ꓔꓲꓺ ꓒ ꓓꓽ ꓟ ꓐ‐ꓢꓲ‐ꓡꓲꓳ ꓮ.‐ꓔꓮꓲꓸꓼ ꓡꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓦꓻ ꓢꓯꓼ ꓪ ꓟꓶ ꓠ, ꓟ ꓐꓱ ꓶ ꓢꓲꓽ‐ꓫꓬ‐ꓕꓳꓽ‐ꓶ ꓵꓻ ꓠ, ꓟ 9 ꓦ (28) ꓠꓬꓲ꓾ ꓬꓰ‐ꓢꓴ ꓫꓵꓺ ꓠꓲ, ꓟ ꓔꓲꓺ ꓒ ꓙꓵꓽ ꓔꓶ. ꓟꓮꓪ‐ꓐꓲ ꓡꓳ ꓒꓱ ꓗꓪ ꓬꓰ ꓗꓷ ꓟ ꓢꓲꓽ‐ꓫꓬ‐ꓕꓳꓽ‐ꓶ ꓑꓮꓲꓽ ꓦꓬꓼ ꓠꓬꓲ ꓕꓯ ꓕꓵꓼ ꓪ ꓖꓶ ꓗꓷꓳ꓿
“ꓠꓴ ꓦꓻ ꓢꓯꓼ ꓪ ꓟꓶ ꓠ, ꓟ ꓐꓱ ꓶ ꓢꓲꓽ‐ꓫꓬ‐ꓕꓳꓽ‐ꓶ ꓵꓻ” ꓐꓯ ꓢꓲ ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓗꓳ‐ꓟ‐ꓫꓲ ꓢꓽ ꓡ ꓙꓵꓽ ꓔꓲꓺ ꓒ ꓓꓽ ꓟ ꓥ ꓟ ꓔꓲꓺ ꓒ ꓓꓽ ꓐ‐ꓢꓲ‐ꓡꓲꓳ ꓗꓪ ꓐꓰ ꓢꓯꓼ ꓖꓶ ꓗꓷꓳ꓿
ꓔꓲꓺ ꓒ ꓓꓽ ꓟ ꓗꓪ ꓐꓰ ꓑꓮꓲꓽ ꓗꓪ ꓛꓲ ꓡ ꓢꓴ ꓐꓴ ꓔꓯ ꓢꓲꓽ‐ꓫꓬ‐ꓕꓳꓽ‐ꓶ ꓔꓯ ꓠ. ꓑꓳ ꓡꓰ ꓠ ꓠ, ꓢꓲ꓾ ꓟꓬ ꓢꓶꓽ ꓡꓰ ꓵꓻ ꓠ, ꓟ꓾ ꓓꓵꓽ ꓙ ꓚꓱ, ꓗꓪ ꓐꓰ ꓵ ꓠ, ꓟ ꓐꓰ ꓠꓲ, ꓟ ꓗꓪ ꓐꓰ ꓵꓻ ꓠ, ꓟ ꓘꓴꓻ ꓗꓷꓳ꓿
ꓔꓮꓳꓽ‐ꓙꓲ, ꓢꓽ‐ꓢꓶ‐ꓠꓽ ꓙꓵꓽ ꓔꓲꓺ ꓒ ꓓꓽ ꓟ ꓗꓪ ꓐꓰ “ꓢꓲꓽ‐ꓫꓬ‐ꓕꓳꓽ‐ꓶ ꓠꓬ ꓙꓵꓻ ꓠꓲ, ꓔꓯ ꓕꓶ ꓡꓰ ꓝꓲˍ ꓡꓳ꓿ ꓢꓲꓽ‐ꓫꓬ‐ꓕꓳꓽ‐ꓶ ꓠꓬ ꓠꓲ, ꓟ ꓙꓬ ꓡꓰˍ ꓟ ꓔꓯ ꓠꓲ, ꓗꓴ ꓖꓶˍ ꓡꓳ꓾” ꓐꓰ ꓡꓲꓽ ꓡꓲꓽ ꓡꓰꓽ ꓕꓵꓼ ꓪ ꓖꓶ ꓫ. ꓕꓱ ꓗꓷꓳ꓿
ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓟ ꓔꓳ, ꓙ ꓔꓲꓺ ꓒ ꓓꓽ ꓝꓣꓮꓠꓚꓲꓢ ꓔꓮꓠ.‐ꓕꓴꓠ ꓗꓪ ꓐꓰˍ ꓟꓲ “ꓪꓴ‐ꓢ ꓠꓬ ꓬꓲ ꓐꓯ ꓘꓶꓽ ꓗꓪ ꓐꓰ ꓣꓳ ꓐꓴ ꓔꓯ ꓫ. ꓕꓱ ꓔꓬ ꓡꓳ” ꓐꓰ ꓐꓯ ꓡꓳ꓿
ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓗꓳ‐ꓟ‐ꓫꓲ ꓗꓪ ꓧꓳꓽ ꓪꓴ. ꓟꓳ ꓢꓴ ꓜꓴꓻ ꓗꓪ ꓟ ꓟꓮꓪ‐ꓡ‐ꓟꓬꓮꓲꓠ ꓢꓽ‐ꓢꓶ‐ꓠꓽ ꓙꓵꓽ ꓔꓲꓺ ꓒ ꓓꓽ ꓟꓮꓴꓣꓲꓚ ꓠꓬꓴꓠꓔ ꓪꓮꓲ ꓗꓪ ꓐꓰˍ ꓟꓲ ꓢꓲꓽ‐ꓫꓬ‐ꓕꓳꓽ‐ꓶ ꓗꓪ ꓐꓰ ꓢꓯꓼ ꓟꓬ ꓖꓶˍ ꓟ ꓢꓲ, ꓜꓲ ꓚꓱ, ꓔꓯ ꓐꓯ ꓟ. ꓖꓶ ꓗꓷꓳ꓿
“ꓬꓲ. ꓚꓰ ꓬꓲ. ꓪꓴ. ꓕꓳꓽ ꓶ ꓗꓪ ꓢꓯꓼ ꓟꓬ ꓖꓶˍ ꓟ ꓢꓲ, ꓜꓲ ꓐꓰ꓾ ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓔꓯ ꓒꓯꓽ ꓦꓰꓽ ꓗꓴ.ˍ ꓟ ꓢꓲ, ꓜꓲ ꓐꓯˍ ꓟ ꓢꓲ, ꓜꓲ (2) ꓜꓲ ꓙꓳˍ ꓡꓳ꓿ ꓡ ꓞꓳ ꓠꓬ ꓬꓲ ꓠꓲ, ꓫꓵˍ ꓟ ꓕꓲꓽ ꓜꓲ ꓔꓯ ꓢꓲꓺ ꓐ ꓡˍ ꓡꓳ꓿ ꓞꓳ ꓤ ꓐꓴ ꓠꓬ ꓢꓯꓼ ꓟꓬ ꓖꓶˍ ꓟ ꓢꓲ, ꓜꓲ ꓟ. ꓟꓲꓽ ꓔꓯ ꓖꓳ ꓟꓬ ꓟꓽ ꓐꓯ ꓔꓬ” ꓐꓰ ꓔꓲꓺ ꓒ ꓓꓽ ꓟꓮꓴꓣꓲꓚ ꓠꓬꓴꓠꓔ ꓪꓮꓲ ꓡꓰ ꓐꓯ ꓡꓳ꓿
ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓗꓪ ꓐꓰ National Director ꓔꓲꓺ ꓒ George ꓢꓧꓪꓰ‐ꓕꓴꓠ.꓾ ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓙꓵꓽ ꓢꓴ ꓔꓲꓺ ꓒ ꓑꓰꓔꓰꓣ ꓕꓴꓠ.‐ꓕꓴꓠ. ꓐꓰ ꓬꓲ ꓡ ꓞꓳ ꓐꓴ ꓗꓪ ꓐꓰ ꓑꓮꓲꓽ ꓕꓱ ꓟ ꓔꓯ ꓧꓳꓽ ꓣꓱꓽ ꓗꓷꓳ꓿
