ꓔꓱ, ꓟ ꓔꓱ, ꓜꓳ_ ꓟ ꓠꓬ ꓪꓴꓽ ꓓꓰ ꓡꓰ ꓟ ꓠꓵꓻ ꓠꓲ, ꓣꓱ ꓬꓯꓼ_ ꓡꓳ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓠꓽ ꓦꓬꓼ ꓠꓬꓲ ꓢꓲ ꓫꓬ ꓕꓳ ꓶ ꓟ‐ꓕꓲ ꓕꓳ ꓶ ꓗꓪ ꓐꓰ ꓔꓱ, ꓕ ꓢꓲ꓾ “ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓪꓴ‐ꓢ ꓗꓴꓷꓼ ꓠꓯꓼ ꓗꓪ ꓘꓴ ꓔꓬ ꓡꓳ꓾” ꓐꓰ ꓐꓯ ꓔ ꓡꓳ꓿ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓟꓳ‐ꓫꓲ ꓙꓵꓽ ꓗ ꓕꓳ ꓶ ꓚꓱ, ꓔꓯ ꓢꓷ. ꓡꓰ ꓝꓲ ꓢꓲ꓾ ꓖꓳ ꓙꓵꓽ ꓗ ꓕꓳ ꓶ ꓗꓪ ꓠꓬ ꓣꓳ ꓔꓯ ꓪꓴ‐ꓢ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓬꓲꓼ ꓠꓬꓲ ꓤ ꓐꓴ ꓔꓯ ꓫꓱ. ꓤ ꓠꓵꓻ ꓠꓲ, ꓙꓳ ꓠ, ꓟ ꓘꓴ ꓔ ꓡꓳ꓾ ꓐꓰ ꓐꓯ ꓔ ꓡꓳ꓿”ꓖꓳ ꓟ ꓑꓶ ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓥꓪ ꓠꓬ ꓙꓵꓽ ꓗ ꓔꓯ ꓐꓬ ꓡꓰ ꓝꓲ ꓐꓰ ꓡ_ ꓟ ꓟꓽ ꓥ꓾ ꓐꓲ ꓡꓰ ꓝꓲ ꓐꓰ ꓡ_ ꓟ ꓥ ꓡꓳ꓾ “ ꓐꓰ ꓐꓯ ꓔ ꓟ ꓥ ꓡꓳ꓿
ꓙꓵꓽ ꓗ ꓕꓳ ꓶ ꓠꓬ ꓫꓱ. ꓤ ꓠꓵꓻ ꓠꓲ, ꓗꓪ ꓐꓰ ꓐꓲ ꓜꓲꓼ ꓡꓰ ꓝꓲ_ ꓟ ꓥ ꓢꓲ꓾ ꓕꓱ ꓠꓵꓻ ꓠꓲ, ꓗꓪ ꓐꓰ ꓡꓰ ꓙꓵꓽ ꓗ ꓕꓳ ꓶ ꓔꓯ ꓬꓲ. ꓠꓯ. ꓟ ꓬꓲ ꓢꓷ. ꓡꓰ ꓓꓴ ꓐꓰ ꓔꓶꓻ ꓙꓱꓼ ꓔꓯ ꓐꓲ ꓜꓲꓼ ꓡꓰ ꓝꓲ ꓟ ꓬꓰ ꓖꓶ_ ꓟ ꓥ ꓡꓳ꓾
ꓔꓱ, ꓜꓳ ꓟ ꓠꓬ ꓙꓵꓽ ꓗ ꓕꓳ ꓶ ꓔꓯ ꓛꓳ_ ꓟ ꓡꓰ ꓟꓽ ꓞꓲ ꓣꓳ ꓔꓯ ꓠꓵꓻ ꓠꓲ, ꓠꓯꓼ ꓗꓪ ꓧꓳꓽ ꓪꓴ. ꓔꓴ ꓢꓲ ꓠꓵꓻ ꓠꓲ, ꓙꓳ ꓠ, ꓟ ꓢꓯꓼ ꓖꓶ ꓔ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ “ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓒꓬꓱꓼ ꓔꓬ ꓟ ꓔꓯ ꓟꓳ. ꓖꓶ_ ꓟ ꓙꓵꓽ ꓗ ꓕꓳ ꓶ ꓔꓯ ꓬꓲ ꓔꓯ ꓥꓳꓽ ꓟ. ꓖꓶ ꓢꓲ꓾ ꓮꓽ ꓟꓴ ꓕꓲ ꓕ ꓘꓴ ꓜꓲꓼ ꓞꓳ ꓔꓱ, ꓟ ꓐꓰ ꓪꓴ‐ꓢ ꓟꓴ ꓗꓪ ꓗꓴꓷꓼ ꓚꓱ, ꓔꓱ, ꓟ ꓠꓬꓲꓽ ꓗꓳ. ꓚ. ꓗꓪ ꓚꓬ, ꓟ ꓔꓯ ꓟ. ꓖꓶ ꓔ ꓡꓳ꓿ ꓟꓳ‐ꓫꓲ ꓐꓰ ꓟꓷꓽ ꓠꓷ, ꓝ. ꓢꓴ ꓐꓴ ꓔꓯ ꓡꓯꓼ ꓙꓱ ꓔ ꓟ ꓙꓵꓽ ꓗ ꓕꓳ ꓶ ꓠꓬ ꓪꓴ‐ꓢ ꓔꓯ ꓢꓷ. ꓠ, ꓟ ꓐꓰ ꓣꓳ ꓠꓯꓼ ꓗꓪ ꓔꓬ ꓟ ꓪꓴ‐ꓢ ꓠꓲ, ꓡꓶꓽ ꓔꓯ ꓢꓷ. ꓠ, ꓟ ꓐꓱ ꓶ ꓙ ꓖꓴ ꓟꓳ. ꓖꓶ ꓔꓬ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓔ ꓡꓳ꓿
ꓪꓴ‐ꓢ ꓬꓲ ꓚꓲ. ꓛꓬ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓬꓯꓼ ꓡ ꓢꓲ ꓙꓵꓽ ꓗ ꓕꓳ ꓶ ꓔꓯ ꓐꓲ ꓜꓲꓼ ꓡꓰ ꓝꓲ_ ꓟ ꓥ ꓡꓳ꓾ ꓣꓳ ꓔꓯ ꓪꓴ‐ꓢ ꓬꓲ ꓤ ꓠꓱ ꓤ ꓐꓰ ꓒꓬꓱꓼ ꓡꓰ ꓝꓲ_ ꓟ ꓡꓰ ꓐꓰ ꓪꓴ‐ꓢ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓔꓯ ꓥ ꓟꓲ ꓬꓲꓼ ꓠꓬꓲ ꓤ ꓠꓵꓻ ꓠꓲ, ꓐꓰ ꓙꓻ ꓡꓯ ꓘꓳ ꓠ, ꓟ ꓣꓱ ꓛꓰ ꓔꓯ ꓖꓶ ꓔ ꓡꓳ꓿ ꓔꓱ, ꓟ ꓔꓱ, ꓜꓳ ꓟ ꓠꓬ ꓠꓵꓻ ꓠꓲ, ꓡꓰ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓟ. ꓖꓶ ꓗꓷ ꓢꓲ꓾ ꓙꓵꓽ ꓗ ꓕꓳ ꓶ ꓬꓲ. ꓠꓯ. ꓟ ꓗꓪ ꓠꓵꓻ ꓠꓲ, ꓙꓳ ꓠ, ꓟ ꓘꓴ ꓔ ꓟ ꓔꓯ ꓢꓷ. ꓠ, ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓔꓱ, ꓟ ꓠꓬ ꓮ ꓠꓶ. ꓡꓰ ꓙꓳ_ ꓟ ꓡꓰ ꓟꓽ ꓡꓳꓼ ꓪꓴꓽ ꓓꓰ ꓡꓰ ꓟ ꓠꓵꓻ ꓠꓲ, ꓣꓱ ꓬꓯꓼ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓔꓯ ꓥꓳꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓕꓱ ꓡꓱ ꓠꓵꓻ ꓠꓲ, ꓠꓬ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓡꓰ ꓪ ꓓ_ ꓟ ꓥ ꓡꓳ꓾ ꓔ꓾ꓧ ꓑ ꓪ ꓔꓲ ꓡꓰ ꓟ, ꓟ ꓟ‐ꓡꓲ ꓗꓪ ꓐꓰ ꓣꓳ ꓐꓱ ꓶ ꓪꓽ ꓘꓴ ꓶꓽ ꓓꓰꓽ ꓙ ꓖꓶ ꓠ, ꓟ ꓐꓰ ꓪꓴ‐ꓢ ꓟꓴ ꓗꓪ ꓗꓴꓷꓼ ꓚꓱ, ꓔꓯ ꓟꓬ ꓠꓬꓲ ꓢꓷ. ꓡꓰ ꓢꓲ꓾ ꓔꓱ, ꓟ ꓚꓱ, ꓗꓪ ꓐꓰ ꓢꓯ. ꓔꓬ ꓛꓳ ꓫꓱꓽ ꓐ ꓡ ꓠ, ꓟ ꓬꓰ ꓙ ꓖꓶ ꓠ, ꓟ ꓪꓽ ꓘꓴ ꓖꓶ_ ꓟ ꓥꓳ꓿
