ꓠꓬꓲꓸ ꓠꓬꓲ ꓗꓪ ꓐꓯ ꓟꓸ ꓖꓶ ꓠꓹ ꓟ ꓠꓬ꓾ ꓣꓳ ꓖꓳ ꓓꓱꓽ ꓗꓪ ꓬꓳꓸ ꓚꓵˍ ꓟ ꓕꓲ ꓟ ꓥ ꓟ ꓐꓵꓼ ꓟꓵ ꓢꓯꓼ ꓙꓳ ꓠꓹ ꓟ ꓐꓱ ꓶ ꓜꓽ ꓖꓶ ꓠ ꓔ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓚꓱꓹ ꓥ ꓡꓳ=
ꓐꓵꓼ ꓟꓵ ꓠꓬ ꓮ ꓡꓲ ꓟꓬ ꓗꓪ ꓛꓲ ꓬꓳꓸ ꓚꓵˍ ꓡ ꓐꓯ ꓕꓯ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓥˍ ꓟꓲ 11 ꓦ 1 ꓠꓬꓲ ꓗꓪ ꓐꓰ 30 ꓠꓬꓲ ꓗꓪ ꓛꓲ ꓔꓯ꓾ ꓐꓵꓼ ꓟꓵ ꓚꓮꓠꓚꓰꓣ ꓢꓷꓸ ꓡꓰ ꓓꓴ ꓚꓱꓹ ꓟꓸ ꓖꓶˍ ꓟ ꓦꓬꓼ ꓠꓬꓲ ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓡꓳ=
ꓐꓵꓼ ꓟꓵ ꓔꓬꓹ ꓢꓻ ꓓꓴ ꓠꓬ ꓢꓯꓼ ꓦ ꓚꓱꓹ ꓔꓯ ꓟꓳꓸ ꓠꓻ ꓫꓵꓽ ꓠꓻ ꓙꓰꓽ ꓗꓪ ꓐꓰ ꓗꓽ ꓕꓸ ꓙ ꓖꓶ ꓠꓹ ꓟ ꓮ ꓘꓶꓸ ꓬꓳꓸ ꓚꓵˍ ꓟ ꓕꓲ ꓟ ꓥ ꓡꓳ= ꓕꓲ ꓐꓱ ꓜꓽ ꓓꓴ ꓐꓴ ꓠꓬ ꓣꓳ ꓢꓯꓼ ꓦˍ ꓟ ꓟꓬꓱꓽ ꓐꓰ ꓐꓵꓼ ꓟꓵ ꓔꓯ ꓟꓬꓽ ꓠꓬꓲ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓕꓱ ꓡꓱ ꓬꓳꓸ ꓚꓵˍ ꓟ ꓐꓵꓼ ꓟꓵ ꓔꓯ ꓔꓬꓹ ꓢꓻ ꓝꓲˍ ꓟ ꓢꓲꓹ ꓢꓶꓽ ꓐꓴ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=
- ꓐꓰꓣꓣꓲꓰꓢ ꓢꓶꓽ
ꓐꓯ-ꓣꓲ ꓢꓶꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬꓹ ꓓꓵˍ ꓟ ꓡꓰꓽ ꓟꓽ ꓞꓲꓺ꓾ ꓠꓱꓸ ꓐꓯ ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓓꓴ ꓐꓱ ꓶ ꓢꓯꓼ ꓡꓴꓽ ꓖꓶˍ ꓟ ꓢꓯꓼ ꓥˍ ꓟꓲ ꓮ ꓟꓬꓹ ꓐꓹˍ ꓟ ꓥ ꓡꓳ=
ꓐꓯ-ꓣꓲ ꓢꓶꓽ ꓗꓪ ꓓꓵˍ ꓟ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓠꓬ꓾ ꓐꓵꓼ ꓟꓵ ꓚꓮꓠꓚꓰꓣ ꓠꓻ ꓒꓬꓱꓼ ꓡˍ ꓟ ꓚꓱꓹ ꓔꓯ ꓗꓽ ꓕꓸ ꓙꓻ ꓖꓶˍ ꓐ ꓡˍ ꓡꓳ= ꓐꓵꓼ ꓟꓵ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓮ ꓟꓬꓹ ꓔꓯ ꓥˍ ꓟꓲ꓾ ꓐꓯ-ꓣꓲ ꓢꓶꓽ ꓜꓽˍ ꓟ ꓗꓪ ꓐꓰ ꓖꓼ ꓓꓳ ꓖꓶ ꓐ ꓡˍ ꓡꓳ=
