ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓚꓱ, ꓗꓪ ꓐꓰ ꓮ ꓙꓵꓽ ꓔꓯ ꓝꓮꓲ ꓕꓲ ꓧꓪ, ꓘꓳ ꓣꓴ ꓩꓴ ꓡˍ ꓥꓳ꓿
ꓕꓱ ꓕꓲ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱ, ꓔꓯ ꓐꓯ ꓟ. ꓖꓶˍ ꓟ ꓙꓵ, ꓗꓪ ꓐꓰ ꓔꓮꓟꓮꓣꓲꓠꓓ ꓐꓰ ꓐꓯˍ ꓟ ꓟ‐ꓙꓲ, ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓮ ꓡꓲ ꓕꓲ ꓒꓳ, ꓗꓪ ꓐꓰ ꓬꓲ ꓢꓯꓼ ꓙꓳ ꓔꓬ ꓡ? ꓐꓯ ꓟ ꓚꓱ, ꓔꓯ ꓐꓯ ꓖꓶ ꓩꓴ ꓡˍ ꓥꓳ꓿
ꓟ‐ꓙꓲ, ꓢꓶꓽ ꓠꓬ ꓡꓱꓻ ꓟꓵꓽ (ꓞꓻ ꓟꓵꓽ) ꓗꓪ ꓣꓱꓻˍ ꓟ ꓬꓲ ꓢꓶꓽ ꓕꓲ ꓙꓰꓽ ꓥ ꓡꓳ꓿ ꓟ‐ꓙꓲ, ꓢꓶꓽ ꓔꓯ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓪꓳꓽ ꓒꓬꓽ ꓗꓪ ꓣꓱꓽ ꓔꓬ ꓟˍ ꓡꓰ ꓐꓰ꓾ ꓟ‐ꓙꓲ, ꓢꓶꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓬꓲ ꓢꓯꓼˍ ꓟꓲ ꓓꓵˍ ꓟ ꓥ ꓡꓳ꓿ ꓟ‐ꓙꓲ, ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓡꓲ ꓡꓴ ꓫꓵꓽ ꓙꓲꓻ ꓖꓴ ꓖꓶˍ ꓡ ꓐꓰ ꓐꓯ ꓕꓯ
- ꓦꓰꓼ ꓟ ꓜꓶ ꓢꓻˍ ꓡꓳ꓿
ꓟ‐ꓙꓲ, ꓢꓶꓽ ꓠꓬ ꓝꓲꓐꓰꓣ ꓢꓯꓼ ꓮ ꓟꓬ, ꓓꓵˍ ꓟ ꓢꓲ, ꓢꓶꓽ ꓥ ꓟ ꓑꓶ. ꓓꓴ꓾ ꓦꓰꓼ ꓟ ꓜꓶ ꓢꓻ ꓝꓲ ꓢꓲ꓾ ꓦꓰꓼ ꓟ ꓐꓰ ꓬꓲ ꓪꓴꓻ ꓚꓱ, ꓔꓯ ꓫꓬ ꓡꓰ ꓝꓲˍ ꓡꓳ꓿ ꓟ‐ꓙꓲ, ꓢꓶꓽ ꓠꓬ ꓫꓵꓽ ꓒꓬ.꓾ ꓬꓲ ꓪꓴꓻ ꓓꓽ ꓟ ꓐꓰ ꓠꓱ. ꓐꓯ ꓜꓽ ꓓꓴ ꓜꓶ ꓖꓶˍ ꓟ ꓚꓱ, ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ꓿
- ꓖꓳ ꓓꓱꓽ ꓗꓪ ꓫꓵꓽ ꓬꓲꓻ ꓚꓳꓻˍ ꓟ ꓗꓪ ꓢꓯꓼ ꓙꓳ ꓡꓰ ꓠ ꓔꓳ, ꓙ ꓖꓶˍ ꓡꓳ꓿
