Synod ꓖꓪ ꓙꓱ ꓜꓲꓼ ꓓꓴ ꓗꓪ ꓟꓬꓱꓽ ꓬꓰ ꓢꓴ ꓜꓴꓻ (10) ꓜꓴꓻ ꓒꓴ ꓔ ꓟ ꓥ ꓡꓳ꓿ ꓬꓲ ꓪ ꓜꓴꓻ ꓠꓬ ꓔꓱ, ꓔꓱ, ꓐꓰ ꓬꓲ ꓪ ꓡꓳ. ꓟꓳˍ ꓟ ꓔꓯ ꓕꓳ ꓶ ꓐꓳ ꓠ, ꓟ ꓐꓰ ꓔꓲꓺ ꓒ ꓪ ꓔꓲ ꓡꓰ (Theological) ꓪꓴ‐ꓢ ꓚꓱ, ꓢꓷ. ꓠꓲ, ꓚꓱ, ꓔꓯ ꓟꓳ. ꓫꓵꓽ ꓪꓴ ꓮ ꓙꓵꓽ ꓙꓳˍ ꓡ? ꓝꓮꓲ ꓮ ꓟꓶ ꓟ ꓙꓵ, ꓗꓪ ꓮ ꓡꓰ ꓐꓰ ꓒꓬꓱꓼ ꓔꓬ ꓟ ꓚꓱ, ꓔꓯ ꓡꓳ. ꓟꓳˍ ꓟ ꓚꓱ, ꓮ ꓙꓵꓽ ꓔꓯ ꓕꓳ ꓶ ꓐꓳ ꓠ, ꓟ ꓔꓯ (16) ꓧꓪ, ꓬꓰ ꓗꓷ ꓟ  ꓡ ꓞꓳ ꓮ ꓙꓵꓽ ꓜꓲꓼˍ ꓟ ꓖꓪꓙꓱ ꓜꓲꓼ ꓓꓴ ꓗꓪ ꓐꓯ ꓗꓷꓳ꓾ ꓐꓰ ꓔꓲꓺ ꓒ ꓓꓽ Cardinal Mario Grech ꓡꓰ ꓐꓯ ꓗꓷ ꓟ ꓥ ꓡꓳ꓿

ꓬꓲ ꓡꓰ ꓐꓯ ꓔ ꓟ ꓠꓬ ꓔꓲꓺ ꓒ ꓪ ꓔꓲ ꓡꓰ ꓢꓲ‐ꓠꓳ ꓖꓪ ꓙꓱ ꓜꓲꓼ ꓓꓴ ꓗꓪ ꓔ ꓡ ꓢꓴ ꓐꓴ ꓔꓲꓺ ꓒ ꓓꓽ ꓐꓴ ꓔꓯ ꓢꓲ‐ꓠꓳ ꓠꓬ ꓣꓳ ꓮ ꓙꓵꓽ ꓢꓴ ꓐꓰ ꓶꓻ ꓤ ꓗꓪ ꓟꓽ ꓙꓳ ꓟ ꓥ ꓡꓳ꓿ ꓣꓳ ꓒ ꓕꓲ ꓗꓪ ꓙꓳˍ ꓟ ꓕꓲ ꓫꓵꓽ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓕꓯꓽ ꓢꓲ ꓗꓪ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓟꓬꓱꓽ ꓬꓰ ꓔ ꓟ ꓮ ꓙꓵꓽ ꓠꓬ꓾ ꓢꓲ‐ꓠꓳ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓦꓵꓻ ꓜꓽˍ ꓟ꓾ ꓝꓮꓲ ꓘꓳ, ꓣꓴ ꓠ, ꓟ ꓟꓬꓱꓽ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓔꓲꓺꓒ ꓪ ꓔꓲ ꓡꓰ ꓣꓳ ꓮ ꓙꓵꓽ ꓔꓯ ꓟꓬꓱꓽ ꓬꓰ ꓠ, ꓟ ꓢꓲ‐ꓠꓳ ꓗꓪ ꓟꓬꓱꓽ ꓬꓰ ꓠ, ꓟ ꓢꓲ ꓔ ꓢꓴ ꓜꓴꓻ ꓮ ꓙꓵꓽ ꓔꓯ ꓥ ꓟꓲ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓔꓯ ꓬꓰ ꓠ, ꓟ ꓐꓯ ꓔ ꓡꓳ꓾ ꓐꓰ ꓐꓯ ꓖꓶ ꓔ ꓡꓳ꓿

