ꓙꓲ‐ꓢꓴ ꓢꓲ ꓤ ꓐꓴ ꓢꓲ ꓡꓲ ꓟ ꓐꓰ ꓪꓽ ꓡꓯ ꓘꓳ ꓕꓽ ꓡꓯ ꓘꓳ ꓓꓴ ꓐꓱ ꓶ ꓪꓽ ꓘꓴˍ ꓟ ꓠꓬꓲꓽ ꓠꓬꓲ ꓕꓲ ꓠꓬꓲ ꓔꓯ 2024 ꓘꓳꓼ 9 ꓦ (27) ꓠꓬꓲ ꓟꓶ ꓘꓶꓼ (4ꓽ30) ꓕꓯ꓾ ꓲ‐ꓬ‐ꓪ‐ꓓꓲ ꓟꓵꓽ ꓫꓴ ꓑ‐ꓔꓰꓲꓠ ꓡꓳ ꓒꓱ ꓙꓲꓻ ꓫꓬ ꓢꓴ ꓒꓲ‐ꓕꓱ ꓗ‐ꓔꓲ‐ꓓ‐ꓣꓯ ꓪꓽ ꓘꓴ ꓦꓲꓻ ꓗꓪ ꓬꓰ ꓗꓷꓳ꓿
ꓑ‐ꓔꓰꓲꓠ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓐꓰ Msgr. ꓑꓲ‐ꓴ ꓪꓲꓠ‐ꓔꓮꓠ. ꓗꓪ ꓐꓰ ꓘꓳ ꓣꓴ ꓘꓶ ꓫ. ꓕꓱ ꓗꓷ ꓢꓲ꓾ ꓙꓲ‐ꓢꓴ ꓢꓲ ꓤ ꓒꓳ, ꓮ ꓙꓵꓽ ꓡꓳꓽ ꓢꓲ ꓪꓽ ꓘꓴˍ ꓟ ꓑꓮꓲꓽ ꓚꓱ, ꓔꓯ ꓐꓯ ꓟ. ꓖꓶ ꓗꓷꓳ꓿
ꓝ. ꓢꓲ ꓠꓬꓲ Msgr ꓡꓰ “ꓮ ꓟꓶ ꓕꓯ ꓟꓬ‐ꓟ ꓗꓴꓷꓼ ꓗꓪ ꓫ. ꓓꓴ ꓮ ꓟꓬ, ꓔꓳ, ꓜꓳꓽ ꓔꓬ ꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓲ ꓠꓬꓲ ꓕꓯ ꓠꓬ ꓪꓴ‐ꓢ ꓡꓰ ꓣꓳ ꓐꓴ ꓔꓯ ꓢꓲ ꓡꓲ ꓟ ꓐꓰ꓾ ꓧꓳ, ꓡꓯ ꓘꓳ ꓪꓽ ꓡꓯ ꓘꓳˍ ꓟ ꓔꓯ ꓖꓶˍ ꓥꓳ ꓐꓯ ꓟ ꓥꓪ ꓚꓵ ꓚꓵ ꓙꓵꓻˍ ꓡꓳ” ꓐꓰ ꓐꓯ ꓗꓷꓳ꓿
ꓗ‐ꓔꓳ‐ꓡꓲꓗ ꓔꓲꓺ ꓒ ꓙꓲꓟꓟꓬ ꓡꓰ ꓟ‐ꓕꓲ ꓕꓳꓽ ꓶ (18ꓽ19‐20) ꓔꓯ ꓬꓲ ꓟ. ꓟꓲꓽ ꓒꓶꓻ ꓗꓷ ꓢꓲ꓾ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟ ꓟꓶ ꓠ, ꓟ꓾ ꓙꓲ‐ꓢꓴ ꓢꓲ ꓤ ꓐꓴ ꓕꓲ ꓠꓲ, ꓕꓲ ꓪ ꓐꓰ ꓧꓳ, ꓡꓯ ꓘꓳ ꓕꓽ ꓡꓯ ꓘꓳ,ˍ ꓟ ꓙꓳ ꓠ, ꓟ ꓐꓱ ꓶ ꓪꓽ ꓘꓴ ꓠ, ꓟ꓾ ꓬꓲꓼ ꓠꓬꓲ. ꓖꓶ ꓗꓷꓳ꓿
