2024 ꓘꓳꓼ 10 ꓦ 19 ꓠꓬꓲ꓾ ꓠꓯꓼ ꓠꓯꓼ 8ꓽ00 ꓙꓵ, ꓕꓯ Deacon ꓙꓵꓽ ꓪ ꓘꓳ ꓣꓴˍ ꓟ ꓑꓮꓲꓽ ꓔꓯ ꓑ‐ꓔꓰꓲꓠ ꓡꓳ ꓒꓱ ꓙꓲꓻ ꓫꓬ ꓢꓴ ꓒꓲ‐ꓕꓱ ꓗ‐ꓔꓲ‐ꓓ‐ꓣꓯ ꓪꓽ ꓘꓴ ꓦꓲꓻ ꓗꓪ ꓬꓰ ꓗꓷꓳ꓿
Deacon ꓙꓵꓽ ꓪ ꓘꓳ ꓣꓴ ꓢꓴ ꓐꓴ ꓠꓬ Bro.Bartholomeus ꓛꓬ,‐ꓡꓳ‐ꓕꓴꓠ, (ꓟꓮꓣꓬ‐ꓡꓯꓠ, ꓢꓽ‐ꓢꓶ‐ꓠꓽ)꓾ Bro. Raymond ꓢ‐ꓢꓯ‐ꓚꓬꓮꓪ‐ꓔꓴ (ꓛꓬ,‐ꓔ‐ꓗꓳꓠꓰ ꓢꓽ‐ꓢꓶ‐ꓠꓽ)꓾ Bro. Sylvester ꓢꓮꓪ‐ꓰ‐ꓓꓲ‐ꓴ, (ꓗ‐ꓠ‐ꓢꓳ‐ꓗꓳꓠꓰ ꓢꓽ‐ꓢꓶ‐ꓠꓽ) ꓐꓴ ꓥ ꓡꓳ꓿ ꓬꓲ ꓪ ꓐꓴ ꓠꓬ ꓑ‐ꓔꓰꓲꓠ ꓗ‐ꓔꓳ‐ꓡꓲꓗ ꓔꓲꓺ ꓒ ꓓꓽ ꓟ Bishop Henry Eikhlein ꓡꓯꓽ ꓒꓯ, ꓗꓪ ꓐꓰ ꓓꓰꓮꓚꓳꓠ ꓙꓵꓽ ꓪ ꓔꓯ ꓘꓳ ꓣꓴ ꓗꓷꓳ꓿
ꓓꓰꓮꓚꓳꓠ ꓙꓵꓽ ꓪ ꓘꓳ ꓣꓴ ꓔꓬ ꓟ ꓕꓱ ꓐꓣꓳꓔꓧꓰꓣ (4) ꓣꓳ ꓠꓬ ꓕꓲꓽ ꓤꓶꓻ ꓡꓱꓸꓼ ꓦꓲꓻ ꓕꓴꓽ ꓗꓪ ꓕꓴꓽˍ ꓟ ꓟꓽ ꓬꓰ ꓬꓰ꓾ ꓢꓲꓽ ꓫꓬ, ꓟ ꓤꓶꓻ ꓗꓪ ꓐꓰ ꓡꓳ, ꓬꓰˍ ꓗꓪ ꓛꓲꓺ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓐꓰ꓾ ꓙꓵꓽ ꓢꓴ ꓟꓴ ꓢꓴ ꓔꓲꓺ ꓒ ꓓꓽ ꓟ ꓐꓴ ꓐꓯ ꓘꓶꓽ ꓔꓯ ꓠ ꓠ, ꓥꓳ꓾ ꓐꓯˍ ꓟ ꓪꓵꓼ ꓙꓱꓼ ꓘꓶꓽ ꓠꓬꓲꓽ ꓟ ꓔꓯ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓪꓵꓼ ꓙꓱꓼ ꓠ, ꓟ꓾ ꓕꓱ 4 ꓣꓳ ꓠꓬ ꓓꓰꓮꓚꓳꓠ ꓒꓬꓱꓼ ꓡꓰ ꓗ ꓠꓯ. ꓬꓲ ꓪ ꓔꓯ ꓙꓰ ꓝꓲˍ ꓟ ꓟꓵꓽ ꓐꓴ ꓗꓪ ꓙꓰ ꓢꓲ꓾ ꓖꓳ ꓗꓪ ꓔꓬ ꓟ ꓔꓲꓺ ꓒ ꓐꓴ ꓔꓯ ꓬꓰ ꓙ ꓠꓯ, ꓟ ꓔꓯ꓾ ꓔꓲꓺ ꓒ George ꓯ‐ꓓꓳ ꓗꓪ ꓐꓰ Deacon ꓐꓴ ꓤꓶꓻ ꓔꓯ ꓐꓯ ꓟ. ꓖꓶ ꓗꓷꓳ꓿
