ꓗ‐ꓠꓬꓴꓔ ꓔꓯ ꓗꓳ. ꓡ ꓟ ꓬꓲ ꓘꓳꓼ 2000 ꓘꓳꓼ ꓟꓽ ꓞꓲꓺ ꓕꓯ ꓡꓰ ꓜꓽ ꓔꓬ ꓟ ꓜꓽ ꓓꓴ ꓕꓲꓽ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓕꓱ ꓡꓱ ꓬꓲ ꓔꓴ ꓘꓳꓼ ꓛꓲ ꓞꓳ ꓤ ꓐꓴ ꓜꓽ ꓩꓴ ꓡˍ ꓟ ꓠꓬ ꓮꓽ ꓔꓳ ꓟꓽ ꓥ꓿ ꓬꓲ ꓔꓯ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓥ ꓡꓳ꓿
ꓗ‐ꓠꓬꓴꓔ (3) ꓙꓰꓽ ꓙꓳˍ ꓡꓳ꓿ ꓬꓲ ꓫꓵꓽ ꓫꓵꓽ꓾ ꓬꓲ ꓒꓴ ꓒꓴ ꓐꓰ ꓬꓲ ꓠꓲ, ꓛꓵꓼ ꓥ ꓡꓳ꓿
ꓗ‐ꓠꓬꓴꓔ ꓠꓬ ꓣꓳꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞ, ꓟ ꓬꓲ ꓢꓯꓼ ꓮ ꓟꓬ, ꓓꓯˍ ꓟ ꓪꓴ. ꓠꓬꓲ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓜꓽˍ ꓟ ꓗꓪ ꓜꓽ ꓖꓶ ꓠꓯ, ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥ ꓡꓳ꓿ ꓝꓮꓲ ꓗ‐ꓠꓬꓴꓔ ꓗꓪ ꓠꓬ ꓬꓲ ꓞꓶꓻ ꓢꓯꓼ ꓠꓬ ꓟꓽ ꓙꓳ ꓐꓯ ꓠ ꓛꓲ ꓮ ꓘꓶ. ꓠꓲ.ˍ ꓟ ꓥ ꓡꓳ꓿ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓜꓽ ꓠꓯ, ꓟ ꓪꓳꓽ ꓒꓬꓽ ꓗꓪ ꓟ ꓕꓲ ꓙꓰꓽ ꓥ ꓡꓳ꓿
ꓗ‐ꓠꓬꓴꓔ ꓘꓴꓽ ꓗꓪ ꓠꓬ ꓙꓲꓺ ꓡꓰ ꓢꓻˍ ꓟ ꓢꓳꓡꓴꓐꓡꓰ ꓝꓲꓐꓰꓣ ꓓꓵˍ ꓟ ꓑꓶ. ꓓꓴ ꓜꓽ ꓓꓴ ꓙꓲꓺˍ ꓟ ꓔꓯ ꓢꓯꓼ ꓖꓶ ꓢꓲ꓾ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓐꓰ ꓠꓲ, ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙꓻ ꓖꓶˍ ꓡꓳ꓿ ꓗ‐ꓠꓬꓴꓔ ꓗꓪ ꓓꓵˍ ꓟ ꓝꓳꓡꓮꓔꓰ ꓢꓯꓼ ꓠꓬ ꓪꓴ. ꓠꓷ. ꓬꓲ ꓟꓬꓱꓽ ꓬꓰ ꓚꓱ, ꓔꓯ ꓢꓯꓼ ꓡꓴꓽ ꓖꓶ ꓢꓲ꓾ ꓖꓳ ꓓꓱꓽ ꓡꓲꓽ ꓢꓴ ꓤ ꓠꓱ ꓶꓻ ꓞ, ꓢꓴ ꓐꓴˍ ꓐꓱ ꓶˍ ꓟꓲ ꓮ ꓟꓬ, ꓙꓲꓻ ꓖꓴ ꓙꓳˍ ꓡꓳ꓿
ꓗ‐ꓠꓬꓴꓔ ꓗꓪ ꓓꓵˍ ꓟ ꓦꓲꓔꓮꓟꓲꓠ ꓚ ꓐꓰ ꓰ ꓠꓬ ꓧꓪꓽ ꓗꓴ, ꓙꓲ ꓐꓰ ꓪꓴꓽ ꓞꓱ ꓐꓱ ꓶ ꓮ ꓘꓶ. ꓙꓲꓻˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓗ‐ꓠꓬꓴꓔ ꓬꓲ ꓙꓲꓻ ꓖꓴ ꓐꓴ ꓠꓬ꓾
ꓪꓳꓽ ꓔꓳ ꓔꓯ ꓕꓶꓻ ꓡꓰ ꓝꓲˍ ꓡꓳ꓾
ꓦꓲꓔꓮꓟꓲꓠ-ꓮ ꓠꓬ ꓪꓳꓽ ꓔꓳ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ꓿ ꓗ‐ꓠꓬꓴꓔ ꓕꓲ ꓑꓶ, ꓓꓴꓽ ꓗꓪ ꓣꓳ ꓕꓲ ꓠꓬꓲ ꓐꓱ ꓶ ꓣꓱꓽ ꓞ, ꓟ ꓦꓲꓔꓮꓟꓲꓠ-ꓮ ꓘꓴꓽ ꓗꓪ 70% ꓓꓵˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓗ‐ꓠꓬꓴꓔ ꓜꓽˍ ꓟ ꓗꓰ ꓐꓰ ꓣꓳ ꓪꓳꓽ ꓔꓳ ꓡꓰ ꓚꓮꓡꓚꓲꓴꓟ ꓢꓯꓼ ꓛꓵꓼ ꓣꓴˍ ꓟ ꓗꓪ ꓢꓯꓼ ꓙꓳ ꓡꓰ ꓝꓲ ꓢꓲ꓾ ꓪꓳꓽ ꓔꓳ ꓳʼˍ ꓟ ꓠꓻ ꓐꓰ ꓪꓳꓽ ꓔꓳ ꓘꓳ, ꓡꓰ ꓢꓻ ꓟ ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓚꓮꓠꓚꓰꓣ ꓠꓻ ꓔꓯ ꓗꓽ ꓙꓻ ꓖꓶˍ ꓡꓳ
ꓗ‐ꓠꓬꓴꓔ ꓗꓪ ꓓꓵˍ ꓟ ꓢꓮꓑꓳꓠꓲꓠꓢ ꓐꓰ ꓘꓴˍ ꓟ ꓬꓲ ꓢꓯꓼ ꓠꓬ ꓚꓮꓠꓚꓰꓣ ꓚꓰꓡꓡ ꓐꓴ ꓔꓯ ꓫꓵꓻ ꓝꓲ ꓢꓲ꓾ ꓚꓮꓠꓚꓰꓣ ꓚꓰꓡꓡ ꓟꓽ ꓟꓬꓽ ꓡ ꓠ ꓬꓰ ꓙ ꓖꓶ ꓐ ꓡˍ ꓡꓳ꓿ ꓚꓮꓠꓚꓰꓣ ꓠꓻ ꓙꓳ ꓢꓴ ꓐꓴ ꓠꓬ ꓚꓮꓠꓚꓰꓣ ꓠꓯꓻ ꓞꓲꓼ ꓫꓬ, ꓟ ꓡꓰꓽ ꓟꓽ ꓞꓲꓺ ꓗ‐ꓠꓬꓴꓔ ꓬꓲ ꓙꓲꓽ ꓔꓯ ꓜꓶ ꓗꓷ ꓢꓲ ꓬꓲ. ꓬꓲꓻ ꓓꓳꓻ ꓖꓶˍ ꓠꓬ ꓪ ꓚꓮꓠꓚꓰꓣ ꓠꓻ ꓫꓬ, ꓟ ꓗꓪ ꓪ ꓜꓲ ꓢꓻ ꓡꓰ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓤꓲꓽ ꓚꓱ, ꓐꓰ ꓗꓴ. ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓗꓽ ꓕ. ꓙ ꓖꓶˍ ꓡꓳ꓾
ꓗ‐ꓠꓬꓴꓔ ꓠꓬ ꓤꓲꓽ ꓒꓴꓽ꓾ ꓪꓳꓽ ꓓꓲꓻ ꓐꓰ ꓤꓲꓽ ꓚꓱ, ꓠꓻ ꓐꓴ ꓔꓯ ꓗꓽ ꓕ. ꓙ ꓖꓶˍ ꓡꓳ꓿ ꓤꓲ ꓫꓵ ꓫꓵˍ ꓟ ꓗꓪ ꓢꓻ ꓡꓰ ꓝꓲ ꓢꓲ ꓖꓳ ꓓꓱꓽ ꓘꓴꓽ ꓗꓪ ꓟ ꓓꓳꓼ ꓐꓴ ꓔꓯ ꓣꓴꓻ ꓦ ꓖꓶ ꓐ ꓡˍ ꓡꓳ꓿