ꓟꓬꓱ ꓬꓰ ꓠ, ꓟ ꓢꓲ ꓔ ꓟ ꓜꓴꓻ ꓮ ꓙꓵꓽ ꓔꓯ ꓙꓲꓻ ꓖꓴ ꓙꓳˍ ꓟ ꓜꓴꓻ ꓒꓬꓱꓼ ꓡ ꓠ, ꓟ ꓢꓷ. ꓠꓲ, ꓚꓴꓽ ꓬꓲ, ꓖꓶ ꓗꓷꓳ ꓐꓰ ꓐꓯ ꓔ ꓡꓳ꓿

ꓕꓱ ꓜꓴꓻ ꓮ ꓙꓵꓽ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓠꓬ ꓡ ꓞꓳ ꓐꓴ ꓗꓳ ꓡꓳ ꓗꓪ ꓪꓴ‐ꓢ ꓔꓯ ꓓꓵꓽ ꓡ ꓠ, ꓟ ꓟꓬꓱꓽ ꓬꓰ ꓢꓴ ꓐꓴ ꓥ ꓡꓳ꓿ ꓕꓱ ꓟ ꓬꓲ ꓔꓶꓻ ꓐꓬꓱꓽ ꓠꓬ ꓟꓬꓱꓽ ꓬꓰ ꓢꓴ ꓜꓴꓻ (10) ꓜꓴꓻ ꓠꓯꓸꓼ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓝꓮꓲ (Canonist Commission) ꓘꓴ ꓜꓲꓼ ꓞꓳ ꓙꓵꓽ ꓗ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓛꓲ ꓡ ꓟ 2025 ꓘꓳꓼ 6 ꓦ ꓗꓪ ꓛꓲ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿

ꓬꓲ ꓪ ꓜꓴꓻ ꓗꓪ ꓐꓰ ꓟꓬꓱꓽ ꓬꓰ ꓔ ꓟ ꓧꓪ ꓔ ꓟ ꓮ ꓙꓵꓽ ꓔꓯ ꓢꓷ. ꓡꓰ ꓠ, ꓟ ꓢꓯꓼ ꓕꓵꓼ ꓢꓲ ꓠꓬꓲ ꓐꓯ ꓟ. ꓖꓶ ꓠ, ꓟ ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓔꓲꓺ ꓒ ꓔꓲꓺ ꓟ꓾ ꓟ. ꓒ ꓟ. ꓟ ꓐꓴ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓥ ꓟꓲ ꓚꓲ. ꓛꓬ ꓓꓵꓽ ꓙꓽ ꓚꓱ, ꓗꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓙꓲ ꓟ ꓕꓲ ꓒꓳ, ꓗꓪ ꓪꓴꓽ ꓟꓴ ꓡ ꓠ, ꓟ ꓢꓷ. ꓠꓲ, ꓚꓴꓽ ꓬꓲ, ꓖꓶ ꓠ, ꓟ ꓐꓯ ꓔ ꓡꓳ꓿

ꓢꓲ‐ꓠꓳ ꓖꓪ ꓙꓱ ꓜꓲꓼ ꓓꓴ ꓗꓪ ꓧꓳꓽ ꓪꓴ. ꓟꓴ ꓢꓴ ꓐꓴ ꓠꓬ ꓔꓲꓺ ꓒ ꓪ ꓔꓲ ꓔꓯ ꓬꓲ ꓪ ꓮ ꓡꓰ ꓐꓰ ꓡꓳ. ꓟꓳˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓙꓳˍ ꓡꓳ꓿ ꓜꓴꓻ ꓗꓪ ꓟꓬꓱꓽ ꓬꓰ ꓔ ꓟ ꓮ ꓙꓵꓽ ꓔꓯ ꓟꓵꓽ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓷ. ꓠꓲ, ꓚꓴꓽ ꓬꓲ, ꓖꓶ ꓔ ꓟ ꓚꓱ, ꓔꓯ ꓚꓱ, ꓮ ꓙꓵꓽ ꓔꓯ ꓣꓴ ꓔ ꓫ ꓔ ꓢꓲ ꓠꓬꓲ ꓜꓴꓻ ꓟꓬꓱꓽ ꓬꓰ ꓠ, ꓟ ꓜꓴꓻ ꓕꓲ ꓜꓴꓻ ꓐꓰ ꓕꓲ ꓜꓴꓻ ꓔꓯ ꓬꓲ ꓙꓵ, ꓕꓲ ꓑ, ꓤ ꓗꓪ ꓮ ꓡꓰ ꓐꓰ ꓬꓰ ꓠ, ꓟ ꓕꓲ ꓠꓲ, ꓕꓲ ꓪ ꓟꓬꓱꓽ ꓬꓰ ꓔꓬ ꓡꓳ ꓐꓰ ꓐꓯ ꓔ ꓡꓳ꓿