ꓗꓪꓺ ꓒꓴ ꓟꓰꓻ ꓑꓮꓲꓽ ꓠꓽ‐ꓢꓽ‐ꓠꓬꓲ ꓓꓽ ꓟ ꓗꓪ ꓔꓲꓺ ꓒ ꓪ ꓔꓲ. ꓡꓰ ꓐꓯˍ ꓟ ꓠꓬ꓾
ꓜꓽ ꓓꓴ ꓚꓲ.ˍ ꓟ ꓦꓬꓼ ꓠꓬꓲ ꓪꓴ. ꓔꓴˍ ꓕꓯ ꓔꓲꓺ ꓒ ꓪ ꓔꓲ. Leo ꓡꓰ꓾ ꓗꓪꓺ ꓒꓴ ꓠꓬ “ꓮ ꓔꓳ. ꓐꓬ ꓔꓬ ꓟ ꓟꓲ ꓠꓯ ꓬꓲ ꓡꓲꓽ ꓙ ꓐꓰ ꓟꓯꓼ ꓢꓰꓼ ꓡꓯ ꓘꓳˍ ꓟ ꓪꓴ. ꓠꓬꓲ ꓐꓬ ꓡꓰ ꓗꓷ ꓟ ꓡꓳ ꓒꓱ ꓐꓴ ꓔꓯ꓾ ꓓꓵꓽ ꓙꓽ ꓟꓶ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓗꓷꓳ꓿
ꓣꓳ‐ꓟ ꓡꓳ ꓒꓱ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓢ‐ꓐꓲ‐ꓠ (Saint Sabina) ꓪꓽ ꓘꓴ ꓦꓲ ꓓꓽ ꓗꓪ ꓬꓰˍ ꓟ ꓗꓪꓺ ꓒꓴ ꓟꓰꓻ ꓑꓮꓲꓽ ꓠꓽ‐ꓢꓽ‐ꓠꓬꓲ ꓓꓽ ꓟ ꓟꓲ‐ꓢ ꓙꓵ, ꓔꓯ ꓬꓰ ꓔꓬ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ ꓡꓰ ꓓꓵꓽ ꓙꓽ ꓡꓰꓼ ꓡˍ ꓟ꓾ ꓜꓴꓻ ꓐꓰ ꓫꓵꓻˍ ꓟ ꓔꓯ ꓟꓳ. ꓔꓱ, ꓕ ꓗꓷ ꓢꓲ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓗꓷꓳ꓿
ꓪꓽ ꓘꓴ ꓦꓲ ꓗꓪ ꓡ ꓢꓴ ꓐꓴ ꓬꓲ ꓪ ꓠ ꓖꓼ (ꓠꓬ ꓘꓶꓽ ꓛꓲ) ꓗꓪ ꓘꓳ ꓣꓴ ꓟꓶˍ ꓟ ꓗꓪꓺ ꓒꓴ (ꓘꓴꓽ ꓦ) ꓠꓬ “ꓮ ꓔꓳ. ꓐꓬ ꓔꓬ ꓟ ꓟꓲ ꓠꓯ ꓬꓲ ꓡꓲꓽ ꓙ ꓐꓰ ꓟꓯꓼ ꓢꓰꓼ ꓡꓯ ꓘꓳˍ ꓟ ꓪꓴ. ꓠꓬꓲ ꓐꓬ ꓡꓰ ꓗꓷ ꓟ ꓡꓳ ꓒꓱ ꓐꓴ ꓔꓯ” ꓓꓵꓽ ꓙꓽ ꓟꓶ ꓡꓰ ꓝꓲˍ ꓟ꓾
ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓐꓰ ꓗꓴ. ꓙꓲꓽ ꓙꓳ ꓢꓲ ꓕꓱ ꓗꓪꓺ ꓒꓴ (ꓘꓴꓽ ꓦ) ꓟꓰꓻˍ ꓟ ꓠꓽ‐ꓢꓽ‐ꓠꓬꓲ ꓗꓪ “ꓫꓵꓻˍ ꓟ ꓚꓱ, ꓔꓯ ꓫꓵꓻˍ ꓟ ꓡꓰ ꓟꓳꓻ ꓢꓲ ꓘꓳ ꓣꓴ ꓐ ꓡ ꓠ, ꓟ ꓐꓰ ꓫꓵꓻˍ ꓟ ꓬꓲ ꓢꓽ ꓔꓯ ꓣꓳ ꓠꓯꓸꓼ ꓗꓪ ꓔꓯ, ꓓꓵꓽ ꓡ ꓠ, ꓟ” ꓓꓰꓽ ꓔꓬ ꓟ꓾ ꓔꓯ ꓐꓯ ꓗꓷꓳ꓿