ꓪꓳꓽ ꓓꓲꓻ ꓔꓯ ꓛꓲꓽ ꓖꓶ ꓐ ꓡ ꓢꓲ ꓠꓬꓲ꓾ ꓪꓳꓽ ꓓꓲꓻ ꓗꓪ ꓡꓳ ꓓꓰ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓪꓴ. ꓠꓷ. ꓔꓯˍ ꓟꓲ ꓔꓳ, ꓙ ꓖꓶˍ ꓡꓳ꓾
ꓗ‐ꓠꓬꓴꓔ ꓗꓪ ꓦꓲꓔꓮꓟꓲꓠ ꓰ ꓐꓰ ꓚ ꓒ ꓐꓲ ꓓꓵˍ ꓟ ꓪꓴ. ꓠꓬꓲ ꓕꓱ ꓢꓯꓼ ꓠꓬꓲꓽ ꓙꓰꓽ ꓟ ꓠꓬ ꓮꓡꓜꓲꓟꓰꓲꓣ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓬꓲ ꓞꓲꓼ ꓙꓳ ꓡ ꓕꓯ ꓪꓴ. ꓠꓷ. ꓚꓲ. ꓟꓶ ꓓꓴ ꓢꓯꓼ ꓠꓲ. ꓡ ꓟ ꓔꓯ ꓥˍ ꓟꓲ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿
ꓠꓲ, ꓟ ꓔꓯ ꓔꓬ, ꓢꓻ ꓝꓲˍ ꓟ ꓢꓯꓼ ꓖꓶˍ ꓡꓳ꓾
ꓗ‐ꓠꓬꓴꓔ ꓗꓪ ꓓꓵˍ ꓟ ꓐꓲꓔꓮꓟꓲꓠ ꓐ ꓠꓬ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓐꓰ ꓧꓳꓟꓳꓚꓬꓢꓔꓰꓲꓠꓰ ꓔꓯ ꓠꓲ. ꓡꓰ ꓝꓲ ꓢꓲ ꓗꓳ‐ꓡꓯ‐ꓢ‐ꓕ‐ꓣꓮꓪ ꓔꓯ ꓥˍ ꓟꓲ ꓠꓲ. ꓡꓰ ꓝꓲˍ ꓡꓳ꓿
ꓬꓲ ꓝꓲ. ꓬꓲ ꓟꓲ ꓠꓻ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓾
ꓬꓲ ꓝꓲ. ꓬꓲ ꓟꓲ ꓠꓻ꓾ ꓟꓬꓽ ꓠꓬꓲ ꓡꓰ,‐ꓒꓯꓼ‐ꓠꓻ ꓔꓯ ꓗ‐ꓠꓬꓴꓔ ꓜꓽˍ ꓟ ꓗꓪ ꓐꓰ ꓗꓽ ꓕ. ꓙ ꓖꓶˍ ꓡꓳ꓿ ꓗ‐ꓠꓬꓴꓔ ꓗꓪ ꓓꓵˍ ꓟ ꓠꓲꓮꓚꓲꓠ ꓠꓬ ꓪꓳꓽ ꓔꓳ ꓬꓲ ꓝꓲ. ꓳʼ ꓡˍ ꓟ ꓔꓯ ꓠꓲ. ꓡꓰ ꓝꓲ ꓢꓲ꓾ ꓚꓳꓑꓑꓰꓣ ꓠꓬ ꓬꓲ ꓝꓲ. ꓔꓲꓢꓢꓴꓰ ꓕꓲ ꓙꓰꓽ ꓔꓯ ꓢꓯꓼ ꓙꓳ ꓡꓰ ꓠ ꓔꓳ, ꓙ ꓖꓶˍ ꓟ ꓑꓶ. ꓓꓴ꓾ ꓬꓲ ꓝꓲ. ꓬꓲ ꓟꓲ ꓠꓻˍ ꓟ꓾ ꓬꓲ ꓙꓴꓽ ꓔꓶ ꓠ, ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿
ꓫꓵꓽ ꓢꓯꓼ ꓓꓯꓻ ꓟ ꓔꓯ ꓬꓯꓼ ꓡꓰ ꓝꓲ ꓢꓲ꓾ ꓫꓵꓽ ꓙꓴꓽ ꓔꓯ ꓔꓬ, ꓢꓻ ꓡꓰ ꓝꓲˍ ꓡꓳ꓾
