ꓬꓲꓻ ꓞꓻ ꓓꓳꓻ ꓖꓶˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ
ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓔꓯ ꓐꓯ ꓟ. ꓖꓶˍ ꓟ ꓙꓵ, ꓛꓲ ꓡ ꓠꓬꓲ꓾ ꓬꓲꓻ ꓞꓻ ꓓꓳꓻˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓐꓯ ꓖꓶ ꓩꓴ ꓡˍ ꓥꓳ꓿
ꓬꓲꓻ ꓞꓻ ꓠꓬ ꓬꓲꓻ ꓙꓬ ꓔꓯ ꓚꓺ ꓞꓻ ꓔ ꓟ ꓥ ꓢꓲ ꓠꓬꓲ꓾ ꓬꓲ. ꓧꓪ ꓟꓽ ꓙꓳ꓾ ꓛꓵˍ ꓟ ꓘꓪꓽˍ ꓟ ꓕꓱ ꓡꓱ ꓫꓵꓽ ꓟꓽ ꓙꓳ ꓟ ꓪꓴ. ꓠꓬꓲ꓾ ꓬꓲꓻ ꓞꓻ ꓕꓱ ꓟ ꓗꓪ ꓠꓬ ꓣꓳꓽ ꓐꓱ ꓶ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓰ ꓓꓵꓽ ꓙ ꓟꓶ ꓓꓴ ꓥꓳ꓿ ꓖꓳ ꓡꓱ ꓥˍ ꓟꓲ ꓕꓱ ꓡꓱ ꓬꓲ ꓧꓪ ꓟꓽ ꓙꓳ ꓟ꓾ ꓛꓵˍ ꓟ ꓘꓪꓽˍ ꓟ ꓟꓽ ꓙꓳ ꓟ ꓬꓲꓻ ꓞꓻ ꓗꓪ ꓥˍ ꓟꓲ ꓣꓳꓽ ꓐꓱ ꓶ ꓙꓲꓻ ꓖꓴ ꓬꓲ ꓓꓽ ꓟ ꓙꓳˍ ꓡꓳ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓠꓬꓲ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓯ ꓕꓯ
- ꓠꓻ ꓘꓴ ꓟꓽ ꓐ ꓟ꓾ ꓠꓻ ꓐꓰ ꓛꓵꓽˍ ꓟ ꓔꓯ ꓓꓻ ꓡꓰ ꓝꓲˍ ꓟ
ꓬꓲꓻ ꓞꓻ ꓞꓻ ꓞꓻˍ ꓗꓪ ꓐꓰ ꓓꓳꓻ ꓡˍ ꓟ ꓬꓲꓻ ꓟꓴꓽ ꓘꓴꓽ ꓗꓪ ꓠꓻ ꓘꓴ ꓟꓽ ꓐ ꓟ꓾ ꓠꓻ ꓐꓰ ꓛꓵꓽ ꓡꓰ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿
- ꓦꓰꓼ ꓟ ꓙꓲꓺ ꓢꓻˍ ꓟ
ꓬꓲꓻ ꓞꓻ ꓓꓳꓻˍ ꓟ ꓠꓬ ꓦꓰꓼ ꓟ ꓬꓲ ꓪꓴꓻ ꓚꓱ, ꓟꓬꓱꓽ ꓬꓰˍ ꓟ ꓔꓯ ꓬꓰ ꓙ ꓔꓳ, ꓙ ꓖꓶˍ ꓡꓳ꓿ ꓦꓰꓼ ꓟ ꓬꓲ ꓪꓴꓻ ꓚꓱ, ꓗꓪ ꓬꓲꓻ ꓙꓬ ꓢꓯꓼ ꓡꓴꓽ ꓖꓶˍ ꓟ ꓡꓰꓽ ꓟꓽ ꓞꓲꓺ ꓟꓽ ꓫꓬꓻ ꓟ ꓔꓯ ꓓꓳꓻ ꓡꓰ ꓝꓲ ꓠ, ꓟˍ ꓟꓲ ꓬꓰ ꓙ ꓖꓶˍ ꓡꓳ꓿ ꓜꓽ ꓧꓳꓽ ꓔ ꓟ ꓔꓯ ꓢꓻ ꓢꓻ ꓡꓰꓽ ꓙꓲꓺ ꓖꓶˍ ꓡꓳ꓿
- ꓬꓲ ꓐꓽ ꓗꓪ ꓙꓰ ꓟꓽ ꓓꓻ ꓟ꓾ ꓦꓲ ꓫꓳ. ꓟ. ꓗꓪ ꓓꓳꓻ ꓟꓽ ꓐ ꓡ ꓟ ꓔꓯ ꓓꓻ ꓡꓰ ꓝꓲˍ ꓟ
ꓬꓲꓻ ꓞꓻ ꓓꓳꓻ ꓗꓷˍ ꓕꓯ ꓬꓲꓻ ꓪꓴꓻ ꓚꓱ, ꓔꓯ ꓝꓶ.ˍ ꓟ ꓢꓯꓼ ꓒꓬꓱꓼ ꓡ ꓝꓲˍ ꓡꓳ꓿ ꓖꓳ ꓕꓯ ꓬꓲ ꓪꓴꓻ ꓚꓱ, ꓘꓴꓽ ꓗꓪ ꓛꓵꓽ ꓓ,ˍ ꓟ ꓟꓽ ꓫꓬ, ꓟ ꓔꓯ ꓓꓳꓻ ꓡ ꓝꓲˍ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓠꓯꓼ ꓠꓯꓼ ꓔꓴ ꓡ ꓕꓯ ꓬꓲꓻ ꓞꓻ ꓕꓲ ꓗꓶ. ꓔꓯ ꓧꓶ. ꓕꓯ ꓓꓳꓻ ꓖꓶ ꓠ ꓗ, ꓡꓳ꓾ ꓐꓰ ꓠꓯꓻ ꓞꓲꓼ ꓟ. ꓒ ꓐꓴ ꓡꓰ ꓕꓵꓼ ꓪ ꓖꓶ ꓔ ꓡꓳ꓿
- ꓬꓲꓻ ꓙꓬ ꓢꓯꓼ ꓐꓲ ꓡꓰ ꓝꓲˍ ꓟ
ꓬꓲꓻ ꓞꓻ ꓔꓯ ꓓꓳꓻˍ ꓥ ꓟꓲ꓾ ꓬꓲꓻ ꓛꓵꓼ ꓔꓯ ꓓꓳꓻˍ ꓥ ꓟꓲ ꓬꓲꓻ ꓙꓬ ꓠꓬ ꓬꓲꓻ ꓙꓬ ꓡꓰꓽ ꓥ ꓟ ꓪꓴ. ꓠꓬꓲ꓾ ꓖꓳ ꓓꓱꓽ ꓠꓯꓸꓼ ꓗꓪ ꓬꓲꓻ ꓙꓬ ꓢꓯꓼ ꓔꓯ ꓡꓴꓽ ꓖꓶˍ ꓡꓳ꓿ ꓙꓬꓻ ꓝꓲ. ꓗꓪ ꓬꓲꓻ ꓛꓵꓼ ꓮ ꓟꓬ, ꓓꓳꓻ ꓟꓽ ꓑꓶ. ꓕꓯ ꓠꓬ ꓬꓲꓻ ꓞꓻ ꓓꓳꓻˍ ꓟ ꓠꓬ ꓣꓳꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓐꓲ ꓡꓰ ꓠ, ꓟ ꓬꓰ ꓙ ꓔꓳ, ꓙ ꓖꓶˍ ꓟ ꓥ ꓡꓳ꓿
- ꓙꓬˍ ꓟ ꓔꓯ ꓓꓻ ꓡꓰ ꓝꓲˍ ꓟ
ꓙꓬ ꓡˍ ꓕꓯ ꓖꓳ ꓓꓱꓽ ꓛꓱꓽ ꓛꓱꓽ ꓡˍ ꓟ ꓠꓬ ꓣꓳ ꓖꓳ ꓓꓱꓽ ꓠꓬ ꓞꓻ ꓢꓯꓼ ꓔꓯ ꓔꓲ ꓟꓴ ꓗꓷ ꓡꓰ ꓝꓲ ꓠ, ꓟ ꓐꓱ ꓶ ꓟꓮꓰꓚꓡꓰ ꓐꓴ ꓔꓯ ꓛꓱꓽ ꓛꓱꓽ ꓝꓲˍ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓖꓳ ꓡꓱ ꓙꓬ ꓢꓲ ꓛꓱꓽ ꓔꓬ ꓕꓯ ꓬꓲꓻ ꓞꓻ ꓓꓳꓻ ꓖꓶˍ ꓠꓬ ꓖꓳ ꓓꓱꓽ ꓔꓯ ꓡꓱꓻ ꓡꓰ ꓝꓲ ꓢꓲ꓾ ꓙꓬˍ ꓟ ꓔꓯ ꓥˍ ꓟꓲ ꓫꓳ ꓡꓰ ꓝꓲˍˍ ꓟ ꓥ ꓡꓳ꓿
- ꓫꓵꓽ ꓬꓲꓻ ꓚꓳꓻˍ ꓟ ꓔꓯ ꓔꓳ, ꓙ ꓖꓶˍ ꓟ
ꓬꓲꓻ ꓞꓻ ꓐꓰ ꓖꓳ ꓓꓱꓽ ꓞꓲꓽˍ ꓟ ꓠꓬ ꓫꓵꓽ ꓙꓴꓽ ꓐꓴ ꓔꓯ ꓪꓴꓽ ꓡ ꓝꓲ ꓢꓲ꓾ ꓫꓵꓽ ꓔꓯ ꓖꓳ ꓓꓱꓽ ꓗꓪ ꓬꓲꓻ ꓚꓳꓻ ꓝꓲˍ ꓡꓳ꓿ ꓬꓲꓻ ꓞꓻ ꓓꓳꓻ ꓖꓶˍ ꓟˍ ꓟꓲ ꓕꓱ ꓡꓱ ꓫꓵꓽ ꓙꓲꓻ ꓖꓴ ꓟꓶ ꓓ,ˍ ꓡꓳ꓿ ꓫꓵꓽ ꓬꓲꓻ ꓚꓳꓻˍ ꓟ ꓧ ꓡˍ ꓕꓯ꓾ ꓫꓵꓽ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲ ꓢꓲ ꓠꓲ, ꓟ ꓠꓻ ꓒꓬꓱꓼ ꓡ ꓚꓱ, ꓔꓯ ꓥˍ ꓟꓲ ꓠꓲ. ꓡꓰ ꓝꓲˍ ꓡꓳ꓿ ꓟꓶꓽ ꓘꓶꓼ ꓙꓵ, ꓕꓯ ꓬꓲꓻ ꓞꓻ ꓬꓲꓻ ꓡꓱꓻ ꓐꓰ ꓖꓳ ꓓꓱꓽ ꓞꓲꓽ ꓖꓶˍ ꓟ ꓐꓰ ꓬꓲꓻ ꓞꓻ ꓓꓳꓻ ꓖꓶˍ ꓟ ꓠꓬ ꓣꓳ ꓖꓳ ꓓꓱꓽ ꓔꓯ ꓡꓳꓻ ꓡꓳꓻ ꓡꓰꓽ ꓗꓷ ꓡꓰ ꓝꓲ ꓢꓲ꓾ ꓬꓲꓼ ꓟꓶ ꓢꓻ ꓡꓰ ꓝꓲˍ ꓡꓳ꓿