ꓗꓪꓺ ꓒꓴ (ꓘꓴꓽ ꓦ) ꓟꓰꓻ ꓑꓮꓲꓽ ꓠꓽ‐ꓢꓽ‐ꓠꓬꓲ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓟꓽ ꓛꓲ ꓡ ꓢꓰꓽ ꓕꓯ ꓜꓽ ꓓꓴ ꓚꓲ. ꓢꓲ ꓪꓽ ꓘꓴˍ ꓟ ꓔꓯ ꓬꓰ ꓠ ꓔˍ ꓟ (40) ꓦꓬꓼ (40) ꓠꓬꓲ ꓙꓳˍ ꓟ ꓜꓽ ꓓꓴ ꓚꓲ. ꓦꓬꓼ ꓠꓬꓲ ꓬꓲ ꓪꓴ. ꓕꓲꓽ ꓠꓬꓲ ꓥ ꓡꓳ꓿
ꓕꓱ ꓕꓲ ꓙꓵ, ꓠꓬ “ꓘꓴ ꓜꓲꓼ ꓞꓳ ꓜꓴ ꓐꓱ ꓶ ꓢꓯꓼ ꓙꓳˍ ꓟ ꓬꓲ ꓦꓬꓼ ꓠꓬꓲ ꓥ ꓡꓳ”꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓔꓱ, ꓚꓵˍ ꓟ ꓜꓴꓻ ꓠꓲ, ꓟ ꓠꓬ ꓮ ꓘꓶ. ꓠꓲ. ꓡꓰ ꓔꓬ ꓥˍ ꓟꓲ꓾ ꓜꓽ ꓓꓴ ꓚꓲ.ˍ ꓟ ꓦꓬꓼ ꓠꓬꓲ ꓠꓬ “ꓚꓲ. ꓛꓬ ꓝꓴꓲ. ꓔꓯ ꓣꓷꓠ.ˍ ꓟ ꓔꓯ ꓢꓷ. ꓙ ꓟꓳ ꓙˍ ꓟ ꓘꓴ ꓜꓲꓼ ꓞꓳ” ꓕꓲ ꓟˍ ꓡꓰ ꓐꓰ ꓢꓲ ꓤ ꓐꓴ ꓔꓯ ꓜꓲꓼ ꓡꓳꓽ ꓖꓶˍ ꓟ꓾
ꓝꓴꓲ. ꓐꓴ ꓠꓬ “ꓣꓳꓽ ꓠꓲ, ꓟ ꓔꓯ ꓘꓶꓻ ꓙꓵ ꓢꓲ ꓣꓳ ꓠꓯꓸꓼ ꓗꓪ ꓔꓬ, ꓡˍ ꓟ ꓔꓯ” ꓔꓲꓺ ꓒ ꓪ ꓔꓲ. ꓡꓰꓳ ꓡꓰ ꓬꓲꓼ ꓠꓬꓲ. ꓖꓶ ꓗꓷꓳ꓿
ꓖꓳ ꓡꓱ ꓢꓲ ꓝꓴꓲ. ꓠꓬ ꓪ ꓜꓲ ꓪꓴꓽ ꓓꓰˍ ꓟ “ꓶꓻ ꓡꓯꓼ ꓚꓱ,꓾ ꓡꓲꓽ ꓒꓰꓼ ꓚꓱ,꓾ ꓗꓴꓷꓼ ꓙꓵꓽ ꓚꓱ, ꓐꓰ ꓙꓵꓻ ꓠꓲ, ꓚꓱ, ꓐꓴ ꓠꓯꓸꓼ ꓗꓪ ꓟ ꓜꓴꓻ ꓐꓴ” ꓘꓴꓽ ꓠꓯꓸꓼ ꓗꓪˍ ꓟꓲ ꓒꓬꓱꓼ ꓔꓬ ꓟ ꓥ ꓡꓳ꓿