ꓟ‐ꓙꓲ, ꓢꓶꓽ ꓗꓪ ꓲꓣꓳꓠ ꓢꓯꓼ ꓒ ꓐꓲ ꓓꓵ ꓢꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓫꓵꓽ ꓬꓲꓻ ꓚꓳꓻˍ ꓟ ꓢꓯꓼ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ꓿
ꓟ‐ꓙꓲ, ꓢꓶꓽ ꓗꓪ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓲꓣꓳꓠ ꓢꓯꓼ ꓘꓴꓽ ꓗꓪ 10% ꓛꓲ ꓔꓯ ꓡꓴꓽ ꓖꓶˍ ꓡꓳ꓿ ꓲꓣꓳꓠ ꓢꓯꓼ ꓠꓬ ꓣꓰꓓ ꓐꓡꓳꓳꓓ ꓚꓰꓡꓡꓢ ꓐꓴ ꓔꓯ ꓟꓬꓽ ꓡ ꓝꓲˍ ꓡꓳ꓿ ꓚꓰꓡꓡꓢ ꓐꓴ ꓐꓰ ꓖꓳ ꓓꓱꓽ ꓘꓴ ꓗꓪ ꓳꓫꓬꓖꓰꓠ ꓖꓶˍ ꓟ ꓚꓱ, ꓔꓯ ꓥˍ ꓟꓲ ꓬꓰ ꓙ ꓖꓶˍ ꓡꓳ꓿
- ꓢꓰꓠꓢꓰꓢ ꓟꓬꓱꓽ ꓬꓰ ꓚꓱ, ꓔꓯ ꓪꓴꓽ ꓡ ꓟꓴ ꓡ ꓝꓲˍ ꓟ
ꓞꓲꓼ ꓙꓳ ꓡˍ ꓕꓯ ꓣꓳ ꓖꓳ ꓓꓱꓽ ꓗꓪ ꓢꓰꓠꓢꓰꓢ ꓟꓬꓱꓽ ꓬꓰ ꓚꓱ, ꓪꓽ ꓠꓬꓲ ꓡ ꓠ, ꓟ ꓐꓱ ꓶ꓾ ꓣꓳ ꓠꓬ ꓜꓽ ꓓꓴ ꓔꓯ ꓦ ꓡꓱ ꓔꓬ ꓪˍ ꓡꓳ꓿ ꓢꓰꓠꓢꓰꓢ ꓟꓬꓱꓽ ꓬꓰ ꓚꓱ, ꓔꓯ ꓢꓯꓼ ꓡꓴꓽ ꓖꓶˍ ꓟ ꓜꓽ ꓓꓴ ꓘꓴꓽ ꓗꓪ ꓟ‐ꓙꓲ, ꓢꓶꓽ ꓥˍ ꓟꓲ ꓐˍ ꓟ ꓥ ꓡꓳ꓿
- ꓢꓰ,‐ꓛꓬꓳ ꓔꓲ ꓟꓴ ꓗꓷ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓟ
ꓟ‐ꓙꓲ, ꓢꓶꓽ ꓠꓬ ꓫꓵꓽ ꓘꓴꓽ ꓠꓯꓸꓼ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓔꓲ ꓟꓴ ꓗꓷ ꓡꓰ ꓝꓲˍ ꓡꓳ꓿ ꓟ‐ꓙꓲ, ꓢꓶꓽ ꓠꓬ ꓞꓼ ꓛꓵ ꓢꓯꓼ ꓐꓰ ꓬꓲ ꓞꓶꓻ ꓢꓯꓼ ꓒꓬꓱꓼ ꓡ ꓝꓲˍ ꓟ ꓚꓮꓣꓐꓳꓖꓬꓓꓣꓮꓔꓰꓢ ꓢꓯꓼ ꓔꓯ ꓛꓵꓼ ꓣꓴˍ ꓟ ꓔꓯ ꓠꓲ. ꓡꓰ ꓝꓲ ꓐ ꓡˍ ꓟˍ ꓡꓰ ꓐꓰ꓾ ꓲꓠꓢꓴꓡꓲꓠ ꓢꓯꓼ ꓔꓯ ꓥˍ ꓟꓲ ꓟꓬꓽ ꓡꓰ ꓝꓲ ꓐ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓢꓰ,‐ꓛꓬꓳ ꓠꓻ ꓙꓳ ꓢꓴ ꓐꓴ ꓟ‐ꓙꓲ, ꓢꓶꓽ ꓔꓯ ꓜꓽ ꓖꓶ ꓐ ꓡˍ ꓡꓳ꓿
- ꓫꓵꓽ ꓔꓯ ꓫꓬꓻ ꓡꓰ ꓝꓲˍ ꓡꓳ꓿