ꓟꓬ‐ꓟ ꓖꓳ ꓓꓱꓽ ꓔꓲ, ꓘꓴ ꓜꓲꓼ ꓞꓳ ꓗꓪ ꓟ ꓐꓰ Rev. ꓴ.‐ꓕꓴꓠ,‐ꓡ. ꓡꓰ ꓟꓬ‐ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓔꓯ ꓐꓯ ꓟ. ꓖꓶ ꓗꓷ ꓢꓲ꓾ ꓫ. ꓘꓶ ꓓꓴ ꓗꓪ ꓛꓲ ꓬꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙꓻ ꓖꓶ ꓠ, ꓟ ꓐꓯ ꓗꓷꓳ꓿
“ꓗꓴꓷꓼ ꓫꓵꓽ ꓪꓴ ꓔꓯ ꓡꓳ. ꓢꓲ ꓪꓴ‐ꓢ ꓔꓯ ꓕꓽ ꓱꓽ ꓠꓱꓽ ꓪ ꓡꓰ ꓝꓲ꓿ ꓙꓵꓻ ꓠꓲ, ꓔꓯ ꓟꓲ ꓕꓽ ꓡꓱ. ꓙꓰ ꓝꓲ꓿ ꓟꓬꓽ ꓠꓬꓲ ꓠꓬ ꓟꓯꓼ ꓘꓶꓽ ꓐꓰ ꓬꓲꓻ ꓙꓬ ꓙꓵꓽ ꓟꓶˍ ꓟ ꓐꓰ ꓠꓱ. ꓐꓯ ꓙꓳꓺ ꓓꓴ ꓐꓰ ꓔꓳ, ꓜꓳꓽ ꓔꓬ ꓪˍ ꓟ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓐꓱ ꓶ ꓬꓲ ꓑꓶ. ꓟꓽ ꓞꓷ, ꓪꓽ ꓘꓴ ꓙ ꓖꓶ ꓠ, ꓟ꓾ ꓬꓰ ꓙ ꓖꓶ ꓠ, ꓟ ꓬꓳ. ꓚꓵˍ ꓡꓳ” ꓐꓰ ꓣꓰꓦ. ꓴ.‐ꓕꓴꓠ,‐ꓡ. ꓡꓰ ꓐꓯ ꓡꓳ꓿
ꓕꓱ ꓜꓲꓼ ꓡꓳꓽ ꓪꓽ ꓘꓴ ꓑꓮꓲꓽ ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ꓾ ꓟꓬ‐ꓟ ꓖꓳ ꓓꓱꓽ ꓔꓲ, ꓘꓴ ꓜꓲꓼ ꓞꓳ꓾ ꓢ‐ꓖꓮꓪ ꓗ‐ꓬꓲꓠ ꓖꓳ ꓓꓱꓽ ꓔꓲ, ꓘꓴ ꓜꓲꓼ ꓞꓳ꓾ ꓑꓳ,‐ꓗ‐ꓬꓲꓠ ꓖꓳ ꓓꓱꓽ ꓔꓲ, ꓘꓴ ꓜꓲꓼ ꓞꓳ꓾ ꓲ‐ꓖ‐ꓡꓲ‐ꓗꓯ ꓘꓴ ꓜꓲꓼ ꓞꓳ ꓐꓰ ꓠꓱ. ꓐꓱ ꓙꓲ‐ꓢꓴ ꓢꓲ ꓤ ꓕꓲ ꓐꓱˍ ꓟꓲ ꓓꓯꓻ ꓗꓷꓳ꓿
ꓕꓱ ꓕꓲ ꓘꓳꓼ ꓜꓲꓼ ꓡꓳꓽ ꓪꓽ ꓘꓴ ꓑꓮꓲꓽ ꓗꓪ ꓐꓰ ꓟꓶˍ ꓟ ꓔꓳ, ꓙ ꓒꓴꓻ (15) ꓫꓬ, ꓟꓽ ꓞꓲꓺ ꓔꓯ ˍ ꓟꓲ ꓬꓲꓻ ꓙꓬ ꓙꓵꓽ ꓟꓶ. ꓟꓶ ꓡꓰ ꓢꓴ ꓐꓴ ꓐꓱ ꓶ ꓬꓰ ꓙ ꓖꓶ ꓙꓰˍ ꓥꓳ ꓐꓰ꓾ ꓙꓲ‐ꓢꓴ ꓢꓲ ꓤ ꓬꓲ ꓒꓳ, ꓮ ꓙꓵꓽ ꓔꓳ, ꓙ ꓟꓬꓱꓽ ꓬꓰ ꓔꓬ ꓢꓴ ꓟꓯ,‐ꓮꓴꓠꓖ‐ꓟꓬꓲꓠꓔ‐ꓘꓮꓲ ꓡꓰ ꓐꓯˍ ꓡꓳ꓿