ꓜꓽ ꓓꓴ ꓚꓲ.ˍ ꓟ ꓦꓬꓼ ꓠꓬꓲ (Lent) ꓐꓯˍ ꓟ ꓠꓬ ꓓꓵꓽ ꓙꓽ ꓡꓰꓼ ꓡˍ ꓟ ꓐꓰ ꓠꓲ, ꓟ ꓒꓳ, ꓡꓶ.ˍ ꓟ ꓗꓪ ꓐꓰ ꓕꓲꓽ ꓝ. ꓕꓱ ꓟ ꓮ ꓙꓵꓽ ꓗꓪ ꓐꓰ “ꓡꓲ, ꓓꓳ ꓙꓰ ꓑꓶ.ˍ ꓟ” ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ. ꓡꓰꓳ ꓡꓰ ꓖꓴ ꓟꓳ. ꓖꓶ ꓗꓷꓳ꓿
ꓜꓽ ꓓꓴ ꓚꓲ.ˍ ꓟ ꓦꓬꓼ ꓠꓬꓲ ꓗꓪ “ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ ꓔꓯ ꓟꓳ. ꓬꓲ. ꓬꓲ ꓢꓲ”
ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓟꓲ ꓠꓯ ꓚꓱ, ꓗꓪ ꓡꓰꓽ ꓢꓯꓼ ꓕꓵꓼ ꓔꓬ ꓟ ꓦꓬꓼ ꓠꓬꓲ ꓗꓪ ꓶꓼ ꓓꓳꓽ ꓫꓱ, ꓓꓳꓽ ꓕꓱ ꓟ ꓠꓬ ꓞꓳ ꓡꓱꓻ ꓞꓳ ꓡꓯ. ꓐꓴ ꓐꓱ ꓶ ꓠꓲ, ꓟ ꓗꓪ ꓚꓵ, ꓣꓴ ꓓꓴ ꓙꓳˍ ꓟ ꓔꓯ ꓔꓲꓺ ꓒ ꓪ ꓔꓲ. ꓡꓰ ꓐꓯˍ ꓡꓳ꓿
“ꓘꓴ ꓜꓲꓼ ꓞꓳ ꓐꓰ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓥꓳꓽ ꓔꓬ, ꓟ ꓔꓯ ꓫꓬ, ꓔꓱ, ꓠ ꓗ, ꓡꓳ” ꓐꓯˍ ꓟ ꓔꓯ ꓞꓳ ꓡꓱ ꓐꓴ ꓠꓬ ꓫꓬꓽ ꓫꓬꓽ ꓡꓰꓽ ꓢꓷ. ꓔꓬ ꓡꓳ ꓐꓰ ꓬꓲ ꓡꓰ ꓖꓴ ꓟ. ꓖꓶ ꓗꓷꓳ꓿
ꓖꓳ ꓟ ꓑꓶ. ꓓꓴ ꓙꓲ‐ꓢꓴ ꓢꓲ ꓤ ꓐꓴ ꓠꓬ ꓜꓽ ꓓꓴ ꓚꓲ.ˍ ꓟ ꓦꓬꓼ ꓠꓬꓲ ꓔꓯ ꓞꓳ ꓤ ꓔꓯ ꓛꓳꓻ ꓢꓲ ꓡꓰꓽ ꓦ ꓡꓱ ꓪꓽ ꓘꓴ ꓔꓬ ꓡꓳ꓾ ꓐꓰ ꓟꓳꓻˍ ꓟ ꓔꓯ ꓠꓽ ꓗꓷ ꓢꓲ “ꓚꓲ. ꓛꓬ ꓤꓶꓻ ꓔꓯ ꓬꓲ ꓫꓵꓼ ꓫꓬ, ꓔꓱ, ꓠ, ꓟ ꓔꓱ, ꓚꓵˍ ꓟ ꓚꓱ, ꓐꓴ” ꓔꓯ ꓧꓪ ꓔꓬ ꓟ “ꓙꓲꓻˍ ꓟ ꓠꓲ, ꓟ ꓙꓳ ꓢꓴ ꓐꓴ” ꓐꓴ ꓔꓬ ꓗꓪ ꓦꓬꓼ ꓠꓬꓲ ꓕꓱ ꓟ ꓔꓯ ꓐꓯ ꓟ. ꓖꓶ ꓐ ꓡˍ ꓟ ꓬꓲ ꓚꓱ, ꓐꓴ ꓔꓯ ꓧꓪ ꓠ ꓗ, ꓡꓳ꓾ ꓐꓰ ꓔꓲꓺ ꓒ ꓪ ꓔꓲ. ꓡꓰ ꓕꓵꓼ ꓪ ꓖꓶ ꓗꓷꓳ꓿