ꓟ‐ꓙꓲ, ꓢꓶꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓳ ꓟꓽ ꓓꓻ ꓣꓱꓽ ꓞ, ꓟ ꓟꓲꓠꓰꓣꓮꓡ ꓢꓯꓼ꓾ ꓕꓲ ꓠꓬꓲ ꓕꓲ ꓠꓬꓲ ꓣꓱꓽ ꓞ, ꓟ ꓝꓲꓐꓰꓣ ꓢꓯꓼ ꓐꓰ ꓦꓲꓔꓮꓟꓲꓠ ꓚ ꓢꓯꓼ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓫꓵꓽ ꓔꓯ ꓫꓬꓻ ꓡꓰ ꓠ ꓬꓰ ꓖꓶˍ ꓡꓳ꓿ ꓟ‐ꓙꓲ, ꓢꓶꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓝꓣꓰꓰ ꓣꓮꓓꓲꓚꓮꓡ ꓐꓴ ꓔꓯ ꓖꓼ ꓓꓳ ꓗꓷ ꓢꓲ꓾ ꓫꓵꓽ ꓔꓯ ꓫꓬꓻ ꓡꓰ ꓝꓲˍ ꓟ ꓥ ꓡꓳ꓿
- ꓠꓲ, ꓟ ꓔꓯ ꓔꓬ ꓢꓻ ꓡꓰ ꓝꓲˍ ꓡꓳ꓾
ꓟ‐ꓙꓲ, ꓢꓶꓽ ꓠꓬ ꓠꓲ, ꓟ ꓔꓯ ꓥˍ ꓟꓲ ꓔꓬ, ꓢꓻ ꓡꓰ ꓝꓲˍ ꓡꓳ꓿
ꓟ‐ꓙꓲ, ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓟꓽ ꓙꓳ ꓟ ꓗꓳ‐ꓡꓯ‐ꓢ‐ꓕ‐ꓣꓮꓪ ꓔꓯ ꓠꓲ. ꓡꓰ ꓝꓲ ꓢꓲ꓾ ꓙꓲꓻ ꓓꓴ ꓙꓳˍ ꓟ ꓗꓳ‐ꓡꓯ‐ꓢ‐ꓕ‐ꓣꓮꓪ ꓔꓯ ꓟꓬꓽ ꓡ ꓠ ꓬꓰ ꓖꓶˍ ꓡꓳ꓿ ꓑꓳꓔꓮꓢꓢꓲꓴꓟ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓫꓵꓽ ꓢꓯꓼ ꓔꓯ ꓥˍ ꓟꓲ ꓟꓽ ꓞꓰꓻ ꓡꓰ ꓠ꓾ ꓟꓽ ꓟꓬꓽ ꓡꓰ ꓠ ꓬꓰ ꓖꓶˍ ꓡꓳ꓿ ꓦꓲꓔꓮꓟꓲꓠ ꓚ ꓮ ꓟꓬ, ꓓꓵˍ ꓟ ꓠꓬ꓾ ꓠꓲ, ꓟ ꓫꓵꓽ ꓙꓴꓽ ꓟꓬꓱꓽ ꓬꓰˍ ꓟ ꓔꓯ ꓬꓰ ꓙ ꓖꓶˍ ꓡꓳ꓿
ꓮ ꓫꓵꓽ ꓥˍ ꓟꓲ ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓕꓱ ꓡꓱ ꓙꓳˍ ꓡꓳ꓿ ꓖꓳ ꓟˍ ꓡꓰ ꓐꓰ ꓟ‐ꓙꓲ, ꓢꓶꓽ ꓗꓪ ꓥˍ ꓟꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓡꓰ ꓐꓰ꓾ ꓟꓽ ꓙꓲꓻ ꓟˍ ꓟꓲ ꓙꓳˍ ꓡꓳ꓿
- ꓖꓳ ꓓꓱꓽ ꓘꓳꓼ ꓠꓻˍ ꓟ ꓓꓻ ꓡꓰ ꓓꓴ ꓠꓯꓻ ꓞꓲꓼ ibuprofen ꓐꓰ ꓫꓵꓽ ꓓꓯꓻ ꓢꓴ ꓐꓴ ꓓꓳꓻ ꓔꓬ ꓟ ꓠꓯꓻ ꓞꓲꓼ ꓜꓽ ꓔꓬ ꓢꓴ ꓐꓴ ꓠꓬ ꓟ‐ꓙꓲ, ꓢꓶꓽ ꓔꓯ ꓜꓽ ꓟꓽ ꓓꓻ ꓐꓯˍ ꓡꓳ꓿ ꓖꓳ ꓓꓱꓽ ꓗꓪ ꓐꓰ ꓫꓵꓽ ꓬꓲꓻ ꓓꓳˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓑꓶ. ꓓꓴ ꓠꓯꓻ ꓞꓲꓼ ꓕꓱ ꓟ ꓓꓳꓻ ꓔꓬ ꓢꓴ ꓐꓴ ꓠꓬ ꓟ‐ꓙꓲ, ꓢꓶꓽ ꓜꓽ ꓟꓽ ꓓꓻ ꓐꓰ ꓢꓷ. ꓪ ꓡꓳ꓿