ꓑꓮꓲꓽ ꓕꓱ ꓟ ꓠꓬ ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ 14 ꓧꓪ, ꓕꓲ ꓧꓪ, ꓟ ꓢꓲꓽ‐ꓫꓬ‐ꓕꓳꓽ‐ꓶ ꓠꓬꓲ ꓑꓮꓲꓽ ꓥ ꓢꓲ꓾ ꓢꓲꓽ‐ꓫꓬ‐ꓕꓳꓽ‐ꓶ ꓔꓯ ꓬꓲ ꓥꓳꓽ ꓒꓳ, ꓢꓴ ꓥ ꓟ ꓙꓲꓻ ꓫꓬ ꓢꓴ ꓙꓰꓣꓳꓟꓰ ꓑꓮꓲꓽ ꓔꓯ ꓟꓬꓱ ꓓꓳꓽ ꓖꓶˍ ꓟ ꓑꓮꓲꓽ ꓥ ꓡꓳ꓿ ꓙꓲꓻ ꓫꓬ ꓢꓴ ꓙꓰꓣꓳꓟꓰ ꓠꓬ ꓢꓲꓽ‐ꓫꓬ‐ꓕꓳꓽ‐ꓶ ꓔꓯ ꓖꓣꓰꓰꓗ ꓥꓳꓽ ꓗꓪ ꓐꓰ ꓡ‐ꓔꓲꓠ, ꓥꓳꓽ ꓗꓪ ꓒꓳ, ꓖꓶ ꓢꓴ ꓥ ꓡꓳ꓿
ꓢꓲꓽ‐ꓫꓬ‐ꓕꓳꓽ‐ꓶ ꓑꓷꓠꓽ ꓔꓯ ꓙꓵꓽ ꓠꓬꓲ. ꓕꓲꓽ ꓗꓪ ꓗꓷˍ ꓟ ꓔꓯ ꓔꓲꓺ ꓒ Fr. George Shwe Htun ꓗꓪ ꓐꓰ ꓧꓳꓽ ꓪꓴ. ꓟꓳ ꓢꓲ ꓑꓮꓲꓽ ꓔꓯ ꓬꓲ ꓪꓴ. ꓔꓴ ꓗꓷꓳ꓿
ꓔꓲꓺ ꓒ ꓐꓴ꓾ ꓔꓲꓺ ꓟ ꓐꓴ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ ꓐꓴ꓾ ꓔꓲꓺ ꓒ ꓣꓱꓽ ꓠ, ꓟ ꓢꓳ ꓔꓬ ꓢꓴ ꓐꓴ꓾ ꓠꓱ. ꓐꓯ ꓢꓽ‐ꓢꓶ‐ꓠꓽ ꓗꓪ ꓐꓰ ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓔꓯ ꓧꓳꓽ ꓣꓱꓽ ꓢꓴ ꓐꓴ ꓐꓰ꓾ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓑꓮꓲꓽ ꓗꓪ ꓛꓲ ꓡ ꓗꓷ ꓟ ꓥ ꓡꓳ꓿
ꓢꓲꓽ‐ꓫꓬ‐ꓕꓳꓽ‐ꓶ ꓝꓲ ꓓꓴ ꓟꓬꓱꓽ ꓗꓪ (10) ꓘꓳꓼ ꓟꓽ ꓞꓲꓺ ꓝꓲ ꓓꓴ ꓟꓬꓱꓽ ꓬꓰ ꓗꓷ ꓢꓴ ꓐꓴ ꓔꓯ ꓟꓬꓱꓺ ꓓꓳꓽ ꓖꓶˍ ꓟ ꓡꓯ‐ꓟ ꓖꓶ ꓗꓷꓳ꓿
9 ꓦ (28) ꓠꓬꓲ ꓠꓯꓼ ꓠꓯꓼ 11ꓽ30 ꓕꓯ ꓟꓲ‐ꓢ ꓔꓲꓺ ꓪꓽ ꓘꓴ ꓗꓷ ꓢꓲ꓾ ꓑꓮꓲꓽ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿
