ꓮ ꓟꓬ ꓗꓪ ꓛꓲ ꓬꓲ ꓒꓵꓽ ꓙꓳ ꓥˍ ꓟꓲ ꓢꓻ ꓢꓻˍ ꓪ ꓐꓭˍ ꓠꓬ ꓖꓳ ꓟ ꓠꓬ ꓬꓲ ꓒꓵꓽ ꓮ ꓘꓶꓸ ꓟꓽ ꓙꓳ= ꓞꓳ ꓤ ꓕꓲ ꓐꓱ ꓠꓬ ꓟꓶ ꓔˍ ꓟ ꓔꓯ ꓡꓰ ꓬꓲ ꓒꓵꓽ ꓙꓳˍ ꓐꓰ ꓓꓵ ꓙ ꓢꓲ꓾ ꓢꓴ ꓠꓯꓸꓼ ꓗꓪ ꓙꓳˍ ꓟ ꓔꓯ ꓬꓲ ꓒꓵꓽ ꓟꓽ ꓙꓳ ꓐꓰ ꓓꓵꓽ ꓙ ꓔꓬ ꓡꓳ= ꓢꓻ ꓢꓻˍ ꓡꓰꓽ ꓟꓶˍ ꓟ ꓮ ꓙꓵꓽ ꓠꓬ ꓬꓲ ꓒꓵꓽ ꓟꓽ ꓙꓳ ꓐꓰ ꓐꓯ ꓔꓬ ꓡꓳ= ꓖꓳ ꓟˍ ꓡꓰ ꓐꓰ ꓮ ꓫꓵꓽ ꓗꓪ ꓥˍ ꓟꓲ ꓢꓻ ꓢꓻ ꓪꓴꓸ ꓓꓵ ꓥꓷꓼ ꓢꓴ ꓕꓲ ꓣꓳ ꓥ ꓐꓭ ꓠꓬ ꓢꓴ ꓡꓰ ꓠꓴ ꓔꓯ ꓬꓲ ꓒꓵꓽ ꓙꓳˍ ꓟ ꓞꓳ ꓤ ꓕꓲ ꓣꓳ ꓟꓽ ꓢꓳꓽ ꓡ= ꓞꓳ ꓤ ꓕꓲ ꓐꓱ ꓠꓬ ꓣꓳ ꓠꓯꓸꓼ ꓗꓪ ꓢꓻ ꓢꓻˍ ꓪ ꓓꓻˍ ꓟ ꓔꓯ ꓢꓷꓸ ꓐꓭ ꓠꓬˍ ꓣꓳ ꓠꓯꓸꓼ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓣꓴ ꓔꓯ, ꓙꓰ ꓡˍ ꓥꓳ=
ꓣꓳ ꓠꓯꓸꓼ ꓗꓪ ꓢꓻ ꓢꓻˍ ꓪ ꓓꓻˍ ꓟ ꓔꓯ ꓢꓷꓸ ꓡꓰ ꓐꓭˍ ꓠꓬ ꓞꓳ ꓟꓽ ꓒꓵꓽ ꓟ ꓬꓲ ꓪ ꓬꓰ ꓠꓲꓹ ꓫꓵˍ ꓪ ꓡꓰ ꓬꓰ ꓡˍ ꓥꓳ= ꓞꓳ ꓤ ꓮ ꓙꓵꓽ ꓠꓽ ꓟꓽ ꓥ꓿ ꓖꓳ ꓡꓱ ꓐꓯˍ ꓥ ꓟꓲ ꓞꓳ ꓤ ꓮ ꓟꓬꓹ ꓠꓯꓸꓼ ꓘꓴꓽ ꓗꓪ ꓡꓳꓸ ꓟꓳꓻ ꓪ ꓓꓻˍ ꓡꓳ= ꓖꓳ ꓟ ꓑꓶꓸ ꓓꓴ ꓢꓻˍ ꓟ ꓞꓳ ꓤ ꓕꓽ ꓗꓷ ꓡꓰ ꓝꓲ= ꓮ ꓡꓲ ꓗꓪ ꓛꓲ ꓬꓰˍ ꓥ ꓟꓲ ꓠꓴ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓔꓯ ꓠꓲꓹ ꓠꓵ꓾ ꓬꓲ ꓒꓵꓽ ꓙꓳˍ ꓟ ꓡ ꓞꓳ ꓒꓬꓱꓽ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ= ꓣꓳ ꓗꓴꓷꓼ ꓠꓯꓸꓼ ꓗꓪ ꓥˍ ꓟꓲ ꓬꓰ ꓠꓲꓹ ꓫꓵˍ ꓪ ꓡꓰ ꓬꓰ ꓔꓬ ꓢꓴ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓔꓬ ꓡꓳ= ꓖꓳ ꓡꓱ ꓞꓳ ꓤ ꓔꓬˍ ꓟ ꓪꓴꓸ ꓠꓬꓲ ꓣꓳ ꓗꓴꓷꓼ꓾ ꓣꓳ ꓘꓹ ꓘꓴꓽ ꓗꓪ ꓪꓴꓽ ꓟꓴ ꓡ ꓓꓴ ꓟꓽ ꓙꓳˍ ꓟ ꓥ ꓡꓳ=
ꓔꓯ ꓥꓳꓽ ꓕꓲ ꓟ ꓐꓯˍ ꓠꓬ ꓞꓳ ꓤ ꓕꓲꓽ ꓣꓳ ꓒꓴ ꓮ ꓙꓵꓽ ꓣꓱꓽ ꓬꓯꓼˍ ꓟ ꓪꓴꓸ ꓠꓬꓲ ꓒꓴ ꓛꓵꓽ ꓡ ꓢꓲ꓾ ꓖꓳ ꓕꓲ ꓠꓬꓲ ꓛꓲ ꓡˍ ꓕꓯ ꓚꓱꓹ ꓖꓶˍ ꓠꓬꓲ ꓐꓯ ꓢꓲ꓾ ꓡꓽ ꓙꓰˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓚꓱꓹ ꓖꓶ ꓠꓹ ꓟ ꓬꓲ ꓦꓬꓼ ꓠꓬꓲ ꓛꓲ ꓡ ꓕꓯ ꓟꓽ ꓚꓱꓹ ꓖꓶ ꓡ= ꓒꓴ ꓛꓵꓽ ꓖꓶ ꓢꓴ ꓠꓬ ꓕꓱ ꓕꓲ ꓧꓪ, ꓠꓬ ꓖꓼ ꓖꓶˍ ꓠꓬꓲ ꓐꓯˍ ꓡꓳ= ꓝꓮꓲ ꓕꓲ ꓧꓪ, ꓥ ꓟꓲ ꓒꓴ ꓟꓽ ꓚꓱꓹ ꓖꓶ ꓡ= ꓕꓱ ꓟ ꓠꓬ ꓢꓻ ꓢꓻˍ ꓪ ꓓꓻˍ ꓟ ꓪꓴꓸ ꓠꓬꓲ ꓥ ꓡꓳ= ꓮ ꓫꓵꓽ ꓗꓪ ꓥˍ ꓟꓲ limit ꓛꓬ, ꓦ ꓠ ꓗꓹ ꓡꓳ= ꓖꓳ ꓡꓰ ꓔˍ ꓟ ꓪꓴꓸ ꓠꓬꓲ ꓣꓳ ꓤ ꓟꓳ ꓠ ꓗꓹ ꓡꓳ=
ꓟꓽ ꓙꓲ ꓟ ꓞꓳ ꓤ ꓕꓲ ꓣꓳ ꓬꓰˍ ꓐꓯ ꓟ ꓠꓬ ꓟꓽ ꓥ= ꓮ ꓡꓲ ꓕꓲ ꓣꓳ ꓔꓯ ꓥ ꓟꓲ ꓮ ꓘꓶꓸ ꓕꓽ ꓬꓰ ꓙ ꓪ ꓡꓰ ꓝꓲ= ꓮ ꓡꓲ ꓟ ꓠꓬ ꓙꓲꓻ꓾ ꓟꓽ ꓙꓲꓻ ꓟ ꓔꓯ ꓣꓳ ꓢꓷꓸ ꓠ ꓗꓹ ꓡꓳ= ꓣꓳ ꓢꓴ ꓔꓯ ꓬꓰ ꓙˍ ꓟ ꓗꓪ ꓥ ꓟꓲ ꓕꓱ ꓕꓲ ꓣꓳ ꓠꓬ ꓚꓵ ꓚꓵ ꓣꓱꓽ ꓬꓯꓼ ꓢꓴ ꓥ ꓡ? ꓐꓯˍ ꓟ ꓔꓯ ꓢꓷꓸ ꓪ ꓡꓰ ꓝꓲ= ꓮ ꓡꓲ ꓗꓪ ꓙꓰˍ ꓥ ꓟꓲ ꓮ ꓫꓵꓽ ꓟꓬꓱꓽ ꓬꓰˍ ꓥ ꓟꓲ ꓢꓻˍ ꓞꓳ ꓤ ꓕꓽ ꓗꓷ ꓡꓰ ꓝꓲ= ꓠꓴ ꓚꓲ. ꓚꓬ ꓖꓳ ꓓꓱꓽ ꓔꓯ ꓮ ꓕꓯ ꓥ ꓟꓲ ꓠꓲꓹ ꓠꓵ ꓢꓲ ꓔꓬ ꓪ ꓡꓰ ꓝꓲ=