Bishop Henry Eikhlein ꓗꓪ ꓐꓰˍ ꓟꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓞꓳ ꓡꓱ ꓞꓳ ꓡꓯ. ꓐꓴ ꓔꓯ ꓘꓴ ꓗꓷ ꓢꓲ꓾ ꓠꓬꓲ. ꓠꓬꓲ Deacon ꓙꓵꓽ ꓪ ꓘꓳ ꓣꓴ ꓢꓴ ꓬꓲ ꓪ ꓮꓽ ꓐ ꓮ ꓟ ꓫꓵꓽ ꓤ ꓧꓪ ꓤ ꓐꓴ ꓔꓯ ꓥˍ ꓟꓲ ꓫ. ꓟꓳˍ ꓡꓳ꓾ ꓐꓯ ꓗꓷꓳ꓿
“ꓕꓱ ꓑ‐ꓔꓰꓲꓠ ꓢꓽ‐ꓢꓶ‐ꓠꓽ ꓗꓪ ꓡꓲꓽ ꓒꓰꓼ ꓕꓲꓽ ꓟ ꓙꓳˍ ꓡꓳ꓿ ꓖꓳ ꓟ ꓠꓬ ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓟꓬꓽ ꓡ ꓠ, ꓟ ꓐꓱ ꓶ ꓪꓽ ꓘꓴˍ ꓟ ꓔꓯ ꓢꓽ‐ꓢꓶ‐ꓠꓽ ꓕꓲꓽ ꓟ ꓡꓱꓸꓼ ꓗꓪ ꓪꓽ ꓘꓴˍ ꓟ ꓡꓲꓽ ꓒꓰꓼ ꓥ ꓡꓳ꓿ ꓪꓴ‐ꓢ ꓟꓬꓱꓽ ꓟꓯꓻ ꓔꓬ ꓢꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓪꓽ ꓘꓴ ꓙ ꓖꓶ ꓠ ꓔ ꓡꓳ” ꓐꓰ ꓐꓯ ꓢꓲ Deacon ꓙꓵꓽ ꓪ ꓘꓳ ꓣꓴ ꓗꓷ ꓢꓴ ꓐꓴ ꓐꓱ ꓶˍ ꓟꓲ ꓪꓽ ꓘꓴ ꓙ ꓖꓶ ꓠ, ꓟ ꓐꓯ ꓗꓷꓳ꓿
ꓟꓵꓽ ꓘꓳꓼ ꓟꓽ ꓢꓲ ꓡꓲ ꓟ ꓘꓴꓽ ꓠꓯꓸꓼ ꓗꓪ ꓙꓵꓻ ꓠꓲ, ꓐꓰ ꓠꓲ, ꓟ ꓟꓽ ꓙꓬ ꓡꓰ ꓠ, ꓟ꓾ ꓪꓴ‐ꓢ ꓠꓬ ꓣꓳ ꓢꓯꓼ ꓔꓯ ꓠ ꓠ, ꓔꓬ ꓟ꓾ ꓣꓳ ꓟꓬꓽ ꓠꓬꓲ ꓬꓰ ꓠ ꓔ ꓟ ꓠꓵꓻ ꓠꓲ, ꓢꓲ ꓒ ꓢꓲ ꓡꓲ ꓟ ꓢꓲ ꓒ ꓪꓴ‐ꓢ ꓔꓯ ꓣꓳꓽ ꓗꓳ ꓡꓳ ꓗꓪ ꓘꓴꓻ ꓔꓯ, ꓡ ꓠ, ꓟ꓾ ꓝꓮꓲ ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓥˍ ꓟꓲ ꓢꓲ ꓡꓲ ꓟ ꓐꓱ ꓶ ꓪꓽ ꓘꓴ ꓙ ꓖꓶˍ ꓔꓬ ꓟ ꓔꓯ Msgr. Andrea Ferrante ꓗꓪ ꓐꓰ ꓢꓯꓼ ꓖꓶ ꓗꓷꓳ꓿
ꓟꓲ‐ꓢ ꓔꓲꓺ ꓖꓶ ꓪꓽ ꓘꓴˍ ꓟ ꓠꓯꓸꓼ ꓗꓪ ꓪꓽ ꓘꓴ ꓡ ꓢꓴ ꓐꓴ ꓠꓬ (400) ꓣꓳ ꓛꓲ ꓙꓳ ꓢꓲ꓾ ꓠꓯꓼ ꓠꓯꓼ 11ꓽ00 ꓙꓵ, ꓛꓲ ꓕꓯ ꓠꓬ Deacon ꓙꓵꓽ ꓪ ꓘꓳ ꓣꓴ ꓑꓮꓲꓽ ꓔꓯ ꓧꓪ. ꓧꓪ. ꓐꓰ ꓬꓰ ꓡꓳ, ꓬꓰꓳ꓾ ꓐꓰ ꓢꓷ. ꓪ ꓡꓳ꓿
Source: RVA Pwo Karen, Pathein.
