬ ꓕꓳ ꓶ ꓗꓪ ꓟꓬꓽ ꓠꓬꓲ ꓧꓪ ꓠˍ ꓟ ꓧꓪ ꓠˍ ꓟ ꓮ ꓕꓯ ꓥˍ ꓟꓲ ꓕꓱ ꓡꓲꓳ ꓫꓵꓽ ꓔꓯ ꓐꓯˍ ꓕꓯ ꓧꓪꓽ ꓫꓵꓽ ꓧꓪꓽ ꓙꓵꓽ ꓙꓱꓽ ꓤꓽ ꓟ ꓞꓲ ꓔꓯꓸ ꓔꓯ ꓢꓲ ꓐꓯˍ ꓟ ꓥ ꓪ= ꓪꓴ-ꓢ ꓠꓬ ꓣꓳꓽ ꓔꓯ ꓮ ꓕꓯ ꓥˍ ꓟꓲ ꓣꓱꓽ ꓬꓯꓼˍ ꓟ ꓖꓶ ꓔꓬ ꓡꓳ= ꓠꓴ ꓪꓽ ꓠꓬ ꓠꓬꓹ ꓤꓼ ꓕꓯ ꓢꓲ ꓮꓽ ꓘꓶꓸ ꓒꓵꓽˍ ꓟ ꓟꓽ ꓥˍ ꓡ ꓐꓰ ꓕꓱ ꓡꓰ ꓐꓯˍ ꓡꓳ= ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓟꓬꓽ ꓠꓬꓲ ꓒꓵꓽˍ ꓟ ꓖꓶ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓢꓯꓸ ꓔꓬˍ ꓟ ꓙꓵꓹ ꓗꓪ ꓟꓵꓽ ꓘꓳꓼ ꓕꓱ ꓟ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓠꓯꓸꓼ ꓗꓪ ꓐ ꓔꓬ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=
ꓢꓲꓺ ꓒꓽ ꓬꓰ-ꓢꓴ ꓔꓯ ꓛꓱꓽ ꓟꓳˍ ꓕꓯ ꓮꓸ ꓟꓳꓽ ꓡꓴ ꓕꓵ ꓗꓪ ꓫꓵꓸ ꓔ ꓡꓳ= ꓮ ꓡꓲꓳ ꓐꓯ ꓠꓬ ꓪꓰ ꓜꓽ ꓦꓲꓺ ꓗꓪ ꓬꓲꓼ ꓔ ꓔꓷꓸ ꓗꓪ ꓬꓲꓼ ꓔ ꓠꓹ ꓟ ꓬꓲ ꓪꓽ ꓐꓱ ꓶ ꓬꓲ ꓔꓷ ꓟꓽ ꓙꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓙꓱꓽ ꓤꓽ ꓟ ꓞꓲ ꓟꓵꓽ ꓗꓪ ꓟ ꓧꓪꓽ ꓫꓵꓽ ꓧꓪꓽ ꓙꓵꓽˍ ꓐꓰ ꓮ ꓕꓯ ꓥˍ ꓟꓲ ꓬꓲ ꓕꓲꓽ ꓞꓲꓼ ꓠꓬ ꓝꓸ ꓡꓯꓽ ꓘꓳˍ ꓟ ꓙꓳ ꓐꓭ= ꓢꓲꓺ ꓒꓽ ꓬꓰ-ꓢꓴ ꓦꓱ ꓙꓵꓹ ꓚꓧꓣꓲꓢꓔꓟꓮꓢ ꓙꓵꓹ ꓛꓵ ꓡˍ ꓕꓯ ꓠꓬ ꓙꓲ-ꓢꓴ ꓢꓲꓺ ꓤꓼ ꓐꓴ ꓚꓵ ꓛꓬꓽ ꓦꓲꓺ ꓗꓪ ꓥˍ ꓟꓲ ꓪꓽ ꓘꓴ ꓦꓲꓺ ꓗꓪ ꓥˍ ꓟꓲ ꓮꓸ ꓠꓬꓲ ꓡꓳ ꓕꓴ ꓐꓬꓱꓽ ꓕꓱ ꓡꓲꓳ ꓫꓵꓽ ꓬꓰ ꓢꓲ ꓐꓲ ꓫꓵꓽ ꓦˍ ꓟ ꓔꓯ ꓟꓳ ꓪ ꓓˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓔꓯ ꓛꓱꓽ ꓟꓳˍ ꓕꓯ ꓬꓲ ꓟꓹ ꓟ ꓟ-ꓡꓲ꓾ ꓬꓳ-ꓢꓷ ꓐꓰ ꓙꓱꓽ ꓤꓽ ꓟ ꓞꓲ ꓠꓬ ꓢꓲꓺ ꓒꓽ ꓬꓰ-ꓢꓴ ꓚꓳ ꓡꓳ ꓡꓳ ꓗꓪ ꓔꓬˍ ꓟ ꓔꓯ ꓡꓳꓸ ꓟꓳˍ ꓡꓳ= ꓢ ꓘꓪ ꓕꓯ ꓮꓸ ꓣꓳ ꓡꓳꓸ ꓢꓴ ꓐꓴ ꓡꓰ ꓢꓲꓺ ꓒꓽ ꓬꓰ-ꓢꓴ ꓔꓯ ꓒꓵꓽ ꓗꓹ ꓬꓲ ꓡˍ ꓟ ꓪꓴꓸ ꓓꓵ ꓕꓵꓼ ꓡˍ ꓟ ꓔꓯ ꓓꓽ ꓪꓴꓸ ꓡꓳꓸ ꓟꓳˍ ꓟ ꓥ ꓪ= ꓖꓳ ꓟ ꓠꓬ ꓮꓸ ꓣꓳˍ ꓐꓰ ꓢꓲꓺ ꓒꓽ ꓬꓰ-ꓢꓴ ꓝꓸ ꓡꓯꓽ ꓘꓳˍ ꓟ ꓙꓳˍ ꓟ ꓔꓯ ꓡꓳꓸ ꓟꓳ ꓪꓽ ꓓˍ ꓡꓳ= ꓟ-ꓘꓳ ꓡꓰ ꓐꓳ ꓔ ꓟ ꓠꓯꓸꓼꓗꓪ ꓢꓲꓺ ꓒꓽ ꓬꓰ-ꓢꓴ ꓬꓲ ꓦꓺ ꓔꓯ ꓮꓽ ꓘꓶꓸ ꓫꓸ ꓔ ꓟ ꓡꓲ ꓛꓵ ꓗꓪ ꓧꓳꓽ ꓔꓯꓹ ꓙꓰˍ ꓡꓳ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓖꓳ ꓡꓰ ꓡꓲ ꓛꓵ ꓗꓪ 40 ꓦꓬꓼ 40 ꓠꓬꓲ ꓕꓱ ꓡꓰ ꓔꓬ ꓢꓲ ꓠꓲꓽ ꓪꓸ ꓔꓲꓸ ꓢ ꓓꓯꓼ ꓡꓰ ꓤꓹ ꓠꓬꓲˍ ꓟ ꓔꓯ ꓔꓳꓹ ꓜꓳ ꓡꓰꓳ= ꓢꓲꓺ ꓒꓽ ꓬꓰ-ꓢꓴ ꓑ ꓕꓲꓸꓼ ꓗꓪ ꓧꓪꓽ ꓫꓵꓽ ꓧꓪꓽ ꓙꓵꓽ ꓠꓬꓹ ꓫꓵꓽ ꓠꓬꓹ ꓙꓵꓽ ꓮꓽ ꓟꓬꓹ ꓔꓬ ꓐꓭ_ ꓥꓳ= ꓟꓴ ꓗꓪ ꓝꓲ ꓓꓴ ꓐꓴ ꓠꓬ ꓢꓲꓺ ꓒꓽ ꓬꓰ-ꓢꓴ ꓣꓱꓽ ꓬꓯꓼˍ ꓟ ꓕꓯ ꓬꓰ ꓙ ꓔ ꓙˍ ꓡꓳ ꓣꓱꓽ ꓙˍ ꓡꓳ ꓐꓰ ꓟ-ꓘꓳ 1ꓽ 13 ꓝꓲꓸ ꓗꓪ ꓕꓱ ꓡꓰ ꓐꓳ ꓔ ꓡꓳ= ꓖꓳ ꓡꓰ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓡꓲ ꓛꓵˍ ꓐꓰ ꓮ ꓕꓯ ꓥˍ ꓟꓲ ꓔꓳꓹ ꓜꓳꓽ ꓠꓬꓲˍ ꓟ ꓙꓳˍ ꓡꓳ=