- ꓑꓯꓹ-ꓔꓲꓸ ꓢꓶꓽꓸ
ꓢꓯꓼ ꓦ ꓚꓱꓹ ꓐꓱ ꓶ ꓐꓰ ꓣꓳꓽ ꓖꓳ ꓓꓱꓽ ꓔꓯ ꓑꓯꓹ-ꓔꓲꓸ ꓠꓬ ꓙꓲꓻ ꓖꓴ ꓖꓶˍ ꓟ ꓥ ꓡꓳ= ꓐꓵꓼ ꓟꓵ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓟꓬꓽ ꓠꓬꓲ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓑꓯꓹ-ꓔꓲꓸ ꓢꓶꓽ ꓗꓪ ꓦꓲꓔꓮꓟꓲꓠ (ꓮ) ꓟꓬꓹ ꓓꓵˍ ꓟ ꓡꓰꓽ ꓟꓽ ꓞꓲ꓾ ꓢꓯꓼ ꓦ ꓚꓱꓹ ꓟꓬꓱꓽ ꓬꓰˍ ꓟ ꓔꓯ ꓢꓯꓼ ꓡꓴꓽ ꓖꓶˍ ꓟ ꓝꓡꓮꓦꓳꓠꓳꓲꓓ ꓢꓯꓼ ꓥˍ ꓟꓲ ꓓꓵˍ ꓟ ꓥ ꓡꓳ= ꓢꓯꓼ ꓕꓱ ꓟ ꓪꓴꓸ ꓠꓬꓲ ꓐꓵꓼ ꓟꓵ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶ ꓐ ꓡˍ ꓟ ꓥ ꓡꓳ=
- ꓧꓪꓽ ꓗꓳꓼ ꓢꓶꓽ
ꓧꓪꓽ ꓗꓳꓼ ꓢꓶꓽ ꓠꓬ ꓐꓵꓼ ꓟꓵ ꓐꓱ ꓶ ꓳꓫꓬꓖꓰꓠ ꓟꓲꓽ ꓦꓲ ꓛꓵꓼ ꓣꓴˍ ꓟ ꓗꓪ ꓬꓰ ꓙ ꓔꓳꓹ ꓙ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓮ ꓘꓶꓸ ꓛꓵꓻˍ ꓟ ꓧꓪꓽ ꓗꓳꓼ ꓢꓶꓽ ꓔꓯ ꓠꓽ ꓟꓽ ꓐꓯ= ꓧꓪꓽ ꓗꓳꓼ ꓢꓶꓽ ꓗꓪ ꓓꓵˍ ꓟ ꓦꓲꓔꓮꓟꓲꓠ (ꓚ) ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓠꓬ ꓝꓣꓰꓰ ꓣꓮꓓꓲꓚꓮꓡ ꓪꓴꓸ ꓠꓬꓲ ꓚꓰꓡꓡ ꓐꓬ ꓡꓰˍ ꓟ ꓗꓪ ꓐꓰ ꓗꓽ ꓕꓸ ꓙ ꓖꓶˍ ꓡꓳ= ꓟꓬꓽ ꓠꓬꓲ ꓐꓵꓼ ꓟꓵ ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓚꓱꓹ ꓔꓯ ꓟꓬꓽ ꓠꓬꓲ ꓗꓽ ꓕꓸ ꓙ ꓖꓶˍ ꓡꓳ=
- ꓡꓹ ꓝꓲꓼ ꓓꓽ ꓟ
ꓚꓮꓑꓢꓮꓲꓚꓲꓠ ꓐꓰ ꓘꓴˍ ꓟ ꓢꓯꓼ ꓕꓲ ꓙꓰꓽ ꓓꓵˍ ꓟ ꓡꓹ ꓝꓲꓼ ꓓꓽ ꓟ ꓠꓬ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓫꓵꓽ ꓢꓯꓼ ꓔꓯ ꓬꓲ ꓙꓵ ꓙꓳ ꓙꓳ ꓡꓰꓽ ꓬꓲꓻ ꓚꓳꓻ ꓔꓬ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓻ ꓚꓲꓸ ꓠꓷꓼˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ= ꓡꓹ ꓝꓲꓼ ꓓꓽ ꓟ ꓗꓪ ꓓꓵˍ ꓟ ꓦꓲꓔꓮꓟꓲꓠ (ꓚ) ꓠꓬ ꓧꓪꓽ ꓗꓳꓼ ꓢꓶꓽ ꓗꓪ ꓓꓵˍ ꓟ ꓦꓲꓔꓮꓟꓲꓠ ꓢꓶꓸ ꓟꓽ ꓞꓲꓺ ꓮ ꓟꓬꓹ ꓓꓵˍ ꓡꓳ=
- ꓪꓳꓽ ꓙꓲꓽ ꓫꓵꓽ ꓫꓵꓽ
ꓪꓳꓽ ꓙꓲꓽ ꓫꓵꓽ ꓫꓵꓽ ꓕꓱ ꓟ ꓗꓪ ꓦꓲꓔꓮꓟꓲꓠ ꓮ ꓟꓬꓹ ꓓꓵˍ ꓡꓳ= ꓦꓲꓔꓮꓟꓲꓠ (ꓮ) ꓥˍꓟꓲ ꓓꓵˍ ꓟ ꓑꓶꓸ ꓓꓴ ꓐꓵꓼ ꓟꓵ ꓠꓻ ꓔꓯ ꓖꓼ ꓓꓳˍ ꓟ ꓗꓪ ꓬꓰ ꓙ ꓖꓶ ꓐ ꓡˍ ꓡꓳ= ꓮꓠꓔꓲꓳꓫꓲꓓꓮꓠꓔ ꓥˍ ꓟꓲ ꓓꓵˍ ꓟ ꓑꓶꓸ ꓓꓴ ꓐꓵꓼ ꓟꓵ ꓐꓰ ꓠꓲꓹ ꓟ ꓫꓵꓽ ꓙꓴꓽ ꓔꓯ ꓥˍ ꓟꓲ ꓢꓯꓼ ꓡꓴꓽ ꓖꓶˍ ꓡꓳ=
- ꓟꓶꓽ ꓛꓲ ꓔꓶꓸ
ꓟꓶꓽ ꓛꓲ ꓔꓶꓸ ꓗꓪ ꓠꓬ ꓑꓳꓔꓮꓢꓢꓲꓴꓟ ꓮ ꓟꓬꓹ ꓓꓵˍ ꓟ ꓡꓰꓽ ꓟꓽ ꓞꓲ꓾ ꓦꓹ ꓓꓴꓽ ꓢꓶ ꓐꓰ ꓐꓯ-ꓣꓲ ꓢꓶꓽ ꓐꓴ ꓡꓰ ꓐꓰ ꓚꓮꓣꓳꓔꓲꓠꓳꓲꓓꓢ ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓟꓬꓽ ꓠꓬꓲ ꓓꓵˍ ꓟ ꓥꓡꓳ= ꓬꓲ ꓢꓯꓼ ꓕꓱ ꓟ ꓮ ꓟꓬꓹ ꓓꓵˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓠꓬ ꓐꓵꓼ ꓟꓵ ꓔꓬꓹ ꓢꓻ ꓚꓱꓹ ꓔꓯ ꓟꓬꓽ ꓠꓬꓲ ꓬꓰ ꓙ ꓔꓳꓹ ꓙ ꓖꓶ ꓐ ꓡˍ ꓡꓳ=
- ꓮ ꓒꓵꓽ ꓢꓶꓽ
ꓛꓵꓼ ꓡꓱ ꓛꓵꓼ ꓢꓴ ꓠꓬ ꓮ ꓒꓵꓽ ꓢꓶꓽ ꓕꓯ ꓟꓽ ꓜꓽ ꓟꓽ ꓓꓻ ꓜꓽ ꓠꓯꓹ ꓟ ꓥ ꓡꓳ= ꓮ ꓒꓵꓽ ꓢꓶꓽ ꓠꓬ ꓐꓵꓼ ꓟꓵ ꓔꓯ ꓢꓯꓼ ꓡꓴꓽ ꓖꓶˍ ꓟ ꓬꓲ ꓢꓯꓼ ꓕꓲ ꓙꓰꓽ ꓔꓯ ꓖꓶˍ ꓟ ꓪꓴꓸ ꓠꓬꓲ ꓥ ꓡꓳ= ꓮ ꓒꓵꓽ ꓢꓶꓽ ꓗꓪ ꓚꓮꓣꓳꓔꓲꓠꓳꓲꓓꓢ ꓢꓯꓼ ꓮ ꓟꓬꓹ ꓓꓵˍ ꓟ ꓥ ꓢꓲ꓾ ꓐꓵꓼ ꓟꓵ ꓟꓬꓱꓽ ꓬꓰ ꓚꓱꓹ ꓔꓯ ꓪ ꓜꓲ ꓢꓯꓼ ꓡꓴꓽ ꓖꓶˍ ꓡꓳ=
- ꓦ ꓓꓴꓽ ꓢꓶ