- ꓠꓲ, ꓟ ꓘꓶꓻ ꓡꓶˍ ꓟ ꓔꓯ ꓓꓻ ꓡꓰ ꓝꓲˍ ꓟ
ꓬꓲꓻ ꓞꓻ ꓓꓳꓻˍ ꓟ ꓠꓬ ꓖꓳ ꓓꓱꓽ ꓗꓪ ꓮ‐ꓬꓳꓠ‐ꓚꓬꓮꓪ ꓙꓴꓽ ꓔꓯ ꓡꓵ, ꓫꓴ ꓖꓶˍ ꓡꓳ꓿ ꓬꓲꓻ ꓞꓻ ꓓꓳꓻ ꓗꓷ ꓕꓯ ꓠꓬ ꓠꓲ, ꓟ ꓘꓶꓻ ꓡꓶˍ ꓟ ꓠꓲ. ꓡꓰˍ ꓡꓳ꓿ ꓠꓲ, ꓟ ꓔꓯ ꓥ ꓟꓲ ꓢꓲ ꓡꓲ ꓗꓷ ꓡꓰ ꓝꓲˍ ꓡꓳ꓿ ꓐꓰ ꓢꓷ. ꓪ ꓡꓳ꓿
ꓥꓪ ꓚꓲ. ꓛꓬ ꓥˍ ꓟꓲ ꓟꓬꓱꓽ ꓮ ꓘꓶ. ꓟꓬꓽˍ ꓟ ꓪꓴ. ꓠꓬꓲ ꓓꓵꓽ ꓙꓽ ꓪꓴꓽ ꓧꓶ ꓡ ꓕꓯ꓾ ꓠꓲ, ꓟ ꓘꓶꓻ ꓡꓶ ꓡ ꓕꓯ ꓬꓲꓻ ꓞꓻ ꓔꓯ ꓮ ꓕꓯ ꓟꓲ ꓓꓳꓻ ꓖꓶˍ ꓡꓳ꓿ ꓓꓳꓻ ꓗꓷ ꓗ ꓠꓯ. ꓠꓲ, ꓟ ꓢꓲ ꓡꓲ ꓗꓷ ꓡꓰ ꓢꓲ ꓟꓬꓱꓽ ꓔꓯ ꓝ. ꓢꓲ ꓬꓰ ꓐ ꓡˍ ꓡꓳ꓾ ꓐꓯ ꓟ ꓔꓯ ꓥꓪ ꓚꓲ. ꓛꓬ ꓡꓰ ꓢꓷ. ꓙ ꓟꓳ ꓙ ꓠꓲ, ꓫꓵˍ ꓡꓳ꓿
- ꓬꓲ ꓓꓳꓼ ꓐꓴ ꓔꓯ ꓠꓲ. ꓡꓰ ꓝꓲˍ ꓡꓳ꓾
ꓬꓲꓻ ꓞꓻ ꓓꓳ ꓗꓷ ꓠꓬ ꓖꓳ ꓓꓱꓽ ꓡꓱꓻ ꓡˍ ꓡꓳ꓿ ꓚꓵ. ꓬꓲꓻ ꓥˍ ꓟꓲ ꓓꓳ ꓡˍ ꓡꓳ꓿ ꓖꓳ ꓡꓱ ꓚꓵ. ꓬꓲꓻ ꓓꓳˍ ꓟ ꓗꓪ ꓐꓰ ꓖꓳ ꓓꓱꓽ ꓠꓯꓸꓼ ꓗꓪ ꓓꓵˍ ꓟ ꓬꓲ ꓓꓳꓼ ꓐꓰ ꓟꓽ ꓫꓬꓻ ꓟ ꓠꓬ ꓚꓵ. ꓬꓲꓻ ꓐꓰ ꓕꓲ ꓛꓳˍ ꓓꓳ ꓡˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓪꓳꓽ ꓓꓲꓻ ꓗꓪ ꓐꓰ ꓬꓲ ꓓꓳꓼ ꓣꓴ ꓓꓳˍ ꓟ ꓗꓪˍ ꓟꓲ ꓬꓰ ꓙ ꓖꓶˍ ꓡꓳ꓿