ꓢꓲꓺ ꓒꓽ ꓬꓰ-ꓢꓴ ꓣꓳꓽ ꓟꓲ ꓠꓯ ꓞꓳ ꓤꓽ ꓔꓯ ꓚꓬꓴ. ꓙ ꓠˍ ꓟ ꓐꓱ ꓶ ꓚꓬꓴ. ꓙˍ ꓟ ꓔꓯ ꓘꓳꓹ ꓣꓴˍ ꓟ ꓔꓯ ꓛꓳꓽ ꓠꓬꓲ ꓠꓬ ꓡꓲ ꓛꓲ ꓗꓪ ꓛꓲ ꓔꓬˍ ꓟ ꓙꓵꓹ ꓗꓪ ꓢꓲꓺ ꓒꓽ ꓬꓰ-ꓢꓴ ꓘꓳꓹ ꓣꓴˍ ꓟ ꓥ ꓐꓭ= ꓟꓲ ꓠꓯ ꓞꓳ ꓤꓽ ꓔꓯ ꓚꓬꓴ. ꓙ ꓠˍ ꓟ ꓔꓯ ꓚꓬꓴ. ꓙ ꓠˍ ꓟ ꓐꓱ ꓶ ꓚꓬꓴ. ꓙˍ ꓟ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓞꓳ ꓤꓽˍ ꓐꓰ ꓕꓲꓽ ꓪꓼ ꓔꓬ ꓠ, ꓟ ꓕꓯ ꓢꓲ ꓗꓪ ꓡꓲ ꓛꓲ ꓗꓪ ꓙꓱꓽ ꓤꓽ ꓟ ꓞꓲ ꓧꓪꓽ ꓫꓵꓽ ꓧꓪꓽ ꓙꓵꓽˍ ꓐꓰ ꓔꓬ ꓠˍ ꓟ ꓕꓱ ꓟ ꓔꓯ ꓢꓲꓺ ꓒꓽ ꓬꓰ-ꓢꓴ ꓠꓬ ꓓꓽ ꓪꓴꓸ ꓢꓲ ꓚꓰ ꓔ ꓟ ꓔꓯ ꓡꓳꓸ ꓟꓳˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓪꓽ ꓘꓴ ꓠˍ ꓟ ꓐꓱ ꓶ ꓪꓴ-ꓢ ꓐꓰ ꓫꓸ ꓕꓱ ꓡꓯꓽ ꓘꓳ ꓠˍ ꓟ ꓪꓽ ꓚꓵ ꓗꓪ ꓓꓯ ꓢꓲ ꓕꓱ ꓡꓰ ꓫꓸ ꓕꓱ ꓡꓯꓽ ꓘꓳˍ ꓟ ꓪꓽ ꓘꓴˍ ꓟ ꓔꓯ ꓟ-ꓕꓲ 17ꓽ 1꓾ ꓟ-ꓘꓳ 6ꓽ 46꓾ ꓟ-ꓕꓲ 14ꓽ 23 ꓗꓪ ꓬꓲ ꓗꓸ ꓠꓯꓸ ꓢꓲ ꓛꓳ ꓢꓴ ꓐꓴ ꓬꓲ ꓝꓲ ꓓꓴ ꓐꓴ ꓔꓯ ꓢꓲ ꓠˍ ꓟ ꓐꓱ ꓶ ꓓꓵꓽ ꓙꓽ ꓞꓲꓹ ꓠˍ ꓟ ꓠꓬ ꓡꓲ ꓛꓵ ꓗꓪ ꓬꓰˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓡꓴ-ꓘ 6ꓽ 12 ꓬꓲ ꓡꓰ ꓟꓸ ꓔ ꓟ ꓟꓬ ꓠꓬꓲ ꓠꓬ ꓦꓲꓺ ꓗꓪ ꓥˍ ꓠꓬ ꓜꓲꓼ ꓦꓲꓺ ꓗꓪ ꓥˍ ꓠꓬ ꓪꓽ ꓘꓴ ꓦꓲꓺ ꓗꓪ ꓮꓽ ꓘꓶꓸ ꓟꓽ ꓬꓰˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=