ꓦ ꓓꓴꓽ ꓢꓶ ꓥˍ ꓟꓲ ꓧꓪꓽ ꓗꓴꓹ ꓙꓲꓻ ꓐꓱ ꓶˍ ꓡꓰꓽ ꓟꓽ ꓞꓲ ꓐꓵꓼ ꓟꓵ ꓐꓱ ꓶ ꓥˍ ꓟꓲ ꓜꓽ ꓖꓶ ꓠꓯꓹ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ= ꓦ ꓓꓴꓽ ꓢꓶ ꓠꓬ ꓐꓵꓼ ꓟꓵ ꓟꓬꓱꓼ ꓬꓰ ꓚꓱꓹ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟ ꓚꓮꓣꓳꓔꓲꓠꓳꓲꓓꓢ ꓮ ꓟꓬꓹ ꓓꓵˍ ꓟ ꓪꓳꓽ ꓒꓬꓽ ꓘꓴꓽ ꓗꓪ ꓕꓲ ꓟ ꓥ ꓡꓳ= ꓦ ꓓꓴꓽ ꓢꓶ ꓐꓰ꓾ ꓦ ꓓꓴꓽ ꓢꓶ ꓡꓰ ꓫꓬꓹ ꓔ ꓟ ꓜꓽ ꓓꓴ ꓔꓯ ꓜꓽ ꓖꓶˍ ꓟ ꓠꓬ ꓐꓵꓼ ꓟꓵ ꓢꓯꓼ ꓐꓽ ꓡˍ ꓟ ꓐꓰ ꓢꓯꓼ ꓦ ꓚꓱꓹ ꓗꓪ ꓳ’ ꓡ ꓟ ꓔꓯ ꓓꓻ ꓡꓰ ꓠꓹ ꓟ ꓬꓰ ꓙ ꓖꓶˍ ꓡꓳ=
- ꓬꓲꓻ ꓙꓬ ꓓꓳꓻˍ ꓟ
ꓐꓵꓼ ꓟꓵ ꓐꓱ ꓶ ꓥˍ ꓟꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓮ ꓡꓲ ꓕꓲ ꓛꓱꓽ ꓐꓱ ꓶ ꓥˍ ꓟꓲ ꓬꓲ ꓓꓳꓼ ꓔꓯ ꓣꓴ ꓦˍ ꓟ ꓗꓪ ꓬꓲꓻ ꓙꓬ ꓠꓬ ꓣꓱꓽ ꓬꓯꓼ ꓓꓰ ꓡꓰˍ ꓟ ꓥ ꓡꓳ= ꓖꓳ ꓓꓱꓽ ꓠꓱ ꓫꓳꓸ ꓟ. ꓗꓪ ꓠꓯꓻ ꓡꓰ ꓛꓬꓽ ꓡꓰ ꓕꓯ ꓬꓲꓻ ꓙꓬ ꓡꓰ ꓞꓲꓽ ꓫꓬ ꓡꓰˍ ꓟ ꓡꓰ ꓐꓰ ꓾ ꓖꓳ ꓓꓱꓽ ꓬꓲ ꓘꓴꓽ ꓠꓯꓸꓼ ꓗꓪ ꓥˍ ꓟꓲ ꓬꓲꓻ ꓙꓬ ꓓꓳꓻ ꓖꓶˍ ꓟ ꓗꓪ ꓐꓰ ꓫꓬꓻ ꓡꓰ ꓝꓲ ꓐ ꓡˍ ꓡꓳ=
ꓝꓮꓲ ꓗ ꓐ ꓡ ꓢꓶ꓾ ꓚꓬꓻ (ꓛꓬꓳꓽ ꓒꓲꓻ)꓾ ꓔ ꓡꓯꓹ ꓢꓶ꓾ ꓬꓲ ꓫꓵꓸ ꓬꓲ ꓠꓲꓹ ꓟ ꓐꓴ꓾ ꓠ-ꓠꓪꓰꓠꓹ꓾ ꓡꓽ ꓫꓪꓸ ꓐꓰ꓾ ꓮꓸ ꓠꓳ ꓬꓲ ꓫꓵꓽ ꓬꓲ ꓙꓰꓽ ꓐꓴ ꓥˍ ꓟꓲ ꓐꓵꓼ ꓟꓵ ꓐꓱ ꓶ ꓙꓲꓻˍ ꓟ ꓜꓽ ꓓꓴ ꓥ ꓡꓳ=
ꓐꓵꓼ ꓟꓵ ꓔꓬꓹ ꓢꓻ ꓠꓹ ꓟ ꓐꓱ ꓶ ꓠꓬ ꓫꓬꓹ ꓟ ꓟꓲꓽ ꓦꓲ ꓔꓯ ꓦ ꓖꓶˍ ꓟ꓾ ꓛꓵꓼ ꓡꓱ ꓛꓵꓼˍ ꓟ ꓗꓪ ꓐꓰ ꓠꓽ ꓗꓷˍ ꓟ꓾ ꓝꓮꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻˍ ꓟ ꓜꓽ ꓫꓵꓽ ꓜꓽ ꓙꓰꓽ ꓜꓽ ꓖꓶˍ ꓟ꓾ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓠ ꓔꓬ ꓟ꓾ ꓬꓲꓻ ꓙꓬ ꓮ ꓟꓬꓹ ꓓꓳꓻ ꓖꓶˍ ꓠꓬ ꓐꓵꓼ ꓟꓵ ꓐꓱ ꓶ ꓮ ꓘꓶꓸ ꓙꓲꓻˍ ꓟ ꓥ ꓡꓳ=