- ꓟ‐ꓙꓲ, ꓢꓶꓽ ꓔꓯ ꓟꓬꓽ ꓙꓲ ꓡꓰ ꓠ꓾ ꓬꓲ ꓟꓶ, ꓬꓲ ꓙꓲꓽ ꓜꓽˍ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓮ ꓟꓬ, ꓞꓰꓻ ꓡꓰ ꓝꓲˍ ꓟ ꓑꓶ. ꓓꓴ ꓕꓲ ꓠꓬꓲ ꓗꓪ ꓟ‐ꓙꓲ, ꓢꓶꓽ 10g ꓕꓯꓽ ꓢꓲ ꓜꓽ ꓟꓽ ꓓꓻ꓾ ꓐꓰ ꓢꓷ. ꓪ ꓡꓳ꓿
- ꓟ‐ꓙꓲ, ꓢꓶꓽ ꓐꓰ ꓟꓽ ꓕꓽ ꓢꓴ ꓐꓴ ꓠꓬ꓾ ꓟ‐ꓙꓲ, ꓢꓶꓽ ꓜꓽ ꓗꓷ ꓕꓯ ꓧꓪꓽ ꓗꓴ, ꓙꓲꓻ ꓗꓪ ꓬꓲ ꓑ ꓓꓲꓻ ꓡˍ ꓟ꓾ ꓒꓰꓼ ꓔꓴ ꓡˍ ꓟ ꓒꓬꓱꓼ ꓡ ꓗꓴ.ˍ ꓟ ꓑꓶ. ꓓꓴ꓾ ꓟ‐ꓙꓲ, ꓢꓶꓽ ꓐꓰ ꓟꓽ ꓕꓽ ꓢꓴ ꓠꓬ ꓜꓽ ꓟꓽ ꓓꓻ꓿
- ꓟ‐ꓙꓲ, ꓢꓶꓽ ꓗꓪ ꓮꓚꓲꓓ ꓢꓯꓼ ꓙꓳˍ ꓟ ꓪꓴ. ꓠꓬꓲ꓾ ꓮ ꓟꓬ, ꓜꓽ ꓗꓷˍ ꓕꓯ ꓢꓲꓽ ꓛꓲ ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ꓿ ꓝꓮꓲ ꓬꓲ ꓝꓲ ꓗꓪ ꓡꓳ ꓓꓰ ꓒꓬꓱꓼ ꓡ ꓝꓲ ꓐ ꓡˍ ꓡꓳ꓿
- ꓟ‐ꓙꓲ, ꓢꓶꓽ ꓔꓯ ꓟꓽ ꓠꓽ ꓠꓽ ꓜꓽˍ ꓟ ꓠꓬ ꓦꓰꓼ ꓟ ꓘꓴꓽ ꓗꓪ ꓮꓚꓲꓓ ꓮ ꓟꓬ, ꓟꓬꓽ ꓡꓰ ꓝꓲ ꓢꓲ꓾ ꓦꓰꓼ ꓟ ꓠꓻˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ꓿
- ꓟ‐ꓙꓲ, ꓢꓶꓽ ꓜꓽ ꓟꓬꓽ ꓡꓰ ꓠꓬ ꓫꓵꓽ ꓢꓯꓼ ꓔꓯ ꓞꓰꓻ ꓡꓰ ꓝꓲˍ ꓟ ꓡꓰ ꓟꓽ ꓞꓲ ꓲꓣꓳꓠ ꓢꓯꓼ ꓠꓲ. ꓡꓰ ꓝꓲ ꓢꓲ ꓪꓴ. ꓓꓵ ꓠꓻˍ ꓟ꓾ ꓪꓴ. ꓟꓶ ꓟꓶˍ ꓟ꓾ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓝꓲˍ ꓡꓳ꓿
ꓮ ꓟꓶ ꓐꓯ ꓟ. ꓖꓶ ꓩꓴ ꓡˍ ꓟ ꓟ‐ꓙꓲ, ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓠꓬ ꓧꓰꓡꓡꓳ ꓢ‐ꓬ‐ꓪꓴꓠ ꓪꓰꓐꓢꓲꓔꓰ ꓗꓪ ꓐꓯ ꓔ ꓟ ꓔꓯ ꓕꓲ ꓝ. ꓐꓯ ꓖꓶ ꓩꓴ ꓡˍ ꓟ ꓥ ꓡꓳ꓿
