ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓠꓹ ꓟ ꓐꓱ ꓶ ꓜꓽ ꓖꓶ ꓠꓯꓹ ꓟ ꓜꓽ ꓓꓴ (7) ꓙꓰꓽ ꓐꓴ ꓠꓬ꓾
- ꓬꓲ ꓞꓶꓻ ꓟꓬꓽˍ ꓟ ꓥꓪꓸ
ꓥꓪꓸ ꓕꓱ ꓟ ꓘꓴꓽ ꓗꓪ ꓳꓟꓰꓖꓮ 3 ꓝꓮꓔꓔꓬ ꓮꓚꓲꓓꓢ ꓓꓯꓹˍ ꓟ ꓥ ꓡꓳ= ꓢꓯꓼ ꓕꓱ ꓟ ꓗꓪ ꓰꓑꓮ ꓐꓰ ꓓꓧꓮ ꓢꓯꓼ ꓓꓵˍ ꓟ ꓥ ꓢꓲ꓾ ꓕꓱ ꓟ ꓠꓬ ꓣꓳ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓔꓯ ꓘꓶꓸ ꓢꓯꓼ ꓙꓳ ꓡꓰ ꓝꓲˍ ꓡꓳ= ꓕꓲ ꓫꓵꓽ ꓫꓵꓽ ꓢꓳ ꓣꓴˍ ꓟ ꓗꓪˍ ꓟꓲ ꓢꓳꓻ ꓢꓻ ꓡꓰ ꓝꓲˍ ꓡꓳ= ꓪꓴꓸ ꓠꓷꓸ ꓫꓵꓽ ꓙꓴꓽ ꓐꓱ ꓶ ꓥˍ ꓟꓲ ꓮ ꓘꓶꓸ ꓙꓲꓻˍ ꓟ ꓥ ꓡꓳ=
- ꓐꓰꓣꓣꓲꓰꓢ – ꓢꓔꓣꓮꓪꓐꓰꓣꓣꓬ
ꓐꓰꓣꓣꓬ ꓢꓶꓽ ꓘꓴꓽ ꓗꓪ ꓙꓳˍ ꓟ ꓝꓡꓮꓦꓳꓠꓳꓲꓓꓢ ꓢꓯꓼ ꓐꓴ ꓠꓬ ꓪꓴꓸ ꓠꓷꓸ ꓡꓰ ꓚꓲꓸ ꓟꓶˍ ꓟ ꓢꓯꓼ ꓞꓰꓻ ꓡꓰˍ ꓟ ꓔꓯ ꓗꓽ ꓕꓸ ꓙ ꓐ ꓡˍ ꓡꓳ= ꓪꓴꓸ ꓠꓷꓸ ꓗꓪ ꓓꓳꓼ ꓒꓬꓱꓼ ꓡˍ ꓟ ꓔꓯ ꓥˍ ꓟꓲ ꓗꓽ ꓕꓸ ꓙ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓪꓴꓸ ꓠꓷꓸ ꓫꓵꓽ ꓙꓴꓽ ꓐꓱ ꓶ ꓮ ꓘꓶꓸ ꓙꓲꓻˍ ꓟ ꓥ ꓡꓳ=
- ꓬꓲ ꓫꓵꓸ ꓬꓲ ꓠꓲꓹ ꓟ ꓐꓴ ꓔꓯ ꓟꓬꓽ ꓟꓬꓽ ꓜꓽ ꓠ ꓔ ꓡꓳ=
ꓬꓲ ꓫꓵꓸ ꓬꓲ ꓠꓲꓹ ꓟ ꓐꓴ ꓗꓪ ꓳꓟꓰꓖꓮ 3 ꓝꓮꓔꓔꓬ ꓮꓚꓲꓓꓢ꓾ ꓮꓠꓔꓲꓳꓫꓲꓓꓮꓠꓔꓢ꓾ ꓟꓮꓖꓠꓰꓢꓲꓴꓟ꓾ ꓜꓲꓠꓚ꓾ ꓟꓰꓡꓮꓔꓳꓠꓲꓠ ꓐꓰ ꓔꓣꓬꓑꓔꓳꓑꓧꓮꓠ ꓢꓯꓼ ꓐꓴ ꓙꓳˍ ꓟ ꓥ ꓡꓳ= ꓢꓯꓼ ꓕꓱ ꓟ ꓐꓴ ꓠꓬ ꓣꓳ ꓕꓲ ꓫꓵꓽ ꓫꓵꓽ ꓢꓳ ꓣꓴˍ ꓟ ꓗꓪ ꓪꓴꓸ ꓠꓷꓸ ꓠꓬ ꓖꓼ ꓟꓽ ꓟꓶ ꓗꓷ ꓡˍ ꓟ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓪꓴꓸ ꓠꓷꓸ ꓗꓪ ꓓꓳꓼ ꓒꓬꓱꓼ ꓡˍ ꓟ ꓔꓯ ꓗꓽ ꓕꓸ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ꓾ ꓕꓱ ꓟ ꓥˍ ꓟꓲ ꓪꓴꓸ ꓠꓷꓸ ꓫꓵꓽ ꓙꓴꓽ ꓢꓯꓼ ꓪ ꓠꓬꓲ ꓡ ꓠꓹ ꓟ ꓬꓰ ꓙ ꓖꓶˍ ꓡꓳ=
- ꓓꓮꓣꓗ ꓚꓧꓳꓚꓳꓡꓮꓔꓰ
ꓓꓮꓣꓗ ꓚꓧꓳꓚꓳꓡꓮꓔꓰ ꓗꓪ ꓥˍ ꓟꓲ ꓮꓽ ꓢꓳ ꓕꓯ ꓟ ꓡꓰ ꓝꓡꓮꓦꓳꓠꓳꓲꓓꓢ ꓢꓯꓼ ꓐˍ ꓟ ꓓꓵˍ ꓟ ꓑꓶꓸ ꓓꓴ꓾ ꓢꓯꓼ ꓕꓱ ꓟ ꓠꓬ ꓪꓴꓸ ꓠꓷꓸ ꓗꓪ ꓬꓲ ꓓꓳꓼ ꓒꓬꓱꓼ ꓡˍ ꓟ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓪꓴꓸ ꓠꓷꓸ ꓫꓵꓽ ꓙꓴꓽ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓝꓮꓲ ꓓꓮꓣꓗ ꓚꓧꓳꓚꓳꓡꓮꓔꓰ ꓗꓪ ꓚꓮꓝꓝꓰꓲꓠꓰ ꓐꓰ ꓔꓧꓰꓳꓐꓣꓳꓟꓲꓠꓰ ꓢꓯꓼ ꓓꓵˍ ꓟ ꓑꓶꓸ ꓓꓴ ꓪꓴꓸ ꓠꓷꓸ ꓔꓯ ꓢꓰ ꓡꓰ ꓝꓲ ꓢꓲ꓾ ꓢꓳ ꓣꓴˍ ꓟ ꓗꓪ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ=
- ꓚꓳꓝꓝꓰꓰ ꓐꓰ꓾ ꓡꓽ ꓚꓬꓸ(ꓛꓽ ꓬꓰꓹ)
ꓚꓳꓝꓝꓰꓰ ꓐꓰ ꓡꓽ ꓚꓬꓸ ꓘꓴꓽ ꓗꓪ ꓚꓮꓝꓝꓰꓲꓠꓰ ꓢꓯꓼ ꓓꓵˍ ꓟ ꓥ ꓢꓲ ꓠꓬꓲ꓾ ꓢꓯꓼ ꓕꓱ ꓟ ꓠꓬ ꓪꓴꓸ ꓠꓷꓸ ꓔꓯ ꓢꓰ ꓡꓰ ꓝꓲˍ ꓡꓳ= ꓝꓮꓲ ꓢꓳ ꓣꓴˍ ꓟ ꓗꓪˍ ꓟꓲ ꓠꓲꓹ ꓟ ꓙꓳ ꓙꓳ ꓡꓰꓽ ꓢꓳ ꓣꓴ ꓐ ꓡ ꓝꓲˍ ꓡꓳ= ꓝꓮꓲ ꓢꓯꓼ ꓕꓱ ꓟ ꓠꓬ ꓮꓓꓰꓠꓳꓢꓲꓠꓰ ꓐꓰ ꓘꓴˍ ꓟ ꓧꓳꓣꓟꓳꓠꓰꓢ ꓔꓯ(ꓪꓴꓽ ꓧꓶ ꓡꓰ ꓢꓻˍ ꓟ ꓧꓳꓣꓟꓳꓠꓰꓢ) ꓔꓯ ꓗꓽ ꓕꓸ ꓙ ꓖꓶˍ ꓡꓳ=
ꓝꓮꓲ ꓡꓽ ꓚꓬꓸ ꓘꓴꓽ ꓗꓪ ꓡ-ꓔꓧꓰꓮꓠꓲꓰ ꓐꓰ ꓘꓴˍ ꓟ ꓮꓟꓲꓠꓳ ꓮꓚꓲꓓ ꓕꓲ ꓙꓰꓽ ꓓꓯꓹˍ ꓟ ꓥ ꓡꓳ= ꓢꓯꓼ ꓕꓱ ꓟ ꓠꓬ ꓣꓳ ꓢꓳ ꓣꓴˍ ꓟ ꓗꓪ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡ ꓝꓲ ꓢꓲ ꓠꓬꓲ꓾ ꓠꓲꓹ ꓟ ꓓꓵꓽ ꓙ ꓪꓴꓽ ꓧꓶ ꓢꓻˍ ꓟ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲˍ ꓡꓳ= ꓠꓲꓹ ꓟ ꓔꓯ ꓥˍ ꓟꓲ ꓢꓲ ꓡꓲ ꓡꓰ ꓝꓲˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ ꓐꓯ ꓠꓬ꓾ ꓖꓮꓐꓮ ꓐꓰ ꓘꓴˍ ꓟ (ꓣꓳ ꓪꓴꓸ ꓠꓷꓸ ꓗꓪ ꓙꓳˍ ꓟ ꓢꓯꓼ ꓕꓲ ꓙꓰꓽ) ꓔꓯ ꓟꓬꓽ ꓠꓬꓲ ꓓꓳꓻ ꓡ ꓝꓲ ꓐ ꓡˍ ꓟ ꓑꓶꓸ ꓓꓴ ꓥ ꓡꓳ=
ꓝꓮꓲ ꓕꓱ ꓡꓽ ꓛꓬꓸ( ꓛꓽ ꓬꓰꓹ) ꓐꓰ ꓚꓳꓝꓝꓰꓰ ꓗꓪ ꓥˍ ꓟꓲ ꓝꓡꓮꓦꓳꓠꓳꓲꓓꓢ ꓢꓯꓼ ꓓꓵˍ ꓟ ꓑꓶꓸ ꓓꓴ ꓪꓴꓸ ꓠꓷꓸ ꓫꓵꓽ ꓙꓴꓽ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓚꓳꓝꓝꓰꓰ ꓐꓰ ꓡꓽ ꓚꓬꓸ ꓔꓯ ꓮ ꓕꓯ ꓟꓳ ꓓꓳꓻ ꓠ ꓔ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓕꓲ ꓐꓱ ꓠꓬ ꓚꓳꓝꓝꓰꓰ ꓓꓳꓻˍ ꓕꓯ ꓠꓲꓹ ꓟ ꓔꓷꓹ ꓗꓴꓸˍ ꓟ ꓑꓶꓸ ꓓꓴ꓾ ꓡꓽ ꓚꓬꓸ (ꓛꓽ ꓬꓰꓹ) ꓔꓯ ꓓꓳꓻ ꓖꓶ ꓐ ꓡˍ ꓡꓳ=
- ꓪꓳꓽ ꓒꓬꓽ ꓠꓲꓹ ꓛꓵꓼ ꓜꓽˍ ꓟ ꓗꓪ ꓐꓰˍ ꓟꓲ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡ ꓝꓲˍ ꓡꓳ=
ꓪꓳꓽ ꓒꓬꓽ ꓠꓲꓹ ꓛꓵꓼ ꓠꓯꓸꓼ ꓗꓪ ꓦꓲꓔꓮꓟꓲꓠ ꓗ꓾ ꓝꓳꓡꓮꓔꓰ꓾ ꓡꓴꓔꓰꓲꓠ꓾ ꓠꓲꓔꓣꓮꓔꓰ꓾ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓐꓴ ꓓꓵˍ ꓟ ꓥ ꓡꓳ= ꓢꓯꓼ ꓕꓱ ꓟ ꓐꓴ ꓠꓬ ꓪꓴꓸ ꓠꓷꓸ ꓫꓵꓽ ꓬꓲꓻˍ ꓟ ꓗꓪ ꓪꓽ ꓠꓬꓲ ꓡꓰ ꓠ ꓬꓰ ꓙ ꓖꓶˍ ꓡꓳ= ꓢꓳ ꓣꓴˍ ꓟ ꓗꓪˍ ꓟꓲ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓝꓮꓲ ꓕꓲ ꓑꓹ ꓕꓲ ꓑꓹ ꓟꓲ ꓡꓰꓹ ꓢꓻˍ ꓟ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲˍ ꓡꓳ= ꓖꓳ ꓡꓱ ꓠꓬꓲ ꓪꓳꓽ ꓒꓬꓽ ꓠꓲꓹ ꓛꓵꓼ ꓔꓯ ꓟꓬꓽ ꓠꓬꓲ ꓜꓽ ꓖꓶ ꓠꓯꓹ ꓟ ꓥ ꓡꓳ=