ꓟ-ꓕꓲ ꓶꓽ ꓓꓳꓽ ꓫꓱꓸ ꓓꓳꓽ ꓗꓪ ꓢꓲꓺ ꓒꓽ ꓬꓰ-ꓢꓴ ꓟꓸ ꓖꓶ ꓡˍ ꓟ ꓚꓱꓹ ꓟ-ꓕꓲ 5ꓽ 1-7ꓽ 29 ꓗꓪ ꓛꓲ ꓬꓲ ꓠꓬ ꓕꓱ ꓡꓰ ꓟꓸ ꓖꓶ ꓡˍꓕꓯ ꓪꓽ ꓚꓲ ꓗꓪ ꓓꓯꓻ ꓙꓰ ꓢꓲ ꓠꓬꓲ ꓟꓸ ꓖꓶ ꓡˍ ꓟ ꓬꓲ ꓡꓰ ꓮ’ ꓡꓰ ꓓꓴ ꓞꓳ ꓤꓽ ꓔꓯ ꓟꓸ ꓖꓶˍ ꓟ ꓠꓬ ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱ ꓗꓪ ꓬꓰˍ ꓟ ꓟ-ꓕꓲ 13ꓽ1-25꓾ ꓟ-ꓘꓳ 4ꓽ35-41꓾ ꓬꓳ-ꓦ 21ꓽ1- 14 ꓗꓪ ꓡꓳꓸ ꓟꓳˍ ꓡꓳ= ꓝꓲ ꓓꓴ ꓐꓴˍ ꓐꓰ ꓕꓲꓽ ꓪꓼ ꓡꓲ ꓛꓲ ꓗꓪ ꓔꓬ ꓕꓯ ꓢꓲꓺ ꓒꓽ ꓬꓰ-ꓢꓴ ꓠꓬ ꓑ ꓑ 5 ꓑꓬ ꓐꓰ ꓥꓪꓸ 2 ꓟ ꓔꓯ ꓞꓳ ꓤꓽ ꓮꓽ ꓟꓬꓹ ꓔꓯ ꓖꓶ ꓜꓽ ꓪ ꓠ, ꓟ ꓟꓬꓽ ꓡ ꓐꓶˍ ꓡ ꓠ ꓢꓲꓺ ꓒꓽ ꓬꓰ-ꓢꓴ ꓠꓬ ꓕꓱ ꓡꓰ ꓟꓳꓸ ꓖꓶˍ ꓟ ꓟ-ꓕꓲ 14ꓽ 15- 21꓾ ꓡꓴ-ꓘ 9ꓽ 10-17꓾ ꓬꓳ-ꓦ 6ꓽ1- 13 ꓗꓪ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓡꓲ ꓛꓲ ꓗꓪ ꓟꓵꓽ ꓗꓪ ꓪꓽ ꓚꓲ ꓗꓪ ꓕꓱ ꓡꓱ ꓫꓵꓽ ꓗꓪ ꓟꓬꓽ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓔꓬˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓵꓽ ꓘꓳꓼ ꓔꓯ ꓒꓵꓽ ꓢꓴ ꓟꓵꓽ ꓘꓳꓼ ꓟꓽ ꓐꓬ ꓡꓰ ꓠ, ꓟ ꓗꓽ ꓕꓸ ꓙ ꓢꓴ ꓥ ꓡꓳ ꓐꓯˍ ꓟ ꓔꓯ ꓕꓱ ꓕꓲꓽ ꓘꓴ ꓗꓪ ꓡꓳꓸ ꓟꓳ ꓪ ꓓˍ ꓡꓳ=
