ꓡ ꓞꓳ ꓕꓲ ꓣꓳ ꓟ ꓟꓬꓱꓺ ꓐꓯ ꓟ ꓮ ꓘꓶꓸ ꓬꓳꓸ ꓚꓰꓽˍ ꓡꓳ= ꓟꓬꓱꓺ ꓐꓯ ꓟ ꓠꓬ ꓬꓲ ꓮ ꓡꓲ ꓫꓵꓽ ꓡꓽ ꓞꓳ ꓥ꓾ ꓬꓲ ꓮꓽ ꓟ ꓥ꓾ ꓮ ꓫꓵꓽ ꓡꓽ ꓞꓳ ꓥ꓾ ꓐꓯ ꓟ ꓢꓲꓽ ꓢꓲꓽ ꓡꓰꓽ ꓢꓷꓸ ꓓꓹ ꓡꓳ= ꓖꓳ ꓡꓱ ꓠꓬꓲ ꓡ ꓞꓳ ꓕꓲ ꓣꓳ ꓬꓲ ꓟꓬꓱꓺ ꓐꓯ ꓟꓳꓸ ꓖꓶ ꓡˍ ꓕꓯ꓾ ꓣꓳ ꓠꓬ ꓬꓲ ꓟꓬꓱꓺ ꓮ ꓡꓲ ꓥ ꓐꓯ ꓟ ꓢꓷꓸ ꓡꓰˍ ꓟ ꓡꓰꓽ ꓟꓽ ꓞꓲꓺ ꓬꓲ ꓐꓰ ꓗꓴꓸ ꓙꓲꓽ ꓙꓳ ꓠꓹ ꓟ꓾ ꓬꓲ ꓐꓰ ꓫꓸ ꓕꓱ ꓠꓹ ꓟ ꓙꓵꓽ ꓪ ꓟꓶ ꓡꓰˍ ꓡꓳ= ꓬꓲ ꓟꓬꓱꓺ ꓘꓴꓻˍ ꓟ ꓠꓬ ꓙꓲꓻˍ ꓟ ꓕꓲ ꓫꓵꓽ ꓥ ꓡꓳ= ꓕꓱ ꓟˍ ꓡꓰ ꓐꓰ ꓡ ꓞꓳ ꓕꓲ ꓣꓳ ꓠꓬ ꓬꓲ ꓟꓬꓱꓺ ꓔꓯ ꓐꓯ ꓟꓳꓸ ꓖꓶ ꓡˍ ꓕꓯ꓾ ꓖꓳ ꓟ ꓠꓬ ꓬ ꓐꓯ ꓟꓳꓸ ꓖꓶ ꓢꓴ ꓖꓳ ꓕꓲ ꓣꓳ ꓐꓰ ꓫꓸ ꓕꓱ ꓡꓯ ꓘꓳ ꓐ ꓡˍ ꓡꓳ꓾ ꓐꓯ ꓟ ꓬꓲꓸ ꓟꓸ ꓟꓲꓽ ꓥ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓓꓳ ꓙꓰ ꓕꓳꓽ ꓶ ꓗꓪ ꓪꓴ-ꓢ ꓠꓬ ꓬꓲ ꓟꓬꓱꓺ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓬꓲ ꓟꓬꓱꓺ ꓠꓬ ” I am who I am” ꓐꓯˍ ꓟ ꓡꓰ ꓐꓰ “ꓥꓪ ꓠꓬ ꓥꓪ ꓥ ꓡꓳ” ꓐꓯˍ ꓟ ꓬꓲ ꓟꓬꓱꓺ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓣꓳ ꓪꓴꓸ ꓠꓷꓸ ꓗꓪ ꓐꓰ ꓓꓵꓽ ꓙꓽ ꓑꓰ ꓓꓵꓽ ꓙꓽ ꓛꓲꓺ ꓟꓽ ꓓꓻ ꓟ ꓡꓰ ꓐꓰ ꓬꓲ ꓠꓬ ꓬꓲ ꓟꓬꓱꓺ ꓥˍ ꓟꓲ ꓓꓵꓽ ꓙꓽ ꓑꓰ ꓓꓵꓽ ꓙꓽ ꓛꓲꓺ ꓟꓽ ꓓꓻ= ꓫꓬꓽ ꓫꓬꓽ ꓡꓰꓽ ꓣꓳ ꓬꓲ ꓔꓯ ꓢꓷꓸ ꓟꓽ ꓓꓻ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓬꓲ ꓮꓽ ꓟ ꓥˍ ꓐꓯ ꓟ ꓬꓲ ꓟꓬꓱꓺ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓟꓬꓱꓺ ꓐꓯ ꓟ ꓠꓬ ꓬꓲ ꓥ ꓡꓳ ꓐꓯ ꓟ ꓡꓰ ꓐꓰ ꓬꓲ ꓔꓯ ꓠꓬ ꓮ ꓟꓰ ꓕꓯ ꓟꓽ ꓙꓳ꓿ ꓠꓬꓲ. ꓠꓬꓲ ꓟꓽ ꓙꓳ꓾ ꓢ. ꓠꓯ ꓟꓽ ꓙꓳ꓿ ꓬꓲ ꓙꓵ, ꓠꓬ ꓬꓲ ꓔꓯ ꓟꓽ ꓞꓳ, ꓓ,꓿ ꓬꓲ ꓠꓬ ꓮ ꓕꓯ ꓟꓲ ꓢꓯ. ꓔꓬ ꓮ ꓕꓯ ꓟꓲ ꓢꓯꓼ ꓪ ꓙꓳ ꓢꓴ ꓥ ꓡꓳ꓾ ꓐꓯ ꓟ ꓣꓳ ꓢꓷ. ꓪ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓟꓬꓱꓺ ꓔꓯ ꓐꓯ ꓟꓳ. ꓖꓶ ꓠꓲ, ꓫꓵˍ ꓟ ꓑꓶ. ꓓꓴ ꓣꓳ ꓟꓲ ꓠꓯ ꓞꓳ ꓤ ꓠꓬ ꓬꓲ ꓔꓯ ꓢꓷ. ꓡꓰ ꓠ, ꓟ꓾ ꓬꓲ ꓮꓽ ꓟ ꓥ ꓡ ꓐꓯˍ ꓟ ꓣꓳ ꓔꓯ ꓕꓲ ꓧꓶ. ꓕꓲ ꓡꓯ ꓢꓷ. ꓡꓰ ꓠ, ꓟ ꓐꓱ ꓶ꓾ ꓝꓮꓲ ꓬꓲ ꓔꓯ ꓣꓳ ꓫ. ꓕꓱ ꓠ, ꓟ ꓐꓱ ꓶ ꓬꓲ ꓠꓬ ꓠꓲ, ꓡꓶ ꓙꓳˍ ꓡꓳ ꓐꓯ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓡ ꓞꓳ ꓕꓲ ꓣꓳ ꓟ ꓬꓲ ꓟꓬꓱ ꓔꓯ ꓟꓽ ꓐꓯ ꓟꓳ. ꓖꓶ ꓕꓯ ꓮ ꓡꓲ ꓥ ꓟꓲ ꓣꓳ ꓬꓲ ꓔꓯ ꓢꓷ. ꓟꓽ ꓓꓻ꓿ ꓕꓱ ꓟˍ ꓡꓰ ꓐꓰ ꓪꓴ‐ꓢ ꓠꓬ ꓬꓲ ꓟꓬꓱ ꓔꓯ ꓟꓽ ꓐꓯ ꓟ. ꓖꓶ ꓖꓶ ꓞꓳ ꓤ ꓠꓬ ꓬꓲ ꓔꓯ ꓢꓷ. ꓟꓽ ꓓꓻ ꓟ ꓡꓰ ꓐꓰ ꓬꓲ ꓔꓯ ꓣꓳ ꓮ ꓡꓲ ꓥˍ ꓟꓲ ꓙꓻ ꓡꓯ ꓘꓳ ꓟꓶ ꓟꓽ ꓓꓻ꓿ ꓕꓱ ꓟ ꓠꓬ ꓠꓯ. ꓟ ꓚꓵ ꓘꓶꓽ ꓥ ꓡꓳ꓿ ꓬꓲ ꓠꓬ ꓟꓲ ꓠꓯ ꓞꓳ ꓤ ꓔꓯ ꓚꓰꓼ ꓔ ꓟ ꓡꓰꓽ ꓟꓽ ꓞꓲꓺ ꓬꓲ ꓮꓽ ꓟ ꓥ꓾ ꓬꓲ ꓮ ꓡꓲ ꓫꓵꓽ ꓥ ꓐꓯ ꓟ ꓬꓲ ꓣꓳꓽ ꓔꓯ ꓐꓯ ꓟꓳ. ꓖꓶ ꓡ ꓟ ꓗꓪ ꓐꓰ꓾ ꓣꓳ ꓠꓬ ꓬꓲ ꓮꓽ ꓟ ꓥ ꓡ꓾ ꓮ ꓡꓲ ꓫꓵꓽ ꓪꓴ‐ꓢ ꓥ ꓡ꓾ ꓮ ꓡꓲ ꓠꓲ, ꓡꓶ ꓙꓳˍ ꓡ ꓐꓯ ꓟ ꓬꓲ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓬꓲ ꓠꓬ ꓬꓲ ꓟꓬꓱ ꓔꓯ ꓟꓳ‐ꓫꓲ ꓔꓯ ꓐꓯ ꓟꓳ. ꓖꓶˍ ꓕꓯ “ꓥꓪ ꓠꓬ ꓥꓪ ꓥ ꓡꓳ꓿ ꓠꓴ ꓪ ꓮ ꓒꓵꓽ ꓮ ꓑ ꓮ‐ꓐ‐ꓡ꓾ ꓬ‐ꓗꓴ ꓐꓴ ꓬꓲ ꓪꓴ‐ꓢ ꓥ ꓡꓳ꓾” ꓐꓰ ꓬꓲ ꓐꓯ ꓡꓳ꓿ ꓕꓲ ꓚꓱ, ꓐꓯ ꓥꓳ ꓐꓯ ꓠꓬ꓾ ꓞꓳ ꓤ ꓠꓬ ꓫꓵꓳ꓿ ꓖꓳ ꓡꓱ ꓐꓯ ꓥ ꓠꓬ ꓬꓲ ꓠꓬ ꓕꓲ ꓝ. ꓑꓶ. ꓕꓲ ꓝ. ꓢꓯ. ꓔꓬ ꓟ꓾ ꓫꓵꓻ ꓟꓽ ꓓꓻ ꓟ ꓪꓴ‐ꓢ ꓥ ꓡꓳ꓿ ꓝꓮꓲ ꓠꓵꓻ ꓠꓲ, ꓮ ꓘꓶ. ꓪꓴꓽˍ ꓟ ꓪꓴ‐ꓢ ꓥ ꓡꓳ ꓐꓯ ꓟ ꓬꓲ ꓐꓯ ꓟꓳ. ꓖꓶ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓟꓬꓱꓺ ꓖꓳ ꓟ ꓬꓲ ꓗ ꓠꓯ. ꓢꓲ ꓗꓪ ꓬꓲ ꓲꓓꓰꓠꓔꓲꓔꓬ ꓐꓯˍ ꓟ ꓬꓲ ꓮ ꓡꓲ ꓫꓵꓽ ꓥ ꓡ ꓐꓯ ꓟ ꓣꓳ ꓢꓷ.ˍ ꓟ ꓡꓰ ꓐꓰ꓾ ꓪꓴ‐ꓢ ꓠꓬ ꓮ ꓡꓲ ꓫꓵꓽ ꓪꓴ‐ꓢ ꓥ ꓡ ꓐꓯ ꓟ ꓣꓳ ꓢꓷ. ꓡꓰꓳ꓿ ꓪꓴ‐ꓢ ꓠꓬ ꓬꓲ ꓟꓬꓱ ꓔꓯ ꓠꓲ, ꓪꓴꓽ ꓪꓴꓽ ꓡꓰꓽ ꓐꓯ ꓟ. ꓖꓶ ꓡˍ ꓟ ꓑꓶ. ꓓꓴ ꓣꓳ ꓠꓬ ꓬꓲ ꓔꓯ ꓢꓷ. ꓪ ꓡꓰꓳ꓿ ꓬꓲ ꓔꓯ ꓙꓵꓻ ꓪ ꓡꓰꓳ꓿ ꓕꓱ ꓟ ꓠꓬ ꓪꓴ‐ꓢ ꓣꓱꓽ ꓛꓰꓽ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲꓽ ꓠꓽ ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓙꓵꓻ ꓔꓬ ꓟ “ꓥꓪ ꓙꓵꓻˍ ꓡꓳ” ꓐꓯ ꓟ ꓗꓪ ꓪꓴ‐ꓢ ꓠꓬ ꓬꓲ ꓟꓬꓱ ꓔꓯ ꓞꓳ ꓤ ꓢꓷ. ꓡꓰ ꓠ, ꓟ ꓐꓱ ꓶ ꓐꓯ ꓟꓳ. ꓖꓶ ꓗꓷꓳ꓾ ꓐꓯ ꓟ ꓔꓯ ꓣꓳ ꓠ ꓠ, ꓗꓷ ꓟ ꓥ ꓡꓳ꓿ ꓡꓯꓼ ꓫꓵ ꓕꓲ ꓠꓽ ꓗꓪ ꓠꓬ ꓪꓴ‐ꓢ ꓠꓬ ꓬꓲ ꓟꓳ. ꓖꓶˍ ꓟ ꓑꓶ. ꓓꓴ ꓞꓳ ꓤ ꓠꓬ ꓬꓲ ꓟꓽ ꓐꓲ ꓜꓲꓼ ꓟ ꓬꓲ ꓢꓷ. ꓡꓰꓳ ꓐꓯ ꓟ ꓔꓯ ꓠ ꓠ, ꓓꓴ ꓬꓰ ꓡꓯ꓿