- ꓳꓮꓔꓟꓰꓮꓡ ꓐꓰ ꓜ ꓫꓵꓽ ꓫꓵꓽ
ꓕꓱ ꓟ ꓘꓴꓽ ꓗꓪ ꓣꓳ ꓪꓴꓸ ꓠꓷꓸ ꓡꓰ ꓟꓬꓽ ꓠꓬꓲ ꓣꓱꓽ ꓞꓹ ꓟ ꓚꓮꓣꓐꓳꓧꓬꓓꓣꓮꓔꓰꓢ ꓐꓴ ꓔꓯ ꓡꓴꓽ ꓖꓶˍ ꓡꓳ= ꓣꓳ ꓜꓽ ꓔꓬ ꓟ ꓜ ꓒꓴꓻ ꓐꓴ ꓠꓬ ꓮ ꓟꓬꓹ ꓔꓱꓹ ꓒꓴ ꓡꓰ ꓠ ꓫꓬꓹ ꓔ ꓟ ꓑꓶꓸ ꓓꓴ ꓜꓻ ꓗꓪ ꓓꓵˍ ꓟ ꓬꓲ ꓢꓯꓼ ꓕꓲ ꓐꓱ ꓒꓲꓼ ꓡꓰˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓕꓱ ꓡꓱ ꓜ ꓫꓵꓽ ꓫꓵꓽ ꓐꓰ ꓳꓮꓔꓟꓰꓮꓡ ꓐꓴ ꓗꓪ ꓠꓬ ꓬꓲ ꓢꓯꓼ ꓒ ꓐꓲ ꓓꓵˍ ꓡꓳ= ꓕꓱ ꓟ ꓘꓴꓽ ꓗꓪ ꓠꓬ ꓚꓳꓟꓑꓡꓰꓫ ꓚꓮꓣꓐꓳꓧꓬꓓꓣꓮꓔꓰꓢ ꓾ ꓝꓲꓐꓰꓣ꓾ ꓦꓲꓔꓮꓟꓲꓠ ꓐ꓾ ꓦꓲꓔꓮꓟꓲꓠ ꓰ꓾ ꓟꓮꓖꓠꓰꓢꓲꓴꓟ ꓢꓯꓼ ꓐꓴ ꓓꓵˍ ꓟ ꓥ ꓡꓳ= ꓢꓯꓼ ꓕꓱ ꓟ ꓓꓯˍ ꓟ ꓑꓶꓸ ꓓꓴ ꓣꓳ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓢꓳ ꓣꓴˍ ꓟ ꓗꓪ ꓚꓲꓸ ꓟꓶ ꓢꓻ ꓡꓰ ꓝꓲˍ ꓡꓳ=
ꓕꓱ ꓗꓪ ꓐꓯ ꓗꓷ ꓟ ꓡꓰ ꓐꓰ ꓳꓲꓡꓬ ꓝꓲꓢꓧ ꓬꓲ ꓞꓶꓻ ꓟꓬꓽˍ ꓟ ꓥꓪꓸ ꓜꓽ ꓖꓶ꓾ ꓐꓰꓣꓣꓬ ꓢꓶꓽ ꓔꓯˍ ꓟꓲ ꓜꓽ꓾ ꓬꓲ ꓫꓵꓸ ꓬꓲ ꓠꓲꓹ ꓟ ꓐꓰ ꓓꓮꓣꓗ ꓚꓧꓳꓚꓳꓡꓮꓔꓰ ꓔꓯˍ ꓟꓲ ꓜꓽ ꓖꓶ= ꓝꓮꓲ ꓚꓳꓝꓝꓰꓰ ꓡꓽ ꓚꓬꓸ ꓓꓳꓻ ꓖꓶ= ꓪꓳꓽ ꓒꓬꓽ ꓠꓲꓹ ꓛꓵꓼ ꓐꓰ ꓳꓮꓔꓟꓰꓮꓡ ꓐꓰ ꓜ ꓫꓵꓽ ꓫꓵꓽ ꓐꓴ ꓔꓯ ꓜꓽ ꓖꓶˍ ꓕꓯ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡˍ ꓥꓳ=
ꓮ ꓟꓶ ꓐꓯ ꓖꓶ ꓗꓷ ꓟ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓠꓹ ꓟ ꓐꓱ ꓶ ꓜꓽ ꓖꓶ ꓠꓯꓹ ꓟ ꓜꓽ ꓓꓴ (7) ꓙꓰꓽ ꓔꓯ ꓠꓬ ꓠꓯꓻ ꓞꓲꓼ ꓟꓸ ꓒ ꓜꓲꓠ ꓟꓲꓠ ꓔꓴꓠ ꓡꓰ ꓬꓳꓴꓔꓴꓐꓰ ꓗꓪ ꓐꓯ ꓖꓶ ꓔ ꓟ ꓔꓯ꓾ ꓝꓮꓲ ꓕꓲ ꓝꓸ ꓐꓯ ꓖꓶ ꓩꓴ ꓡˍ ꓟ ꓥ ꓡꓳ=