ꓫꓵꓽ ꓢꓯꓼ ꓐꓱ ꓶ ꓙꓲꓻˍ ꓟ ꓟꓮꓖꓠꓰꓢꓲꓴꓟ ꓢꓯꓼ ꓓꓵˍ ꓟ ꓑꓶ. ꓓꓴ ꓫꓵꓽ ꓟꓽ ꓓꓯꓻ ꓡꓰ ꓠ ꓬꓰ ꓖꓶ ꓐ ꓡ ꓢꓲ꓾ ꓚꓮꓡꓚꓲꓴꓟ ꓐꓰ ꓣꓴꓔꓲꓠ ꓐˍ ꓟ ꓪꓴ. ꓠꓬꓲ ꓫꓵꓽ ꓐꓱ ꓶ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓥ ꓡꓳ꓿
ꓝꓮꓲ ꓗ‐ꓠꓬꓴꓔ ꓗꓪ ꓦꓲꓔꓮꓟꓲꓠ ꓐ6 ꓓꓯ,ˍ ꓟ ꓪꓴ. ꓠꓬꓲ ꓧꓳꓟꓳꓚꓬꓢꓔꓲꓠꓰ ꓔꓯ ꓔꓲꓺ ꓟꓴ ꓗꓷ ꓡꓰ ꓠ ꓬꓰ ꓙ ꓖꓶˍ ꓡꓳ꓿ ꓧꓳꓟꓳꓚꓬꓢꓔꓰꓲꓠꓰ ꓢꓯꓼ ꓟꓬꓽ ꓡꓰ ꓕꓯ ꓠꓬ ꓫꓵꓽ ꓙꓴꓽ ꓐꓰ ꓗꓴ. ꓙꓲꓽ ꓙꓳˍ ꓟ ꓠꓻ ꓒꓬꓱꓼ ꓡ ꓗꓴ.ˍ ꓟ ꓥ ꓢꓲ꓾ ꓫꓵꓽ ꓙꓴꓽ ꓘꓴꓽ ꓗꓪ ꓙꓳˍ ꓟ ꓬꓲ ꓞꓶꓻ ꓡꓳꓽ ꓡꓰ ꓕꓯ ꓫꓵꓽ ꓙꓰˍ ꓟ ꓗꓪ ꓘꓶ ꓡꓶꓽ ꓡꓰ ꓝꓲˍ ꓡꓳ꓿ ꓖꓳ ꓟ ꓑꓶ. ꓓꓴ ꓗ‐ꓠꓬꓴꓔ ꓗꓪ ꓓꓵˍ ꓟ ꓦꓲꓔꓮꓟꓲꓠ ꓐ6 ꓠꓬ ꓧꓳꓟꓳꓚꓬꓢꓔꓰꓲꓠꓰ ꓔꓯ ꓔꓲ ꓟꓴˍ ꓗꓷ ꓡꓰ ꓠ ꓬꓰ ꓙ ꓖꓶˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓡꓰ ꓝꓲˍ ꓡꓳ꓾
ꓖꓳ ꓓꓱꓽ ꓗꓪ ꓠꓻ ꓤ ꓒꓬꓽ ꓤ ꓐꓴ ꓔꓯ ꓖꓼ ꓓꓳ ꓐ ꓡ ꓢꓲ꓾ ꓖꓳ ꓓꓱꓽ ꓔꓯ ꓠꓻ ꓡꓰ ꓝꓲˍ ꓟ ꓗꓪ ꓐꓰ ꓗꓽ ꓕ. ꓙ ꓖꓶ ꓐ ꓡ ꓠ, ꓟ ꓐꓱ ꓶ ꓣꓳꓽ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓠ ꓔ ꓡꓳ꓿
ꓗ‐ꓠꓬꓴꓔ ꓗꓪ ꓠꓬ ꓦꓲꓔꓮꓟꓲꓠ ꓚ ꓓꓵˍ ꓟ ꓑꓶ. ꓓꓴ ꓖꓳ ꓓꓱꓽ ꓗꓪ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ꓾ ꓙꓬꓻ ꓓꓵꓽ ꓡꓰˍ ꓟ ꓐꓰ ꓐꓶ ꓓꓲꓻ ꓟꓽ ꓚꓲ. ꓠꓷꓼ ꓡ ꓠ ꓗꓽ ꓕ. ꓙ ꓖꓶˍ ꓡꓳ꓿ ꓔꓧꓲꓮꓟꓲꓠꓰ ꓢꓯꓼ ꓠꓬ ꓜꓽ ꓓꓴ ꓙꓲꓺˍ ꓟ ꓬꓲ ꓪꓴꓻ ꓚꓱ, ꓔꓯ ꓢꓯꓼ ꓡꓴꓽ ꓖꓶ ꓢꓲ꓾ ꓜꓽ ꓓꓴ ꓜꓽ ꓙꓰꓽ ꓗꓪ ꓐꓰ ꓬꓲ ꓢꓯꓼ ꓛꓵꓼ ꓣꓴ ꓚꓵ, ꓣꓴˍ ꓟ ꓗꓪ ꓣꓱꓽ ꓞ, ꓟ ꓧꓬꓓꓣꓳ ꓚꓡꓳꓣꓲꓚ ꓮꓚꓲꓓ ꓔꓯ ꓥˍ ꓟꓲ ꓖꓶ ꓐ ꓡˍ ꓟ ꓥ ꓡꓳ꓿
